Hama dze Cidjaha—Mungagara Kudini Akristu Akakura Pakunamata?

1. Mwanarume unodikana kuitei kuti agare Mukristu wakakura pakunamata?

MAMBO Dhavhidhi wakapasa mwana wake Soromoni zano rekuti: “Bamba kuti upangidze kuti uri mwanarume.” (1 Mad. 2:1-3) Zano iri rinokosha ku anarume ese anoda kugara Akristu akakura pakunamata. Ngokudaro, awona anodikana kufundira kuteerera mitemo ya Djehovha uye kuseenzesa cokwadi cisikacinji co Bhaibheri mu upenyu wawo. (Ruka 2:52) Ngei zvecikosha kuti hama dze cidjaha dzigare Akristu akakura pakunamata?

2-3. Ngei zvecikosha kuti mudjaha agare Mukristu wakakura pakunamata?

² Mwanarume we Cikristu uno ubaba unokosha mu mhuri uye mu ungano. Hama dze cidjaha, pamweni imwimwi makamborangarira ngezve ubaba wamungakwanisa kugara nawo mu nguwa ye mberi. Pamweni imwimwi muno cinangwa cekuda kuzopinda mu basa re nguwa yakadzara, kugara mubati anoseenzera pedzepo kugara mukuru we ungano. Pamweni munoda kuwaka uye kuzobara ana. (Aef. 6:4; 1 Ti. 3:1) Kuti mugumire ubaba uwona uye mubudirire, munodikana kugara Mukristu wakakura pakunamata.b

³ Cinyi cingamubetserai kuti mugare Mukristu wakakura pakunamata? Pano zviro zvinokosha zvamunodikana kukwanisa kuita. Asi cinyi camunodikana kuita zvino kuti mberiyo muzokwanise kuita zvese zvinoenderana no ubaba wamunonga maanawo?

ZVAMUNGAITA KUTI MUGARE MUKRISTU WAKAKURA PAKUNAMATA

4. Mungagumira kupi miezaniso dzakanaka kuti muteedzere? (Onaiwo mufanikiso.)

⁴ Sanangurai miezaniso dzakanaka kuti mudziteedzere. Mu Bhaibheri mune miezaniso yakawanda yekuti madjaha angakwanisa kuiteedzera. Miezaniso iyona, ngeye anarume aida Djehovha uye akakwanisana no ubaba wakasiyana-siyana kuti acengete anhu ake. Imwimwiwo mungakwanisa kugumira miezaniso yakanaka ye Akristu amweni akakura pakunamata mu mhuri menyu kamare uye mu ungano. (Aheb. 13:7) Uye imwimwi muno muezaniso wakakwana wa Djesu Kristu. (1 Ped. 2:21) Pamunonyasa kufunda ngezve muezaniso iyona, nyasai kurangarira ngezve mawara akanaka anopangidzwa no anarume awona. (Aheb. 12:1, 2) Pedzepo onai kuti mungaateedzera kudini.

5. Mungasakurira kudini wara rekukwanisa kunyasa kurangarira, uye ngei izvona zvecikosha? (Pisarema 119:9)

⁵ Sakurirai uye “cengetedzai . . . marangariro.” (Zvie. 3:21) Mwanarume unokwanisa kunyasa kurangarira unotanga anyasa kurangarira asati asanangura zvaacaita. Hino, petai masimba kuti musakurire uye mugare munhu unokwanisa kunyasa kurangarira. Ngei? Ngekuti mu nyika makadzara no anarume anoita zvisananguro maererano nozvaanorangarira. (Zvie. 7:7; 29:11) Kusiya izvona, materevhizau, mafirme, internet no maredhi sosiyari angamupfuridzira uye angapingaidza marangariro uye maitiro enyu. Hino mungaitei kuti mugare munhu unokwanisa kunyasa kurangarira? Tangai ngekufunda zvokwadi zvisikacinji zvo Bhaibheri uye rangarirai kuti ngei izvona zvecibetsera. Pedzepo seenzesai zvokwadi izvi zvisikacinji pamunoita zvisananguro zvinozopfadza Djehovha. (Erengai Pisarema 119:9.) Pamunosakurira ungwaru uu unokosha wekuseenzesa zvokwadi zvisikacinji pamunoita zvisananguro, imwimwi munonga maita danho rakakura maningi rekuti muzogare Mukristu wakakura pakunamata. (Zvie. 2:11, 12; Aheb. 5:14) Parizvino onai kuti ungwaru ungamubetserai kudini pa migariro miiri inoteera: (1) mushobo wamunobata hanzvadzi (2) pamunoita zvisananguro zvakaringana no mushobo wekupfeka uye ciimo.

6. Kunyasa kukwanisa kurangarira kungabetsera kudini hama ye cidjaha kuti ireremedze hanzvadzi?

⁶ Kukwanisa kunyasa kurangarira kucamubetserai kuti mureremedze anakadzi. Apana cakashata kana hama ikasirira hanzvadzi uye kuda kunyasa kuiziya. Asi mudjaha uno ungwaru uye unonyasa kurangarira asati aita zvisananguro, aaiti zviro zvinoita kuti musikana arangarire kuti iyena uri kumuda kana mudjahewo asikazi kugadzirira kuti awakane naye. (1 Ti. 5:1, 2) Asi kana iyena ecinamorari no hanzvadzi, ucarangarira kudziirira muhambiro wakanaka we hanzvadziyo uye aazogari ari airi basi pasina munhu umweni wecitatu.—1 Ako. 6:18.

7. Kunyasa kukwanisa kurangarira kungabetsera kudini hama ye cidjaha kuti iite zvisananguro zvakanaka pakusanangura macira aangapfeka uye ciimo cayo?

⁷ Mushobo umweni ungapangidza kuti mudjaha unorangarira zvakanaka asati aita cisananguro, i mushobo wake wekupfeka uye ciimo cake. Kajinji, zviro zvakaringana no modha zvinogadzirhwa uye zvinobudiswa no anhu asikareremedzi Djehovha kana kuti anorarama upenyu wakaringana no uhure. Marangariro awo e uhure anooneka pa macira awo anobata maningi kana kuti, macira asikapangidzi pamhene kuti ngee mwanarume here kana kuti ngee mwanakadzi. Pakusanangura zvekupfeka, mudjaha urikuedza kugara Mukristu wakakura pakunamata unodikana kutungamirirhwa ngo zvokwadi zvisikacinji zvo Bhaibheri uye ngo miezaniso dzakanaka mu ungano. Iyena ungadzibvunzisa kuti: ‘Zvisananguro zvangu zvinopangidza kuti ndino marangariro akanaka uye kuti ndinokoshesa zvinorangarirhwa no amweni here? Mushobo wandinopfeka uye ciimo cangu zvinoita kuti amweni andiwone hinga museenzi wa Djehovha here?’ (1 Ako. 10:31-33; Tito 2:6) Mudjaha unonyasa kurangarira zvakanaka ngezve nyaya idzi unoreremedzwa haiwa basi no ungano asiwo na Baba edu e kudenga Djehovha.

8. Hama ye cidjaha ingaitei kuti igare munhu unothembeka?

⁸ Garai munhu unothembeka. Mudjaha unothembeka unocengeta zvakana ubaba wake. (Ruka 16:10) Rangarirai ngezve muezaniso wakakwana wa Djesu. Iyena aicengeta zvakanaka ubaba wake. Kusiya izvona, iyena aiita mabasa ese aaipaswa na Djehovha kunyazi pazvaishupha kuita izvona. Iyena aida anhu—maka-maka afundi ake uye ainga akagadzirira kuafira. (Juau 13:1) Imwimwi mungateedzerawo Djesu ngekuseenza no simba kuti mukwanise kuita ubaba upi hawo wamungapaswa. Kana musikazii zvokuita, dzidodosei uye kumbirai rubetso re hama dzagara no basa. Musambogudzikane ngekuita zviro padoko. (Aro. 12:11) Pane kudaro, itai basa ramunonga mapaswa hinga murikuitira “Djehovha, haiwa anhu.” (Ako. 3:23) Zviri pamhene kuti imwimwi muri munhu usikazi kukwana, ndiyo ndaa garai no maonero ari pakati no pakati uye tenderai zvishaishi zvamunonga maita.—Zvie. 11:2.

FUNDIRAI MABASA ANOBETSERA

9. Ngei hama ye cidjaha yecidikana kufundira kuita mabasa amweni anobetsera?

⁹ Kuti mugare Mukristu wakakura pakunamata, munodikana kufundira kuita mabasa anobetsera. Mabasa awona acamubetserai kuti mucengetedze ubaba wamunawo mu ungano, muone basa ricamubetserai kuti mudziriritire uye muriritire mhuri yenyu uyewo acamubetserai kuti mugare no ushamwari wakanaka no anhu amweni. Parizvino, ngationei mabasa manganani amungafundira kuita.

10-11. Hama ye cidjaha ingabetsereka kudini pacayo uye ingabetserawo kudini ungano kana ikakwanisa kuerenga uye kutara? (Pisarema 1:1-3) (Onaiwo mufanikiso.)

¹⁰ Fundirai kuerenga no kutara zvakanaka. Bhaibheri rinoti kuerenga Soko ra Mwari nokunyasa kurangarira mazuwa ese zvinoita kuti munhu akwanise kupfara uye abudirire pa zvese zvaanoita. (Erengai Pisarema 1:1-3.) Kuerenga Bhaibheri mazuwa ese kucamubetserai kuti munyase kuziya marangariro a Djehovha awo acamubetsera kuti murangarire zvakanaka, mugare no ungwaru uye mufundire kuseenzesa mazano e Bhaibheri. (Zvie. 1:3, 4) Mwanarume unokwanisa kuita izvona, unokosha maningi mu ungano. Ngei?

¹¹ Ungano inoda hama dzinonyasa kufundisa kuti dzifundise uye dzipase mazano anobva mu Bhaibheri. (Tito 1:9) Kana imwimwi mukaziya kuerenga no kutara zvakanaka, mucakwanisa kugadzirira zvakanaka mharidzo uye kupasa mhinduro dzicabambisa kutenda ke hama no hanzvadzi. Mucakwanisawo kutarira mafundo anokosha amunonga mecifunda pamunonga mecizwa mharidzo pa misangano kana kuti pa magungano. Mafundo aya acabambisa kutenda kenyu uye kubambisa hama no hanzvadzi.

12. Cinyi cingamubetserai kuti mukwanise kucedza no amweni zvakanaka?

¹² Ziyai mushobo wakanaka wekucedza no amweni. Mukristu unodikana kufundira kucedzesana zvakanaka no amweni. Mwanarume unokwanisa kucedzesana zvakanaka unonyasa kupurutana uye unokwanisa kuzwisisa marangariro uye mazwiro e amweni. (Zvie. 20:5) Iyena unokwanisawo kuzwisisa mushobo we kureketa we anhu, zvakaita hope yawo uye mushobo urikuita mwiri wawo. Imwimwi amungakwanisi kufunda zvese izvi kana mukatama kupedza nguwa no amweni. Kana mukagara mecicedza nguwa dzese meciseenzesa zvigadzirhwa zve magetsi zvakaita hinga email no mamesaji, zvicapungura kukwanisa kenyu kucedzesana no amweni hope no hope. Hino edzai kupsvaka mikana kuti mugare no anhu uye mukwanise kucedza nawo.—2 Juau 12.

13. Ciro cipi cimweni caizonga cakanaka kuti mudjaha afundire? (1 Timoti 5:8) (Onaiwo mufanikiso.)

¹³ Fundirai kudziriritira. Mukristu wakakura pakunamata unodikana kufundira kudziriritira pacake uye kuriritirawo mhuri yake. (Erengai 1 Timoti 5:8.) Ku mbuto dzimweni madjaha angafundira kuita basa na baba awo kana kuti no munhu umweni we mu mhuri. Asi ku mbuto dzimweni mudjaha ungakwanisa kufundira kuita ciro kana kuti basa paanonga ari kucikora. Azvinei no mugariro wenyu, zvakanaka maningi kufundira zviro zvinozomubetserai kuona basa. (Zvii. 18:2, 3; 20:34; Aef. 4:28) Psvakai kuziikanwa hinga munhu unoseenza no simba uye unopedzesa zviya zvaatangisa. Kana mukaita kudaro zvicagara nyore kuti muone basa uye murumbwe muri pa basepo. Mawara uye mishobo yekuita zviro yatabhuya mu ndima dzadarika zvinokoshawo ku Mukristu kuti akwanise kuita ubaba waanozogara nawo mune ramangwana. Ngatione ubaba unganani wakhona.

GADZIRIRAI KUITIRA UBABA WAMUCAZOGARA NAWO

14. Hama ye cidjaha ingadzigadzirira kudini kuti iseenze mu basa re nguwa yakadzara?

¹⁴ Kuseenza mu basa re nguwa yakadzara. Hama dzakawanda dzakakura pakunamata dzakatanga kupinda mu basa re nguwa yakadzara padzainga dziciri madjaha. Kugara pionero kungabetsera mudjaha kuona kuti ungabata kudini anhu ese ngo mushobo wakanaka uye kuti ungaseenzesa kudini zvakanaka mare yaanoona uye osama kuigastari maningi. (Afi. 4:11-13) Mushobo wakanaka wekutangisa basa re mu nguwa yakadzara ngewe kugara pionero we rubetso. Hama dzakawanda dzakapedza nguwa yakawanda dzeciseenza hinga mapionero e rubetso, uye izvona zvakaita kuti awona agadzirire kugara mapionero e nguwa dzese. Basa re upiyonero ringakwanisa kufungura mikana yakawanda kuti museenze mu nguwa yakadzara, hinga muezaniso kuseenza pa basa rekuwaka kana kuti pa Bheteri.

15-16. Cinyi cingabetsera hama ye cidjaha kuti igare mubati anoseenzera kana kuti mukuru?

¹⁵ Mubati anoseenzera kana kuti mukuru. Zvaizonga zvakanaka kuti mwanarume wese mu ungano agare no cinangwa cekukwaniriswa kuti aitire zvakawanda hama no hanzvadzi ngekugara mukuru. Bhaibheri rinobhuya kuti anarume anopeta masimba kuti agare no ubaba uwona arikuseenza no simba kuti agare no “basa rakanaka.” (1 Ti. 3:1) Asati akwaniriswa kuti aseenze hinga mukuru, hama inodikana kumbokwaniriswa kuti iseenze hinga mubati anoseenzera. Abati anoseenzera anobetsera akuru pakucengeta hama dze mu ungano ngo mushobo wakasiyana-siyana. Akuru kunyazi abati anoseenzera ndi anhu anodzidodosa, anoseenzera hama no hanzvadzi uyewo ndi aparidzi anoshingaira mu basa re kuparidzira. Madjaha angakwaniriswa uye ogara abati anoseenzera kunyazi pakutanga ke udjaha wawo. Uye mubati anoseenzera wakanyasa kukwaniriswa ungakwanisa kugadzwa hinga mukuru kunyazi ari pakati pe makore 20.

¹⁶ Zvinyi zvamunodikana kuita kuti mugare mubati anoseenzera kana mukuru? Bhaibheri rino mundandanda we mawara amunodikana kugara nawo. Asi edzurirai kuti mawara awona anodikanwa kupangidzwa nge ndaa ye rudo ramunaro kuna Djehovha, ku mhuri yenyu uye ku ungano. (1 Ti. 3:1-13; Tito 1:6-9; 1 Ped. 5:2, 3) Petai masimba zvecibva pa mwoyo kuti muzwisise zvinobatanidzwa pa wara rimwe na rimwe. Kusiya izvona, namatai mecikumbira rubetso ra Djehovha kuti mukwanise kugara no mawara awona.c

17. Hama ye cidjaha ingadzigadzirira kudini kuti igare mwamuna wakanaka kana kuti musoro we mhuri? (Onaiwo mufanikiso.)

¹⁷ Mwamuna uye musoro we mhuri. Maererano no masoko a Djesu, Akristu anganani akakura pakunamata aizosanangura kurumbwa asikazi kuwaka. (Mat. 19:12) Asi kana imwimwi mukasanangura kuwaka munogara no ubaba wekugara mwamuna uye musoro we mhuri. (1 Ako. 11:3) Djehovha anoda kuti mwamuna ade mukadzi wake uye amuriritire panocokuita no zviro zvekunyama, zvemundangariro uye zvekumwiya. (Aef. 5:28, 29) Mawara ese uye mabasa ataona mu fundo ino akadai hingana kukwanisa kunyasa kurangarira, kureremedza anakadzi uye kuthembeka zvicamubetserai kuti mugare mwamuna uye musoro we mhuri wakanaka. Ngekuita izvona, imwimwi munonga makanyasa kugadzirira kuti mugare mwamuna uye musoro we mhuri.

18. Hama ye cidjaha ingadzigadzirira kudini kuti igare baba akanaka?

¹⁸ Baba. Mumasure mekucata pamweni imwimwi mucazogara baba. Zvinyi zvamungafundira na Djehovha zvinocokuita nokugara baba akanaka? Zviro zvakawanda. (Aef. 6:4) Djehovha ainga asikapsveruki kubvunza Mwana wake Djesu Kristu kuti aimuda uye aimupfarira. (Mat. 3:17) Kana imwimwi mukagara baba, musakanganwe kubvunza mwana wenyu kuti munomuda uye simbai mwana wenyu pese paya paanoita zviro zvakanaka. Abereki anoteedzera muezaniso wa Djehovha, anobetserawo ana awo kuti agare Akristu akakura pakunamata. Imwimwi mungagadzirira kuzogara baba akanaka ngekutanga zvino kubata zvakanaka anhu e mu mhuri yenyu uye hama dze mu ungano uye kuabvunza mushobo wamunoada uye wamunodada nawo. (Juau 15:9) Zviro izvi, ndizvo zvicamubetserai mune ramangwana kana mukagara mwamuna kana kuti baba. Asi dakara maguma kweneyo, edzurirai kuti imwimwi munokosha maningi kuna Djehovha uye munobetsera maningi mhuri yenyu uyewo ungano.

CINYI CAMUCAITA ZVINO?

19-20. Cinyi cingabetsera hama dze cidjaha kuti dzigare Akristu akakura pakunamata? (Onai foto ye pa kapa.)

¹⁹ Madjaha, zvinoda kupeta masimba kuti mugare Mukristu wakakura pakunamata. Imwimwi munodikana kuteedzera miezaniso yakanaka, kugara no wara rekukwanisa kunyasa kurangarira, kuthembeka, kukwanisa kuita mabasa acamubetserai uye kugadzirira kuti muzogare no ubaba mune ramangwana.

²⁰ Pamweni imwimwi mungadzirhya mwoyo ngekurangarira basa rese ramucagara naro mune ramangwana. Asi imwimwi mucazvikwanisa. Ezdurirai kuti Djehovha anoda maningi kumubetserai. (Isa. 41:10, 13) Zviri pamhene kuti hama no hanzvadzi dze mu ungano dzicamubetseraiwo. Kana imwimwi mukaita zvese hingana Mukristu wakakura pakunamata, mucagara no upenyu unopfadza uye mucagutsikana. Isusu tinomudai maningi imwimwi hama dze cidjaha! Mungagara no rugondo rekuti Djehovha acamukomborerai maningi pamunonga mecipeta masimba kuti mugare Akristu akakura pakunamata.—Zvie. 22:4.