Rumbwai Mecibetsereka nge Kuthya Mwari

1-2. Kuita hingana Roti, Akristu anobatana no zvinetso zvipi mazuwa ano?

PATINOONA zvakashata zvinoizwa nge anhu mazuwa ano, tinozwawo hinga zvaiita Roti. Iyena “wainetseka maningi nge muhambiro usikazi kucena we anhu ainga asikateereri mutemo” ngekuti iyena waiziya kuti Baba edu e kudenga anozonda maitiro awona. (2 Ped. 2:7, 8) Kuthya uye kuda maningi Mwari ndizvona zvakaita kuti Roti azonde maitiro asikazi kucena. Isusu takatenderedzwawo nge anhu anoreremedza padoko uye amweni aatoreremedzi mitemo ya Djehovha. Kunyazi zvakadaro, isusu tingakwanisa kurumbwa takacena pa maitiro kana isusu tingarumbwa tecida Djehovha uye kufundira kumuthya nge mushobo wakanaka.—Zvie. 14:2.

² Kuti tiite izvona, Djehovha anotibetsera eciseenzesa masoko anobambisa atinogumira mu bhuku ra Zvierengo. Akristu ese, anarume no anakadzi, madjaha no acemberi angafunda zvakawanda nge kufunda bhuku iri.

KUTHYA DJEHOVHA KUNOTIDZIIRIRA

3. Maererano na Zvierengo 17:3, cikonzero cipi cinokosha catinaco cinoita kuti tidziirire mwoyo wedu? (Onaiwo mufanikiso.)

³ Cikonzero cinokosha kuti tidziirire mwoyo wedu, ngecekuti Djehovha anoongorora mwoyo yedu. Izvona zvinoreya kuti kusiyana no anhu amweni anokwanisa basi kuona zvatiri ngece kunze, Djehovha anokwanisa kuona zvatiri ngece mukati. (Erengai Zvierengo 17:3.) Kana tikadzadza ndangariro dzedu nge mazano e ungwaru a Djehovha, iyena acatida uye acatipasa upenyu usikaperi. (Juau 4:14) Ngekudaro, atizokuadzwi nge maitiro akashata uye manyepo a Sathani no nyika yake. (1 Juau 5:18, 19) Patinorumbwa tecikhwedera dhuze na Djehovha, rudo uye rureremedzo redu kaari ricarumbwa recikurawo. Asi tinoda maningi Djehovha zvekuti tinozonda kuita zvakashata uye nzero yekuita zvakashata. Patinoedzwa kuita zviro zvakashata, tinoima torangarira kuti: ‘Ndingarhwadzisa kudini Munhu wakapangidza kakawanda kuti anondida?’—1 Juau 4:9, 10.

4. Kuthya Djehovha kakadziirira kudini hanzvadzi imweni?

⁴ Marta, hanzvadzi imweni ye ku Croácia yakasongana no muedzo wekuita uhure, inoti: “Kandiri zvakandishuphira kurangarira zvakadjeka uye kurhwisa cido cekuita zvakashata ngekupfadzwa ke nguwa doko. Asi kuthya Djehovha kakandidziirira.”b Asi kuthya Djehovha kakabetsera kudini Marta? Marta wakati wakanyasa kurangarira ngezve migumisiro yaaizosongana nayo ngekuita cisananguro cakashata. Uye isusu tinodikanawo kuita zvimwezvo. Isusu tinodikana kuedzurira kuti mugumisiro wakashatisisa ngewe kuti tinotsukwarisa Djehovha uye tinoruza mukana wekumunamata nokusikaperi.—Gen. 6:5, 6.

5. Tinofundei kubva pa esperiensiya ya Leo?

⁵ Patinothya Djehovha, isusu tinongwarira kuti tisapsvake cikonzero cekuti ngei ndaiita cakashata ici. Leo, unogara ku Congo, wakafundawo fundo irona. Mumasure me makore marongomuna aa abhabhatidzwa, iyena wakatamba no shamwari dzakashata. Iyena wairangarira kuti kana inini ndisikaiti cakashata, ndinonga ndisikashaishiri Djehovha. Asi pa nguwa doko basi, shamwari idzi dzakashata dzakatanga kupfuridzira Leo kuti amwise doro uye kuti aite uhure. Ndipona paakatanga kurangarira zvaainga afundiswa nge abereki ake uye kupfara kaaiita paaiseenzera Djehovha. Mugumisiro wakhona? Iyena wakasiya kuita zvakashata. No rubetso re akuru, iyena wakahwirira kuna Djehovha. Parizvino iyena uri kupfara uye urikuseenza hingana mukuru we ungano uye hingana pionero espesiyari.

6. Anakadzi api airi e kuezanisira anorekethwa mu bhuku ra Zvierengo kapituro 9?

⁶ Ngatione zvino kapituro 9 ya Zvierengo inobhuya ngezve anakadzi airi. Umwe wawo unoimirira ungwaru, uye umweni unoimirira benzi. (Ezanisai na Aroma 5:14; Agaratiya 4:24.) Patinonga teciongorora fundo ino, edzurirai kuti nyika ino ya Sathani yakadzara no uhure uye nokuona pornografiya. (Aef. 4:19) Ndiyo ndaa zvinokosha maningi kuti tirumbwe tecithya Djehovha uye kugara kure no zviro zvakashata. (Zvie. 16:6) Ndiyo ndaa anarume no anakadzi, pano zvatinofunda zvinofundiswa no kapituro ii. Anakadzi airi aya anopika aya asina maesperiensiya kana kuti aya “asina nzero dzakanaka.” Zvinoita hingana ari kubhuya kuti: ‘Uyai kumba kangu kuti murhye ciro.’ (Zvie. 9:1, 5, 6, 13, 16, 17) Azvinei no mupiko ungatendwa no munhu, mugumisiro ungasiyana.

MUSATENDERE MUPIKO WE MWANAKADZI BENZI

7. Maererano na Zvierengo 9:13-18, ngaupi mugumisiro wekutendera mupiko we mwanakadzi benzi? (Onaiwo mufanikiso.)

⁷ Ngatitange ngekuona mupiko unoizwa nge “mwanakadzi benzi.” (Erengai Zvierengo 9:13-18.) Iyena aapsveruki kupika aya asina ruziyo ku mabiko eciti: “Uyai kuno.” Asi mugumisiro wakhona ngaupi? “Aya asina simba mu rufu ari apo.” Pamweni imwimwi mungaedzurira kuti mu bhuku ra Zvierengo mungagumira miyezaniso yakada kutodzana na ii. Isusu tinongwadzwa ngezve mwanakadzi “usikadzibati” uye uno “uhure.” Uye tinoziiswa kuti: ‘Nyumba ye mwanakadzi uno uhure inoendesa ku rufu.’ (Zvie. 2:11-19) Zvierengo 5:3-10 ino ngwadzo imweni ngezve “mwanakadzi usikadzibati” uye inoti “makwanza ake anoendesa ku guwa.”

8. Cisananguro cipi catinodikana kuita?

⁸ Aya anopurutana “mwanakadzi benzi” anodikana kusanangura kuti acatendera here kana kuti haiwa mupiko waanoita. Uye pamweni isusu tinodikanawo kuita cisananguro cakatodzana. Ngo muezaniso cinyi caticadikana kuita kana munhu akatipfuridzira kuita uhure, kana kuti tikasongana no mafoto e pornografiya?

9-10. Zvikonzero zvipi zvatinazvo kuti tisaite uhure?

⁹ Tino zvikonzero zvakanaka zvekuti tisaite uhure. “Mwanakadzi benzi” unoti: “Mvura ye kuba inotapira.” “Mvura ye kuba” ii icinyi? Bhaibheri rinoezanisa kuita zve pamaponde ke mwamuna no mukadzi hinga mvura inotonhorera. (Zvie. 5:15-18) Mwanarume no mwanakadzi akacata zviri pa mutemo, angagumira mupfaro wekuita zve pa maponde zvakasisira mukati me mucato wawo. Asi zvakasiyana maningi no “mvura ye kuba.” Mvura iyona inoreya kuita zve pa maponde kusikazi kucena uye kunorambidzwa. Anhu anoita izvona, anozviita mucifise-fise hinga mbavha inoedza kuba isikaoneki nge munhu. Uye anhu paanorangarira kuti apana munhu ucaziya zvaanonga aita, “mvura ye kuba” inoita hingana irikutapira maningi. Cishaishi cakakura maningi kurangarira kudaro! Djehovha anoona zvese. Apana ciro cinorhwadza kupinda kuruza kutenderhwa na Djehovha. Ndiyo ndaa, apana “cinotapira” pakupsvetekerhwa ikona kunotsukwarisa. (1 Ako. 6:9, 10) Asi andizvopi zvega.

¹⁰ Kuita uhure kunoita kuti imwimwi mupsveruke uye muzwe hingana musikabetseri. Kusiya izvona, kunoita kuti mubate pa mwiri musikadi uye kunoparadza mhuri. Zviri pamhene kuti kupangidza uzii kusama ‘kutendera’ mupiko we mwanakadzi benzi. Pano kufa basi pakunamata, anhu akawanda anoita uhure angabatana no matenda anoita kuti afe nokukasika. (Zvie. 7:23, 26) Vhersikuro 18 ya Zvierengo kapituro 9 inopedzesa yeciti: “Arendo ake ari mu Guwa rakadzika.” Kana mugumisiro we mupiko uu wakashata, ngei anhu akawanda eciutendera?—Zvie. 9:13-18.

11. Ngei kuona pornografiya kuno ngozi?

¹¹ Ciro cinoizwa maningi mazuwa ano catisikadikani kuita kuona pornografiya. Amweni anorangarira kuti apana ngozi iripo kuona pornografiya. Asi zvezvirokwazvo, kuona pornografiya kunokonzera matambudziko akawanda. Kunoita kuti munhu asadzireremedze uye asareremedze amweni, uye unogara musambo unoshupha kusiya. Mumasure mekuona pornografiya, zvinoshupha kudusa mu musoro medu zvatinonga taona. Kusiya izvona, kuona pornografiya akupedzi zvido zvakashata, pano kudaro, zvido izvona zvinorumbwa zvecikura. (Ako. 3:5; Tig. 1:14, 15) Ndiyo ndaa, akawanda anoona pornografiya anopedzesera aakuita zviro zvisikazi kucena.

12. Tingadzidziirira kudini pa mafoto anoita kuti cido cedu cekuita zve pa maponde cikure?

¹² Mukristu unodikana kuitei kana foto ye pornografiya ikabuda mu foni yake kana kuti mu komputadhori? Tinodikana kuima kuzviona ciriporipoco. Uye zvicaita nyore kuzviita kana tikaedzurira kuti ciro cinokosha maningi mu upenyu wedu ushamwari wedu na Djehovha. Mafoto amweni angasama kuoneka hinga e pornografiya, kunyazi zvakadaro angaita kuti cido cedu cekuita zve pamaponde cikure. Ngei tisikadikani kuona mishobo ii ye mafoto? Ngekuti atidi kuita ciro cipi haco, kunyazi ciri cidoko cingatiitisa kuti tiite kana kurangarira zviro zvisikazi kucena. (Mat. 5:28, 29) Mukuru umweni we ku Tailândia unozwi David unoti: “Inini ndinoima, ndorangarira kuti: ‘Kunyazi mafoto aya asiripi e pornografiya, Djehovha angapfara kana ndikarumbwa ndeciaona here?’ Kurangarira kudaro kunoita kuti ndiite zvisananguro zvino ungwaru.”

13. Cinyi cinotibetsera kuti tiite zvisananguro zvakanaka?

¹³ Kuthya kuita ciro cipi haco cingasiya Djehovha akatsukwara, kucatibetsera kuti tiite zvisananguro zvakanaka. Kuthya Mwari ndikona “kutanga,” kana kuti, panotangira “ungwaru.” (Zvie. 9:10) Izvona zvinooneka pa mavhersikuro e kutanga a Zvierengo kapituro 9, patinoerenga ngezve “ungwaru we zvirokwazvo” unoimirirhwa ngo mushobo umweni we mwanakadzi.

TENDERAI MUPIKO WE MWANAKADZI UNO “UNGWARU WE ZVIROKWAZVO”

14. Mupiko upizve watinogumira pana Zvierengo 9:1-6?

¹⁴ Erengai Zvierengo 9:1-6. Apona tinoona mupiko wa Djehovha Musiki wedu uye Manyuku e ungwaru wese. (Zvie. 2:6; Aro. 16:27) Mavhersikuro aya anoreketa ngezve nyumba yakakura ino madziro 7. Nyumba yakakura ii inotibetsera kuzwisisa kuti Djehovha ano rupo uye anotambira zvakanaka aya anoda kufunda nge zvake kuti agare anhu ano ungwaru.

15. Djehovha anoda kuti tiitei?

¹⁵ Nyaya iri pana Zvierengo inobhuya ngezve mwanakadzi uno rupo uye urikugadzirira mabiko. Iyena unovhenganidza vhinyu yake uye unoikanda pa meza. Mwanakadzi uu unoimirira “ungwaru we zvirokwazvo.” watinogumira pana Zvierengo kapituro 9. Muezaniso wake unotifundisa kuti Djehovha ano rupo zvakadini pa zvese Zvaanotipasa. (Zvie. 9:2, masoko e pasi) Kusiya izvona, maererano no mavhersikuro 4 na 5: “iyena [ungwaru we zvirokwazvo] unobvunza aya asina marangariro akanaka kuti: ‘Uyai, irhyai pau yangu.’” Ngei tecidikana kutendera mupiko uu? Djehovha anoda kuti ana ake agare no ungwaru. Iyena anoda kutidziirira, uye aadi kuti tifundire zviro nge mushobo unoshupha peciseenzeswa esperiensiya yakashata uye kugara tecitsumba zviro zvakashata zvatakaita. Ndiyo ndaa, “iyena anocengetera anhu ano unatsi ungwaru unobetsera.” (Zvie. 2:7) Kana tikathya Djehovha nge mushobo wakanaka, ticada kumupfadza. Isusu ticapurutana mazano ake ano ungwaru uye ticapfara ngekuseenzesa mazano aya mu upenyu.—Tig. 1:25.

16. Kuthya Mwari kakabetsera kudini Alain kuti aite cisananguro ce ungwaru, uye mugumisiro wakhona ngaupi?

¹⁶ Onai kuti kuthya Mwari kakabetsera kudini Alain kuti aite cisananguro ce ungwaru. Alain unoseenza hinga mukuru uye mufundisi we kucikora unoti: “Adoni angu akawanda airangarira kuti mafirme e pornografiya aifundisa zvakawanda ngezve pamaponde.” Asi Alain waizviziya kuti icona cainga cisiripi cokwadi. Iyena wakati: “Ngekuti ndinoda Djehovha uye ndinomureremedza, inini andizi kutendera kuona mafirme aya.” Inini ndakapanganidzirawo adoni angu kuti ngei ndainga ndisikazozviiti. Alain wainga eciseenzesa zano re “ungwaru we zvirokwazvo” we “kuhamba akaringira mberi mu gwanza rekuzwisisa.” (Zvie. 9:6) Afundisi amweni akashamisika maningi zvekuti pari zvino ari kufunda Bhaibheri uye ari kupinda misangano.

17-18. Zviro zvipi zvakanaka zvinoitika no aya anotendera mupiko we “ungwaru we zvirokwazvo,” uye angaetserei mune ramangwana? (Onaiwo mufanikiso.)

¹⁷ Djehovha anoseenzesa muezaniso we anakadzi airi aya kuti atipangidze kuti tingagara kudini no ramangwana rinopfadza. Aya anotendera mupiko we “mwanakadzi benzi” anopsvaka kupfadzwa nge zvido “zvinotapira,” kana kuti zvakafisika hingana uhure. Awona anoraramira cinguwa cidoko caanonga eciita izvona, uye aarangariri ngezve matambudziko aangazosongana nawo mu nguwa ye mberi. Mugumisiro we upenyu wakadai ucaaendesa mu “Guwa rakadzika.”—Zvie. 9:13, 17, 18.

¹⁸ Ku aya anotendera mupiko we mwanakadzi uno ungwaru, kana kuti “ungwaru we zvirokwazvo” mugumisiro wakhona wakasiyana! Iyena unogadzirira mabiko kuitira aya aapika zvese zvaanoda kuti arumbwe ari dhuze na Djehovha. (Isa. 65:13) Eciseenzesa muphorofita Isaya, Djehovha anoti: “Nyasai kundipurutana kuti murhye zviro zvakanaka, uye mucapfadzwa maningi nge zviro zvinowaka mwiri.” (Isa. 55:1, 2) Nge kuita kudaro, tinonga tecifundira kuda zvinodiwa na Djehovha uye kuzonda zvaanozonda. (Pis. 97:10) Uye tinopfarawo maningi ngekupikawo amweni kuti abetserhwe no “ungwaru we zvirokwazvo.” Zvinoita hingana kuti “tiri kudaidzira tiri mu mbuto dzakakhwirira mu thaundi teciti: ‘Munhu wese usina ruziyo ngaauye kuno.’” Uye kubetsereka katingaita pamwepo no aya anotendera mupiko uu akuzomboperi. Uye kunotibetsera kuti “tirarame” nokusikaperi uye “teciringira mberi mu gwanza rekuzwisisa.”—Zvie. 9:3, 4, 6.

19. Maererano na Muparidzi 12:13, 14, tinodikana kushinga kuitei? (Onaiwo bhokisi rakazwi: “Kuthya Mwari Kunotibetsera.”)

¹⁹ Erengai Muparidzi 12:13, 14. Kuthya Djehovha kucadziirira mwoyo wedu uye kucatibetsera kuti tirumbwe takacena pamaitiro uye pa mwiya mu mazuwa ano ekupedzesera. Ngatipike numero yakakura ye anhu kuti afundire ngezve “ungwaru we zvirokwazvo.” Tinoita izvona ngekuti tinothya Djehovha ngo mushobo wakanaka uye tinomuda no mwoyo wedu wese.