Tingapasa Kudini Mazano Akanaka

1. Ndiyani unodikana kupasa mazano uye ngei?

IMWIMWI munopfarira kupasa mazano here? Ku anganani zvinoaitira nyore kupasa mazano. Asi amweni anothya uye aazwi akasudzunuka kuita izvona. Ngo mushobo uri wese, nguwa dzimweni tese isusu tinodikana kupasa mazano. Ngei? Ngekuti Djesu akabhuya kuti ateeri ake e zvirokwazvo, aizozikanika nge rudo raanopangidzira ku umwe na umwe wawo. (Juau 13:35) Uye umwe we mushobo we kupangidzira rudo irona, ngewe kupasa mazano hama ne hanzvadzi dzedu paya pa zvinodikanika. Soko ra Mwari rinoti: “Ushamwari wakanaka” unobva pa kupasa “mazano no mwoyo wese.”—Zvie. 27:9.

2. Akuru anodikana kuziya kuitei uye ngei? (Onai bokisi rakazwi “Mazano Atinopaswa pa Musangano we Pakati pe Sumana.”)

² Zvinokosha maningi kuti akuru aziye kupasa mazano akanaka. Djehovha na Djesu, akasanangura anarume aya kuti aushe ungano. (1 Ped. 5:2, 3) Uye umwe we mushubo waanoita izvona, ngewe kuita mharidzo dzinobatanidza mazano e Bhaibheri mu ungano. Iwona anodikanawo kupasa mazano kubira rimwe na rimwe kutobatanidzawo aya ekuti akabuda mu ungano. Akuru uye tese isusu, tingapasa kudini mazano akanaka?

3. (a) Tingafundira kudini kupasa mazano akanaka? (Isaya 9:6; onai bokisi rakazwi “Teedzerai Djesu Pamunopasa Mazano.”) (b) Mu fundo ino ticaonei?

³ Tingakwanisa kufundira kupasa mazano akanaka nge kufunda miezaniso ye anhu anorekethwa mu Bhaibheri maka-maka wa Djesu Kristu. Umwe we mushobo wakadainzwa Djesu ngewe kuti: “Mupi Wakanaka we Mazano.” (Erengai Isaya 9:6.) Mu fundo ino, ticaona kuti tingaita kudini kuti tipase mazano akanaka ku aya anonga atikumbira uye ku aya anonga asikazi kutikumbira. Uyewo ticaona kukosha kekupasa mazano pa nguwa yakasisira uye ngo mushobo wakanaka.

PATINOPASA MAZANO KU AYA ATIKUMBIRA

4-5. Munhu paanotikumbira mazano, tinodikana kudzibvunzisei? Pasai muezaniso.

⁴ Kana munhu akatikumbira mazano, cinyi catinodikana kutanga taita? Pamweni imwimwi mungazwa kupfara ngekuti munhu iyena amugondai uye mungada kumupasa mazano ciriporipoco. Asi cekutanga tinodikana kudzibvunzisa kuti: ‘Kodi inini ndiri munhu wakasisira kuti ndipase mazano ngezve nyaya ii here?’ Nguwa dzimweni, mushobo wakanaka we kubetsera ngewe kutama kupasa mazano, asi kumupangidza munhu wakasisira unonyasa kuziya zvakanaka ngezve nyaya iyona.

⁵ Ngo muezaniso, rangaridzai kuti shamwari yenyu ye padhuze yaziya kuti ino cinetso cakakura ce uthongo. Pedzepo iyona inobhuya kuti irikupsvakisisa ngezve mushobo we kuraphwa uye inomukumbirai kuti muibetsere kuti ngaupi mushobo waangasanangura. Zvingaita kuti imwimwi mungaona mushobo wakanaka we kuraphwa, asi imwimwi amuna zvikwaniriso zvekurapa kana kuti amuzi kurowedzwa pa kurapa nhenda iyona. Kana zviri izvona, mushobo wakanaka wamungabetsera nawo shamwari yenyu, ngewe kumubetsera kupsvaka munhu unozvikwaniriso zve kurapa nhenda iyona.

6. Tisati tapasa mazano zvinyi zvatinodikana kutanga taita?

⁶ Kunyazi meciona kuti munokwanisa kupasa mazano akanaka ngezve nyaya imwe, pamweni zvakanaka kumboetsera kekacinguwa musati madaira munhu uya wamukumbirai mazano. Ngei? Zvierengo 15:28 inobhuya kuti: “Munatsi unotanga amborangarira asati adaira.” Asi zvakadini meciona kuti munoziya mhinduro yakhona? Kunyazi zvakadaro, zvakanaka kumbopsvaka kacinguwa kekupsvakisisa, kuita munamato uye kunyasa kurangarira. Ngekudaro, imwimwi mucagara ne rugondo rekuti mhinduro yenyu inopindirana no zviya zvinorangarirhwa na Djehovha ngezve nyaya iyona. Nge muezaniso, onai zvakaitika no muphorofita Natani.

7. Tinofundei no zvakaitika no muphorofita Natani?

⁷ Ecireketa no muphorofita Natani, Mambo Dhavhidhi wakabhuya kuti waida kuwakira Djehovha tempro. Ciriporipoco Natani wakatendera ecibhuya kuti cainga ciri cisananguro cakanaka. Asi Natani waidikana kutanga ambobvunzisa Djehovha ngezve nyaya iyona. Ngei? Ngekuti Djehovha ainga asikadi kuti Dhavhidhi awake tempro. (1 Mak. 17:1-4) Muezaniso uu unopangidza kuti kana tikakumbirhwa zano, ciro cakanaka catingaita ngece ‘kunonoka kureketa.’—Tig. 1:19.

8. Cikonzero cipi cimweni catinaco kuti tingwarire tisati tapasa mazano?

⁸ Rangarirai ngezve cikonzero cimweni catinaco kuti tingwarire tisati tapasa mazano ku munhu: Ngatiti mumasure mekuti tapasa mazano, munhu oita cisananguro cinomuunzisira mugumisiro wakashata. Nde dii rimweni, ndaa yaizogarawo yedu. Zvezvirokwazvo tino zvikonzero zvakawanda kuti tinyase kumborangarira tisati tapasa zano.

PATINOPASA MAZANO KU AYA ASIKAZI KUTIKUMBIRA

9. Asati apasa mazano, akuru anodikana kugara no rugondo rei? (Agaratiya 6:1)

⁹ Nguwa ne nguwa akuru anodikana kupasa mazano ku hama kana kuti hanzwadzi yekuti yaakuhamba mu “gwanza rakashata.” (Eregai Agaratiya 6:1.) Munhu angakwanisa kuita zvisananguro zvisikazi kunaka “zvekuti no kuhamba ke nguwa ungakwanisa kuita citema cakakura.” Hino, cinangwa ce akuru ngece kubetsera munhu iyena kuti arumbwe ari mugwanza rinomuendesa ku upenyu usikaperi. (Tig. 5:19, 20) Asi kuti zano rigare rakanaka, akuru anodikana kugara no rugondo rokuti munhu iyena waita zvisananguro zvisikazi kunaka. Akuru anoziyawo kuti kunyazi munhu akaita cisananguro cakasiyana no cawo, azvireyi kuti iyena unonga eciita ciro cisikapfadzi Djehovha. (Aro. 14:1-4) Asi zvakadini kana akuru akaziya kuti hama irikuhambadi mugwanza rakashata uye eciona kuti anodikana kumupasa mazano? Awona angazviita kudini?

10-12. Akuru anodikana kuitei, paanonga ecipasa mazano ekuti aazi kukumbirhwa? Panganidzai. (Onaiwo foto.)

¹⁰ Zvingashupha ku akuru kupasa mazano ku aya asikazi kuakumbira. Ngei? Muphostori Pauro wakabhuya kuti pamweni munhu aazozii kuti unodikana kupaswa mazano. Hino ciro cekutanga cinodikana kuizwa no akuru, i kugadzirira munhuwo kuti azokwanise kutambira mazano.

¹¹ Kupasa mazano atisikazi kukumbirhwa zvingaita hingana kusima pa mbuto yakabamba. Asati asima, murimi unodikana kutanga agadzirira paacasima. Ngekudaro mbuto iyona icanyasa kusisira kuti pasimwe. Pakupedzesera murimi unodirira mbeu kuti ikure. Nge mushobo umwewo, asati apasa zano raasikazi kukumbirhwa, mukuru unodikana kutanga kugadzirira munhuwo. Ngo muezaniso, iyena unoetsera nguwa yakasisira uye obvunza hameyo kuti unoida maningi uye unoda kucedza nayo. Kana munhu anopasa mazano ecizikanika hingana uno rudo uye wakanaka, zvicaita nyore kuti amweni atende mazano ake.

¹² Paanonga ecicedza, mukuruwo unorumbwa ecibetsera munhuwo nge kumuedzurira kuti tese isusu tinoita zvishaishi uye nguwa dzimweni tinodikana kupaswa mazano. (Aro. 3:23) No izwi rakanyasa kuterema uye no rureremedzo, mukuru unoseenzesa Bhaibheri kuti apangidze nge mushobo wakadjeka ku hamewo kuti iyona yahamba kudini mugwanza rakashata. Mumasure mekuti iyona yazwisisa kuti yaita ciro cakashata, mukuru “unosima mbeu” nge kumupanganidzira nge mushobo uri nyore kuti zvinyi zvaangaita kuti agadzirise cishaishi caaita. Pakupedzesera, mukuru “unodirira”mbeu ngekunyasa kubhuya zviro zvakanaka zvinoizwa no hama iyona uye kuita munamato pamwepo nayo.—Tig. 5:15.

13. Akuru angagara kudini no rugodo rokuti munhuwo wazwisisa zanoro?

¹³ Nguwa dzimweni, zvinobhuiwa no munhu unopasa zano uye nokuzwisisa kunoita munhu unopaswa zano, zvingagara zviro zviri zvakasiyana. Akuru anodikana kuitei kuti izvona zvisaitike? No unaki, akuru angaita mibvunzo ku munhuwo kuti aone kuti iyena azwisisa zanoro here uye kuti zvinyi zvaangaita kuti ariseenzese.—Mup. 12:11.

KUPASA ZANO PA NGUWA YAKASISIRA UYE NGO MUSHOBO WAKANAKA

14. Ngei atidikani kupasa mazano patinonga takanyangadzwa? Panganidzai.

¹⁴ Tese isusu tiri anhu asikazi kukwana, ndiyo ndaa, nguwa dzimweni tingaita kana kubhuya zviro zvinonyangadza amweni. (Ako. 3:13) Kunyazi Bhaibheri rinotobhuyawo kuti isusu tinganyangadzwa kana kuti tinganyangadzisawo amweni. (Aef. 4:26) Asi atidikani kupasa munhu zano takanyangadzwa. Ngei? Ngekuti “kunyangadzwa ko munhu akuiti kuti pagare no unatsi wa Mwari.” (Tig. 1:20) Kana tikapasa zano takanyangadzwa tingatoita kuti zviro zvitobambirire kushata. Izvona azvireyi kuti atidikani kureketa zvatiri kurangarira kana kuti mazwiro edu ku munhu uya watisiya takanyangadzwa. Asi ticakwanisa kureketa zvakanaka kana tikaetsera kuti tirekete pa nguwa yatinonga takaterama. Tingafunda no muezaniso wa Eriyu wakapasa zano rakanaka kuna Djobo.

15. Tinofundei no mauezaniso wa Eriyu? (Onaiwo mufanikiso.)

¹⁵ Eriyu wakapedza mazuwa akawanda ecipurutana Djobo paaiedza kudzidziirira pakupumbwa kaiizwa no anarume atatu. Eriyu waizwira usisi Djobo. Asi Djobo wakaedza kupangidza kuti iyena wainga asina ndaa uye wakazotoreketa zviro ngezva Djehovha zvainga zvisiripi zvecokwadi. Nge ndaa yazvo, Eriyu wakanyangadzwa maningi. Kunyazi zvakadaro, iyena wakaetsera nguwa yake uye wakareketa ngo mushobo wakaterama uye no rureremedzo ecipasa mazano Djobo. (Djobo 32:2; 33:1-7) Muezaniso wa Eriyu unotifundisa fundo rinokosha rekuti: Nguwa yakanaka yekuti tipase zano ndi paya pekuti takaterama uye mushobo wakanaka wekuzviita nge we rudo uye rureremedzo.—Mup. 3:1, 7.

RUMBWAI MECIPASA UYE MECITENDA MAZANO

16. Zvinyi zvatinofunda pana Pisarema 32:8?

¹⁶ Tsamba inowakira funo ino, inoti: ‘Djehovha anotipasa mazano akanyasa kutiringira.’ (Erengai Pisarema 32:8.) Izvona zvinopangidza kuti Djehovha nguwa dzese arikutibetsera. Iyena aatipasi basi mazano asi anotibetsera kuaseenzesa. Uu muezaniso wakanaka maningi katiri! Kana imwimwi mukagara no mukana we kupasa mazano, teedzerai Djehovha nge kurumbwa makaringira munhu iyena mecimupasa rubetso ripi haro kuti iyena aite zvisananguro zvakanaka.

17. Ngei zvinokosha kugara no akuru anotipasa mazano akananga uye anotsamira mu Bhaibheri? (Isaya 32:1, 2)

¹⁷ Kubvira zvino kwenda mberi, tinodikana kupasa uye kutambira mazano akanaka. (2 Ti. 3:1) Akuru anopasa mazano akananga uye anotsamira mu Bhaibheri, akaita hingana “mukandira we mvura munyika isina mvura.” (Eregai Isaya 32:1, 2.) Tinotenda maningi shamwari dziya dzisikathyi kutibvunza zviya kamare zvatinodikana kuzwa, masoko awo akaita hingana “masaa e oro ari mu paratu ye prata.” (Zvie. 25:11) Hino tese ngatirubwe tecisakurira ungwaru watinoda kuti tipase uye titambire mazano akanaka.