Zvatinofunda no Tsamba Mbiri dza Pedru

1. Djehovha akaseenzesa kudini Pedru mu nguwa doko iyena asati afa?

MUPHOSTORI Pedru waiziya kuti waizofa mu nguwa doko yaizoteera. Pa makore ese aakapedza eciita basa akatendeka, iyena wakaperekedza Djesu pa mabasa ake, wakatanga kuparidzira mu mbuto dzakawanda, uye wakaseenza hinga nhengo yo dare rinotungamirira. Mu gore ra 62-64 K.A., iyena wakafemerhwa kuti atare tsamba mbiri—mabhuku mairi e Bhaibheri tsamba yo 1 uye 2 Pedru. Iyena waietsera kuti tsamba idzi dzibetsere Akristu kunyazi mumasure me kufa kake.—2 Ped. 1:12-15.

2. Ngei tecibhuya kuti tsamba dza Pedru dzakatarhwa pa nguwa yakasisira?

² Pedru wakafemerhwa kutara tsamba mbiri idzi mu nguwa yokuti hama ‘dzaitsukwara nge ndaa ye miyedzo yakasiyana-siyana.’ (1 Ped. 1:6) Anhu ano mwoyo dzakashata aiedza kusvipisa ungano no fundiso dze manyepo uye no maitiro akashata. (2 Ped. 2:1, 2, 14) Akristu aida kuzosongana no “kuguma ke zviro zvese” kana kuti Aroma aida kutsakatisa thaundi rese ro Djudha uye no tsika dzese dze Adjudha. (1 Ped. 4:7) Zviri pamhene kuti tsamba dza Pedru dzakabetsera Akristu kuti aziye zvokuita paaisongana no matambudziko aya uye kuti agadzirire matambudziko aaizosongana nawo mu nguwa yo mberi.b

3. Ngei tecidikana kunyasa kurangarira ngezve tsamba mbiri dza Pedru?

³ Izvirokwazvo kuti Pedru wakatarira tsamba idzi ku Akristu airarama mu nguwa iyona, asi Djehovha akaita kuti idzona dzitarhwe mu Soko Rake. Hino isusu tingakwanisawo kufunda zvakawanda no tsamba idzona. (Aro. 15:4) Nyamasi uno, tiri kurarama mu nyika yakasvipa maningi ino anhu asikaseenzeri Djehovha. Ndiyo ndaa, tinobatana no zvitsinzwa zvakawanda uye nguwa dzimweni zvinoshupha kuseenzera Djehovha, uyezve mbai-mbai pano ticatobatana no kutambudzika kukuru kudarika matambudziko akabatana no Adjudha kare. Ndiyo ndaa, zviedzuriro zviri mu tsamba mbiri dza Pedru zvinokosha maningi katiri. Izvona zvinotibetsera kuetsera no mwoyo wese zuwa ra Djehovha, kukunda kuthya munhu uye kupangidzirana rudo rakakura ku umwe na umwe wedu. Zviedzuriro izvi zvingabetserawo akuru kuziya kuti angabetserawo kudini zvinodikanwa zve mabira.

RUMBWAI MECIETSERA NO MWOYO WESE

4. Maererano na 2 Pedru 3:3, 4, cinyi cingakwanisa kurembesa kutenda kedu?

⁴ Isusu takatenderedzwa no anhu asikatendi zvipikirhwa zve Bhaibheri. Amweni anotiseka ngokuti taano nguwa yakareba tecibhuya ngezve mugumo. Amweni anotiphikisa kuti mugumo auzombouyi. (Erengai 2 Pedru 3:3, 4.) Pamweni patinozwa masoko aya na samuzi, no watinoseenza naye kana kuti no anyaukama kutenda kedu kungazungunika. Pedru unopanganidza kuti zvinyi zvingatibetsera.

5. Zvinyi zvingakwanisa kutibetsera kuti tietsere mugumo no mwoyo unononoka kutsamwa? (2 Pedru 3:8, 9)

⁵ Ku amweni zvingaita hingana kuti Djehovha ari kunonoka maningi kutsakatisa zviro zvakashata zve nyika. Asi masoko a Pedru anotibetsera kuti tigare no maonero akanaka ecitiedzurira kuti mushobo unoona Djehovha nguwa wakasiyana maningi no mushobo unoona anhu. (Erengai 2 Pedru 3:8, 9.) Kuna Djehovha, makore ciuru akaita hingana zuwa rimwe. Djehovha ano mwoyo unononoka kutsamwa uye aadi kuti kunyazi munhu upi hake atsakatiswe. Asi nguwa yakasisira ikaguma, Djehovha acatsakatisa zviro zvese zvakashata. Uye isusu tinomakomborero akakura maningi ekuseenzesa nguwa doko yasara kuti tiparidzire anhu mu nyika yese.

6. Zvinyi zvatinodikana kuita kuti tirumbwe ‘tecirangarira ngezve kuoneka’ ke zuwa ra Djehovha? (2 Pedru 3:11, 12)

⁶ Pedru unotikohomedzesa kuti ‘tigare tecinyasa kurangarira’ ngezve kuoneka ke zuwa ra Djehovha. (Erengai 2 Pedru 3:11, 12.) Tingazviita kudini? Kana zveciita zvakanaka kunyasa kurangarira mazuwa ese ngezve makomborero aticatambira munyika ipsva. Makamborangarira here muri pa mbuto yakarungama, mecifema mhepo yakanaka, mecirhya zvokurhya zvinonaka uye mecitambira anyaukama kana shamwari dzenyu dziri kumutswa kana kuti mecifundisa anhu e kare kare kuti zvipikirhwa zve Bhaibheri zvakadzadzika kudini. Kunyasa kurangarira izvi kunomubetsera kuti murumbwe mecietsera uye kugonda kuti mugumo waa padhuze. “Kuziya ngezve ramangwana” redu uye kuziya izvi pacino nguwa, isusu “atizopauswi” nge fundiso dze manyepo e nyika ino yakashata.—2 Ped. 3:17.

KUKUNDA KUTHYA MUNHU

7. Kuthya anhu kungatibata-bata kudini?

⁷ Isusu tinoziya kuti zuwa ra Djehovha raapadhuze, ndiyo ndaa tinoda kuita zviri zvese kuti tiparidzire amweni masoko akanaka. Asi pamweni paya zvecienderana no mugariro we zviro, tingakwanisa kugara tisina ushingi. Ngei? Ngokuti tingakwanisa kukundwa no kuthya hingana zvakaitika na Pedru. Mu usiku we kutongwa ka Djesu, Pedru wakathya kubhuya kuti ndi umwe we afundi ake uye kakawanda iyena wakatobhuya kuti wainga asikatozii Djesu. (Mat. 26:69-75) Asi Pedru wakakunda kuthya kake uye pa nguwa yakazoteera iyena wakatara no rugondo rese kuti: “Musathye zviya zvaanothya, kana kunetseka.” (1 Ped. 3:14) Masoko a Pedru anotipasawo rugondo rekuti isusu tingakwanisawo kukunda kuthya anhu.

8. Zvinyi zvingatibetsera kukunda kuthya anhu? (1 Pedru 3:15)

⁸ Zvinyi zvingatibetsera kukunda kuthya anhu? Pedru wakati: “Cenesai Kristu hinga Tenzi mu mwoyo menyu.” (Erengai 1 Pedru 3:15.) Izvi zvinobatanidza kunyasa kurangarira cigaro uye simba rina Tenzi uye Mambo wedu Djesu Kristu. Kana pakamuka mukana wekuti mucedze ngezve masoko akanaka no anhu amweni, munothya here. Kana izvona zvikaitika, rangarirai Djesu ecitonga ari kudenga akatenderedzwa nge ngirozi dzakawanda. Edzurirai kuti iyena ano “masimba ese kudenga no panyika” uye iyena kamare akagondesa kuti “ndicange ndinemwi mazuwa ese dakara pa kupera ke nyika.” (Mat. 28:18-20) Pedru unotikohomedzesa kuti “tigare takagadzirira” kureketa ngezve zviro zviya zvatinotenda. Imwimwi maizoda here kuparidzira munhu we ku basa kenyu, kucikora kana kumbuto ipi hayo? Tangai marangarira kuti maizoda kuzviita pa mugariro upi uye gadzirirai zvamucareketa. Itai munamato kuti mugare no ushingi uye garai no rugondo rekuti Djehovha acamubetserai kukunda kuthya anhu.—Zvii. 4:29.

“IDAI MANINGI UMWE NA UMWE WENYU”

9. Pedru wakasiya kudini kupangidza rudo pa zuwa rimweni? (Onaiwo mufanikiso.)

⁹ Pedru wakafundira kupangidza rudo. Iyena wainga aripo Djesu paakati: “Ndiri kumupasai mutemo mupsva, dananai; hinga mushobo wandamudai, dananaiwo.” (Juau 13:34) Kunyazi zvakadaro, munguwa doko yakazoteera Pedru wakathya anhu uye iyena wakaramba kurhya no hama no hanzvadzi dzainga dzisiripi Adjudha. Muphostori Pauro wakabhuya kuti maitiro aya ainga ari e “ucengedzi.” (Aga. 2:11-14) Pedru wakatenda kupangirhwa uku uye pano zvaakafunda kubva ipona. Mutsamba dzake mbiri, iyena wakapangidza kuti atidikani basi kuzwa rudo re hama no hanzvadzi dzedu, asi tinodikanawo kupangidza rudo irona.

10. Panganidzai kuti cinyi cingatibetsera kupangidza ‘rudo risina ucengedzi’? (1 Pedru 1:22)

¹⁰ Pedru wakabhuya kuti munodikana “kuda hama dzenyu musikacengedzeri.” (Erengai 1 Pedru 1:22.) Kuti tidanane hinga hama tinodikana “kuzwira cokwadi.” Cokwadi ici cinobatanidza kuti “Mwari aasananguri.” (Zvii. 10:34, 35) Tinonga tisikapangidzi muezaniso wa Djesu we rudo mu ungano kana tikada hama dzimweni uye totama kuda dzimweni. Izvirokwazvo kuti tinoda hama dzese, asi aripo atinonyanya kuda maningi hinga zvakaizwawo na Djesu waida maningi afundi amweni. (Juau 13:23; 20:2) Asi Pedru unotiedzurira kuti tinodikana kupeta masimba kuti “tide hama dzedu”—kunyasa kubatana hinga hama dze kubarhwa nadzo no hama no hanzvadzi dzese.—1 Ped. 2:17.

11. Ngei zvakanaka kuda maningi hama dzedu no “mwoyo wese”?

¹¹ Pedru wakapangidza kuti zvinokosha “kuda maningi umwe na umwe wedu no mwoyo wese.” Kuda no “mwoyo wese” uku kunoreya kuda kunyazi zvecitoshupha kamare. Ngo muezaniso, maizoitei kana munhu akamunyangadzai? Cokutanga catingarangarira ngece kumuhwirinzirawo, pane kumupangidzira rudo. Asi Pedru wakafunda na Djesu kuti maitiro akadaro aapfadzi Djehovha. (Juau 18:10, 11) Pedru wakatara kuti: “Musahwirinzire cakashata no cakashata kana kutuka no kutuka. Pane kudaro, komborerai.” (1 Ped. 3:9) Kana imwimwi mukada maningi hama dzenyu mucadzipangidzira upfawi uye moedza kuzwisisa kunyazi aya akamugumburai.

12. (a) Kuda maningi hama no hanzvadzi dzedu kunotibetsera kuti tiitei? (b) Maererano no vhidhiyo yakazwi Chengetedza Chipo Chinokosha Chekubatana, imwimwi munodikana kupeta masimba kuti muitei?

¹² Mutsamba yake yekutanga, Pedru wakaseenzesa masoko ekuti “idai maningi.” Rudo rakadaro rinotibetsera kuti tirekerere, haiwa zvitema zvinganani basi, asi “zvitema zvakawanda.” (1 Ped. 4:8) Pamweni Pedru wakaedzurira zvaainga afunda na Djesu makore manganani ainga adarika ngezve kurekerera. Pa nguwa iyona, Pedru wakatendera kuti waipangidza upfawi paakabhuya kuti hama inodikana kurekerera “kanokwana 7.” Asi Djesu akafundisa Pedru pamwepo na isusu kuti tinodikana kurekerera “kanokwana 77,” kana kuti pese pazvinonga zvecidikanwa. (Mat. 18:21, 22) Kana meciona kuti zvinoshupha kuseenzesa zano iri, musaore mwoyo! Tese isusu pamweni paya tino cinetso cekurekerera amweni. Cinokosha kutora matanho anodikanwa kuti murekerere hama yenyu uye mugare murunyararo.c

AKURU, CENGETAI ZVAKANAKA UNGANO

13. Zviro zvipi zvingakwanisa kushuphira akuru e ungano kuti aone nguwa ye kubambisa hama no hanzvadzi?

¹³ Zvezvirokwazvo Pedru aazi kukanganwa zvaakabvunzwa na Djesu mumasure me kumutswa kake kuti: “Usha zvimabira zvangu.” (Juau 21:16) Kana imwimwi muri mukuru we ungano, munoziya kuti masoko aya anoseenzawo kamuri. Izvirokwazvo kuti zvingashuphira mukuru we ungano kuona nguwa yekuti aite basa iri rinokosha. Akuru anodikana kutanga kuriritira mhuri yawo panocokuita no zvokurarama nazvo, zvemundangariro uye zvekumwiya. Uyezve anodikana kupasa mukana wakanaka uyezve anodikana kupasa muezaniso wakanaka wekubuda mubasa rekuparidzi, kugadzirira matii awo emusangano, magungano e nharaunda uye magungano emutanha. Uye amweni ano ubaba wekubetsera mu Comissão de Ligação com Hospitais kana kuti Departamento Local de Projeto e Construção. Apana mubvunzo kuti akuru anarume akabatikana maningi!

14. Zvinyi zvingabetsera akuru kuti aushe mabira? (1 Pedru 5:1-4)

¹⁴ Pedru wakabvunza akuru e ungano kuti, “Ushai mabira a Mwari.” (Erengai 1 Pedru 5:1-4.) Kana imwimwi muri mukuru, tinoziya kuti munoda maningi hama no hanzvadzi uye munoda kunyasa kuacengeta zvakanaka. Asi pamweni paya, mungakwanisa kugara makabatikana maningi kana kuzwa makaremba zvoita kuti musakwanise kuita basa renyu. Pakadaro, zvinyi zvamungaita? Bvunzai Djehovha zvamuri kuzwa. Pedru wakatara kuti: “Kana munhu eciseenzera, ngaaite izvona no simba raanopaswa na Mwari.” (1 Ped. 4:11) Pamweni hama no hanzvadzi dziri kubatana no matambudziko ekuti aagadzirisiki zvino. Asi edzurirai kuti “muushi mukuru” Djesu Kristu angakwanisa kuabetsera kupinda imwimwi. Iyena anokwanisa kuzviita zvino uno kutobatanidzawo no munyika ipsva. Djehovha anoda basi kuti akuru ade hama no hanzvadzi, adziushe uye agare “muezaniso wakanaka ku mabira.”

15. Mukuru we ungano ungausha kudini mabira? (Onaiwo foto.)

¹⁵ William, hama iri kuseenza hinga mukuru ke makore akawanda, inoziya kukosha ke kuusha hama. Nhenda ye COVID-19 payakatanga, iyena no akuru amweni akaita zviri zvese kuti apinde mucitenderano no hama imwe na imwe ye muzvikwata zvawo. Iyona inopanganidza yeciti: “Hama dzakawanda dzainga dziri dzega pa nyumba uye zvainga zviri nyore kuti awona atange kugara no marangariro akashata.” William unonyasa kupurutana hama painonga yecibatana no matambudziko. Kuti anyase kuzwisisa zviri kudiwa no hama uye kuti ungaibetsera kudini, pedzepo iyena unopsvaka mabhuku kana kuti mavhidhiyo kuti abambise hameyo. Iyena unoti: “Nguwa yatiri kurarama ino, zvinokosha maningi kuusha mabira. Isusu tinopeta maningi masimba kuti tibetsere anhu asikazii Djehovha; hino tinodikana kupeta masimba amwewo kuti tibetsera hama kuti dzirumbwe dziri mu cokwadi.”

SIYAI KUTI DJEHOVHA AMUFUNDISEI

16. Tingaseenzesa kudini zviro zvatafunda kubva mu tsamba dza Pedru?

¹⁶ Dakara zvino takwanisa kuona zviro zvinganani zvatinofunda kubva mutsamba mbiri dza Pedru. Pamweni imwimwi maona zviro zvamunodikana kugadzirisa. Ngo muezaniso, imwimwi muri kuda here kunyasa kurangarira ngezve makomborero amucatambira munyika ipsva? Kodi imwimwi mungagara no cinangwa cekuparidzira kucikora, ku basa kana kuti pamugariro upi hawo? Imwimwi makwanisa kuona here mishobo yamungapangidza nayo rudo rikuru kuhama no hazvadzi dzenyu? Uye imwimwi akuru e ungano, mashinga here kurumbwa meciusha mabira a Mwari no mwoyo wese? Pamweni imwimwi maona kuti muno matii amweni amunodikana kugadzirisa, kana zvakadaro musaore mwoyo. “Tenzi akanaka,” uye iyena acamubetserai kuita cinjo dzinodikanwa. (1 Ped. 2:3) Pedru wakatigondesa kuti: “Mwari . . . acapedzesa kumufundisai. Iyena acamubambisai, acamupasai simba, acamukandai pa fundasau yakabamba.”—1 Ped. 5:10.

17. Makomborero api aticatambira ngekushingirira uye kusiya kuti Djehovha atifundise?

¹⁷ Pedru waidziona hinga wainga asikazi kusisira kugara na Djesu. (Ruka 5:8) Asi no rubetso re rudo ra Djehovha na Djesu, Pedru wakashingirira uye wakarumbwa ari muteeri wa Kristu. Mubairo wakhona ngewe kuti Pedru wakatenderhwa na Mwari “kupinda mu Umambo usikaperi wa Tenzi wedu uye Muponesi wedu Djesu Kristu.” (2 Ped. 1:11) Uu mubairo wakanaka maningi! Kana imwimwi mukaita hinga Pedru, moshingirira uye motenda kufundiswa na Djehovha, mucatambira mubairo we kurarama nokusikaperi. Nge kudaro, imwimwi mungakwanisa kugumira cinangwa “pamunonga meciona ruponeso renyu, nge kutenda kenyu.”—1 Ped. 1:9.