Muciri Kuedzurira Here?

Makanyasa kuerenga misoro ye Murindiri ye gore rino here? Onai kuti munokwanisa here kudaira mibvunzo dzinoteera:

Ngaapi makomborero aticaona kana tikapedza nguwa tecicedza, kupurutana uye kurangarira ngezva Djehovha?

Ticaita zvisananguro zvakanaka, ticagara afundisi akanaka, kutenda kedu kucabamba, uye ticatunhudzira rudo redu kuna Djehovha.—w22.01, mapaji. 30-31.

Ticabetsereka kudini kana tikafundira kugonda Djehovha no aimiriri ake?

Ino ndiyo nguwa yokufundira kugonda mushobo wa Djehovha wekuita zviro, tecipurutana nhungamiriro dzake uye zvisananguro zvinoizwa ne akuru. Kutambudzika kukuru pakucatanga tinonga takagadzirira kutondoedza, kunyazi tikatambira nhungamiriro inoita hinga isina musoro katiri.—w22.02, mapaji. 4-6.

Ngirozi yainga yecidei payakabvunza Zakariya ngezve “prumu iri mu nyara dza [Governadori] Zorobhabheri”? (Zak. 4:8-10)

Ciono ici cakabambisa anhu a Djehovha kuti tempro yainga yeciwakwa yaizoita maererano no zvinodikanwa na Djehovha.—w22.03, mapaji. 16-17.

Tingagara kudini “muezanisoa wakanaka . . . pakureketa”? (1 Ti. 4:12)

Ngatirekete ne rureremedzo mu basa rokuparidzira, toemba no mwoyo wese, topasawo mhinduro dzedu pa misangano, toreketa cokwadi nguwa dzese tecibambisawo amweni uye tisikareketi mapsveda ngezve amweni.—w22.04, mapaji. 6-9.

Ngei mishobo ye zvikara zvirongomuna (umambo) inorekethwa pana Dhanyeri 7 zvecibatanidzwa pa cinyama cimwe basi, hingana zvinorekethwa pana Zvakapangidzwa 13:1, 2?

Cikara ciri pana Zvakapangidzwa 13 aciimiriri basi umambo umwe, wakaita hinga Roma. Kusiya izvona cinoimirira utongi wese we zvematongerhwe e nyika ari kutonga nyika.—w22.05, paji. 9.

Ngaupi mushobo wakanaka wekupangidza unatsi wa Djehovha?

Kana munhu akatituka, tinodikana kukasika kumurekerera uye tosiyai nyaya yakhona mu nyara dza Djehovha. Ayena acaparadza ushaishi wese wakakonzerhwa ne citema.—w22.06, mapaji. 10-11.

Cinyi cirikurangarirhwa no hama irikuita munamato pa musangano?

Munamato audikani kuseenzeswa kupangira ungano kana kupa ciziiso. Azvidikani kuseenzesa “masoko akawanda,” kunyanya misangano painonga yecitanga. (Mat. 6:7)—w22.07, mapaji. 24-25.

Aya “anoita zviro zvakashata acamukira mukutongwa” nge gwanza ripi? (Juau 5:29)

Kutongwa kuri kubhuiwa apa akuzi kushata, ngekuti acatongwa haiwa nge zviro zvakashata zvaakaita kare. Asi acatonga maererano no zvaacaita mumasure mekumutswa kawo.—w22.09, paji. 18.

Hama J. F. Rutherford akapa ngwadzo ipi pa gungano ra rakaizwa mu Setembro muna 1922?

Gungano parakaizirhwa ku Cedar Point, Ohio, U.S.A., pakarekethwa kuti: “Mambo waakutonga! Imwimwi ndimwi aziisi akhona. Ndiyo ndaa, ziisai, ziisai, ziisai Mambo no Umambo wake!”—w22.10, mapaji. 3-5.

Pana Isaya 30 panopangidza mishobo 3 inoseenzeswa na Djehovha kuti atibetsere kushingirira.

Kapituro ii inopangidza kuti ayena (1) anozwa uye anodaira minamato yedu, (2) anotipasa nhungamiriro, uye (3) anotikomborera zvino uye acatikomborera mune ramangwana.—w22.11, paji. 9.

Ngei tingapedzesa teciti masoko ari pana Pisarema 37:10, 11, 29 akadzadzika mu nguwa yekare uye acadzadzika mune ramangwana?

Masoko a Dhavhidhi anopangidza makomborero ainga ari mu Israeri, hinga mu nguwa ye umambo wa Soromoni. Djesu akapangidza zvicaitika mune ramangwana mu Paraizo hinga zvaakareketa pa vherisikuro 11. (Mat. 5:5; Ruka 23:43)—w22.12, mapaji. 8-10, 14.