Tsamba Inobva ku Dare Rinotungamirira

Hama no Hanzvadzi Dzinodiwa:

Tese isusu ekuti tinonamata Djehovha tinoda Bhaibheri. Tino rugondo rekuti ngano dzatinogumira mu Soko ra Mwari ngedze cokwadi uye mazano adzo akathembeka uye anopangidza rudo rakakura rina Djehovha katiri. (Pisarema 119:105; Ruka 1:3; 1 Juau 4:19) Isusu tinoda maningi kubetsera anhu ese kuti aziye zvokwadi zvinokosha zviri mu Bhaibheri. Ndiyo ndaa, tinopfara maningi ngo kumugadzirirai bhuku iri rino musoro unoti: “Fundai no Ngano Dziri mu Bhaibheri.” Ticamupanganidzirai padoko ngezve bhuku iri.

Bhuku iri rakagadzirirhwa maka-maka pecirangarirhwa ngezve ana adoko. Asi irona ringakwanisawo kubetsera anhu akura ekuti anoda kuziya zvakawanda ngezve Bhaibheri. Uyewo ringakwanisawo kubetsera isusu ekuti taano makore akawanda teciseenzera Djehovha. Zvicapfadza maningi kuedzurira ngezve ngano dzaticaona mu bhuku rino. Kubhuya zvazviri, Bhaibheri i bhuku rinobetsera anhu ese uye fundo dziri imona dzinokwanisa kutibetsera kuti tipfare.

Peciseenzeswa Bhaibheri, bhuku iri rinopanganidza ngezve anhu kubvira paakasikwa. Irona rinopanganidza ngezve ngano dze Bhaibheri nge mushobo wakadjeka uye uri nyore. Pese pazvinobvira, irona rinopanganidza izvona nge mushobo wazvakaitika kamare.

Bhuku iri rinoita zvakawanda pane kupanganidza ngano dze Bhaibheri basi. Tsamba uye mifanikiso dziri imona dzakagadzirirhwa kuitira kuti muerengi azwe hingana kuti wainga ari ipona kamare uyewo kuti agare no mazwiro akazwa anhu anorekethwa mu ngano iyona.

Bhuku iri rinopangidza kuti Bhaibheri i bhuku rinoreketa ngezve anhu; anhu akazwira Djehovha no anhu asikazi kumuzwira. Irona ricatibetsera kuona kuti tingafundei kubva pa anhu awona. (Aroma 15:4; 1 Akorinti 10:6) Bhuku iri rino matii anokwana kuita 14. Pakutanga ke dii rimwe na rimwe, pano cigwagwa cinopangidza zviro zvinganani zvaticafunda.

Kana imwimwi muri baba kana mai, erengai ngano dziri mu bhuku iri no mwana wenyu uye cedzai ngezve mifanikiso dziri imona. Mumasure mazvo, mungakwanisa kuerenga mwese matsamba e Bhaibheri ari pakupedzesera ke ngano imwe na imwe ye bhuku rino. Betserai mwana wenyu kuzwisisa kuti tsamba idzona dzinobatana kudini no ngano dziri mu bhuku iri. Imwimwi mungaitawo zvimwezvo pamunonga mecibetsera munhu wakura kuti azwisise Bhaibheri.

Tinoetsera kuti bhuku iri ribetsere anhu ese, ana adoko, kutobatanidzawo anhu akuru kuti afunde ngezve Soko ra Mwari. Uya unoseenzesa zvinobhuiwa no Bhaibheri ucakwanisa kunamata Djehovha uye kuita dii re anhu aanoda maningi.