Tingapsvaka Kudini Mazano Akanaka?

1. Maererano na Zvierengo 13:10; 15:22 tingaita kudini zvisananguro no ungwaru uye kuita kuti zvinangwa zvedu zvibudirire zvakanaka?

TESE isusu tinoda kuita zvisananguro zvakanaka uye tinodawo kuti zvinangwa zvedu zvinyase kubudirira. Bhaibheri rinotipangidza kuti tingaita kudini kuti izvona zviitike.—Erengai Zvierengo 13:10; 15:22.

2. Djehovha anogondesa kutiitirei?

² Zviri pamhene kuti Munhu wakanaka angatipasa mazano ndi Djehovha Baba edu. Iyena anotigondesa kuti: “Ndicakupasa zano ndakanyasa kukuringira.” (Pis. 32:8) Masoko awona anopangidza kuti Djehovha anoda kutipasa mazano akanakisisa—iyena anotipasa mazano aya kamare atinoda. Kusiya izvona, anotibetserawo kuseenzesa mazano awona.

3. Mu fundo ino ticadaira mibvunzo dzipi?

³ Mu fundo ino ticaona kuti Bhaibheri rinotibetsera kudini kudaira mibvunzo mirongomuna: (1) Mawara api andinodikana kugara nawo kuti ndinyase kukhorovhera mazano akanaka andinopaswa? (2) Ndiani angandipasa mazano akanaka? (3) Ndingapangidza kudini kuti ndinoda kupaswa mazano? (4) Ngei ndisikadikani kusiya kuti anhu amweni andiitire zvisananguro?

MAWARA API ANDINODIKANA KUGARA NAWO?

4. Mawara api atinodikana kugara nawo kuti tinyase kukhorovhera mazano akanaka?

⁴ Kuti tinyase kukhorovhera mazano akanaka atinopaswa, tinodikana kudzidodosa uye kugara no maonero ari pakati no pakati. Zvinokosha kutendera kuti isusu atizii zvese uye kuti tinoda rubetso kuti tikwanise kuita zvisananguro no ungwaru, paya patinobatana no mugariro wokuti atisati takambobatana nawo. Kana tikatama kudzidodosa uye tisina maonero ari pakati no pakati, Djehovha aazotibetseri. Mugumisiro wakhona ngewe kuti isusu atizoseenzesi zano ripi haro ratinopaswa mu Bhaibheri. (Mik. 6:8; 1 Ped. 5:5) Asi kana tikagara no mawara ekudzidodosa uye no maonero ari pakati no pakati, ticapurutana mazano atinogumira mu Bhaibheri uye ticaaseenzesa mu upenyu medu.

5. Zviro zvipi zvaizoitisa kuti Dhavhidhi adzikudze?

⁵ Rangarirai zvakaitika na Mambo Dhavhidhi. Iyena wakaita zviro zvakawanda zvinoshamisa, asi aazi kudzikudza. Ngo muezaniso, makore akawanda asati agara mambo, iyena wainga ano mbiri nge kugara muembi wakanaka zvekuti wakatopikwa kuti aembere mambo. (1 Sam. 16:18, 19) Mumasure mekuti wadzodzwa kuti agare mambo waizoteera, mwiya mucena wa Djehovha wakapasa Dhavhidhi simba. (1 Sam. 16:11-13) Iyena waizikanika maningi no Aisraeri nge kunyisa azondi ake kutobatanidzawo Goriyati, Mufiristiya wainga wakareba maningi uye wakabamba. (1 Sam. 17:37, 50; 18:7) Kudai Dhavhidhi wainga ari munhu unodzikudza, iyena waizorangarira kuti sezvo wainga waita zviro zvakawanda zvinoshamisa, wainga asikacadizve kupaswa mazano. Asi Dhavhidhi wainga asikarangariri kudaro.

6. Tinoziya kudini kuti Dhavhidhi waipfarira kutambira mazano? (Onaiwo pa kapa.)

⁶ Mumasure me kugara mambo, Dhavhidhi wakaita zviri zvese kuti agare dhuze no anhu aya aizomupasa mazano. (1 Mak. 27:32-34) Izvona azvishamisi ngekuti kunyazi asati agara mambo, Dhavhidhi wainga ano musambo we kuzwa mazano akanaka. Iyena wakatendera mazano haiwa basi e anarume asiwo mazano e mwanakadzi unozwi Abhigairi. Iyena waiga waka-wakwa na Nabhari, mwanarume unodzikudza, asikatendi uye asikareremedzi amweni. Kusiyana na Nabhari, Dhavhidhi waidzidodosa. Iyena wakateerera zano rakanaka raakapaswa na Abhigairi uye nge ndaa yazvo aazi kuita cishaishi cakakura.​—1 Sam. 25:2, 3, 21-25, 32-34.

7. Zviro zvipi zvatingafundira no muezaniso wa Dhavhidhi? (Muparidzi 4:13) (Onaiwo mifanikiso.)

⁷ Pano zvatingafunda no muezaniso wa Dhavhidhi. Nge muezaniso, pamweni pano ciro catinokwanisa kuita zvakanaka kana kuti tino ubaba pakati pe anhu amweni. Kunyazi zvakadaro, atidikani kurangarira kuti tinoziya zvese uye kuti atidikani kupaswa mazano. Kuitawo hingana Dhavhidhi, tinodikana kugara takagadzirira kuzwa zano rakanaka pasinei kuti riri kubva kuna ani. (Erengai Muparidzi 4:13.) Kana tikaita izvona, pamweni tinganzvenga zvishaishi zvaizotsukwarisa isusu uyewo no anhu amweni.

NDIANI ANGANDIPASA MAZANO AKANAKA?

8. Ngei Djonatani waizopasa mazano akanaka kuna Dhavhidhi?

⁸ Muezaniso wa Dhavhidhi ungatifundisazve zviro zvimweni. Iyena waipurutana mazano e anhu ainga ano ushamwari wakabamba na Djehohva uye ainyasa kuzwisisa zvinetso zvaaibatana nazvo. Ngo muezaniso, paaida kuziya kuti angaitei kuti agare ari mu runyararo na Mambo Sauri, Dhavhidhi wakapurutana mazano a Djonatani wekuti wainga ari mwana wa Sauri. Ngei Dhavhidhi waigonda kuti Djonatani waizomupasa mazano akanaka? Ngekuti pane kugara basi no ushamwari wakabamba na Djehovha, Djonatani wainyasawo kuziya baba ake Sauri. (1 Sam. 20:9-13) Tingateedzera kudini muezaniso wa Dhavhidhi?

9. Patinonga tecida mazano tingapsvaka ani? Pasai muezaniso. (Zvierengo 13:20)

⁹ Patinopsvaka mazano, zvinokosha kukumbira anhu aya ano ushamwari wakanaka na Djehovha uyewo ano esperiensiya no zviya zvatiri kubatana nazvo.a (Erengai Zvierengo 13:20.) Ngo muezaniso, ngatiti hama iri kupsvaka hanzvadzi yakanaka kuti iwakane nayo. Ndiani waizoipasa mazano akanaka? Shamwari isati yawaka ingakwanisa kuipasa mazano akanaka kana ecibva mu Bhaibheri. Asi, hameyo ingakwanisa kukumbira mazano akanyasa kunanga ku kazado yekuti inonyasa kuziya hameyo uye kazadoyo iri kuseenzera Djehovha ke kacinguwa yecipfara. Kazado iyona ingakwanisa kuibvunza haiwa basi kuti ingaseenzesa kudini mazano akanaka e mu Bhaibheri, asiwo maesperiensiya aakabatana nawo mu mucato mawo.

10. Pari zvino, ticaonei?

¹⁰ Isusu tafunda ngezve mawara mairi akanaka atinodikana kugara nawo uye taonawo kuti ndiani angatipasa mazano akanaka. Parizvino, ticaona kuti tingapangidza kudini kuti tinoda kupaswa mazano uye kuti ngei atidikani kusiya kuti anhu amweni atiitire zvisananguro.

NDINGAPANGIDZA KUDINI KUTI NDINODA KUPASWA MAZANO?

11-12. (a) Cinyi catisikadikani kuita? (b) Paainga ecida kuita cisananguro cinokosha, Mambo Robhoamu wakaitei?

¹¹ Nguwa dzimweni, munhu ungaita hingana kuti uri kupsvaka mazano asi zvezvirokwazvo iyena unonga atoita cisananguro uye unonga ecida munhu kuti atenderane no zvaanonga asanangura. Munhu wakadaro, aazi kugadzirira kuti apaswe mazano. Muezaniso wakashata wa Mambo Robhoamu ungaseenza hingana ngwadzo ku aya ano musambo uwona.

¹² Robhoamu wakagara mambo mumasure me kufa ka Soromoni baba ake. Pa nguwa iyona, dzinza ra Israeri rainga rino zviro zvakawanda zvakanaka. Asi anhu airangarira kuti Soromoni wainga aita kuti awona aseenze maningi. Anhu akaenda kuna Robhoamu uye akadeketera kuti iyena aarerusire. Robhoamu wakakumbira kacinguwa kuti aite cisananguro. Iyena wakatangisa zvakanaka ngekuti pakutanga wakaenda kookumbira mazano ku anarume akura ekuti ainga akatobetserawo Soromoni. (1 Mad. 12:2-7) Asi iyena aazi kuda kuteerera mazano e anarume aya. Ngei wakaita izvona? Kodi zvinoreya kuti Robhoamu wainga waita cisananguro asi waida munhu kuti atenderane no cisananguro icona here? Kana zviri izvona, iyena wakazoona zvaaida paakapaswa mazano no shamwari dzake dzainga dziri madjaha. (1 Mad. 12:8-14) Robhoamu wakabvunza anhu zviya kamare zvaainga abvunzwa no shamwari dzake. Mugumisiro wakhona ngewe kuti akawanda akamupandukira uye akasanangura mambo umweni. Hino, kubvira ipona kuenda mberi, Robhoamu waindobatana no zvinetso.—1 Mad. 12:16-19.

13. Tingaziya kudini kuti takagadzirira kutambira mazano?

¹³ Tingafundei no zviya zvakaitika na Robhoamu? Patinokumbira mazano, tinodikana kugara takagadzirira kupurutana aya anotipasa mazano. Mushobo wekuziya kuti takagadzirira kupaswa mazano ngewe kudzibvunzisa kuti: ‘Inini ndinokumbira mazano pedzepo ndoramba ngekuti andizvopi zvandaida kuzwa here?’ Ngatione muezaniso unoteera.

14. Cinyi catinodikana kuedzurira mumasure me kupaswa mazano? Pasai muezaniso. (Onaiwo foto.)

¹⁴ Rangaridzai kuti hama yakwanisa kuona basa rakanaka maningi. Isati yatenda basero, iyona inopsvaka mukuru we ungano kuti ikumbire mazano. Hameyo inobhuya kuti basero rinoita kuti iyona imbogare kure no mhuri yayo. Mukuruwo unoibvunza kuti maererano no Bhaibheri, musoro we mhuri uno ubaba wakakura we kuriritira mhuri yake panecokuita no zvekunamata. (Aef. 6:4; 1 Ti. 5:8) Hino, ngatiti hameyo aitenderani no mazano ayapaswa no mukuruwo uye inurumbwa yecikumbira amweni dakara yagumira munhu unobhuya kuti inodikana kutenda basero. Kodi hameyo irikupsvakadi mazano kamare, kana kuti iyona yaita kare cisananguro uye iri kupsvaka munhu unotenderana no cisananguro cayaita? Tinodikana kuedzurira kuti mwoyo wedu ungakwanisa kuticengedza. (Djer. 17:9) Pamweni paya tinotambira mazano ekuti atiapfariri, asi nguwa dzimweni ndiwona kamare atinodikana kuteerera.

NDINODIKANA KUKUMBIRA AMWENI KUTI ANDIITIRE CISANANGURO HERE?

15. Tinodikana kungwarirei uye ngei?

¹⁵ Umwe na umwe wedu uno ubaba we kudziitira zvisananguro. (Aga. 6:4, 5) Hingana zvataona, munhu akangwara asati aita cisananguro anopsvaka mazano mu Soko ra Mwari uye ku hama dzakakura pakunamata. Asi tinodikana kungwarira kuti tisakumbire amweni kuti atiitire cisananguro. Amweni anoita izvona nge kubvunzisa munhu waanoreremedza kuti: “Kudai muri imwimwi maizoitei?” Amweni anoteedzera zvinoizwa no amweni asati anyasa kurangarira.

16. I nyaya ipi yakamuka ku Korinti inocokuita no nyama yakabairhwa zvidhori, uye ndiani wainga uno ubaba we kusanangura kuti angarhya here kana kuti haiwa? (1 Akorinti 8:7, 10:25, 26)

¹⁶ Rangarirai zvakaitika mu zana re makore rekutanga. Ku ungano ye ku Korinti, pakamuka nyaya yekuti hama dzingarhya here kana kuti haiwa nyama yekuti pamweni yakabairhwa zvidhori. Pauro wakaatarira kuti: ‘Tinoziya kuti cidhori aciseenzi ciro pa nyika uye kuti akuna Mwari umweni kunza ke umwe basi.’ (1 Ako. 8:4) Maererano no izvona, anganani mu ungano akasanangura kuti angarhya nyama yekuti pamweni yakabairhwa zvidhori mumasure mazvo yotengeswa ku bazari. (Erengai 1 Akorinti 8:7; 10:25, 26) Cisananguro icona cainga ciri co munhu ega. Pauro aazi kumbopasa mazano Akorinti kuti aitire amweni zvisananguro kunyazi kuabvunza kuti ateedzere zviya zvaiizwa nge amweni. Umwe na umwe wawo waidikana ‘kudzidairira kuna Mwari.’—Aro. 14:10-12.

17. Zvinyi zvingaitika kana tikandoteedzera basi zvisananguro zve anhu amweni? Pasai muezaniso. (Onaiwo mafoto.)

¹⁷ Zvakaitika ku Korinti zvingaitikawo kudini nyamasi uno? Rangarirai zvinocokuita no mafrasau e ngazi. Mukristu umwe na umwe unodikana kudzisanangurira ega kuti ungatendera here kana kuti haiwa mafrasau aya.b Izvirokwazvo kuti nyaya ii ingashupha kuzwisisa. Asi kuita cisananguro cakaita hingana ici, cinotsamira pa ubaba we Mukristu umwe na umwe. (Aro. 14:4) Kana tikateedzera zvisananguro zve anhu amweni, zvingaita kuti hana yedu isaseenze zvakanaka. Isusu tingagara anhu ano ungwaru kana tikaita zvisananguro zvedu kamare maererano no Bhaibheri. (Aheb. 5:14) Tinodikana kukumbira mazano ku Mukristu wakakura pakunamata mumasure mekuti taitei? Mumasure mekuti isusu tapsvakisisa ngezve nyaya iyona asi tinonga tecida rubetso kuti tinyase kuzwisisa zvokwadi zvisikacinji zve Bhaibheri zvinocokuita no nyaya iyona.

RUMBWAI MECIPSVAKA MAZANO

18. Djehovha anotiitirei?

¹⁸ Djehovha anopangidza kuti anotigonda nge kutisiya kuti tiite zvisananguro zvedu tega. Iyena anotipasa Soko rake Bhaibheri uyewo shamwari dzino ungwaru dzinotibetsera kuzwisisa kuti tingaseenzesa kudini zvokwadi zve Bhaibheri. Nge mushobo uwona, Djehovha anoticengeta hingana Baba ano rudo. (Zvie. 3:21-23) Zvinyi zvatingaita kuti tipangidze kuti tinotenda?

19. Tingarumbwa kudini tecipfadza Djehovha?

¹⁹ Rangaridzai zvinoteera. Abereki anopfarira kuona ana awo ecigara aseenzi a Djehovha akakura pakunamata, ano ungwaru uye anobetsera amweni. Nge mushobo umwewo, Djehovha anopfara maningi paanotiona tecigara Akristu akakura pakunamata, anopsvaka mazano uye anoita zvisananguro zvinomukudza.