Ndakafunda Zvakawanda uye Ndakashamiswa Maningi Pakuseenzera Djehovha

Abereki angu akasiya Estônia pa nguwa ye Hondo Yecipiri ye Nyika yese, uye akaenda ku Alemanha. Ndikona kandakabarirhwa. Mumasure mekuti ndabarhwa, abereki angu akafuruka oenda ku Canadá. Isusu takaenda pa dhuze no Ottawa, ku Canadá. Tairaramira mu cikwere cainga ciri nge pamuceto cakapintarhwi no kori yekucena. Isusu tainga tiri arombo maningi, asi mazanda ainga asikashoti pese patairhya matabico.

Zuwa rimweni, Apupuri a Djehovha akaerengera mai angu bhuku ra Zvakapangidzwa 21:3, 4. Tsamba iyona, yakabaya mwoyo wawo zvekuti akatanga kucema. Mbeu yecokwadi yakakura mu mwoyo me abereki angu uye awona akabudirira nokukasika dakara pakubhabhatidzwa.

Abereki angu ainga asikanyasi kureketa Cingezi, asi kunyazi zvakadaro, awona akabatisisa cokwadi. Pese pazvaibvira mu ma Sabudu ese, baba angu ainditora pamwepo no munukuna wangu Sylvia kuti tiende kooparidzira, kunyazi mumasure mekuseenza usiku wese ku fabrika ye metalúrgica ku Sudbury, ku Ontário. Mhuri yedu yaifunda Murindiri mu ma sumana ese. Abereki angu akandifundisa kuda Djehovha. Ndiyo ndaa, ndakadzipira upenyu wangu kuna Djehovha mu gore ra 1956 pandainga ndino makore 10. Kuda kaiita abereki angu Djehovha, ndikona kunoita kuti ndirumbwe ndecimuseenzera.

Pandakapedza kufunda, inini ndainga ndisikacanyanyi kukoshesa kuseenzera Djehovha. Ndakaona kuti kana ndikagara mu pionero, ndainga ndisikazokwanisi kuunganidza mare inokwana yaizokwanisa kuti ndiite rhwendo rangu rekuziya nyika yese. Ndakatanga kuseenza mu radhiyo ndecipeperusa cirongwa ce ngoma, uye basa iri ndairida maningi. Asi ndaidikana kuseenza ce usiku, uye izvona zvaiita kuti ndiruze musangano kakawanda, uye ndakatanga kushamwaridzana no anhu ainga asikadi Djehovha. Pakupedzesera, hana yangu yakarowedzwa nge Bhaibheri yakandibetsera kuita cinjo dzinganani.

Inini ndakafuruka ndoenda ku Oshawa, thaundi rimweni rainga riri ku Ontário. Ikona, inini ndakaziya Ray Norman, no hanzvadzi yake Lesli, uye no mapionero amweni. Awona akandibata zvakanaka maningi. Pandaiona kupfara kaaiita zvakandiita kuti ndirangarire zvandaida mu upenyu wangu. Awona akandikohomedzesa kuti ndigare pionero, uye ndakazogara pionero muna Setembro ya 1966. Inini ndaipfara, uye ndaikhorovhera upenyu wangu. Asi inini ndainga ndisikarangariri cinjo dzaizoitika mu upenyu wangu.

KANA DJEHOVHA AKAMUPIKA KUTI MUITE CIRO, TENDERAI

Pandainga ndecifunda, ndakatara petisau rekuseenzera ku Bheteri ro ku Canadá. Asi nokuhamba ke nguwa, pandainga ndiri mu pionero, inini ndakapikwa kuti ndiende kooseenza ke makore marongomuna ku Bheteri. Asi inini ndainga ndaakuda maningi Lesli, uye ndainga ndoothya kuti kana ndikatendera mupiko uwona, inini ndaizoruza zvacose Lesli. Mumasure mekuita minamato kakawanda uye yakareba, inini ndakatendera mupikoo, uye kunyazi mwoyo wangu wairhwadza inini ndakasiya Lesli.

Inini ndakaseenza muno phadzirhwa ku Bheteri uye ndakazoseenza hinga mutari. Pa nguwa iyona, Lesli wakagara pionera espensiyari ku Gatineau, ku Quebec. Inini ndaigara ndecirangarira ngezve zviro zvaiita, uye kuti ndainga ndaita cisananguro cakanaka here. Mumasure mazvo, inini ndakashamisika maningi. Hama ya Lesli yaizwi Ray yakapikwa kuti iuye ku Bheteri. Uye isusu takagara mu kwartu imweyo! Ngokudaro, ndakatangazve kucedza na Lesli. Isusu takacata zuwa rakapera designação yedu ku Bheteri mu zuwa 27 ya Fevrero ya 1971.

Inini na Lesli takatumwa kuti tiende kooseenzera ku ungano yaireketa mureketero we ci francesa ku Quebec. Mumasure me makore manganani, inini ndakashamiswa pandakapikwa kuti ndiseenze hinga muonereri we nharaunda pandainga ndino makore 28 basi. Inini ndaidziona hingana kuti ndiciri mudjaha maningi, uye ndainga ndisina esperiensiya na imwe hayo. Asi masoko a Djeremiya 1:7, 8 akandibambisa. Asi Lesli wainga akabatana no tsaona yo karu, uyewo wainga ano cinetso ce kutama kuwata. Ndiyo ndaa, takaona kuti zvainga zvisikaiti kuti tiseenze hingana muonereri we nharaunda. Kunyazi zvakadaro, Lesli wakati: “Kana Djehovha akatipika, ngei isusu tisikamboedzi?” Isusu takatendera kupikwa, uye takapfara maningi mu basa re munharaunda ke makore 17.

Upenyu wekugara muonereri we nharaunda wainga wakabatikana maningi zvekutoti inini ndainga ndisikaoni nguwa yekugara na Lesli. Inini ndakadikana kufunda ciro cimweni. Zuwa rimweni, mu Ciposi ce macibesi, kampainya yakarira. Uye pandakaenda koona kuti wainga ari ani, painga pasina munhu, asi painga pano toalha uye no citengu cainga cino zvekurhya zvakawanda no tsamba yainga isina zina yainga yakatarhwa kuti: “Endai ku pikiniki no mukadzi wenyu.” Rainga riri zuwa rakanaka uye kainga kuno zuwa. Asi ndakapanganidzira Lesli kuti ndainga ndino mharidzo yekuti ndigadzirire, hino ndainga ndisikakwanisi kuenda. Iyena wakazwisisa, asi wakatsukwara. Pandakatanga kugadzirira mharidzo, hana yangu yairema. Inini ndakaedzurira tsamba ya Aefeso 5:25, 28. Zvaiita hingana kuti Djehovha aindiedzurira ngezve tsamba ii kuti ndaidikana kunyasa kucengeta mukadzi wangu. Mumasure mekuita munamato, ndakabvunza Lesli kuti: “Ngatiende,” uye Lesli wakapfara maningi. Takaenda ku mbuto yainga yakarungama maningi yainga iri padhuze no murambo, takawaridza toalha yedu, uye zuwa iri rakapfadza maningi ratakavhakaca tiri tese. Mumasure mazvo, inini ndakagara no nguwa yekugadzirira mharidzo yangu.

Basa redu re muonereri we nharaunda rainga rakawanda uye ese hawo aitipasa mupfaro. Takahamba kubva ku muceto dakara kumuceto ke nyika, kubva ku Colúmbia Britânica dakara ku Terra Nova. Inini ndainga ndoodzadzisa cido candainga ndinaco kubvira ndiri mwana mudoko ce kuita rhwendo kuti ndiziye mbuto dzimweni. Inini ndainga ndakamborangarira kudzadzisa petisau kuti ndiende ku Cikora ce Giriyadhi. Asi ndainga ndisina cido cekugara mu misiyonariyo ku nyika imweni. Kandiri, mamisiyonariyo ainga ari anhu anokosha. Ndairangarira kuti ndainga ndisikazi kusisira kuti ndigare misiyonariyo. Kusiya izvona, ndaithya maningi kuti ndaizogadzwa kuti ndiende ku nyika imweni ye ku África kainga kuno hondo kana matenda. Inini ndainga ndecipfara ku Canadá.

MUPIKO WANDAINGA NDISIKAETSERI KUENDA KU ESTÔNIA UYE KU NYIKA DZE KU BÁLTICOS

Mu gore ra 1992 Apupuri a Djehovha aikwanisazve kuparidzira mu mbuto dzimweni dzokuti kareko dzainga dzecibatanidzwa mu União Soviética. Patainga tiri ikona, hama dzakatibvunzisa kuti tainga takagadzirira here kuti ticinje tiende ku Estônia kooseenza hinga mamisiyonariyo. Takabathwa tisikakariri uye taidikana kunamata ngezvazvo. Asi takarangarirazve kuti: ‘Kana ari Djehovha ari kutipika, ngei isusu tisikazviedzi?’ Isusu takatenda kupikwa, uye inini ndakarangarira kuti: ‘Pezvakanakira ngepekuti atiripi kuenda ku África.’

Atizi kupedza nguwa yakawanda, takatanga kufundira mureketero we ku Estônia. Uye mumasure me mwedzi minganani takapikwa kuti tiende kooseenza hinga aonereri e nharaunda. Takavhakacira ungano dzinokwana kuita 46 no magrupu ari ku Estônia, Letônia uye ku Lituânia kutobatanidzawo ku Kaliningrado, ndima ye ku Rússia. Ndiyo ndaa isusu taidikana kufundira padoko mureketero umwe na umwe. Takafundira ci Letão, ci Lituano, uye ci Rússia. Ici cakaita cinetso cakakura katiri. Hama dzakapfara maningi ngekupeta masimba kataiita uye awona akatibetsera. Muna 1999, kakaumbwa firiyari ye ku Estônia, uye inini ndakapikwa kuti ndiende kooseenza mu dare re firiyari iyona pamwepo na Toomas Edur, Lembit Reile, uye Tommi Kauko.

Isusu takaziya hama dzinganani dzainga dzakataphwa kuenda ku Sibéria. Kunyazi hazvo nokusama kubathwa zvakanaka kaainga aizwa uye kugara kawo nhambo no mhuri dzawo, awona aazi kugara anhu akaoma mwoyo. Awona aazi kuruza mupfaro wawo wekuseenza no simba mu basa re kuparidzira. Muezaniso wawo wakatifundisa kuti tingakwanisa kushingirira no mupfaro kunyazi tecisongana no mugariro unoshupha.

Ainga ari makore akawanda mu basa ra Djehovha, uye tainga tisina mazuwa akawanda e kuzorora. Uye Lesli ndipona paakatanga kuzwa akaremba maningi. Asi isusu tainga tisikamborangariri kuti kainga kuri kutanga ke nhenda ye fibromialgia. Ndipona patakatanga kunyasa kurangarira ngezve kuhwirira ku Canadá. Isusu takapikwa kuti tiende ku cikora cinopindhwa no nhengo dze dare re firiyari ku Patterson, Nova York, ku Estados Unidos. Inini ndakadzibvunzisa kuti taizokwanisadi here, asi mumasure mekuita minamato yakawanda, takasanangura kutenda. Uye Djehovha akakomborera cisananguro cedu. Ndikona ketakazoziya ngezve nhenda yaainga anayo, uye iyena wakaraphwa. Ngokudaro, takakwanisa kuhwirirazve pakuita basa redu.

CISHAMISO CIMWENI KU MBUTO IMWENI

Tiri ku Estônia, usiku umweni muna 2008, inini ndakafonerhwa no e sedhi mundiyari uye aitibvunzisa kuti taizotendera here kuenda kooseenza ku Congo. Inini ndainga tisikatombokariri, maka-maka ngekuti ndaidikana kudaira pa zuwa raizoteera. Inini andizi kutomboreketa ngezvazvo kuna Lesli ngekuti ndaizviziya kuti iyena wainga asikazombowati usiku uwona. Pakupedzesera, ndini ndisikazi kutowata. Ndakapedza usiku wese ndecinamata ngezve zvitsinzwa zvangu zvekuenda kooseenza ku África.

Pa zuwa rakazoteera inini ndakabhuya ngezvazvo na Lesli, uye takaguma pakuona kuti ndi “Djehovha aitipika kuti tiende ku África. Isusu taizozviziya kudini kuti atizvikoni uye kuti atizozvipfariri kudai tisina kumbozviedza?” Hino mumasure mekupedza makore 16 tiri ku Estônia, isusu takaenda ku Kinshasa, ku Congo. Bheteri re ikona rainga rino jardim yakarungama maningi uye painga pakanyararira. Ciro cekutanga cakaizwa ndi Lesli ngecekukanda kartau yatainga tinayo ku Canadá mu kwartu medu. Iyona yaiti: “Pfara ku mbuto yaunonga uri.” Mumasure mekuziya hama no hanzvadzi, kuitisa fundo dze Bhaibheri, uye kuona kuti basa re umisiyonariyo rainga rakanaka kudini, rudo redu kuna Djehovha rakanyasa kutunhudzirika. Nokuhamba ke nguwa, isusu takagara no makomborero e kuvhakacira Bheteri dzinokwana kuita 13 dze nyika dzakasiyana dze África. Izvona zvakatibetsera kuti tiziye tsika dzakawanda uye anhu akasiyana-siyana. Kuthya kandainga ndinako pakutanga kakapera, uye isusu takatenda Djehovha ngekutituma kuenda ku África.

Hama dze ku Congo, dzakatipangidzira zvekurhya zvakasiyana-siyana, ngo muezaniso zvisikwa zvidoko zvinomburuka zvakasiyana-siyana, zvandairangarira kuti inini ndainga ndisikazokwanisi kuzvirhya. Asi patakaona kuti hama dzaipfarira maningi kuzvirhya, isusu takasanangurawo kuedza kuzvirhya, uye takazopedzesera taakuzvipfarira.

Isusu takaenda kumabvazuwa kuti tibambise hama dzedu uye takatora zviro kuti tiabetsere. Ku mbuto idzona, zvikwata zvairhwisa anhu uye aikuwadza anakadzi no ana adoko. Hama dzedu dzakawanda dzainga dziri arombo. Kunyazi zvakadaro, kariro yawo yakabamba ye rumuko, rudo rawo kuna Djehovha uye kugondeka kawo ku sangano zvaibata-bata mwoyo yedu. Muezaniso wawo wakaita kuti tirangarire ngezve zvikonzero zvedu zvekuseenzera Djehovha uye akabambisa kutenda kedu. Hama dzedu dzinganani dzakaruza nyumba dzawo uye zviro zvaainga asima. Izvona zvakandiedzurira kuti zviro zvakawanda zvekunyama zvingakwanisa kuruzika ciripo-ripoco, asi ushamwari wedu na Djehovha iciro cinokosha maningi. Kunyazi no zvitsinzwa zvakawanda, hama dzedu dzainga dzisikagurunguti. Mushobo wawo wekuona zviro wakatibambisa kubatana no citsinzwa ce uthongo no ushingi.

KUPFARIRA KEDU ÁSIA

Pano ciro cimweni cakatishamisazve. Isusu takatumwa kuti tiende koogara ku Bheteri re Hong Kong. Isusu tainga tisikamborangariri kuti taizogara ku Ásia! Mumasure mekutambira rubetso ra Djehovha mu basa rimwe na rimwe, isusu takatenda mupiko. Muna 2013, no misodzi mu madziso, isusu takasiya hama dzedu dzinodiwa, nokurungama ke África tisikazii zviro zvaizoitika.

Kugara ku Hong Kong, thaundi rakakura rino anhu akawanda e mu nyika dzese, kainga kuri kucinja kunoshupha mu upenyu wedu. Kufundira ci chinês kainga kusiripi nyore. Asi hama dzaitibata no rudo uye zvekurhya zvawo zvainga zvakanaka maningi. Basa raikura maningi asi mitengo ye zviro yairumbwa yecitunhudzirawo. Hino, no ungwaru, Dare Rinotungamirira rakasanangura kutengesa zviro zvinganani zve firiyari. Mu masure mazvo, muna 2015, isusu takacinjwa kuti tiende ku Coreia do Sul, katiri kuseenzera zvino. Kuno, isusu tino mureketero unoshuphawo maningi kuti tiufundire, asi kunyazi tisikakwanisi kuretekata ci coreano, hama dzinotibambisa dzecibhuya kuti isusu tirikubudirira zuwa no zuwa.

ZVATINOFUNDA

Kuita shamwari dzipsva, akuripi nyore, asi isusu takaona kuti tikatanga isusu kupika anhu kuti auye kumba kedu, zvinozoita nyore kuti tiite ushamwari. Isusu takaona kuti hama dzedu dze mu nyika dzese dzakatodzana, uye kuti Djehovha akatipasa makomborero e kufungura mwoyo wedu kuti tide shamwari dzakawanda pa nguwa imweyo.—2 Ako. 6:11.

Isusu tinosoona kuti zvinokosha maningi kuda anhu nge mushobo waanodiwa na Djehovha uye toedza kuona zvikonzero zvakawanda zvekuti Djehovha anotida uye anotitungamirira. Pese pataiwora mwoyo, uye pataidzibvunzisa kuti hama dzatipfarira here kana kuti haiwa, taierenga tsamba uye kartau dze shamwari dzedu. Izvona zvaitibambisa maningi, uye kakawanda taiona kuti Djehovha aidaira kudini minamato yedu. Izvona zvakabambisa kutenda kedu uye zvaitigondesa kuti Djehovha anotida maningi.

No kuhamba ke nguwa, inini na Lesli takafunda kuti zvinokosha maningi kuti tione nguwa yekuti tigare tese azvinei kuti takabatikana maningi kana kuti haiwa. Isusu takazwisisawo kuti taidikana kuseka zvishaishi zvedu, maka-maka patinonga tecifundira kureketa mureketero mupsva. Usiku wese isusu tinorangarira ciro catapfarira pa zuwa irona, uye tinotenda Djehovha nge ndaa yazvo.

Kubhuya zvazviri, inini ndainga ndisikarangariri kuti raizoguma zuwa rekuti ndaizogara misiyonariyo, uye kurarama mu nyika imweni. Asi inini ndino mupfaro wekuona kuti zviro zvese zvinobvira no rubetso ra Djehovha. Nguwa dzese ndinoedzurira masoko a muphorofita Djeremiya paakati: “Imwimwi makanditsotsa, Haiwa Djehovha.” (Djer. 20:7) Djehovha akandishamisa uye akandikomborera maningi nge mushobo wekuti ndainga ndisikambokariri. Djehovha kadzadzisawo cido cangu cekuita rhwendo no ndeka, uye isusu takaenda ku mbuto dzakawanda dzekuti inini ndainga ndisikatombodzirangariri pandainga ndiri mwana mudoko. Isusu takavhakacira ma Bheteri e kontinente dzinokwana kuita shanu, inini ndinotendawo Lesli ngekunditsigira pa mabasa ese ataiita.

Nguwa dzese, tinoedza kuedzurira kuti zvese zvatinoita, tinozviita ngekuti tinoda Djehovha. Makomborero atinawo nyamasi uno, anopangidza kuti ticazorarama kudini nokusikaperi Djehovha paaca “funungura nyara [yake] kuti adzadzise zvido zve anhu ese.”—Pis. 145:16.