Zvakaoneswa Juau

Muphostori Juau wainga akasungwa ku citsuwa cinozwi Patimosi. Paainga ari ikona, iyena wakaona zviono 16 zvezviro zvaizoitika mune ramangwana. Pa zviono izvona, Djesu akapangidza Juau kuti zina ra Djehovha raizoceneswa kudini, Umambo wa Mwari waizouya, uye kuda ka Mwari kaizoizwa kudini pa nyika hingana zvakunoizwa kudenga.

Pa ciono cimweni, Juau unoona cigaro cinokosha ca Djehovha kudenga, pa cigaro icona, panobuda mheni no kucetuka ke mheni. Pamuceto pe cigaro icona, Juau unoona akuru anokwana kuita 24. Awona ainga akapfeka macira e kucena, uye ainga ano korowa ye oro. Akuru awona 24 anogodama uye anonamata Djehovha. Pa ciono cimweni, Juau unoona cikwata ce anhu akawanda ari pa nyika ecinamata Djehovha. Pedzepo, Bira rinotora anhu aya roaendesa ku manyuku e mvura ye upenyu. Bira irona ndi Djesu. Pa ciono cimweni, Djesu anotanga kutonga pamwepo no akuru 24. Pa ciono cinoteera, Juau unoona Djesu ecirhwisana no nyoka huru, kureya Sathani no madhimoni ake. Djesu anodzingira nyoka huru no madhimoni kudenga uye anoenda koorarama pa nyika.

Mumasure mazvo, Juau unoona ciono cakarungama maningi. Iyena unoona Bira uye anhu 144 000 akaima pa Dunhu re Ziyoni. Juau unoonawo ngirozi yecimburuka mu nyika yese. Ngirozi iyona inobvunza anhu kuti: Namatai Mwari uye Mupasei rukudzo.

Pa ciono cimweni, Juau unoona hondo ye Amagedhoni. Pa hondo iyona, Djesu ne anyahondo anorhwisana no nyika yakashata ya Sathani uye anowina. Pedzepo pa ciono cekupedzesera, Juau unoona runyararo uye rubatano kudenga no pa nyika. Sathani uye no ese ari ku dii rake acatsakatiswa. Anhu ese kudenga no pa nyika anocenesa zina ra Djehovha uye anonamata iyena basi.