Cikumbiro Cinoshupha Maningi

Abrahamu nguwa dzese waida Djehovha uye waimugonda. Iyena wakafundisawo mwana wake Izaki kuita izvona. Asi Izaki paainga ano makore 25, Djehovha akakumbira Abrahamu kuti aite ciro cinoshupha maningi. Cainga ciri cinyi?

Mwari akabvunza Abrahamu kuti: ‘Ndapota, enda ku mbuto inodainzwa kuti Moriya. Ukaguma ikona, ndinoda kuti undipase cibairo, asi pari zvino andidi cibairo ce cinyama. Ndinoda kuti undipase mwana wako umwe basi, Izaki.’ Abrahamu aazi kuzwisisa kuti ngei Djehovha akamukumbira kuti aite izvona. Asi hinga zvaaiita nguwa dzese, iyena wakazwira Djehovha.

Pakakaedza, Abrahamu wakaenda na Izaki uye no aseenzi ake airi kaakabvunzwa na Djehovha kuti aende. Mumasure me mazuwa matatu ecihamba, awona akatanga kuona dunhu re Moriya. Hino, Abrahamu wakabvunza aseenzi ake kuti: Garai pano. Inini na Izaki ticaenda koopasa cibairo Djehovha. Abrahamu wakakumbira kuti Izaki athware huni padoko uye Abrahamu wakabatira banga. Izaki wakabvunzisa baba ake kuti: ‘Cirikupi cinyama caticapasa Djehovha hinga cibairo?’ Abrahamu wakadaira kuti: ‘Usanetseke mwanangu, Djehovha ndiye acatipasa.’

Paakaguma ku dunhu, awona akagadzira mbuto yekuti akande huni padenga. Mumasure mazvo, Abrahamu wakasunga moko uye murenje dza Izaki uye wakaita kuti Izaki awate padenga pe hunidzo.

Pedzepo, Abrahamu wakabata banga. Pa nguwa iyona kamare, wakazwa izwi re ngirozi ya Djehovha reciti: ‘Abrahamu! Usakuwadze Izaki! Zvino ndaakuziya kuti iwewe uno kutenda kakakura muna Mwari. Kunyazi zvisiripi nyore, iwewe waida kupasa mwana wako umwe ega kuna Mwari.’ Hino, Abrahamu wakaona bira rainga rakamanwa nyanga dzaro pacimuti. Iyena wakapasa cibairo ici kuna Djehovha pa mbuto ya Izaki.

Kubva pa zuwa irona kuenda mberi, Djehovha akatanga kudainza Abrahamu kuti shamwari. Unoziya kuti ngei? Ngokuti kunyazi wainga asikazi kuzwisisa nhungamiriro yaakapaswa na Djehovha, Abrahamu waiita zvese zvaaibvunzwa na Djehovha kuti aite.

Pedzepo, Djehovha akaphindazve gondeso yaainga akaita kuna Abrahamu yekuti: ‘Inini ndicakukomborera uye ndicaita kuti mhuri yako iwande. Uyewo ndicaseenzesa mhuri yako kuti ndiunzise zviro zvakanaka ku anhu ese e pa nyika.’