Uphorofiti Wekare Unokosha Kamuri

1. Djehovha akaitei mumasure mekuti Adhamu na Evha aita citema? (Genesi 3:15)

MUMASURE mekuti Adhamu na Evha ashaisha, Djehovha akabhuya kuti waizopasa kariro ku mubarirhwana wa Adhamu. Masoko awona ari pana Genesi 3:15.—Erengai.

2. Ngei uphorofiti uri mu bhuku ra Genesi wecikosha katiri?

² Uphorofiti uu uri mu bhuku rokutanga re Bhaibheri. Asi mabhuku amweni, anobatanidzwawo mu uphorofiti uu nge mishobo imweni. Kuita hingana zviphini zvinobatanidza maphepha akawanda, masoko ari pana Genesi 3:15 anobatana no mabhuku ese e Bhaibheri. Zvese zvecibva mu tsamba imwe basi, zvokuti Mwari aizotuma munhu kuti aponese anhu uye atsakatise Sathani ne ateeri ake.b Aya acanga ari makomborero makuru ku anhu anoda Djehovha!

3. Ticaonei mu fundo ino?

³ Mu fundo ino, ticadaira mibvunzo dzinoteera nge zve uphorofiti uri pana Genesi 3:15: Ndianaani anhu anorekethwa pa uphorofiti iwona? Uphorofiti iwona uri kudzadzika kudini? Uye umwe na umwe wedu unobatanidzwa kudini pa uphorofiti iwona?

NDIANAANI ANOREKETHWA MU UPHOROFITI?

4. Kodi “nyoka” ndiani uye isusu tinozviziya kudini?

⁴ Anhu anorekethwa pana Genesi 3:14, 15 anobatanidzwa “nyoka,” “mubarirhwana” we nyoka, “mwanakadzi,” uye “mubarirhwana” we mwanakadzi. Bhaibheri rinotibetsera kuziya umwe na umwe wawo.c Ngatitange kuona nge zve nyoka. Mu munda we Edheni, Djehovha ainga asikareketi ne nyoka kamare, ngekuti iyona yainga isikazozvizwisisi. Djehovha ainga ecireketa ne cisikwa cino ungwaru. Asi cisikwa cipi icona? Mhinduro yakadjeka tinoigumira pana Zvakapangidzwa 12:9. Apona panoreketa nge zve “nyoka ye pakutanga” kuti ndi Sathani Diyabhurosi. Asi mubarirhwana we nyoka ndiani?

5. Mubarirhwana we nyoka ndiani?

⁵ Pamweni paya Bhaibheri rinoreketa nge zve mubarirhwana recibhuya nge zve munhu unonyasa kuteedzera munhu umweni zvopedzesera zvazwi wakaita hingana mwana wake kamare. Hino mubarirhwana we nyoka i ngirozi dzisikazi kugondeka, anhu anoteedzera Sathani, anhu anozonda Djehovha pamwepo ne aya anozondawo anhu a Mwari. Nge muezaniso, pano ngirozi dzakapanduka mu nguwa ya Nowa uye anhu ano muraramiro wakaita hingana wa baba awo Dhiyaburosi.—Gen. 6:1, 2; Juau 8:44; 1 Juau 5:19; Djud. 6.

6. Ngei tecireketa kuti mwanakadzi unorekethwa pa uphorofiti andi Evhapi?

⁶ Zvino ngatione kuti mwanakadzi ndiani. Mwanakadzi uu aangaiti Evha. Ngei? Ngatione cikonzero cimwe basi. Uphorofiti unoreketa kuti mubarirhwana “waizodzengenyesa” musoro we nyoka. Hingana zvataona nyoka ndi Sathani Dhiyaburosi cisikwa ce ku mwiya. Hino kudai mwanakadzi ari Evha, zvaizonetsa kuti mubarirhwana wake akwanise kudzengenyesa Sathani Dhiyaburosi. Hino Sathani waizoparadzwa kudini?

7. Maererano na Zvakapangidzwa 12:1, 2, 5, 10, ndiyani mwanakadzi unorekethwa pana Genesi 3:15?

⁷ Bhuku rokupedzesera re Bhaibheri rinoreketa kuti ndiyani mwanakadzi we mu uphorofiti uri pana Genesi 3:15. (Erengai Zvakapangidzwa 12:1, 2, 5, 10.) Mwanakadzi uu amunhupi! Iyena uno mwedzi pasi pe tsoka dzake uye uno korona 12 mu musoro. Iyena unobara mwana wakasiyana maningi: Umambo wa Mwari. Nge kuti Umambo uri kudenga, mwanakadziwo nge we kudengawo. Mwanakadziwo unoimirira dii rokudenga re sangano ra Djehovha rinoumbwa nge ngirozi dzakagondeka.—Aga. 4:26.

8. Ndiani dii rinonyanya kukosha re mubarirhwana we mwanakadzi, uye izvona zvakaitika rini? (Genesi 22:15-18)

⁸ Bhaibheri rinotibetsera kuzwisisa kuti Djesu i dii rinokosha maningi re mubarirhwana we mwanakadzi. Bhaibheri rinobhuya kuti mubarirhwana uu waidikana kubuda mu mubarirhwana wa Abrahamu. (Erengai Genesi 22:15-18.) Djesu ainga ari mwana we mubarirhwana uu wakagondeka. (Ruka 3:23, 34) Asi mubarirhwana we mwanakadzi waidikana kugara ne simba rakakura kudarika anhu kuti akwanise kudzengenyesa Sathani. Ndiyo ndaa paainga no makore 30, Djesu akadzodzwa ne mwiya mucena, pa nguwa iyona iyena wakagara dii rinokosha re mubarirhwana we mwanakadzi. (Aga. 3:16) Mumasure mekumutswa ka Djesu, Mwari “akamupfekedza korona ye rukudzo” uye “mbiri . . . ari kudenga wakapaswa masimba ese kudenga ne panyika, uye ayena acatsakatisa mabasa a Dhiyabhorosi.”—Aheb. 2:7; Mat. 28:18; 1 Juau 3:8.

9-10. (a) Ndianizve unobatanidzwa pa mubarirhwana we mwanakadzi, uye awona akagara rini dii romubarirhwana? (b) Ticaonei kubvira zvino?

⁹ Asi kusiya Djesu, pano amweni anobatanidzwa pa mubarirhwana we mwanakadzi uu. Mupostori Pauro wakapanganidza kuti Akristu ese akadzodzwa, aizonga ari mubarirhwana we mwanakadzi, iyena wakati: “Kana imwimwi muri a Djesu Kristu, zvezvirokwazvo ndimwi mubarirhwana wa Abrahamu, akagara nhaka maererano ne cipikirhwa.” (Aga. 3:28, 29) Mukristu paanodzodzwa ne mwiya mucena unogara mubarirhwana we mwanakadzi. Mubarirhwana we mwanakadzi unoumbwa na Djesu uye ne 144 000 acatonga naye kudenga. (Zvak. 14:1) Ese anobatanidzwa pa mubarirhwana uu anopeta masimba kuti arangarire uye aite zviro eciteedzera Baba awo Djehovha.

¹⁰ Ngekuti taakuziya kuti ndiani anorekethwa mu uphorofiti uri pana Genesi 3:15, ngaticione kuti Djehovha padoko ne padoko arikudzadzisa kudini uphorofiti uu uye iwona urikutibetsera kudini nyamasi uno.

UPHOROFITI UU URI KUDZADZIKA KUDINI?

11. Mubarirhwana we mwanakadzi wakakuwadzwa pa cisisino nge gwanza ripi?

¹¹ Maererano ne uphorofiti uri pana Genesi 3:15, nyoka yaizokuwadza “cisisino” ce mubarirhwana we mwanakadzi. Uye dii iri re uphorofiti rakadzadzika Sathani paakapfuridzira Adjudha ne Aroma kuti auraye Mwana wa Mwari. (Ruka 23:13, 20-24) Kana munhu akakuwadzika pa cisisino unogara mazuwa mangani asikakwanisi kuita zviro zvaiita kare, nge mushobo umwewo Djesu paakafa wakagara mazuwa matatu, pa nguwa iyona iyena wainga asikakwanisi kuita ciro.—Mat. 16:21.

12. Musoro we nyoka ucadzengenyeswa rini?

¹² Asi kuti uphorofiti uri pana Genesi 3:15 udzadzike, Djesu wainga asikadikani kurumbwa akafa. Ngei? Ngekuti maererano ne uphorofiti mubarirhwana we mwanakadzi waizodzengenyesa musoro we nyoka. Izvi zviri kuda kureya kuti kukuwadzika kakaita Djesu pa cisisino kaidikana kupora. Uye ndizvona kamare zvakaitika! Mumasure memazuwa matatu ayena akamutswa kuti ararame kudenga ari cisikwa cisikazombofi. Pa nguwa yakasisira ya Djehovha, Djesu acadzengenyesa nyoka. (Aheb. 2:14) Djesu ne akadzodzwa acatsakatisa nokusikaperi azondi a Mwari—mubarirhwana we nyoka.—Zvak. 17:14; 20:4, 10.d

UPHOROFITI UWONA URIKUTIBETSERA KUDINI?

13. Uphorofiti uu urikutibetsera kudini?

¹³ Kana muri museenzi wakadzipira kuna Djehovha, uphorofiti uu uri kumubetserai. Djesu paakauya pa nyika pano se munhu, wakateedzera nge mushobo wakakwana unhu wa Baba ake. (Juau 14:9) Ndiyo ndaa, patinorumbwa tecifunda nge zva Djesu tinorumbwa tecida uye teciziya Djehovha Mwari. Kusiya izvona, fundiso uye mushobo waanotungamirira ungano dziri pasi pano unotibetsera pacedu kamare. Djesu anotifundisa kurarama nge mushobo unopfadza Djehovha. Rufu ra Djesu rinoimirirhwa ne kukuwadzika pa cisisino, kakaita kuti tese tibetsereke. Nge gwanza ripi? Djesu paakafa, akapa ngazi yake hingana cibairo cakakwana “cinoticenesa pa zvitema zvese.”—1 Juau 1:7.

14. Tinoziya kudini kuti uphorofiti wakarekethwa na Djehovha mu munda we Edheni wainga usikazodzadziki pa nguwa iyona?

¹⁴ Uphorofiti wakarekethwa na Djehovha mu munda we Edheni unopangidza kuti wainga usikazodzadziki pa nguwa iyona. Uphorofiti waipangidza kuti mwanakadzi waizogara ne mubarirhwana, uye Dhiyaburosi waizounganidza ateeri ake uye paizogara ne kuzondana kakakura pakati pe magrupu mairi aya. Kuti zvese izvi zviitike zvaizotora nguwa. Kuzwisisa zvinobatanidzwa pa uphorofiti uu kunoita kuti tizie kuti taizozondwa na Sathani uye ne nyika yake. (Mark. 13:13; Juau 17:14) Zvezvirokwazvo tiri kuona zviro izvi zveciitika, maka-maka pa makore 100 adarika. Asi ngei tecireketa kudaro?

15. Ngei isusu tecinyanya kuzondwa nge nyika ya Sathani?

¹⁵ Mumusure mekuti Djesu agadzwa kuita Mambo we Umambo wa Mwari muna 1914, Sathani wakadzingirhwa kudenga. Kubvira apona iyena uri pasi pano ecietsera zuwa rokutsakatiswa. (Zvak. 12:9, 12) Asi iyena aaripi kuimira kutsakatiswa kake akasenga nyara. Sathani wakanyangadzwa uye wapererhwa ne mazano, ndiyo ndaa ecitsungurira shungu dzake dzese ku anhu a Mwari. (Zvak. 12:13, 17) Ndiyo ndaa, uzondi we nyika ku anhu a Mwari unorumbwa wecitunhudzirika. Isusu atina cikonzero cekutya Sathani ne ateeri ake. Isusu tinorugondo rimwero rainga na Pauro paakati: “Kana Mwari ari ku dii redu, ndiani angatirhwisa?” (Aro. 8:31) Isusu tinonyasa kugonda Djehovha ngekuti ayena arikudzadzisa zvese zvinobatanidzwa pa uphorofiti uri pana Genesi 3:15.

16-18. Uphorofiti uri pana Genesi 3:15 urikubetsera kudini hama Curtis, hanzvadzi Ursula, na Jessica?

¹⁶ Uphorofiti uri pana Genesi 3:15 unotibetsera patinosongana ne zvinetso mu upenyu. Hama imweni inozwi Curtis, iri kuseenza hinga misiyonariyo ku Guam, inoti: “Mu upenyu wangu ndakarhwisana ne zvinetso uye ndakambotsukwariswa zvokuti zvakaedza kugondeka kangu kuna Djehovha. Asi kunyasa kurangarira nge zve uphorofiti uri pana Genesi 3:15 kunondibetsera kuti ndirumbwe ndecigonda Mwari wangu.” Hama Curtis anoetsera ne mwoyo wese nguwa yekuti Djehovha acapedza matambudziko edu ese.

¹⁷ Hanzvadzi imweni inozwi Ursula ye ku Baviera inoti kuzwisisa uphorofiti uri pana Genesi 3:15, ndi cimwe ce zviro cakaibetsera kugara ne rugondo rokuti Bhaibheri rakafemerhwa na Mwari. Iyona yakaona kuti uphorofiti imweni iri mu Bhaibheri inobatana ne uphorofiti uu, izvi zvakaibambisa maningi. Iyona yakatizve: “Ndakashamisika nge kuona kuti Djehovha akaita ciito cekuti anhu asagare asina kariro.”

¹⁸ Hanzvadzi imweni inozwi Jessica, inogara ku Micronésia, yakati: “Ndiciri kuedzurira mushobo wandakazwa pandakaona kuti ndainga ndagumira cokwadi! Uphorofiti uri pana Genesi 3:15 waidzadzika. Kuzia izvi kakandibetsera kuona kuti atisati taano upenyu we zvirokwazvo. Uphorofiti uu uri kubambisa rugondo rangu rokuti kuseenzera Djehovha ndiwo mararamiro akanaka mazuwa ano, uye zvinotipasa kariro yekurarama mu nyika yakanaka muna ramangwana.”

19. Ngei tecigara ne rugondo rokuti dii rokupedzesera re uphorofiti uri pana Genesi 3:15 ricadzadzika?

¹⁹ Hingana zvataona uphorofiti uri pana Genesi 3:15 ucirikudzadzika mazuwa ano. Uye isusu taakunyasa kuziya kuti ndiani mubarirhwana we mwanakadzi uye mubarirhwana we nyoka. Djesu dii rinonyanya kukosha mu mubarirhwana we mwanakadzi, wakapora pa kukuwadzika kake pa cisisino uye zvino ndi Mambo ano simba asikazombofi. Djehovha ari kusanangura aya acazotonga na Djesu kudenga. Ngekuti dii rokutanga re uphorofiti rakadzadzika, tino rugondo rokuti dii rimweni rokupedzesera re uphorofiti ricadzadzikawo. Zvezvirokwazvo musoro we nyoka ucadzengenyeswa! Uye izvona zvicaita kuti aseenzi a Mwari pasi pano azwe kurerukirhwa pacaparadzwa Sathani. Uye kunyazi zuwa irona risati raguma musarembe. Gondai kuti Djehovha acaseenzesa mubarirhwana we mwanakadzi kuti aunzise makomborero akawanda ku “madzinza ese e panyika.”—Gen. 22:18.