Djehovha Acamubetsera

1. Tino cokwadi ce zviro zvipi?

ISUSU tiri anhu a Djehovha, tinozviziya kuti iyena anotida maningi uye anoda kuti tigare tecipfara. (Aro. 8:35-39) Isusu tino cokwadi cekuti tinobetsereka maningi kana tikaseenzesa mazano ari mu Bhaibheri. (Isa. 48:17, 18) Asi tinodikana kuitei kana tikabatana no dambudziko ratainga tisikakariri mu upenyu wedu?

2. Zvinetso zvipi zvatingasongana nazvo, uye mibvunzo dzipi dzekuti pamweni dzingamuka?

² Aseenzi ese a Djehovha anosongana no matambudziko. Hinga muezaniso, umwe we mu mhuri medu ungareketa zviro zvinotisiya taora mwoyo kana kuti tingabatana no cinetso ce uthongo cingatipingaidza pa zviya zvataida kuitira Djehovha. Pamweni tingasongana no matambudziko e tsaona dzinoitika dzoga. Kana kuti kuteererhwa nge ndaa ye kutenda kedu. Patinonga tecibatana no migariro yakaita hingana ii, pamweni tingadzibvunzisa kuti: ‘Ngei zviro izvi zviri kuitika kandiri? Kodi inini ndaita ciro cakashata here? Kodi izvi zvinopangidza kuti andicina makomborero a Djehovha?’ Pamweni imwimwi makambozwawo kudaro. Pa mugariro wakadaro musanetseke. Akawanda e aseenzi a Djehovha akagondeka akazwawo kudaro.—Pis. 22:1, 2; Abha. 1:2, 3.

3. Tafundei kubva mu bhuku ra Pisarema 34:19?

³ Erengai Pisarema 34:19. Pisarema ii inopanganidza mafundo maiiri anokosha: (1) Anatsi anosonganawo no matambudziko. (2) Djehovha anotisudzunura mu matambudziko edu. Asi Djehovha anozviita kudini? Mushobo we kuita izvona nge we kutibetsera kuti tigare no maonero e cokwadi mu nyika ino. Djehovha anotigondesa kuti ticaona mupfaro wakakura nge kumuseenzera, kunyazi zvakadaro iyena aatigondesi kuti upenyu ucagara usina matambudziko. (Isa. 66:14) Djehovha anotikohomedzesa kuti tikande ndangariro dzedu mune ramangwana—nguwa yekuti ticagara no upenyu waaida katiri, upenyu unopfadza uye nokusikaperi. (2 Ako. 4:16-18) Dakara ikona, Djehovha acatibetsera kuti tirumbwe tecimuseenzera zuwa no zuwa, pasinei no zvinetso zvatingasongana nazvo.—Mari. 3:22-24.

4. Ticaonei mu fundo ino?

⁴ Ngationei kuti tingafundei nge miezaniso ye aseenzi akagondeka a Djehovha e mu nguwa ye kare no e mazuwa ano. Ticaonawo kuti tese isusu tingasongana no matambudziko atisikakariri mu upenyu. Asi kana tikagonda na Djehovha, iyena acatibetsera. (Pis. 55:22) Patinonga teciongorora miezaniso dze fundo ino, dzibvunzisei kuti: ‘Inini ndaizoita kudini pa mugariro wakadaro? Miezaniso idzi dzinobambisa kudini rugondo rangu na Djehovha? Mafundo api andingaseenzesa mu upenyu wangu?’

MU NGUWA DZE BHAIBHERI

5. Zvinetso zvipi zvakasongana na Djakobo nge ndaa ya Rabhani? (Onai foto ye pa kapa.)

⁵ Aseenzi a Djehovha e mu nguwa ye kare akasongana no matambudziko aainga asikakariri. Onai muezaniso wa Djakobo. Baba ake akamubvunza kuti asanangure waizogara mukadzi wake pa ana airi a Rabhani, wainga ari umwe we mu mhuri ii yainamatawo Djehovha. Baba a Djakobo akamubvunza no rugondo rese kuti kudai ukaita izvona waizokomborerhwa ndi Djehovha. (Gen. 28:1-4) Hino Djakobo wakapurutana baba ake. Iyena wakasiya nyika yake ye Kanani, uye wakaita rhwendo re kuenda ku nyumba ya Rabhani, wainga ano ana ake airi—Reya, na Rakeri. Djakobo wakasirira mudoko wa Reya, waizwi Rakeri, uye wakatendera kuseenzera Rabhani ke makore manomwe kuti azokwanise kumuwaka. (Gen. 29:18) Asi andizvopi zvakazoitika. Rabhani wakacengedza Djakobo nge kuita kuti awake yaya a Rakeri, aizwi Reya. Mumasure me sumana, Rabhani wakatendera kuti Djakobo awake Rakeri, asi waidikana kuseenzazve ke makore manomwe kuti akwanise kumuwaka. (Gen. 29:25-27) Rabhani wakapangidza kusama kugondeka pa bhizi raakaita na Djakobo. Pa nguwa imweyo, Rabhani wakadzvinyirira Djakobo ke makore 20!—Gen. 31:41, 42.

6. Matambudziko api amweni akasongana na Djakobo?

⁶ Djakobo wakasongana no matambudziko amweni. Iyena wainga ano mhuri yakakura, asi ana ake ainga asikaitirani zvakanaka nguwa dzese. Awona akaguma pa kutengesa hama yawo kamare, Zuzee, hinga muranda. Ana airi a Djakobo, Simeyau na Revhi, akatosvipisa haiwa basi zina re mhuri yawo, asi ra Djehovha. Kupinda izvona, Rakeri, mukadzi waidiwa ndi Djakobo, wakafa paaibereka mwana wake we cipiri. Nge ndaa ye nzara yakakura yakaitika mu nharaunda yaaigara, Djakobo kunyazi wainga akura, zvakamubambidzira kuti acinje kwenda koogara ku nyika ye Edjipito.—Gen. 34:30; 35:16-19; 37:28; 45:9-11, 28.

7. Djehovha akapangidza kudini kuna Djakobo kuti aimupfarira?

⁷ Kunyazi no zvese zvakaitika, Djakobo aazi kuruza kugondeka kake kuna Djehovha no zvipikirhwa Zvake. Djehovha akapangidza pamhene kuti ainga apfarira Djakobo. Hinga muezaniso, kunyazi hazvo Rabhani waiedza no paanokwanisa napo kuti acengedze Djakobo, Djehovha akarumbwa ecikomborera Djakobo pa zviro zve kurarama nazvo. Uye cimborangarirai kutenda kakaita Djakobo kuna Djehovha nge kuonanazve no mwana wake waaida, Zuzee—mwana waairangarira kuti wainga afa ke makore ainga adarika! Ushamwari wakabamba wainga una Djakobo na Djehovha ndiwona wakaita kuti akwanise kukunda matambudziko ese aaisongana nawo. (Gen. 30:43; 32:9, 10; 46:28-30) Kana tikarumbwa tino ushamwari wakabamba na Djehovha, ticakwanisa kukunda matambudziko atingasongana nawo tisikaakariri.

8. Mambo Dhavhidhi waida kuitei?

⁸ Mambo Dhavhidhi aazi kukwanisa kuita zvese zvaaida kuita mu basa ra Djehovha. Hinga muezaniso, iyena waida maningi kuwakira Mwari wake tempro. Uye iyena akabhuya ngezve cido icona ku muphorofita Natani. Natani wakadaira eciti: “Itai zvese zviri mu mwoyo menyu, ngokuti Mwari we zvirokwazvo ana imwimwi.” (1 Mak. 17:1, 2) Masoko aya pamweni akabambisa maningi Dhavhidhi. Pamweni mumasure mazvo akatanga kuita urongwa we basero.

9. Dhavhidhi wakazwa kudini paakatambira masoko anotsukwarisa?

⁹ Mumasure mazvo, muphorofita wa Djehovha wakauya no masoko aitsukwarisa. “Usiku iwona,” Djehovha akabvunza Natani kuti Dhavhidhi wainga asikadikani kuwaka tempro, pane kudaro, umwe we mwana wake ndiyena waidikana kuita izvona. (1 Mak. 17:3, 4, 11, 12) Dhavhidhi wakazwa kudini paakatambira masoko aya? Iyena wakagadzirisa zvinangwa zvake. Dhavhidhi wakatanga kukanda ndangariro dzake pa kuunganidza mare no zvese zvaizodikanwa no mwana wake Soromoni pa kuita basa irona.—1 Mak. 29:1-5.

10. Djehovha akakomborera kudini Dhavhidhi?

¹⁰ Mumasure me kubvunza Dhavhidhi kuti wainga asikadikani kuwaka tempro, Djehovha akaita citenderano naye. Iyena akagondesa kuti umwe we mubarirhwana wa Dhavhidhi waizotonga nokusikaperi. (2 Sam. 7:16) Mu nyika ipsva, pa makore anokwana kuita 1000, Dhavhidhi ucapfara maningi paacaziya kuti Mambo Djesu ndi umwe we mubarirhwana wake! Ngano ii inotibetsera kuziya kuti kunyazi tisikakwanisi kuita zvese zviya zvataida kuitira Djehovha, Mwari wedu anokwanisa kugara no makomborero amweni akaigika katiri, makomborero atainga tisikazombokariri kuti taizogara nawo.

11. Akristu e mu nguwa ye aphostori akakomborerhwa kudini kunyazi Umambo usikazi kuuya pa nguwa yaaikarira? (Zviito 6:7)

¹¹ Mu nguwa ye aphostori, Akristu akasongana no matambudziko aainga asikakariri kuti aizosongana nawo. Ngo muezaniso, awona aida maningi kuti Umambo wa Mwari uuye, asi awona ainga asikazii kuti izvona zvaizoitika riini. (Zvii. 1:6, 7) Hino, awona akaitei? Awona akarumbwa akabatikana pa basa re kuparidzira. Paairumbwa akabatikana pa basa re kuparidzira ku matii ese, awona akakwanisa kuona kuti Djehovha aiabetsera zvakadini.—Erengai Zviito 6:7.

12. Akristu e mu nguwa yekare akaitei paakabatana no nzara yakakura?

¹² Pa nguwa imweni, nzara yakakura yakaitika “mu nyika yese yaigarhwa.” (Zvii. 11:28) Uye Akristu e mu nguwa iyona akabatanawo nayo. Cimborangaridzai kuti awona akashuphika zvakadini nge ndaa ye nzara ii yakakura. Apana mubvunzo wekuti aya ainga ari misoro ye mhuri ainetseka maningi kuti aone zvekurhya zvekuti akwanise kupasa mhuri yawo. Uye cimborangaridzai kubata-bata kazvakaita madjaha aya ainga akaronga kuita zvakawanda mu basa re kuparidzira. Nguwa dzimweni, pamweni aitorangarira kucinja urongwa wawo. Kunyazi migariro yainga yakasiyana ku umwe na umwe wawo, Akristu e mu nguwa iyona akaedza kugutsikana no zviya zvaainga anazvo. Awona akarumbwa eciparidzira nge mushobo waaikwanisa, uye aipfara nge kupungurirana zviya zvaainga anazvo no hama dze ku Djudha.—Zvii. 11:29, 30.

13. Akristu akakomborerhwa kudini pa nguwa yese ii ye nzara?

¹³ Akristu aya e mu nguwa ye kare akakomborerhwa kudini pa nguwa ye nzara? Aya akatambira rubetso re zvekurarama nazvo akaona pamhene kuti Djehovha aiabetsera zvakadini. (Mat. 6:31-33) Awona pamweni akazotozwa ari padhuze no hama dziya dzaiabetsa. Uye aya akapasa zvipo kana kuti aya akabetsera nge mushobo umweni, akakwanisa kuzwa mupfaro we kubetsera amweni. (Zvii. 20:35) Djehovha akakomborera ese aya aipeta masimba kuti ararame no zviro zvidoko zvaainga anazvo pa mugariro uu unoshupha.

14. Cinyi cakaitika na Bharnabhee uye no muphostori Pauro, uye ngaupi mugumisiro wakhona? (Zviito 14:21, 22)

¹⁴ Mu nguwa ye aphostori, Akristu aiteererhwa uye kakawanda kakhona asikatozvikariri. Onai zvakaitika na Bharnabhee no muphostori Pauro paaiparidzira ku Ristra. Pakutanga, anhu aiatambira zvakanaka uye aipurutana zviya zvaaibhuya. Asi gare-gare mu zuwa irona kamare, aya aishora “akacengedza zvikwata zve anhu,” uye amweni e aya ainga akambozwa masoko a Pauro akamufura ngo mapuwe, omusiya ecirangarira kuti wafa. (Zvii. 14:19) Kunyazi zvakadaro, Bharnabhee na Pauro akarumbwa eciparidzira ku mbuto dzimweni. Ngaupi mugumisiro wakhona? Awona akaita “numero yakakura ye afundi.” Kusiya izvona, masoko awo no miezaniso dzawo zvakabambisa maningi hama dze mu nguwa iyona. (Erengai Zviito 14:21, 22.) Pauro na Bharnabhee aazi kusiya kuparidzira kunyazi paaiteererhwa. Uye nge ndaa yazvo, akawanda akakwanisa kubetsereka. Kana tikasama kuremba pa basa ratakakumbirhwa na Djehovha kuti tiite, zvezvirokwazvo ticakomborerhwawo.

MU MAZUWA ANO

15. Tingafundei no muezaniso wa Hama A. H. Macmillan?

¹⁵ Asati aguma makore e 1914, anhu a Djehovha aietsera kuti zviro zvimweni zvaizoitika. Onai muezaniso wa Hama A. H. Macmillan. Kuita hinga anhu akawanda e mu nguwa iyona, Hama Macmillan airangarira kuti aizopurumutswa ecienda kudenga nokukasika. Pa mharidzo imweni muna Setembro ya 1914, awona akati: “Ii pamweni i mharidzo yangu ye kupedzesera ku anhu ese.” Zviri pamhene kuti iyona yainga isiripi mharidzo yawo ye kupedzesera. Mu nguwa yakazodarika Hama Macmillan akazotara kuti: “Amweni edu takakasika kurangarira maningi kuti taizoenda kudenga pa nguwa iyona kamare, asi taidikana kurumbwa takabatikana mu basa ra Tenzi.” Zvezvirokwazvo Hama Macmillan akarumbwa akabatikana pa basa irona. Awona akarumbwa eciparidzira no kushingaira. Awona akagara no makomborero e kubambisa hama dzainga dzasungwa nge ndaa ye kusama kutsigira nyika. Kunyazi awona akura, anopinda musangano akagondeka. Ngei zvainga zvakanaka kuna Hama Macmillan kuti arumbwe akabatikana mu basa ra Djehovha paaietsera mubairo wawo? Pa nguwa doko asati afa muna 1966, awona akatara kuti: “Kutenda kangu kucakabamba hingana zvakainga kakaita kare.” Uu i muezaniso wakanaka wekuti tese isusu titeedzere—maka-maka kana zvinetso zvedu zvecinonoka kupera hingana zvataikarira!—Aheb. 13:7.

16. Hama Herbert Jennings, pamwepo no mukadzi wawo akasongana no mugariro upi waainga asikakariri? (Tiyago 4:14)

¹⁶ Aseenzi a Djehovha akawanda anosongana no zvinetso zve uthongo zvinoitika asikakariri. Ngo muezaniso, onai esperiensiya ya Hama Herbert Jenningsb inopanganidza ngezve mushobo waaida basa re umisionariyo, pamwepo no mukadzi wawo ku Gana. Asi nokuhamba ke nguwa, awona akaoneka kuti ainga ano nhenda ye transtorno do humor. Ecireketa ngezve masoko ari pana Tiyago 4:14, Hama Jennings akadainza mugariro uwona we zviro eciti “zviro ‘zva mangwana’ zvatisikakwanisi kuona.” (Erengai.) Awona akatara kuti: “Takabatana nazvo zvezvirokwazvo, uye takagadzirira kusiya Gana no shamwari dzedu dzataida, tohwirira ku Canadá [kuti tiende kooraphwa nhenda iyona].” Djehovha akabetsera Hama Jennings, pamwepo no mukadzi wawo kurumbwa eciseenza akagondeka kunyazi no zvinetso zvaaisongana nazvo.

17. Muezaniso wa Hama Jennings wakabetsera kudini hama dzimweni?

¹⁷ Mushobo wakanaka wakareketa Hama Jennings ngezve zviro zvakaitika, wakabetsera anhu akawanda. Hanzvadzi imweni yakatara kuti: “Apana fundo imweni yakandibaya mwoyo hingana ii. . . . Kuerenga ngezve kuti Hama Jennings aidikana kusiya basa rawo kuti aende koorapisa nhenda yawo, zvakandibetsera kuti ndigare no maonero ari pakati no pakati.” Hama imweni yakatara kuti: “Mumasure me kuseenza makore anokwana 10 ndiri mukuru we ungano, inini ndaidikana kusiya makomborero awona nge ndaa yo nhenda yandainga ndinayo ye kuhunguruka. Marangariro angu e kukonerhwa kuita ciro ainga akabamba maningi, zvekuti kurangarira ngezve ngano ye upenyu zvaiita kuti ndiwore mwoyo maningi. . . . Asi kushingirira ka Hama Jennings kakandidakadza.” Izvona zvinoita kuti tiedzurire kuti kana tikasongana no zvinetso zvinoitika tisikakariri, tinokwanisawo kubambisa amweni. Nguwa dzimweni upenyu wedu auiti zviya zvatairangarira, kunyazi zvakadaro tinokwanisa kugara muezaniso we kutenda no kushingirira ku amweni.—1 Ped. 5:9.

18. Hinga zvinopangidzwa pa mifanikiso, mafundei kubva pa muezaniso we hanzvadzi ye ku Nigéria?

¹⁸ Mugariro unoshupha wakaita hingana COVID-19, wakabata-bata maningi akawanda e hama dzedu. Ngo muezaniso, mufirhwakadzi umweni we ku Nigéria wainga asina mare ye kukwanisa kutenga zvekurhya. Zuwa rimweni ce macibese, mwana wakhona wakabvunzisa kuti: Taizorhyeizve mumasure me kubika kopo ye kupedzesera ye mupunga yainga yasara. Hanzvadziyo yakabvunza mwana wayo kuti awona ainga asisina mare kana cekurhya. Hino awona aidikana kuteedzera muezaniso we mufirhwakadzi we ku Zarefati—kugadzirira cekurhya ce kupedzesera uye tonyasa kugonda Djehovha. (1 Mad. 17:8-16) Pa zuwa irona kamare, asatoti atombonetseka nge zvekuti aizorhyei, ce masikati akatambira hama mbiri dzainga dzino zvekurhya. Zvaakatambira zvaikwana kuti awona arhye ke mazuwa anodarika masumana mairi. Hanzvadzi ii yakareketa kuti pa nguwa iyona yakatoziya kuti Djehovha ainga ecipurutana maningi, paaireketa masoko awona ku mwana wayo. Izvona zvinotifundisei? Zvezvirokwazvo nge zvekuti, kana tikanyasa kugonda Djehovha, matambudziko anomuka tisikakariri mu upenyu anokwanisa kupedzesera atoita kuti tikhwedere dhuze naye.—1 Ped. 5:6, 7.

19. Kuteererhwa kupi kakasongana no hama Aleksey Yershov?

¹⁹ Zvinetso zvimweni zvisikakarirhwi zviri kusongana no hama no hanzvadzi mazuwa ano, i kuteererhwa. Ngo muezaniso, onai zvakaitika kuna Hama Aleksey Yershov, anogara ku Rússia. Awona paakabhabhatidzwa muna 1994, hama dze mu nyika iyona dzainga dzino rusudzunuko. Asi mumasure me makore manganani, zviro zvakacinja ku Rússia. Mu gore ra 2020, nyumba ya Hama Yershov yakatorhwa ngezve cisimba nokuicesa uye anyautongi akapedza kutora zvese zvaaida. Mu mwedzi dzinganani dzakazoteera, anyautongi akatanga kumupumha kuti wainga ano ndaa. Upupuri wakaseenzeswa pakupumha hama ii wainga uri mu mavhidhiyo akaduswa ngo munhu umweni wakapedza gore ecinyepedzera kufunda Bhaibheri. Cimborangaridzai kuti Aleksey wakazwa kudini paakatengeswa!

20. Hama Aleksey akabambisa kudini ushamwari wawo na Djehovha?

²⁰ Kodi kuteererhwa ka Hama Yershov kakagara no mugumisiro wakanaka here? Honde. Ushamwari wawo na Djehovha wakatunhudzira kubamba. Awona anoti: “Inini no mukadzi wangu tinoita munamato pamwepo mazuwa ese.” Uye anotunhudzira kuti: “Inini ndinoziya kuti tainga tisikazokwanisi kuzvikunda tiri tega pasina rubetso ra Djehovha. Kuita fundo yo munhu ega kunondibetsera kuti ndisaore mwoyo. Inini ndinopfarira kunyasa kurangarira ngezve aseenzi akagondeka e kare. Mu Bhaibheri muno ngano dzinopangidza kukosha kunoita kuti tirumbwe takaterama uye kugonda Djehovha.”

21. Tafundei mu fundo ino?

²¹ Tafundei mu fundo ino? Pa migariro ii, zvinetso zvingakwanisa kumuka tisikakariri. Kunyazi zvakadaro, Djehovha anorumbwa ecikomborera aya anomugonda. Ndizvona zvinorekethwa no tsamba irikutungamirira fundo ino, inoti “matambudziko e munhu munatsi akawanda, asi Djehovha anomununura pa matambudziko ese.” (Pis. 34:19) Hino pane kukanda ndangariro dzedu pa zvinetso, tinodikana kukanda ndangariro dzedu pa simba ra Djehovha raanaro pa kutibetsera. Kana tikadaro, ticakwanisa kubhuya zvakabhuiwa no muphostori Pauro paakati: “Ndino simba rokuita zviro zvese ngokuti pane anondipasa simba.”—Afi. 4:13.