Afundi Anotambira Mwiya Mucena

Mumasure me mazuwa gumi mekuti Djesu ahwirira kudenga, afundi ake anotambira mwiya mucena. Gore ra 33 K.A., anhu akawanda akaenda ku Djerusarema ku mutambo we mabiko waidainzwa kuti Pentekosti. Zuwa re Pentekosti afundi a Djesu anokwana kuita 120, ainga akaungana mumba. Asikakariri pakaitika ciro cinoshamisa, pakaitika barurhya re dutu rakakura rakadzadza nyumba yese. Pedzepo, pa musoro pe mufundi umwe na umwe painga pano ciro cakaita hingana muriro uye ese akatanga kureketa mireketero yakasiyana-siyana.

Avhakaci ainga ari ku Djerusarema akazwa barurhya re dutu uye akaungana kuti arekete nge zvazvo. Awona akashamiswa maningi paakazwa afundi ecireketa mureketero wawo. Uye akati: ‘Dzinza iri nge re ku Garireya. Ari kukwanisa kudini kureketa mureketero wedu?’

Pedru no aphostori amweni akaenda kune cikwata ce anhu. Hino, Pedru wakapanganidzira anhu kuti Djesu ainga afa uye kuti Djehovha ainga amutsa kudini Djesu. Uyewo Pedru wakati: ‘Zvino Djesu ari kudenga padii ra Mwari uye ari kutipasa mwiya mucena waakatigondesa. Ndiyo ndaa, imwimwi murikuona zvishamiso zviri kuitika.’

Zvakabhuya Pedru zvakasiya anhu akapfara maningi, nge ndaa yazvo awona akamubvunzisa kuti aidikana kuitei. Pedru wakadaira kuti: ‘Cinyukai pa zviro zvese zvakashata zvamakaita uye bhabhatidzwai mu zina ra Djesu uye mucatambira mwiya mucena.’ Pa zuwa irona kamare, anhu anokwana kuita 3000 akabhabhatidzwa. Kubvira ipona kwenda mberi, kuwanda ke afundi ku Djerusarema kainga kecikura nokukasika. No rubetso re mwiya mucena, anhu mu ungano akarumbwa eciwanda uye aphostori aifundisa anhu zvese zvaainga atumwa na Djesu.