Mibvunzo Inobva Ku Aerengi
Maererano no masoko atinogumira pana Pisarema 61:8, Dhavhidhi wainga ecinyanyisa here paakatara masoko anoti ndicakudza zina ra Mwari “nokusikaperi?”
Haiwa. Zvakatarhwa na Dhavhidhi zvainga zvino musoro.
Onai zvaakatara mu vhersikuro ii no tsamba dzimweni dzakada kutodzana: “Ndicaemba ndecikudza zina renyu nokusikaperi. Ndeciripa mhiko dzangu zuwa no zuwa.” “Ndicamukudza Mwari wangu ne mwoyo wangu wese, uye ndicakudza zina renyu nokusikaperi.” “Ndicakudza zina renyu kuenda nokuenda.”—Pis. 61:8; 86:12; 145:1, 2.
Dhavhidhi wainga asikanyanyisi uye iyena waiziya kuti zuwa rimweni waizofa. Iyena waiziyawo kuti anhu ese anofa nge ndaa ye citema. Dhavhidhi pacake wakatendera kuti wainga ari mushaishi. (Gen. 3:3, 17-19; Pis. 51:4, 5) Iyena waitoziyawo kuti kunyazi anarume aitenderhwa na Mwari akaita hinga Abrahamu, Izaki uye Djakobo ainga afa. Ndiyo ndaa iyena waizviziya kuti waizofawo. (Pis. 37:25; 39:4) Asi masoko aakatara pana Pisarema 61:8 anopangidza cido cainga na Dhavhidhi cekukudza Mwari nokusikaperi ke upenyu wake wese.—2 Sam. 7:12.
Zviro zvinganani zvakatarhwa na Dhavhidhi zvinocokuita no esperiesiya yaakasongana nayo mu upenyu, hinga zvatinoona mumasoko e pamusoro pe Pisarema 18, 51, na 52. Pana Pisarema 23, Dhavhidhi wakaezanisa Djehovha hinga mudziiriri, mucengeti uye mutungamiriri. Dhavhidhi wainga ari muushi uye iyena waida kuseenzera Djehovha ‘mazuwa ese e upenyu wake.’—Pis. 23:6.
Zvakanakawo kuedzurira kuti zvese zvakatarhwa na Dhavhidhi zvakafemerhwa na Djehovha. Pa zviro zvese zvaakatara, zvaibatanidzawo uphorofiti wakaringana nge zve ramangwana. Nge muezaniso pana Pisarema 110, Davhidhi wakareketa nge zve zuwa ra Tenzi kuti “aizogara pa dii re muoko kwawo wa” Mwari uye waizotambira simba. Asi iyena waizoitei no simba irona? Waizoriseenzesa kuti atonge azondi a Mwari uye kupasa “mutongo madzindza” e pa nyika. Dhavhidhi wakagara mubarirhwana wa Mesiya uyo aizotonga ari kudenga uye waizogara “mupristi nokusikaperi.” (Pis. 110:1-6) Djesu akareketa kuti uphorofiti uri pana Pisarema 110 waireketa nge zvake uye kuti waizodzadzika muna ramangwana.—Mat. 22:41-45.
Djehovha akafemera Dhavhidhi kuti atare nge zve nguwa yake, uye nge zve ramangwana, paaizomutswa waizogara no mupfaro wekukudza Djehovha nokusikaperi.Ngokudaro Pisarema 37:10, 11, 29 yakaseenza pa nguwa ye a Israeri ekare, uye icaseenzawo mune ramangwana Mwari paacadzadzisa zvipikirhwa zvake.—Onai ndima 8 ye musoro unoti: “Unonga Uneni mu Paraizo” uri mu Murindiri uno.
Masoko ari pana Pisarema 61:8 anopangidza kuti Dhavhidhi waida kukudza Djehovha ke upenyu wake wese. Uye masoko awona anonyasa kupangidza zviro zvicazoda kuizwa ndi Dhavhidhi Djehovha paacamuunzisa ku upenyu.