Betseranai pa Nguwa Yokutambudzika

1. Djehovha anodaira kudini minamato ye aseenzi ake?

MAIZVIZIYA here kuti Djehovha anokwanisa kuseenzesa imwimwi kuti adaire minamato dze hama dzenyu here? Azvinei nokuti muri mukuru we ungano, mubati anoseenzera, muri mupiyonero, muri djaha, muri munhu wakura, muri hama kana hanzvadzi. Kana munhu unoda Djehovha ecida rubetso, kajinji Djehovha anoseenzesa akuru e ungano kana hama imweni yakagondeka kuti “amunyaradze.” (Ako. 4:11) Zviri pamhene kuti ici cikomborero cakakura cekuseenzera Djehovha nge mushobo uu. Tingakwanisa kubambisa kana kubetsera hama dzedu kana pakaitika njodzi dzinoitika dzoga, nhenda dzinotyisa uye nokuteererhwa.

BETSERAI AMWENI KANA PAKAMUKA NHENDA DZINOTYISA

2. Ngei zvingashupha kubetsera amweni nhenda painonga yeciitika?

² Kubararika ke nhenda kungaita kuti zvitishuphire kubetsera amweni. Nge muezaniso, tinonga tecida kuvhakacira shamwari dzedu asi azviiti nge ndaa yo nhenda. Pamweni tinonga tecida kupika hama imweni inonga yecisongana ne cinetso ce mare kuti tirhye nayo pamwepo ne mhuri yedu. Pamweni tinonga tecida kubetsera amweni, nguwa imweni zvingashupha ngekuti umwe we mhuri yedu unonga ecitobatana ne zvinetso zvakakura. Asi kunyazi zvakadaro, isusu tinoda kubetsera hama dzedu uye kana tikadaro, Djehovha acapfara kana tikapeta masimba kuti tiabetsere. (Zvie. 3:27; 19:17) Kana zvakadaro, tinodikana kuitei kuti tiabetsere?

3. Tingafundei pa muezaniso we akuru e ungano ya Desi? (Djeremiya 23:4)

³ Zvingaizwa no akuru. Kana muri mukuru, petai masimba kuti munyase kuziya hama dze mu ungano. (Erengai Djeremiya 23:4.) Desi, hanzvadzi yakamborekethwa mu fundo yakadarika yakati: “Akuru e cikwata cangu cekuparidzira, aitobudawo na inini kutobatanidzawo ne hama dzimweni mukuparidzira, uye taipedza nguwa yakawanda teciitawo mabasa amweni.”b Nge mushobo uu, zvakaitira nyore akuru kuti abetsere Desi pa nguwa ye COVID-19, uye hama dzake dzinganani dzakafa nge nhenda ii.

4. Ngei akuru akakwanisa kubetsera Desi, uye akuru anofundei?

⁴ Desi wakapanganidza eciti: “Ngekuti ndainga ndaano ushamwari ne akuru, zvakandiitira nyore kuapanganidzira zvinetso zvangu.” Akuru anofundei? Kana muri mukuru, betserai uye ushai hama ne hanzvadzi pasati patanga migariro inoshupha. Garai shamwari dzawo. Kana pakatanga nhenda inotyisa, uye musikakwanisi kuonana hope ne hope, rumbwai mecicedza nawo meciseenzesa mishobo dzimweni. Desi unoenderera mberi eciti: “Akuru akawanda aindikweera bote uye amweni ainditumira tsamba pa zuwa rimwero. Awona aindierengera tsamba uye idzona dzakandibaya mwoyo kunyazi ndaitodziziya kareko.”

5. Akuru angaziya kudini zvinodikanwa no hama ne hanzvadzi, uye zvinyi zvaangaita kuti aabetsere?

⁵ Mushobo umweni wekuziya zvinonga zvecidikanwa ne hama ne hanzvadzi dzedu, nge we kuwaita mibvunzo, asi tisikaabambidziri kuti arekete zvinocokuita no upenyu wawo. (Zvie.  20:5) Tinodikana kudzibvunzisa mibvunzo dzinoti, awona ano zvokurhya zvakakwana here, zvekurapa ne zvimweni zvaanoda here? Pano zvitsinzwa zvaari kusongana nazvo here zvingaaitisa kuti aruze basa uye akonerhwe pekugara? Pano zvaanoda kuti akwanise kugadzirisa zvaanoda ku anyautongi here? Desi wakatambira zvokurarama nazvo zvaibva ku hama ne hanzvadzi. Asi cinyi cakamubetsera kuti akwanisane ne nguwa ii inoshupha? Desi wakati: “Akuru ainamata pamwepo neni. Andicaedzuriri zvaakareketa. Asi ndinoedzurira muzwiro wendakagara nawo, zvaiita hingana kuti Djehovha ari kundibvunza kuti: ‘Auripi wega.’”—Isa. 41:10, 13.

6. Hama no hanzvadzi dze mu ungano dzingabetsera kudini amweni? (Onai mufanikiso.)

⁶ Zvingaizwa no amweni. Tese tinoetsera kuti akuru abetsere hama no hazvadzi dze mu ungano. Asi Djehovha anoda kuti tese isusu tibetse uye tibambise amweni. (Aga. 6:10) Kunyazi tikaita ciro cidoko kuti tibetsere munhu paanonga ecirhwara, tinokwanisa kumubambisa. Mwana mudoko ungakwanisa kutumira hama tsamba kana dhezenyo kuti iipfadze. Kana pano munhu unonga ecida rubetso muungano, hama dzecidjaha dzingadzipira kuti dziende kootenga zvaanoda uye kuitawo mabasa amweni. Amweni angakwanisawo kugadzirira zvokurhya ku hama kana hanzvadzi inonga yecirhwara uye oenda koipasa kumba kayo. Zviri pamhene kuti panguwa inonga yeciitika nhenda inopaswana, ese muungano anonga ecida kubambiswa. Pamweni atidikani kukasika kubuda mumasure memusangano kuitira kuti ticedze no hama no hanzvadzi dzedu kunyazi hope no hope kana kuti pa interneti. Uyewo akuru anodawo kubambiswa. Hama no hanzvadzi dzimweni dzakatumira akuru tsamba dzokutenda, ngekuti awona anogara akabatika maningi nhenda dzinothyisa padzinonga dzeciitika. Zvakanaka maningi ‘kana tikarumbwa tecibambisana’!—1 Ate. 5:11.

BETSERAI AMWENI KANA PAKAITIKA TSAWANA DZINOITIKA DZOGA

7. Tsawana dzinoitika dzoga dzinobata-bata kudini upenyu we munhu?

⁷ Tsawana dzinoitika dzoga dzingakwanisa kucinja upenyu we munhu ciriporipoco. Anhu amweni angakwanisa kuruza zviro zvawo, nyumba yawo uye munhu waanoda. Zvinotsukwarisa kuti zviro zvakashata zvakaita hingana izvi, zvingakwanisa kuitikawo ku hama dzedu. Hino zvinyi zvatingaita kuti tiabetsere?

8. Akuru pamwepo no misoro ye mhuri angagadzirira kudini tsawana dzinoitika dzoga?

⁸ Zvingaizwa no akuru. Akuru, betserai hama no hanzvadzi kuti dzigare dzakagadzirira pasati paitika tsawana dzinoitika dzoga. Garai no cokwadi cokuti ese ari muungano aziye kuti zvinyi zvaanodikana kuita kuti arumbwe akacengeteka uye kuti akwanise kuzopsvaka akuru. Margaret wamborekethwa mu fundo yakadarika, unoti: “Pamusangano padii rakazwi zvinodikanwa zve ungano, akuru akaziisa kuti paizokwanisa kuonekazve kupiswa ke makwasha mu mutanha medu. Awona akabhuya kuti kudai anyautongi akatibvunza kuti tibude panyumba pedu kana kuti mugariro we zviro ukakanda upenyu wedu pangozi, tinodikana kubudepo nokukasika.” Masoko aya akauya panguwa yakasisira kamare ye kuti mumasure mekudarika masumana mashanu pakaoneka muriro wakakura maningi. Pamunonga meciita kunamata ke mhuri, mungakwanisa kukhorovhera mukana uwona kuti mufunde zvingaizwa no umwe na umwe we mumhuri menyu kana pakamuka mugariro we zviro wakadaro. Kana imwimwi pamwepo no ana enyu kana makanyasa kugadzirira, mucarumbwa makaterama panguwa inonga yeciitika tsawana dzinoitika dzoga.

9. Akuru angagadzirira kudini pasati uye mumasure mekuitika tsawana?

⁹ Kana imwimwi muri muonereri we cikwata, garai muno mundandanda we masoko e hama no hanzvadzi dzemucikwata cenyu. Musaimire kuti tsawana iitike kuti mukwanise kuita izvona. Kana pakaitika tsawana dzinoitika dzoga, pindai mucitenderano no aparidzi ese kuti muziye zvaanoda. Mumasure mazvo, nokukasika pasai masoko akakwana kumurongi we dare re akuru. Iyena unozopindirana mucitenderano no muonereri we nharaunda. Basa iri recikwata, zvezvirokwazvo rinobetsera maningi. Mumasure mekupiswa ke makwasha kakaitika, muonereri we nharaunda wa Margaret aazi kuwata ke nguwa dzinokwana 36, iyena wainga akabatikana nge kuronga basa re akuru panguwa yekuti awona aipindirana mucitenderano no hama dzinokwana 450 dzainga dzasiya nyumba dzadzo. (2 Ako. 11:27) Ngokudaro, ese aida kubetserhwa akaona pokugara.

10. Ngei kubetsera hama no hanzvadzi zvinokosha maningi ku akuru? (Juau 21:15)

¹⁰ Kupasa rubetso rekumwiya uye remundangariro zvinobatanidzwa pabasa re akuru. (1 Ped. 5:2) Kana pakaitika tsawana dzinoitika dzoga, ciro cokutanga cinoizwa nge akuru nge cekuziya kuti hama no hanzvadzi dzakacengeteka here, dzino zvokurhya here, macira here uye no pokugara. Asi mumasure me izvi paapadarika mwedzi minganani, hama no hanzvadzi dzinonga dzecida rubetso remundangariro, uye rokumwiya. (Erengai Juau 21:15.) Hama imweni inozwi Harold inoseenza mu Dare re Firiari uye yakambosongana no hama no hanzvadzi dzakambosongana no tsawana dzinoitika dzoga inoti: “Zvinotora nguwa kuti awona ahwirirezve pa mugariro wawo wakanaka. Padoko no padoko, hama no hanzvadzi dzingatanga kuhwirira pa upenyu wawo wekare, asi awona angagara ecizwa cisuwo ce anyaukama awo anonga afa. kupatika ngekuti ainga oda kufa uye ne mazwiro amweniwo, zvinonga zveciuya mundangariro nguwa dzese. Mazwiro aya ndiwona anoitisa kuti atange kuwrhadziwazve. Kugara no mazwiro akadaro, azvidi kureya kuti munhuwo unonga asina kutenda, asi mazwirowo hawo anoitika ku munhu wese-wese.”

11. Mhuri inoda rubetso ripi mumasure mekuitika tsawana dzinoitika dzoga?

¹¹ Akuru teedzerai zano riri pana Aroma 12:15 rekuti “cemai no ari kucema.” Nyaradzai uye edzurirai hama no hanzvadzi dzakabatana no tsawana kuti anodiwa maningi na Djehovha uye no hama dzawo. Munodikana kubetserawo mhuri kuti dzirumbwe dzino urongwa we kunamata unobatanidza kuita munamato, fundo, kupinda misangano uye kuparidzira. Kusiya izvi, kohomedzesai abereki kuti anyaradze ana awo. Abereki betserai ana enyu kuti akande ndangariro dzawo pa zviro zvisikapsveteki nge tsawana dzinoitika dzoga. Edzurirai ana enyu kuti Djehovha nguwa dzese acagara Shamwari dzawo uye aazoasii. Apanganidzirei kuti awona angakwanisa kugonda no rubetso re mhuri ye mu nyika yese ye hama no hanzvadzi kuti acaita zviri zvese kuti aabetsere.—1 Ped. 2:17.

12. Zvinyi zvingaizwa no amweni kuti abetsere paya panonga pamuka tsawana dzinoitika dzoga? (Onai mufanikiso.)

¹² Zvingaizwa no amweni. Kana pakaitika tsawana dzinoitika dzoga padhuze no pamunogara, mungakwanisa kubvunzisa akuru kuti muziye zvamungaita kuti mubetsere. Pamweni mungakwanisa kutambira aya anonga abatana no tsawana dzinoitika dzoga kana kuti aya anonga auya koowaka kuti aone pekugara. Mungakwanisawo kupasa zvekurhya uye no zvimweniwo zvinodikanwa ku aparidzi aya anonga ecida kubetserhwa. Uye mungabetsera kudini kana pakamuka tsawana dzinoitika dzoga kure no kamunogara? Mungakwanisa kuita munamato ngezve aya anonga abatana no tsawana iyona. (2 Ako. 1:8-11) Mungakwanisawo kubetsera ngekuita mipiro kubasa re pasi rese. (2 Ako. 8:2-5) Uye kana imwimwi muno mare ye kuita rhwendo re kwenda kuya kunonga kaitika tsawana dzinoitika dzoga bvunzai akuru kuti amubvunzei zviro zvamungaita. Pa mugariro we zviro wakadaro, kana imwimwi mukapikwa pamweni mucatambira rowedzo icamubeserai kuti muziye mushobo wakanaka wekubetsera.

BETSERAI HAMA NO HANZVADZI PANGUWA YAANONGA ECITEERERHWA

13. Zvinetso zvipi zviri kusongana no hama no hanzvadzi dzedu mu mbuto yekuti basa redu rakarambidzwa?

¹³ Mu mbuto dzekuti basa redu rakarambidzwa, upenyu we hama no hanzvadzi dzedu unobambirira kushupha maningi. Pane basi kuti ateererhwe, hama no hanzvadzi dzedu dziri kusongana no matambudziko akadai hinga kukonerhwa mare, nhenda uye kufirhwa no munhu waanoda. Uye nge ndaa ye kuteererhwa, zvingakwanisa kushuphira akuru kuti akwanise kuvhakacira hama no hanzvadzi uye zvingaashuphira kuti apinde mucitenderano nawo kuti aabambise. Ndizvona kamare zvakaitika na Andrei wamborekethwa mu fundo yakadarika. Hanzvadzi imweni ye cikwata cake, yakasongana no zvinetso zvakakura maningi zvekukonerhwa mare. Uye pakutunhudzira izvona, iyona yakaita tsawana yo karu. Iyona yaidikanazve kucekwa mu mbuto dzakawanda kucipitari uye zvainga zvisikaiti kuti iseenze. Kunyazi no kuteererhwa pamwepo no nhenda yo korona vhiru, hama no hanzvadzi dzakaita zviri zvese kuti dzibetsere hanzvadzi ii uye Djehovha aiona zvese zvaiizwa no hama idzi.

14. Akuru angapasa kudini muezaniso paanogonda na Djehovha?

¹⁴ Zvingaizwa no akuru. Andrei wakaita munamato uye wakaita zviya zvaaikwanisa kuita. Djehovha akadaira kudini munamato wa Andrei? Ayena akaseenzesa hama no hanzvadzi dzakawanda dzainga dzino upenyu uri nani kuti dzibetsere hanzvadzi iyona. Amweni akabetsera hanzvadzi ii kuripa zviya zvainga zvakumbirhwa no mamedhiko, amweni akabvisa mare pakubetsera hanzvadzi ii. Djehovha akaitisa kuti hama no hanzvadzi idzi dzikwanise kuita zviya zvaanokwanisa uye ayena akakomborera kubatana uye ushingi we hama no hanzvadzi idzi. (Aheb. 13:16) Akuru kana basa rekuparidzira rakarambidzwa kamunogara pasai mabasa amweni. (Djer. 36:5, 6) Uye ciro cimweni cinokosha gondai na Djehovha. Ayena acamubetserai kuti mukwanise kubetsera hama no hanzvadzi.

15. Tingarumbwa kudini tino runyararo kana basa redu rarambidzwa?

¹⁵ Zvingaizwa no amweni. Panguwa inonga yeciitika kuteererhwa pamweni tinodikana ku ungana muzvikwata zvidoko. Isusu tiri kurhwisana na Sathani haiwa no hama no hanzvadzi dzedu. Musaetsere kuti hama no hanzvadzi dzenyu dzigare anhu akakwana uye kana pakaoneka kutama kupindirana, gadzirisai cinetso icona no kukasika. (Zvie. 19:11; Aef. 4:26) Garai no cido cekutanga kuda kubetsera amweni. (Tito 3:14) Rubetso rakapaswa no hama no hanzvadzi ku hanzvadzi iya yaida kubetserhwa, zvezvirokwazvo zvakaibetsera maningi. Cikwata cawo cakanyasa kubatana hinga mhuri imwe basi.—Pis. 133:1.

16. Maererano na Akorosi 4:3, 18, tingabetsera kudini hama dzedu dziri kusongana no kuteererhwa?

¹⁶ Hama no hanzvadzi dzedu dzakawanda, dzinoseenzera Djehovha kunyazi no kuteererhwa no anyautongi. Amweni, anoguma pakutokandwa mukaraboso nge ndaa ye kutenda kawo. Isusu tingakwanisawo kunamatira hama idzi, mhuri dzawo, uye no aya anokanda upenyu wawo pa ngozi kuti aabetsere mugwanza re ku mwiya, ku nyama uye kuti basa rawo ritenderhwe zviri pamutemo.c (Erengai Akorosi 4:3, 18.) Musakanganwe kuti minamato yenyu inobetsera maningi hama no hanzvadzi idzi!—2 Ate. 3:1, 2; 1 Ti. 2:1, 2.

17. Mungagara kudini makagadzirira kuteererhwa?

¹⁷ Kubvira zvino, imwimwi no mhuri yenyu mungakwanisa kugadzirira kuteererhwa. (Zvii. 14:22) Musaedze kurangarira zviro zvakashata zvingaitika kamuri. Kusiya izvi, bambisai ukama wenyu na Djehovha uye betserai ana enyu kuti aitewo zvimwezvo. Kana imwimwi mukanetseka nge zviro zvicaitika kamuri, fungurai mwoyo wenyu kuna Djehovha. (Pis. 62:7, 8) Mu mhuri, cedzai nge zvikonzero zvese zvamunazvo zvinomuitisai kuti mugonde Djehovha.d Tsawana dzinoitika dzoga padzinoitika, kugonda kenyu na Djehovha uye kugadzirira zvakanaka, kucapasa ana enyu ushingi uye runyararo.

18. Ngazvipi zvatingaetsera mune ramangwana?

¹⁸ Runyararo ra Mwari rinoita kuti isusu tizwe takacengeteka. (Afi. 4:6, 7) Djehovha anoseenzesa runyararo irona kuti tizwe takaterama mu mwoyo kunyazi no nhenda dzinothyisa, tsawana dzinoitika dzoga, uye kuteererhwa. Ayena anoseenzesawo akuru, awo anoseenza no simba kuti atiushe. Uye Ayena anopasa tese isusu cikomborero ce kubetserawo amweni. Runyararo ratinozwa nyamasi uno, ricakwanisa kutibetsera kuti tikwanisane no matambudziko akakura aticasongana nawo mune ramangwana, kubatanidzawo pa “kutambudzika kukuru.” (Mat. 24:21) Kana izvi zvikazoitika, ticadikana kurumbwa tino runyararo redu uye kubetserawo amweni kuti aite zvimwezvo. Asi mumasure me kutambudzika kukuru, matambudziko ese atiri kusongana nawo nyamasi uno, zvinonga zviri zviro zvadarika. Ngokuti tinonga tino zviya kamare zvaidiwa na Djehovha katiri—runyararo rakakwana uye rusikaperi.—Isa. 26:3, 4.