Zvinyi Zvamungaita kana Imwimwi uye Anhu Amweni Akabathwa Zvisina Unatsi

1-2. Anhu akawanda anozwa kudini nge ndaa ye kutama unatsi uye tingadzibvunzisei?

TIRI KURARAMA mu nyika isina unatsi. Anhu akawanda nyamasi uno anobathwa zvisina unatsi nge ndaa ye urombo, kaakabva, mushobo waari uye zvikonzero zvimweni. Awona anonetseka nge ndaa ye kushata ke kunza kunokonzerhwa nge maemprezariyo anoda maningi mare uye atungamiriri asina unatsi. Mishobo ii ye kutama unatsi inobata-bata isusu uye inobata-batawo amweni.

² Azvishamisi kuti anhu akawanda anonyangadzwa maningi nge kuona kutama unatsi katiri kuona nyamasi uno. Tese isusu tinoda kurarama mu nyika mekuti tinozwa takacengeteka uye tecibathwa no unatsi. Anhu anganani anobatikana pa zvikwata zve anhu zvinoda kupedza kutama unatsi uye anotobatikanawo pa mabongozozo no kutsigira atungamiriri anopikira kupedza zviro zvisina unatsi. Hinga Akristu, tinofundiswa kuti ‘atidikani kuita dii ro nyika’ uye kuti tinodikana kuetsera kuti Umambo wa Mwari upedze zviro zvese zvisina unatsi. (Juau 17:16) Kunyazi zvakadaro, azvirei kuti atidikani kutsukwara kana kuti kunyangadzwa tikaona munhu ecibathwa zvisina unatsi. Tingadzibvunzisa kuti: ‘Pano ciro candingaita nge ndaa ye kutama unatsi zvino here?’ Kuti tidaire mubvunzo uu ngatione kuti Djehovha uye Djesu anozwa kudini nge ndaa ye kutama unatsi.

DJEHOVHA NA DJESU ANOZONDA KUTAMA UNATSI

3. Ngei zvinozwisisika kuti tizwe takanyangazwa nge ndaa ye zviro zvisina unatsi? (Isaya 5:7)

³ Bhaibheri rinopanganidza kuti ngei zviro zvisina unatsi zvecitibata-bata. Irona rinobhuya kuti Djehovha akatisika no mufanikiso wake uye kuti iyena “anoda unatsi no kutonga no unatsi.” (Pis. 33:5; Gen. 1:26) Iyena aaiti zviro zvisina unatsi uye aadi kuti munhu upi hake aite izvona! (Dhe. 32:3, 4; Mik. 6:8; Zak. 7:9) Ngo muezaniso, mu nguwa ye muphorofita Isaya, Djehovha akazwa “kucema nge kushuphika” ke Aisraeri aibathwa zvakashata no Aisraeri amweni. (Erengai Isaya 5:7.) Djehovha akaphanica aya ekuti kakawanda ainga asikateereri Mutemo uye aibata amweni zvisina unatsi.—Isa. 5:5, 13.

4. Ciitiko catinogumira mu Maevhangeri cinopangidza kuti Djesu anoona kudini kutama unatsi? (Onaiwo foto.)

⁴ Kuita hingana Djehovha, Djesu anoda unatsi uye anozonda zvisina unatsi. Pa nguwa imweni, mu basa rake rekuparidzira iyena akaona mwanarume wainga akaremara nyara. Djesu akazwa ecida kumubetsera, asi atungamiriri e magereja ainga ano mwoyo wakashata akazviona ngo mushobo wakasiyana. Awona aibatikana pa kuzwisisa nge mushobo wakashata Sabudu pane kubetsera mwanarume uya waida rubetso. Djesu akazwa kudini nge maitiro awo? Iyena akazwa “ecirhwadziwa ngo kuona kuoma mwoyo kawo.”—Mark. 3:1-6.

5. Cinyi catinodikana kuedzurira paya patinonyangadzwa nge kutama unatsi?

⁵ Sezvo Djehovha na Djesu anonyangadzwa nge ndaa ye kutama unatsi, azvizi kushata kuti isusu tizwewo nge mushobo uwona. (Aef. 4:26) Ngokudaro, tinodikana kuedzurira kuti tikanyangadzwa kunyazi tino zvikonzero zvekuti tidaro atikwanisi kupedza kutama unatsi. Kubhuya zvazviri, kugara takandonyangadzwa zvingatikuwadza mu ndangariro uye mu mwiri. (Pis. 37:1, 8; Tig. 1:20) Hino, zvinyi zvatingaita kana isusu uye amweni akabathwa zvisina unatsi. Tingafunda maningi no muezaniso wa Djesu.

DJESU AKAITEI PAAKAONA AMWENI ECIBATHWA ZVISINA UNATSI

6. Zviro zvipi zvisina unatsi zvaiitika Djesu paainga ari pa nyika? (Onaiwo mufanikiso.)

⁶ Djesu akaona kutama unatsi kakakura paainga ari pa nyika. Iyena akaona anhu ecishuphwa no atungamiriri e magereja. (Mat. 23:2-4) Iyena aiziyawo kuti atungamiriri e Ciroma ainga asikabati anhu zvakanaka. Adjudha akawanga ainga asikacadizve Aroma. Anganani akaita hingana Azeroti ainga akatogadzirira kutorhwisana no Aroma. Kunyazi eciona zvese izvi, Djesu aazi kupindira pa cikwata cipi haco kana kutotsigira zvikwata izvi kuti acinje mugariro. Paakaziya kuti anhu ainga ecironga kuti amugadze Mambo, Djesu akatobuda paainga ari.—Juau 6:15.

7-8. Ngei Djesu aazi kuedza kupedza kutama unatsi paainga ari pa nyika? (Juau 18:36)

⁷ Paainga ari pa nyika, Djesu aazi kuedza kuseenza no atungamiriri e nyika e Israeri kuti apedze kutama unatsi. Ngei iyena aazi kuita kudaro? Ngekuti aiziya kuti anhu aana citenderhwa kunyazi ungwaru we kudzitonga pacawo. (Pis. 146:3; Djer. 10:23) Uye anhu aakwanisi kupedza ciro cekutanga cakakonzera kutama unatsi. Nyika iri kutongwa no utongi wa Sathani Dhiyabhurosi cisikwa ce kumwiya cinouraya anhu uye cinoseenzesa simba racinaco kuti ciite zviro zvisina unatsi. (Juau 8:44; Aef. 2:2) Uye kutama kukwana kunoita kuti kunyazi anhu akanaka asakwanise kuita zviro zvino unatsi nguwa dzese.—Mup. 7:20.

⁸ Djesu aizviziya kuti Umambo wa Mwari basi ndiwona waizokwanisa kupedza zviro zvinokonzera kutama unatsi. Nge ndaa yazvo, iyena akapedza simba uye nguwa “eciparidza uye eciziisa masoko akanaka e Umambo wa Mwari.” (Ruka 8:1) Ngekudaro iyena akanyaradza “aya ano nzara no mukaha we unatsi,” kuti matambudziko ese acazopera. (Mat. 5:6; Ruka 18:7, 8) Izvona azviitiki nge simba re anhu asi no Utongi wa Mwari we kudenga wekuti “auiti dii re nyika ino.”—Erengai Juau 18:36.

TEEDZERAI DJESU PAMUNOBATANA NO KUTAMA UNATSI

9. Cinyi cinomupasai rugondo rekuti Umambo wa Mwari basi ngiwo ucapedza kutama unatsi?

⁹ Nyamasi uno, tiri kuona kutama unatsi kakawanda kupinda kakaoniwa ndi Djesu paainga ari pa nyika. Asi dakara zvino mu ‘mazuwa ano ekupedzesera’ Sathani ndiye manyuku e kutama unatsi uye kutobatanidzawo anhu ake asikazi kukwana ari kupfuridzirhwa naye. (2 Ti. 3:1-5, 13; Zvak. 12:12) Kuita hingana Djesu, isusu tinoziya kuti Umambo wa Mwari basi ndiwo ucapedza zviro zvinokonzera kutama unatsi. Sezvo tinotsigira Umambo uu tinoramba kubatanidzwa pa kuita marsha, mabongozozo uye zviro zvimweni zvinoizwa no nyika kuti apedze kutama unatsi. Onai esperiensiya ye hanzvadzi imweni inozwi Stacy.a Asati afunda cokwadi, Stacy waibatanidzwa pa zvikwata zvaiita marsha ecikumbira unatsi. Asi iyena wakatanga kugara no mubvunzo pa zviya zvaaita. Iyena unoti: “Pa nguwa ye marsha inini ndaidzibvunzisa kuti ndiri ku dii re cokwadi here. Asi zvino ndaakutsigira Umambo wa Mwari uye ndaa kuziya kuti ndiri ku dii re cokwadi. Ndinoziya kuti Djehovha acapedza matambudziko ese zvekuti inini andikwanisi kuzviita.”—Pis. 72:1, 4.

10. Zvikwata zve marsha uye mabongozozo azvipindirani no zano re takapaswa na Djesu iri pana Mateu 5:43-48 nge gwanza ripi? (Onaiwo foto.)

¹⁰ Zvikwata zve marsha zve nyika ino zvinopfuridzirhwa no mwiya we kuda kudzitongera zvisikapindirani no muezaniso uye fundiso dza Djesu. (Aef. 4:31) Hama imweni inozwi Jeffrey inoti: “Ndinoziya kuti mabongozozo akaita hingana kuti ano runyararo ciripo-ripoco angatokwanisa kucinja uye poizwa zviro zvecisimba uye zve umbavha.” Ngokudaro, Djesu anotifundisa kuti tinodikana kubata amweni no rudo kunyazi aya asikatenderani no zvatinobhuya uye anotiteerera. (Erengai Mateu 5:43-48.) Hinga Akristu, tinoita zviri zvese kuti tisaite zviro zvisikapindirani no mitemo ye unatsi yetakapaswa na Djesu.

11. Ngei nguwa dzimweni zvinoshupha kuteedzera Djesu?

¹¹ Kunyazi teciziya kuti Umamabo wa Mwari ucapedza zvacose kutama unatsi, zvingatishuphira kuteedzera Djesu paya patinobathwa zvisina unatsi. Onai zvakaitika na Janiya wakabathwa zvisina unatsi nge ndaa ye ganda rake. Iyena unoti: “Ndakanyangadzwa uye ndakarhwadziwa maningi, ndaida kuti anhu awona aphanicwe. Hino, ndakarangarira kutsigira cikwata ce marsha no mabongozozo kuitira kuti kusanangurhwa ke ganda kusaizwe uye ndakaona kuti kuita izvona zvaizoita kuti ndizwe zvakanaka. No kuhamba ke nguwa, Janiya wakazwisisa kuti waidikana kucinja. Iyena unoti: “Inini ndaisiya kuti anhu apfuridzire mushobo wangu we kurangarira. Kundipfuridzira kuti ndigonde anhu pane kugonda Djehovha. Ndiyo ndaa, ndakasanangura kubuda mu zvikwata izvona.” Tinodikana kungwarira kuti tisasiye kuti kunyangadzwa katinozwa kutiitise kuti tisakwanise kugara takaperera panocokuita no zvematongerhwe e nyika uye no zvikwata zve nyika ino.—Juau 15:19.

12. Ngei zvakanaka kusanangura masoko atinotambira?

¹² Cinyi cingatibetsera kuonerera mazwiro edu e shungu? Akawanda anoona kuti zvakanaka kusanangura zve kuerenga, zve kuzwa uye zve kusistiri. Apeperusi anganani e masoko anabhuya zviro zvinoita kuti anhu ashamisike uye agurungute nge ndaa ye anyautongi. Apeperusi akawanga angatokwanisa kureketa masoko awo pane kureketa zviya zvaiitika. Kunyazi zvaanoreteka zviri zve cokwadi, zvinobetsera here kurumbwa tecizviona kana kuzwa? Kana tikapedza nguwa yakareba tecizwa zviro zvakadai, zvingakwanisa kutisiya takanyangadzwa kana kuora mwoyo. (Zvie. 24:10) Zvingatoita kuti tiime kukanda Umambo wa Mwari pa mbuto yokutanga mu upenyu uye kukanganwa kuti Umambo wa Mwari basi ndiwona ucapedza matambudziko edu.

13. Kugara no urongwa wakanaka we kuerenga Bhaibheri kungatibetsera kudini kuti tigare no maitiro akanaka pa nyaya ye kutama unatsi?

¹³ Kugara no urongwa wakanaka we kuerenga Bhaibheri uye kunyasa kurangarira zvingatibetsera kubatana no zviro zvisina unatsi. Hanzvadzi imweni inozwi Alia yainetseka maningi nge ndaa ye mushobo waibathwa anhu kaaigara. Zvaiita hingana kuti anhu aya aiitisa zviro zvakashata ainga asikaphanicwi. Iyena unoti: “Ndakambogara pasi ndodzibvunzisa kuti: ‘Zvezvirokwazvo ndinotenderadi kuti Djehovha ndiye ucapedza matambudziko aya here?’ Ndipona pandakaerenga Djobo 34:22-29. Tsamba idzi dzakandiedzurira kuti apana ungafindarira Djehovha. Iyena basi ndiye ano unatsi uye ndiyena anokwanisa kugadzirisa zviro. Patinonga tecietsera Umambo wa Mwari kuti uunzise unatsi we zvirokwazvo tinodikana kubatana no kutama unatsi zvino.” Patinonga tecietsera kuti Umambo wa Mwari ugadzirise zviro zvese, zvinyi zvaticaita zvino?

TINGAITEI PATINONGA TECIETSERA KUTI UMAMBO WA MWARI UPEDZE ZVIRO ZVISINA UNATSI

14. Zvinyi zvatingaita kuti tisatsigire zviro zvisina unatsi zve nyika ino? (Akorosi 3:10, 11)

¹⁴ Tingatama kukwanisa kuonerera zviro zvisina unatsi zvinoizwa nge amweni asi tingakwanisa kuonerera zviito zvedu. Hingana zvataona, tinoteedzera Djesu nge kupangidza rudo. Rudo irona rinotiitisa kuti tibate kunyazi aya anoita zviro zvisina unatsi no rureremedzo. (Mat. 7:12; Aro. 12:17) Djehovha anopfara patinobata anhu ese no unaki uye unatsi.—Erengai Akorosi 3:10, 11.

15. Tingabetsera kudini anhu nge kubhuya zviro zvinofundiswa no Bhaibheri?

¹⁵ Mushobo wakanaka we kubatana no zvisina unatsi i kuparidzira zvokwadi zve Bhaibheri ku anhu. Ngei tingabhuya izvona? Ngekuti “uzii wa Djehovha” ungakwanisa kucinja munhu wekuti kareko wainga ari munhu waiita zvecisimba kuti agare munhu ano unaki uye unoda runyararo. (Isa. 11:6, 7, 9) Asati aziya cokwadi, Jemal wakabatana no cikwata ce apanduki kuti arhwisane no anyautongi e mu nyika yake ngekuti ainga asina unatsi. Iyena unoti: “Imwimwi amungakwanisi kucinja munhu meciseenzesa simba. Inini andizi kucinjwa no simba.” Asi ndakacinjwa no zvokwadi zve Bhaibheri zvandakafunda. Zvaakafunda zvakamubetsera kuti aime kurhwisana. Ngokudaro, kana tikafundisa anhu Bhaibheri, tingakwanisa kuabetsera kuti asiye kuita zviro zvinokuwadza amweni.

16. Ngei imwimwi makagadzirira kubhuya ngezve Umambo wa Mwari?

¹⁶ Kuita hingana Djesu isusu tinoda maningi kubvunza anhu kuti Umambo wa Mwari basi ndiwona ucapedza zvisina unatsi. Kariro ii ingabambisa aya akabathwa zvisina unatsi. (Djer. 29:11) Stacy wambopanganidzwa unoti: “Kufunda cokwadi kakandibetsera kuti ndibatane no kutama unatsi kandakaona uye kandakashuphika nako.” Djehovha anoseenzesa masoko e mu Bhaibheri kuti atinyaradze. Kuti mupanganidzire amweni masoko anonyaradza e mu Bhaibheri ngezve kupera ke kutama unatsi, imwimwi munodikana kugara makanyasa kugadzirira. Pamunonyasa kugara no rugondo rokuti mazano e mu Bhaibheri a taona mu fundo ino ngee cokwadi, mucanyasa kugara makagadzirira kuti mubhuye no rureremedzo kana pakamuka mukana ku cikora kana kubasa.b

17. Djehovha anotibetsera kudini kuti tibatane no zviro zvisina unatsi zvino?

¹⁷ Tinoziya kuti ticarumbwa tecibatana no zviro zvisina unatsi Sathani paacarumbwa ari “mutongi we nyika ino.” Asi tinoziya kuti atiripi tega uye tinoziya kuti tino kariro patinonga tecietsera kuti Sathani “adzingwe.” (Juau 12:31) Eciseenzesa Matarhwa Djehovha anotibvunza kuti ngei kuno zviro zvisina unatsi uye anotibvunzawo kuti iyena anozwa kudini paya patinobathwa zvisina unatsi. (Pis. 34:17-19) Eciseenzesa Mwana wake, Djehovha anotifundisa kuti tinodikana kuitei patinobatana no zviro zvisina unatsi uye kuti Umambo wake nokukasika ucapedza kudini zviro zvisina unatsi zvacose. (2 Ped. 3:13) Ngatirumbwe teciparidzira masoko akanaka e Umambo tecishingaira patinonga tecietsera nguwa yekuti nyika ino yese icadzara no “unatsi uye unaki.”—Isa. 9:7.