Garai ne Mupfaro pa Kutambudzika

1. Cinyi cinozwi “runyararo ra Mwari,” uye cinyi cinoitika kana isusu tino runyararo irona? (Afiripi 4:6, 7)

PANO runyararo rimweni rekuti anhu e mu nyika aasati akambogara naro. Irona i “runyararo ra Mwari.” Runyararo iri ngerekuzwa kuterama ngecemukati, uye rinooneka basi no aya ano ushamwari we padhuze na Djehovha. Kana tino runyararo rinobva kuna Mwari, isusu tinozwa takacengeteka. (Erengai Afiripi 4:6, 7.) Uye tingakwanisawo kugara no ushamwari we padhuze no anhu amweni anodawo Djehovha, uye ciro cakanakisisa kupinda zvese izvi, tinogara shamwari ya “Mwari we runyararo.” (1  Ate. 5:23) Kana tikaziya Djehovha, tomupurutana uye togonda naye, runyararo rinobva kuna Mwari ricanyaradza mwoyo wedu patinobatana no matambudziko anoshupha.

2. Tinozviziya kudini kuti zvinoita kugara no runyararo ra Mwari?

² Zvinoitadi kamare kugara no runyararo ra Mwari patinosongana no matambudziko mu upenyu akaita hingana matenda, tsawana, kurhwisana ke nyika uye kuteererhwa? Patinosongana no rimwe re matambudziko aya isusu tingathya maningi. Kunyazi zvakadaro, tinodikana kuedzurira zano rakapasa Djesu ateeri ake rinoti: “Musasiye mwoyo yenyu yecinetseka kana kuti yecithya.” (Juau 14:27) Hama no hanzvadzi dzedu dzakawanda dzakateerera zano iri ra Djesu, uye no rubetso ra Djehovha awona akakwanisa kugara no runyararo kunyazi ecisongana no zvinetso zvakakura.

TINGAGARA KUDINI NO RUNYARARO PATINOSONGANA NO MATAMBUDZIKO E MATENDA

3. Nhenda dzakakura dzinopaswana dzingatibata-bata kudini?

³ Nhenda dzakakura dzinopaswana dzingakwanisa kubara zvitsinzwa mu upenyu wedu. Ngo muezaniso nhenda ye COVID-19 yakabara zvitsinzwa zvakawanda mu upenyu we anhu. Kwarakwatiso imweni yakapangidza kuti anhu akawanda akaitrevhistarhwi akabhuya kuti ainga ano dambudziko rekusama kuwata nge ndaa ye nhenda ii. Nhenda ii yakaunzisa migumisiro yakashata yakaita hingana kudzirhya mwoyo, dhepresau, kuseenzesa mitombo inoraradzisa, kumwisa doro, kuita bvinga uye kuedza kudzitsungira. Kana kamunogara keciitika nhenda, mungaitei kuti musadzirhye mwoyo uye mugare no runyara ra Mwari?

4. Ngei kuziya uphorofiti wa Djesu we mazuwa ekupedzesera kunotiunzisira runyararo?

⁴ Djesu akati mu mazuwa ekupedzesera kaizooneka nhenda dzakakura dzinothyisa mu “mbuto dzakasiyana-siyana.” (Ruka 21:11) Kuziya izvi kungatibetsera kudini kuti tigare no runyararo? Kungaita kuti tisashamisike nhenda idzi dzakakura padzinoitika. Tinoziya kuti zviro zvirikuitika kamare nge mushobo uya wakabhuiwa na Djesu. Ndiyo ndaa tinoona kukosha kekuteerera mazano a Djesu aakabvunza aya acararama mu mazuwa ekupedzesera e kuti: “Musapatike ndizvo.”—Mat. 24:6.

5. (a) Maererano na Afiripi 4:8, 9, tinodikana kunamata nge zvei patinonga tecisongana no nhenda dzinothyisa? (b) Kupurutana ma audhiyo e kuerengwa ke Bhaibheri kungamubetsera kudini?

⁵ Kana pakamuka nhenda yakakura inopaswana, isusu tinganetseka maningi uye tingatothya. Ndizvona kamare zvakaitika no hanzvadzi imweni inozwi Desi.b Mumasure mekuti tsekuru ake, hama yake kutobatanidzawo na medhiko afa nge nhenda ye COVID-19, iyena waithya maningi kubata nhenda iyona uye waitothyirawo kupasa mai ake ainga acembera. Nge ndaa ye nhenda ii, iyena wakanetseka maningi ecithyira kuruza basa rake uye otama kukwanisa kuriritira mhuri yake pamwepo nokuripa nyumba yaaigara. Iyena wakanetseka maningi nge zvazvo zvekutoti waikonerhwa kuwata. Asi Desi wakagarazve no runyararo. Iyena wakaita munamato kuna Djehovha ecikumbira kuti agare no marangariro akanaka uye aterame. (Erengai Afiripi 4:8, 9.) Iyena waizwa Djehovha “ecireketa” naye paaipurutana ma audhiyo ekuerengwa ke Bhaibheri. Iyena wakati: “Izwi rakaterama re aerengi raindinyaradza uye raindiedzurira kuti Djehovha anondida maningi.”— Pis. 94:19.

6. Kuita fundo ye munhu ega uye kupinda misangano kungamubetsera kudini?

⁶ Nhenda dzinothyisa dzingabata-bata urongwa wedu wekunamata. Asi atidi kusiya kuti izvona zvipingaidze fundo yedu ye munhu ega, uye kupinda misangano. Maeshiperiyesiya atinogumira mu mabhuku uye mu mavhidhiyo e sangano anopangidza kuti hama no hanzvadzi dzedu dzirikukwanisa kurumbwa dzakagondeka kunyazi dzecibatana no zvinetso. (1  Ped. 5:9) Kusiya izvona, kupinda misangano kungamubetsera kudzadza ndangariro dzenyu no marangariro akanaka e Bhaibheri. Uye mu nguwa dzakadai, isusu tino mukana wekubambisa uye wekubambiswawo. (Aro. 1:11, 12) Kana mukanyasa kurangarira mushobo unobetsera Djehovha aseenzi ake paanosongana no matenda, kuthya uye kutsukwara, kutenda kenyu kucanyasa kubamba uye mucagarawo no rugondo rekuti Djehovha acamubetseraiwo.

7. Tinofundei kubva pa muezaniso wa muphostori Juau?

⁷ Rumbwai mecicedza no hama uye hanzvadzi dze mu ungano. Nge ndaa ye nhenda inopaswana, pamweni zvingashupha kuti tigare pamwepo no hama dzedu. Mu nguwa dzakadai, tingakwanisa kuzwa hinga zvakaitika no muphostori Juau. Iyena waida maningi kuonana hope no hope no shamwari yake Gaiyo. (3  Juau  13, 14) Asi Juau waizviziya kuti zvainga zvisikaiti pa nguwa iyona. Iyena wakarumbwa ecicedza naye nge mushobo waaikwanisa, wekutarira tsamba Gaiyo. Kana zvisikaiti kuvhakacira hama no hanzvadzi dze mu ungano, edzai kucedza nawo meciseenzesa thurufunu, vhidhiyo-shamadha uye mesaji. Kana tikarumbwa tecicedza no hama dzatinonamata nadzo, tinogara no runyararo uye atizwi hinga tiri tega. Kana murikudzirhya mwoyo, psvakai rubetso re akuru uye tendai rubetso re rudo raanomupasa.—Isa. 32:1, 2.

TINGAGARA KUDINI NO RUNYARARO PATINOBATANA NO TSAWANA DZINOITIKA DZOGA

8. Tsawana dzinoitika dzoga dzingatibata-bata kudini?

⁸ Kana imwimwi makambosongana no tsawana dzinoitika dzoga dzakadai hingana kudzarisa ke mvura, cigidhi-gidhi uye rupsva, pamweni makatsukwara ke nguwa yakareba maningi. Uye kana munhu wamaida wakafa pa tsawana idzi kana kuti makaruza zviro zvamainga munazvo, pamweni makapera simba, musina kariro uye no shungu. Kana mukazwa kudaro, azvirei kuti muri munhu unoda zvakawanda zvekurarama nazvo, kana kuti muno kutenda kudoko. Imwimwi mabatana no mugariro wakashata uye zvakadjairika kugara no marangariro asikazi kunaka. (Djobo 1:11) Asi kunyazi no mugariro wakashata wakaita hingana uwona, imwimwi mungakwanisa kugara no runyararo.

9. Masoko api a Djesu angatibetsera kugadzirira tsawana dzinoitika dzoga?

⁹ Edzurirai kuti Djesu akabhuya kuti mugumo usati wauya, kaizooneka “zvigidhi-gidhi zvakakura” uye tsawana dzinoitika dzoga. (Ruka 21:11) Ndiyo ndaa kusiyana no anhu e nyika, awo anorangarira kuti aazosongani no tsawana dzinoitika dzoga, isusu tinoziya kuti dzicaitika uye dzimweni dzakhona dzingatokwanisawo kutibata-bata. Djesu akaphorofitawo kuti “kuwanda kekusama kupurutana mutemo kaizotunhudzirika.” Uye izvi zvirikubuda pamhene patinoona kuwanda ke ndaa, kupondana uye ubhinya. (Mat. 24:12) Djesu aazi kumbobhuya kuti zviro izvi zvaizoitika basi ku aya asikaseenzeri Djehovha. Kubhuya zvazviri, asenzi a Djehovha akawanda akatobatanawo no tsawana dzinoitika dzoga. (Isa. 57:1; 2Ako. 11:25) Pamweni zvingaita kuti Djehovha aangatidziiriri nge mushobo unoshamisa patinonga tecisongana no tsawana dzinoitika dzoga. Kunyazi zvakadaro, ayena anotibetsera ngekutipasa zvese zvatinoda kuti tirumbwe takaterama uye tigare no runyararo.

10. Ngei tingabhuya kuti kugadzirira zvino tsawana dzinoitika dzoga dzisati dzaitika kunopangidza kuti tinokutenda? (Zvierengo 22:3)

¹⁰ Ciro cingatibetsera kugara takaterama patinosongana no tsawana dzinoitika dzoga, ikugadzirira zvekuita paciino nguwa. Asi kuita izvona zvinoreya kuti atitendi muna Djehovha? Zviri pamhene kuti haiwa. Zvezvirokwazvo, kana tikagara takagadzirira tsawana dzinoitika dzoga dzisati dzaitika, tinonga tecipangidza kuti tinotenda mu simba ra Djehovha rekutibetsera. Soko ra Mwari rinobhuya kuti tinodikana kugara takagadzirira pazviro zvakashata zviri mberi. (Erengai Zvierengo 22:3.) Sangano ra Djehovha rinoseenzesa fundo dze musaiti, misangano, zviedzuriro uye zviziiso kuti ritibetsere kuona kuti ngei tecidikana kugara takagadzirira tsawana dzinoitika dzoga.c Hino tinogonda Djehovha here? Kana tecimugonda, ticatondowedza zvino nhungamiriro dzatinopaswa—tsawana isati yaitika.

11. Tingafundei kubva pa muezaniso we hanzvadzi Margaret?

¹¹ Onai zvakaitika no hanzvadzi imweni inozwi Margaret. Nge ndaa ye muriro waibaka ku mutanha wayaigara, hanzvadzi Margaret aidikana kubuda pa nyumba nokukasika. Ngekuti anhu akawanda aiedza kutiza ku mutanha uu pa nguwa imweyo, gwanza rakadzara zvekuti painga pasina mukana wekubuda. Kunza kainga kusikacaoneki nge ndaa ye cutsi, uye zvainga zvisikaiti kuti hanzvadzi Margaret abude mu karu yawo. Asi awona akakwanisa kupukunyuka nge ndaa yekuti ainga akagadzirira. Mu pasta yawo mainga muno mapa yaipangidza gwanza rimweni rinobuda pa mbutoyo. Awona ainga akatombohamba no gwanza iri paaigadzirira tsawana dzinoitika dzoga. Hanzvadzi ii yakakwanisa kupukunyuka pa tsawana ii ngekuti ainga akanyasa kugadzirira.

12. Ngei tinodikana kutondowedza nhungamiriro dzekudzidziirira?

¹² No cinangwa cekutidziirira, anhu ano masimba angatikumbira kuti isusu tisabude pa nyumba, kana mbuto yatinonga tiri kana kuti tiite zviro zvimweni zvinodiikanwa tsawana dzinoitika dzoga padzinonga dzeciitika. Anhu amweni aatondowedzi nhungamiriro idzi panguwa iyona ngekuti anonga asikadi kusiya zviro zvekunyama zvaanonga anazvo. Asi Akristu anodikana kuitei tsawana paionga yeciitika? Bhaibheri rinotibvunza kuti: “Nge ndaa ya Tenzi, dzikandei pasi pe zvisikwa zvese zve anhu, ku madzimambo hinga anhu e pamusoro-soro uye ku atongi hinga atumwa ake.” (1 Ped. 2:13, 14) Sangano ra Djehovha rinotipasawo nhungamiriro dzekutidziirira. Ngo muezaniso, tinokohomedzeswa kuti tipase akuru numero dzedu dze thurufunu dzatirikuseenzesa uye kuabvunza katinogara. Kana tikadaro, awona acakwanisa kupinda mucitenderano na isusu kana pakamuka tsawana. Akuru ano masoko akadzara anocokuita na imwimwi here? Kupinda izvona, isusu tingatambira nhungamiriro dzakadai hingana kugara pa nyumba, kuenda ku mbuto yakacengeteka, kutambira zvekurhya uye kuti tingabetsera kudini amweni uye kuti ndirini watingaabetsera. Kana tikatama kutondowedza nhungamiriro idzi, tingakanda upenyu wedu no we akuru pa ngozi. Edzurirai kuti hama idzi dzino ubaba wekutibetsera. (Aheb. 13:17) Margaret wakabhuya kuti: “Zvezvirokwazvo, ndakaona kuti kutondowedza nhungamiriro dze akuru uye dze sangano ra Djehovha ndikona kakaponesa upenyu wangu.”

13. Cinyi cirikubetsera hama no hanzvadzi dzakawanda kuti dzigare no mupfaro uye runyararo?

¹³ Hama no hanzvadzi dzakawanda dzakasiya nyumba dzawo nge ndaa ye tsawana dzinoitika dzoga, hondo uye bongozozo re anhu asikazwiri mutemo, uye awona akapeta masimba kuti adjairane no migariro mipsva uye aazi kusiya kuita mabasa anocokuita nokunamata. Kuitawo hingana Akristu e pakutanga aidikana kutiza nge ndaa yekuteererhwa, hama dzedu dzirikurumbwa “dzeciziisa masoko akanaka.” (Zvii. 8:4) Kuparidzira kurikubetsera hama no hanzvadzi idzi kuti dzikande ndangariro dzawo pa Umambo, haiwa pa migariro ye zviro inoshupha. Nge ndaa yazvo, awona arikukwanisa kugara no mupfaro uye runyararo.

TINGAGARA KUDINI NO RUNYARARO PATINONGA TECITEERERHWA

14. Kuteererhwa kungabata-bata kudini upenyu wedu?

¹⁴ Nge ndaa yekuteererhwa tingakwanisa kuruza zviro zvakawanda zvinotipasa runyararo. Ngo muezaniso, tinopfara maningi kana tino rusudzunuko rekuungana no hama uye hanzvadzi dzedu, kuparidzira, uye kurarama tisikathyi kukandwa mukaraboso. Kana tikaruza rusudzunuko rekuita zviro izvi, tingakwanisa kudzirhya mwoyo uye kuthya zviro zvingazoitika. Zvakadjairika kuzwa mazwiro aya. Kunyazi zvakadaro, tinodikana kungwarira. Djesu akabhuya kuti kuteererhwa kungatikuhunyisa. (Juau 16:1, 2) Hino tingagara kudini no runyararo patinonga teciteererhwa?

15. Ngei tisikadikani kuthya kuteererhwa? (Juau 15:20; 16:33)

¹⁵ Bhaibheri rinoti: “Ese anoda kurarama upenyu wawo akagondeka kuna Mwari murubatano na Kristu Djesu acatererhwawo.” (2 Ti. 3:12) Hama imweni inozwi Andrei yairangarira kuti Apupuri a Djehovha ese e mu nyika yawo aizoteererhwa. Iyona yairangarira kuti: ‘Muno mune Apupuri a Djehovha akawanda. Ano masimba aangakwanisi kutisunga tese?’ Asi mushobo uu wekurangarira wakaita kuti Andrei agare asikazi kuterama, pano kudaro iyena wakagara ecidzirhya mwoyo. Hama dzimweni dzakasanangura kugonda Djehovha haiwa kurangarira kuti dzainga dzisikazokandwi mukaraboso. Idzona dzaiziya kuti dzaizokandwa mukaraboso pa nguwa ipi hayo, asi ainga asikagari ecidzirhya mwoyo hingana Andrei. Hino iyena wakasanangura kugara no marangariyo amwewo ainga ano hama dzimweni, uye ogonda Djehovha. Azvizi kutora nguwa yakareba uye iyena wakatanga kugara no runyararo. Parizvino, iyena urikupfara kunyazi ecisongana no zvinetso. Izvona zvingakwanisa kuitikawo na isusu. Icokwadi kuti Djesu akabhuya kuti taizoteererhwa, asi ayena akatigondesawo kuti tingakwanisa kurumbwa takagondeka.—Erengai Juau 15:20; 16:33.

16. Inhungamiriro dzipi dzatinodikana kutondowedza kana basa redu rikarambidzwa?

¹⁶ Kana basa redu rikarambidzwa, kana kuti kuimiswa, isusu tingatambira nhungamiriro dzecibva ku dare re firiyari uye ku akuru. Nhungamiriro idzona dzinotibetsera pakutidziirira, pakuita kuti tirumbwe tecitambira zvekurhya zvekunamata uye kuti tirumbwe teciparidzira pese pazvinobvira. Hino nyasai kutondowedza nhungamiriro idzona kunyazi musikanyasi kuzvizwisisa. (Tig. 3:17) Uye musambopase masoko anocokuita no hama uye hanzvadzi dzenyu, kana kuti masoko akaringana no mabasa e ungano ku aya asina citenderhwa cekuziya masoko awona.—Mup. 3:7.

17. Kuita hingana aphostori, mashinga kuitei?

¹⁷ Cimwe ce zvikonzero zvinoita kuti Sathani ateerere Apupuri a Djehovha, ngecekuti awona “ano basa rekupupurira nge zva Djesu.” (Zvak. 12:17) Musatendere kuti Sathani no nyika yake amuthyisidzire. Basa rekuparidzira uye rekufundisa, rinotipasa mupfaro uye runyararo kunyazi teciteererhwa. Atungamiriri e Cidjudha akabvunza aphostori kuti aime kuita basa rekuparidzira. Asi kunyazi zvakadaro, anarume aya akagondeka akasanangura kuzwira Mwari. Awona akarumbwa eciparidzira uye akapfara maningi nge ndaa yazvo. (Zvii. 5:27-29, 41, 42) Zviri pamhene kuti kana basa redu rikarambidzwa kana kuimiswa, isusu tinodikana kungwarira patinonga teciparidzira. (Mat. 10:16) Asi kana tikapeta masimba kuti tiparidzire, ticazwa runyararo rinobva pakuziya kuti tirikuita zvinodiwa na Djehovha uye pakuziya kuti tirikuita basa rinoponesa upenyu.

“RUNYARARO RA MWARI RICAGARA NA IMWIMWI”

18. Ndiyani angakwanisa kutipasa runyararo re zvirokwazvo ?

¹⁸ Garai no cokwadi cekuti kunyazi pamugariro we zviro unoshupha, imwimwi mungakwanisa kugara no runyararo. Pamugariro we zviro wakadaro, isusu tinodikana kuedzurira kuti tinoda runyararo ra Mwari, kana kuti, runyararo rekuti Djehovha basi ndiyena angakwanisa kutipasa. Hino gondai naye pamunonga mecisongana no nhenda dzinobararika nokukasika, tsawana dzinoitika dzoga uye kuteererhwa. Rumbwai muri padhuze no sangano ra Djehovha. Garai meciedzurira ramangwa rinoshamisa rakatietsera. Kana mukadaro, “runyararo ra Mwari ricagara na imwimwi.” (Afi. 4:9) Mu fundo inoteera, ticaona zviro zvatinodikana kuita kuti tibetsere hama no hanzvadzi dzedu kuti dzigare no runyararo ra Mwari padzinonga dzecisongana no zvinetso.