Genesi

47 Ngokudaro, Zuzee wakaenda koobvunza Faraoo kuti: “Baba angu no hama dzangu, auya no mabira awo, n’ombe dzawo uye zvese zvaanazvo ecibva ku nyika yo Kanani, uye parizvino ari ku nyika yo Gozeni.” 2 Iyena wakasanangura hama dzake shanu uye wakaenda koodzipangidza kuna Faraoo.

3 Faraoo wakabvunzisa hama dza Zuzee kuti: “Munoita basa rei?” Awona akadaira Faraoo eciti: “Isusu aseenzi enyu tiri aushi e mabira, hinga zvaiizwa no madzitsekuru edu.” 4 Akatizve kuna Faraoo: “Tauya koorarama mu nyika ino hinga anhu e nyika imweni, ngokuti ku Kanani akuna shango rokuti aseenzi enyu aushe mabira awo, ngokuti nzara ikona yakakura maningi. Hino tapota, siyai kuti isusu aseenzi enyu tigare mu nyika yo Gozeni.” 5 Faraoo wakati kuna Zuzee: “Baba ako uye hama dzako auya kuno kuti agare na iwewe. 6 Nyika yo Edjipitu iri mu nyara menyu. Ita kuti baba ako uye hama dzako dzirarame mu mbuto yakanaka ye nyika ino. Ngaagare mu nyika yo Gozeni; uye kana weciziya kuti pakati pawo pano anarume anokwanisa basa, agadze kuti agare aonereri e zvipfuyo zvangu.”

7 Hino Zuzee wakatora Djakobo baba ake, wakapinda nawo mainga muna Faraoo, uye Djakobo wakakomborera Faraoo. 8 Faraoo wakabvunzisa Djakobo kuti: “Muno makore mangana?” 9 Djakobo wakadaira Faraoo kuti: “Makore angu anokwana kuita 130 ndeciherereka pa nyika.* Makore aya i padoko maningi uye akadzara no matambudziko; aazi kuwanda hinga makore e upenyu we madzitsekuru angu aiherereka pa nyika.”* 10 Mumasure mazvo, Djakobo wakakomborera Faraoo uye wakabuda pamberi pake.

11 Ngokudaro, Zuzee wakapasa baba ake uye hama dzake mbuto ye kugara mu nyika yo Edjipitu, mbuto yakanaka ye mu nyikemo, mu nyika yo Ramisesi, hinga zvainga zvabhuiwa na Faraoo. 12 Uye Zuzee waipasa zvokurhya* baba ake, hama dzake uye ese e pa nyumba pa baba ake maererano no kuwanda ke ana awo.

13 Mainga musina zvokurhya* mu nyika yese, ngokuti nzara yainga yakakura maningi; nyika yo Edjipitu pamwepo no nyika yo Kanani dzakagara dzisina zvokurhya nge ndaa yo nzara. 14 Zuzee waitora mare yese yainga iri mu nyika yo Edjipitu pamwepo no nyika yo Kanani yaiuya no anhu kootenga zvokurhya, uye Zuzee waiendesa mare iyona ku nyumba ya Faraoo. 15 Nokuhamba ke nguwa, mare yese ye mu nyika yo Edjipitu pamwepo no mu nyika yo Kanani yakapera, uye Aedjipitu ese akatanga kuenda kuna Zuzee, eciti: “Tipasei zvokurhya! Mungatisiyadi kamare tecifa no nzara nge ndaa yekuti mare yedu yapera?” 16 Hino Zuzee wakaabvunza kuti: “Kana mare yenyu yapera, ndipasei zvipfuyo zvenyu, uye inini ndicamupasai zvokurhya tecicinjana no zvipfuyo zvenyu.” 17 Hino awona akatanga kuunzisa zvipfuyo zvawo kuna Zuzee, uye Zuzee wakarumbwa eciapasa zvokurhya, awona ecimupasa makavharo, mabira, n’ombe, no madhongi, uye iyena wakarumbwa eciapasa zvokurhya ecicinjana no zvipfuyo zvawo zvese mu gore irona.

18 Gore iri parakapera, akatanga kuenda kaari mu gore rakazoteera eciti: “Atingamufisirii tenzi wangu kuti mare no zvipfuyo zvataimupasai zvapera. Aticinazve ciro cimweni kunza ke mwiri yedu no minda dzedu basi. 19 Kodi mucatisiya tecifa pamwepo no minda dzedu here? Titengei pamwepo no minda dzedu kuti mutipase zvokurhya, uye isusu pamwepo no minda dzedu tinozogara aranda a Faraoo. Tipasei zvokurhya kuti tirarame uye tisafe, kuitira kuti nyika yedu isagare isina anhu.” 20 Zuzee wakatengera Faraoo nyika yese yo Edjipitu, ngokuti Aedjipitu akatengesa minda dzawo, ngokuti nzara yainga yakakura maningi; uye nyika yese yakazogara ya Faraoo.

21 Pedzepo wakathuthisa anhu ese woaendesa mu mathaundi, kubva mu nharaunda dzese dzo Edjipitu. 22 Asi aazi kutenga minda yo apristi, ngokuti zvokurhya zve apristi zvaibva kuna Faraoo uye awona airarama no zvokurhya zvaaipaswa na Faraoo. Ndiyo ndaa aazi kutengesa minda dzawo. 23 Hino Zuzee wakabvunza anhu kuti: “Onai, imwimwi pamwepo no minda dzenyu ndamutengai kuti mugare a Faraoo. Torai mbeu kuti muende koosima mu minda. 24 Pamunokorora mu mindemo, munodikana kupasa Faraoo murhwi umwe pa mirhwi mishanu, asi mirongomuna nge yenyu kuitira kuti igare mbeu uye igare zvokurhya kamuri, ku ana enyu, uye ku anhu e pa nyumba penyu.” 25 Ngokudaro, awona akamubvunza kuti: “Imwimwi macengetedza upenyu wedu. Ngatizwirhwe nyasha pamberi penyu tenzi wangu, uye isusu ticagara aranda a Faraoo.” 26 Ngokudaro, Zuzee wakagadza mutemo mu nyika yese yo Edjipitu, zvekuti uciri kuseenza dakara nyamasi uno, wekuti: Murhwi umwe pa mirhwi mishanu ye zviro zvamucakorora, unodikana kupaswa Faraoo. Asi minda yo apristi basi ndiyo isikazi kugara ya Faraoo.

27 Aisraeri akarumbwa ecirarama mu nyika yo Edjipitu, nyika yo Gozeni, uye awona akagara no zviro zvakawanda maningi, akabara ana uye awona akawanda maningi. 28 Djakobo wakararama mu nyika yo Edjipitu ke makore 17, zvekuti mazuwa ese e upenyu wa Djakobo akaguma makore 147.

29 Israeri paakaziya kuti wainga wooda kufa, wakadainza mwana wake Zuzee uye wakati kaari: “Kana ndazwirhwa nyasha pamberi pako, ndapota, ndiri kukumbirawo kuti ukande nyara yako pasi pe mutezu wangu, uye unodikana kundipangidzira rudo rakagondeka uye risikacinji. Ndapota, usandikotse mu nyika yo Edjipitu. 30 Kana ndikafa,* ndibvise mu Edjipitu, woenda koondikotsa mu guwa re madzitsekuru angu.” Ngokudaro, Zuzee wakati: “Ndicaita zvamandikumbira.” 31 Hino iyena wakamubvunza kuti: “Pika.” Zuzee wakapika. Ngokudaro, Israeri wakakotamisa musoro wake pa mutsago we kama yake.