Djeoiyadha Wakapangidza Ushingi

Djezabheri wainga ano mwana we mwanakadzi waizwi Atariya. Iyena wainga akashata mwoyo maningi hingana zvainga zvakaita mai ake. Iyena wakawakana na mambo we Djudha. Mambo we Djudha paakafa, mwana wa Atariya wakagara mambo. Asi mwana wakewo wakazofawo. Hino Atariya wakasanangura kugara mambokadzi we Djudha. Kuti aite izvona, iyena wakauraya ese ainga ano citenderhwa ce kugara mambo, kutobatanidzawo azukuru ake. Anhu ese aimuthya.

Mupristi Mukuru Djeoiyadha no mukadzi wake Jeosebha, aizviziya kuti zvaiizwa ndi Atariya zvainga zvakashata. Hino awona akagara no ushingi wakakura maningi. Awona akaiga umwe we azukuru a Atariya waizwi Djeoashi uye akamucengeta mu tempro.

Djeoashi paainga ano makore 7, Djeoiyadha wakaunganidza anarume anokosha e Djudha uye wakati: ‘Garai makarinda pa musuwo we tempro uye musasiye kuti munhu upi hake apinde.’ Hino, Djeoiyadha wakaita kuti Djeoashi agare mambo mupsva we Djudha uye wakakanda korowa mu musoro make. Anhu e Djudha akakhuwa eciti: ‘Mambo ngaarumbwe ecirarama!’

Mambokadzi Atariya paakazwa anhu ecikhuwa, iyena wakagogoma ecienda ku tempro. Paakaona mambo mupsva, iyena wakatanga kukhuwa eciti: “Ndapandukirhwa! Ndapandukirhwa!” Ipona, anarume anganani akatora Atariya oenda naye kunze ko tempro uye omuuraya. Pakupedzesera, umambo we Djudha wakasudzunuka pa mambokadzi wakashata, asi haiwa pa zviro zvakashata zvaakaita. Djeoiyadha waizoitei?

Djeoiyadha uye anhu ese akagondesa kuti aizonamata Djehovha basi. Pedzepo, awona akatsakatisa tempro ya Bhaari uye no mifanikiso yese. Mumasure mazvo, Djeoiyadha wakasanangura apristi, Arehvi uye aonereri o pamusuwo kuti aseenze mu tempro ya Djehovha. Ngokudaro, anhu aikwanisazve kunamata Djehovha ngo mushobo wakanaka. Pedzepo, Djeoiyadha no anarume amweni akatora Djeoashi oenda naye ku nyumba ye mambo uye akamuisa pa cigaro ce umambo. Anhu ese e mu Djudha akapfara maningi. Pari zvino, awona aizonamata Djehovha pasina Atariya uye asikapingaidzwi no kunamathwa ka Bhaari. Waona here kuti ushingi wa Djeoiyadha wakabetsera kudini anhu akawanda?