“Dainzai Akuru”

1. Tinoziya kudini kuti mabira a Djehovha anokosha kaari?

MABIRA A DJEHOVHA anokosha maningi kaari, zvekuti iyena akaripa mutengo wakakura maningi nge kupasa upenyu we mwana wake anodiwa. Iyenawo akagadza akuru kuti aacengete. (Zvii. 20:28) Djehovha anoda kuti mabira ake abathwe no rudo. Eciteerera mutemo wa Djesu, akuru anobambisa hama uye anodzidziirira pa ngozi inocokuita no kumwiya.—Isa. 32:1, 2.

2. Maererano na Ezekiyeri 34:15, 16, Djehovha anonyanya kunetseka maningi nani?

² Djehovha anonetseka no mabira ake ese, asi iyena anonetsekawo maningi no aya anobatana no zvinetso zvinocokuita no kumwiya. Anganani anonetseka nge ndaa ye zvishaishi zvaakaita uye Djehovha anoseenzesa akuru kuti aabetsere. (Ereengai Ezekiyeri 34:15, 16.) Asi Djehovha anoda kubetsera tese isusu pese paya patinoda rubetso. Pamigariro yakadaro, pane kuita basi munamato we mwoyo wese tecikumbira rubetso kuna Mwari, isusuwo tinodikana kupsvaka rubetso re “aushi uye afundisi” mu ungano.—Aef. 4:11, 12.

3. Ngei fundo ino icabetsera isusu tese?

³ Mu fundo ino, ticafunda kuti Djehovha anoseenzesa kudini akuru kuti abetsere pane cokuita no kumwiya aya anonga ecida. Ticaona mhinduro dze mibvunzo idzi: Ndipapi patinodikana kukumbira rubetso ku akuru? Ngei tecidikana kuita izvona? Uye awona anotibetsera kudini? Kunyazi zvino ushamwari wenyu na Djehovha ucakabamba, mhinduro dze mibvunzo idzi dzingabetsera isusu tese kuti titunhudzire kutenda kedu pa mushobo unoseenzesa Djehovha akuru uye izvona zvingakwanisa kuponesa upenyu wedu.

NDIPAPI PATINODIKANA KUKUMBIRA “RUBETSO KU AKURU”?

4. Tingaziya kudini kuti Tiyago 5:14-16, 19, 20 irikureketa ngezve nhenda inocokuita no kumwiya? (Onaiwo mufanikiso.)

⁴ Mufundi Tiyago wakapanganidza kuti Djehovha anoseenzesa kudini akuru kuti atibetsere. Tiyago wakatara kuti: “Pakati penyu pano munhu ari kurhwara here? Ngaadainze akuru e ungano.” (Eregai Tiyago 5:14-16, 19, 20.) Izvona zvinopangidza kuti Tiyago wainga ecireketa ngezve nhenda ye kumwiya. Cikonzero cinoita kuti tirangarire kudaro, nge cekuti munhu iyena urikurhwara unokohomedzeswa kuti adainze akuru haiwa mamedhiko. Kusiya izvona, zvinobvira kurangarira kuti zvinocokuita no nhenda ye kumwiya ngekuti kuraphwa ikona kungabatanidza kurekererhwa ke zvitema. Pamigariro minganani matanho anotorhwa kuti paraphwe nhenda ye kumwiya uye no nhenda ye mu mwiri zvakaezana. Patinonga tecirhwara mu mwiri, isusu tinoenda kuna medhiko uye tinopanganidza mushobo watiri kuzwa uye tinoteerera zviya zvaanonga atibvunza. Nge mushobo umwewo, patinonga tecirhwara mu mwiya, isusu tinodikana kupsvaka mukuru kuti timupanganidzire mugariro wedu uye tinodikana kuita maererano no zano re Bhaibheri raanotipasa.

5. Tingaziya kudini kuti tirikurhwara panocokuita no kumwiya?

⁵ Zvatinoerenga pana Tiyago kapituro 5 zvinotikohomedzesa kuti tipsvake akuru pa nguwa ipi hayo yatinonga tecizwa kuti tino cinetso panocokuita no kumwiya. Asi zvino ungwaru wakakura kupsvaka rubetso tisati taita kuti ushamwari wedu na Djehovha ugume pa ngozi yakakura! Bhaibheri rinotingwadza kuti kana tikatama kungwarira tingakwanisa kupedzesera tadzicengedza panocokuita no kumwiya tecirangarira kuti takabamba nepoo takaremba. (Tig. 1:22) Akristu anganani eku Sardhi akaita cishaishi icona, ndiyo ndaa Djesu akaangwadza panocokuita no kumwiya. (Zvak. 3:1, 2) Umwe we mushobo wekuongorora mugariro wedu we kumwiya ngewe kuezanisa mupfaro wedu watinawo zvino wekuseenzera Djehovha no we kare. (Zvak. 2:4, 5) Tingadzibvunzisa kuti: ‘Kodi mupfaro wangu we kuerenga Bhaibheri uye kunyasa kurangarira wapunguka here? Kodi ndinosorovha misangano miganani uye pandinoenda ndinonga ndakanyasa kugadzirira here? Kodi kushingaira kangu mu basa rekuparidzira uciri mushobo umwewo hingana kare here? Kodi zvino ndangariro dzangu dzinocokuita no kuaraidzwa, kugara no mare kana kubatikana no zvimweniwo here?’ Kana imwe ye mhinduro idzi iri honde, izvona zvinopangidza kuti muno pamakarembera uye mukatama kupagadzirisa mungakwanisa kubambirira. Kana tisiripi kukwanisa kugadzirisa tega cinetso ici kana kuti takaita ciro cekuti Djehovha aacitenderi tinodikana kupsvaka akuru uye kukumbira rubetso.

6. Munhu waita citema cakakura unodikana kuitei?

⁶ Zviri panhene kuti munhu unonga aita citema cakakura, cingaita kuti iyena abviswe mu ungano, unodikana kupsvaka akuru. (1 Ako. 5:11-13) Munhu upi hake unonga aita citema cakakura unoda rubetso kuti ahwirirezve kugara no ushamwari na Djehovha. Kuti muone rurekerero ra Djehovha peciseenzeswa rusudzunuro mundikana kuita ‘mabasa anopangidza kuti macinyuka.’ (Zvii. 26:20) Mabasa awona anobatanidza kupanganidza citema ku akuru.

7. Ndiyanizve unoda rubetso re akuru?

⁷ Akuru aandobetseri basi aya akaita citema cakakura; asi anobetserawo aya akaremba pa kunamata. (Zvii. 20:35) Ngo muezaniso, pamweni imwimwi muri kunetseka meciona kuti zviri kushupha maningi kamuri kurhwisana no zvido zvakashata. Cinetso icona cingamushuphirai maningi kana musati mafundira cokwadi, imwimwi maiseenzesa zvinoraradzisa, maiona pornografiya kana kuti mairarama upenyu we kuita uhure. Asi imwimwi amudikani kurhwisana nazvo muri mwega. Imwimwi mungakwanisa kucedza no mukuru wamunonyasa kugonda iyena angakwanisa kunyasa kumupurutanai, kumupasai mazano anokosha uye kumugondesai kuti Djehovha akapfara maningi ngekuti imwimwi muri kuita zviri zvese kuti mukwanise kurhwisana no zvido zvakashata. (Mup. 4:12) Pamweni imwimwi mungatokwanisawo kuora mwoyo ngekugara mecindorhwisana nazvo. Asi akuru angakwanisa kumubetserai kuona kuti kukumbira rubetso kamaita, kunopangidza kuti munokoshesa ushamwari wenyu na Djehovha uye kuti imwimwi amunyanyi kudzigonda pacenyu.—1 Ako. 10:12.

8. Kodi tinodikana kureketa no akuru cishaishi cimwe na cimwe catinoita? Panganidzai.

⁸ Isusu atidikani kupsvaka akuru pese paya patinoita cishaishi. Nge muezaniso, rangaridzai kuti imwimwi mareketa ciro cinonyangadza hama kana hanzvadzi. Pane kupsvaka akuru ciriporipoco, maizodikana kuseenzesa zano ra Djesu Kristu rekuita runyararo. (Mat. 5:23, 24) Imwimwi mungapsvakisisa ngezve unaki, mwoyo unononoka kutsamwa uye kugara pakati no pakati, kuti imwimwi mukwanise kupangidza mawara aya mu migariro imweni iri mberi. Asi zviri panhene kuti kana imwimwi mukakonerhwa kugadzirisa cinetso icona, imwimwi mungakwanisa kukumbira rubetso ku mukuru. Patsamba yake ku Afiripi, muaphostori Pauro wakakumbira imwe hama kuti ibetsere Ivhodhiya na Sintiki kugadzirisa cinetso cawo, ngo mushobo umwewo mukuru we ungano ungakwanisa kumupasai rubetso hingana irona.—Afi. 4:2, 3.

NGEI TECIDIKANA KUDAINZA AKURU?

9. Ngei atidikani kusiya kuti kupsveruka kutipingaidze kureketa no akuru? (Zvierengo 28:13)

⁹ Tinodikana kutenda uye ushingi kuti tikumbire rubetso paya patinoita citema cakakura kana kuti paya patinoona kuti tiri kukonerhwa kurhwisana no patakarembera. Atidikani kusiya kuti kupsveruka kutiitise kuti tisarekete no akuru. Ngei tisikadikani kuita kudaro? Ngokuti Djehovha akatipasa akuru kuti atibetsere, kugara no uthongo wakanaka panocokuita no kumwiya uye kubambisa ushamwari wedu naye. Hino tikapsvaka akuru tinonga tecipangidza kuti tinogonda mushobo we kuita Djehovha zviro uye tinonga tecimuzwira. Uyewo tinotenderawo kuti tinoda rubetso rake kuti tisambwere uye kuti tirumbwe teciita zviro zvakanaka. (Pis. 94:18) Kana tikaita citema, ticatambira usisi wa Djehovha, kana tikapanganidzira zvese zvatakaita ku akuru uye kuima kuita zviro zvakashata.—Erengai Zvierengo 28:13.

10. Cinyi cingaitika kana tikaedza kufisa zvitema zvedu?

¹⁰ Isusu tingagara no makomborero akawanda kana tikabvunza akuru zvitema zvedu. Asi nge dii rimweni, kana tikaedza kufisa zvishaishi zvedu tingatokwanisa kubambirira nyaya yedu. Mambo Dhavhidhi paakaedza kufisa zvitema zvake, iyena wakanetseka maningi panocokuita no kumwiya, mundangariro uye kutobatanidzawo mwiri kamare. (Pis. 32:3-5) Kuita hingana nhenda ye mu mwiri inobambirira kana tikatama kugadzirisa, cinetso cekumwiya cingakwanisawo kubambirira kana tikatama kugadzirisa. Djehovha anozviziya izvona, ndiyo ndaa iyena anotipika kuti tigadzirise “zvinetso zvedu naye” eciseenzesa mushobo waakagadza kuti tikwanise kuhwirirazve kubamba pa kumwiya.—Isa. 1:5, 6, 18.

11. Tingabata-bata kudini amweni kana tikafisa citema cakakura?

¹¹ Kana tikafisa citema cakakura cataita, tingakwanisa kubata-batawo anhu amweni. Tingakwanisa kuita kuti mwiya mucena usahambe zvakanaka ku ungano yese uye kukanda pagozi runyararo ro hama no hanzvadzi dzedu. (Aef. 4:30) Nge mushobo umwewo, kana tikaziya mu ungano medu munhu waita citema uye tocifisa, tingagarawo no ndaa hingana iyena. (Rev. 5:1) Hino tinodikana kubvunza munhuwo kuti apanganidzire akuru zviya zvaaita.a Kana iyena akatama kuita izvona, mumasure mekacinguwa rudo redu uye kugondeka kedu kuna Djehovha kungatiitisa kuti tipsvake akuru uye toabvunza cokwadi. Ngokudaro, tinonga taita dii redu kuti ungano irumbwe yakacena uye tinonga tabetsera munhu uya waita citema kuti aonezve ushamwari wake na Djehovha.

AKURU ANOTIBETSERA KUDINI?

12. Akuru anobetsera kudini aya akaremba panocokuita no kumwiya?

¹² Bhaibheri rinobvunza akuru kuti abetsere aya akaremba pakunamata. (1 Ate. 5:14) Kana imwimwi maita citema awona pamweni angaita mibvunzo kuti azwisise zvamuri kuzwa. (Zvie. 20:5) Izvona pamweni azviripi nyore kamuri nge ndaa ye kamakakurira, unhu wenyu kana kuti mungatopsveruka nge zviya zvaitika. Asi imwimwi mungatokwanisa kubetsera akuru ngekureketa nge mushobo wakadjeka zviya zvaitika. Uye musathye kana mukarangarira kuti zvamuri kureketa zvakaita hingana “masoka asikazi kunyasa kurangarirhwa.” (Djobo 6:3) Akuru aazokasiki kurangarira zviro zvisiripi izvona zvinocokuita no zvamaabvunza, pane kudaro awona acanyasa kuzwa uye acaita zviri zvese zvinobatanidzwa asati amupasai mazano. (Zvie. 18:13) Awona anozviziya kuti kucengeta bira kunotora nguwa uye aazokwanisi kupasa rubetso rese rinodikanwa ngekucedza kamwe basi.

13. Minamato ye akuru uye mazano awo anobva mu Bhaibheri angatibetsera kudini? (Onaiwo mafoto.)

¹³ Akuru aadi kuti mubambirire kurhwadziwa nge zviya zvaitika, pane kudaro awona acaita munamato nemwi. Zvingaita kuti imwimwi mungatoshamisika nge “simba rakakura” nge ndaa ye mugumisiro ye minamato yawo. Rubetso rawo rinobatanidzawo “kudzodza mafuta kamuri muzina ra Djehovha.” (Tig. 5:14-16) Mafuta awona anoreya “cokwadi ce Soko ra Mwari.” Akuru acaseenzesa matsamba e Bhaibheri acamuteramisai uye acamunyaradzai uyewo acamubetserai kuti mugarezve no ushamwari na Djehovha. (Isa. 57:18) Mazano awo anotsamira mu Bhaibheri, acamupasai simba ramunoda kuti murumbwe meciita zviro zvakanaka. Peciseenzeswa akuru imwimwi mucazwa izwi ra Djehovha reciti: “Iri ndiro ngwanza. Hamba naro.”—Isa. 30:21.

14. Maererano no Agaratiya 6:1, akuru anobetsera kudini uya ‘urikuhamba mu ngwanza rakashata’? (Onaiwo mafoto.)

¹⁴ Eregai Agaratiya 6:1. Mukristu uno hamba “mu ngwanza rakashata” aaripi kuhamba maererano no ngwanza re unatsi ra Djehovha. Muhambiro wakashata ungakwanisa kureya cisananguro cakashata kana kuti citema cakakura. Akuru e Cikristu ecikohomedzeswa ne rudo, “anoedza kumupangira no upfawi.” Soko re Cigerego rakaturikirhwa kuti “kupangira” rakaseenzeswa kuti rienzanise medhiko unoedza kugadzirisa godo kuti rikwanise kupora zvakanaka. Kuita hingana medhiko unoita zviri zvese, kuti ahwirinzezve godo pa mbuto asikarhwadzisi, akuru anoitawo zviri zvese kuti arape nhenda ye kumwiya ye munhu nge mushobo unoita kuti iyena asarhwadziwe maningi. Bhaibheri rinopasawo nhungamiriro ku akuru kuti “ambotange kudziongorora [pacawo] kamare.” Akuru paanonga ecibetsera munhu kuti ahwirirezve mugwanza rakanaka, nguwa dzese anoziya kuti awonawo ndi anhu asikazi kukwana uye anoitawo zvishaishi. Awona aadzioni kuti akakwirira kana kuti akanaka maningi kupinda amweni. Pane kudaro, awona anopeta masimba kuti adzidodose uye azwisise.—1 Ped. 3:8.

15. Cinyi catinodikana kuita kana tikagara no cinetso?

¹⁵ Isusu tingakwanisa kugonda akuru. Djehovha akaafundisa kuti awona asabvunze zviro zvatinoabvunza ku anhu amweni, kuti apase mazano anobva mu Bhaibheri pane kupasa maonero awo kamare uye kuti arumbwe ecitibetsera pakuthwara mitoro yedu. (Zvie. 11:13; Aga. 6:2) Akuru akasiyana ku umwe na umwe wawo. Mukuru umwe na umwe uno mawara ake uye anganani ano maesperiensiya kutodarika amweni. Asi isusu tingazwa takasudzunuka pa kureketa na umwe wawo. Zviri pamhene kuti isusu atikumbiri mazano ku akuru ese tecietsera kuti umwe anotibvunza zviya kamare zvatinoda kuzwa. Kuita izvona, zvakaita hingana kupsvaka ‘zvinopfadza nzee dzedu’ pane “fundiso yakanaka” ye Soko ra Mwari. (2 Ti. 4:3) Asati atipasa zano, mukuru pamweni angatibvunzisa kuti tareketa here no mukuru umweni uye angada kuziya kuti ngaripi zano ratapaswa. Kusiya izvona, ngekugara no maonero ari pakati no pakati zvingaita kuti iyena angada kubvunzisa akuru amweni ngezvenyaya iyona.—Zvie. 13:10.

UBABA WATINAWO UMWE NA UMWE WEDU

16. Umwe na umwe wedu uno ubaba upi?

¹⁶ Kunyazi akuru ecitionerera ngekuti tiri mabira a Mwari, awona aatibvunzi zvatinodikana kuita. Umwe na umwe wedu uno ubaba wekurarama maererano nokudzipira kaakaita. Umwe na umwe wedu, ucadzidaiirira ega kuna Djehovha ngezviya zvaanobhuya kana kuti zvaanoita. (Aro. 14:12) Asi no rubetso rake isusu tingakwanisa kukunda cinetso cekurumbwa takaperera. Pane kuti akuru atibvunze zvatinodikana kuita awona anotibetsa kuzwisisa kuti Djehovha anorangarirei ngezve nyaya iyona uye anotisiya kuti tiite cisananguro cedu kamare. Patinonyasa kurangarira mazano anobva mu Bhaibheri ekuti akuru anotipasa uye toaseenzesa tinonga tecirowedza ‘simba redu rokuzwisisa’ kuti tiite zvisananguro zvino ungwaru.—Aheb. 5:14.

17. Ngacipi cisananguro cenyu?

¹⁷ Makomborero akakura maningi kugara bira ra Djehovha! Djehovha akatumira “muushi akanaka,” Djesu Kristu kuti aripe rusudzunuro uye kutipasa mukana we kurarama no kusikaperi. (Juau 10:11) Kusiya izvona, Djehovha akatipasa akuru kuti aticengete, hingana zvaakagondesa kuti: “Ndicamupasai aushi acaita maererano no zvandinoda, uye awona acamuushai no ruziyo uye no kuzwisisa.” (Djer. 3:15) Patinogara takaremba kana kuti kurhwara panocokuita no kumwiya, tinodikana kukumbira rubetso re akuru tisikarangariri kairi. Tese isusu tinodikana kusanangura kukhorovhera cipo ici ce akuru.