Itai Kuti Ungano Irumbwe Yakabatana

Patinonga tino hama no hanzvadzi, tinozwa hinga zvaiita Mambo Dhavhidhi paakati: “Onai kunaka kazvakaita uye kupfadza kazvinoita kana hama dzecigara pamwepo dzakabatana!” (Pisarema 133:1) Azviitiki zvega kuti tigare takabatana. Umwe na umwe wedu ano zvaanodikana kuita kuti tirumbwe takabatana.

1. Cinyi cinoshamisa pa anhu a Mwari?

Kana mukapinda misangano ku nyika imweni, pamweni mungatama kuzwa henyu mureketero weyo, asi mungazwa kuti muri pakati pe amweni enyu. Ngei? Ngekuti tinofunda Bhaibheri teciseenzesa mabhuku amwewo mu nyika yese. Uye tinoedza kupangidzana rudo. “Tinoseenzesa zina ra Djehovha, uye tinomuseenzera takabatana,” azvinei nokatinogara.—Zefaniya 3:9, masoko epasi.

2. Mungaitei kuti mucengetedze kubatana katakaita?

’Dananai no mwoyo wese.’ (1 Pedru 1:22) Mungaseenzesa kudini zano iri? Pa mbuto pekukanda ndangariro dzedu pa zvishaishi zve amweni, munodikana kupsvaka zviro zvakanaka zvaanoita. Musandoshamwaridzane basi no anhu anopfarira zvamunopfarirawo. Edzai kuziyana no amweni anobva ku mbuto dzakasiyana-siyana. Tinodikanawo kurhwisa ndangariro yekuzonda anhu amweni.—Erengai 1 Pedru 2:17.a

3. Mungaita kudini kana mukatama kuzwirana no mukristu umweni?

Kunyazi hazvo tiri anhu akabatana, tinomboshaishiranawo. Tingaitira anhu amweni zviro zvaainga asikakariri kuti taizoaitira kana kutowarhwadzisa. Ndiyo ndaa Soko ra Mwari recitibvunza kuti “rumbwai . . . mecirekererana.” Uye rinoenderera mberi recibhuya kuti: “Hinga zvamakarekererhwa no mwoyo wese na Djehovha, imwimwi munodikana kuitawo zvimwezvo.” (Erengai Akorosi 3:13.) Tinoshaishira Djehovha kakawanda, asi iyena anondotirekerera. Ndiyo ndaa iyena anoimira kuti isusuwo tirekerere hama dzedu. Kana mukaziya kuti pano munhu wamakashaishira, tangai imwimwi kutora danho rekugadzirisa nyaya yakhona.—Erengai Mateu 5:23, 24.b

FUNDAI ZVAKAWANDA

4. Kurirai dambudziko rekusanangura

Tinodikana kuda hama dzedu dzese. Asi zvingatishuphira kuda munhu wakasiyana na isusu. Cinyi cingamubetsera? Erengai Zviito 10:34, 35, pedzepo cedzai nge zve mibvunzo dzinoteera:

• Djehovha anotambira anhu e madzinza ese kuti agare Apupuri ake. Kuziya izvona kunodikana kuita kuti tione kudini anhu amweni akasiyana na isusu?

• Kamunogara, anhu anosanangura anhu akaita kudini?

Erengai 2 Akorinti 6:11-13, pedzepo cedzai nge zve mubvunzo unoteera:

• Munorangarira kuti mungaita kudini kuti mukhwedere dhuze no hama no hanzvadzi dzakasiyana na imwimwi?

5. Rekererai no mwoyo wese uye gadzirisai nyaya kana musikazwirani

Djehovha anotirekerera no mwoyo wese, asi apana paanozombodawo kuti isusu timurekerere, ngokuti iyena aashaishi. Erengai Pisarema 86:5, pedzepo cedzai nge zve mibvunzo dzinoteera:

• Kurekerera ka Djehovha kakakura kudini?

• Cinyi cinoita kuti titende kurekerera kake?

• Migariro ipi ye zviro ingaita kuti zvitishuphire kuzwirana no amweni?

Tingateedzera kudini Djehovha kuti tirumbwe takabatana no hama uye hanzvadzi dzedu? Erengai Zvierengo 19:11, pedzepo cedzai nge zve mubvunzo unoteera:

• Kana munhu akamunyangadza kana kuti akamurhwadzisa, mungaitei kuti mugadzirise nyaya ii?

Nguwa dzimweni, tingarhwadzisa amweni. Kana izvona zvikaitika tinodikana kuitei? Ridzai VHIDHIYO, pedzepo cedzai nge zve mubvunzo unoteera.

VHIDHIYO: Kupsvaka Runyararo Kunounza Makomborero (6:01)

• Mu vhidhiyo yataona, hanzvadzi yakaitei kuti igadzirise kusama kuzwirana kayaiita no hanzvadzi imweni?

6. Kandai ndangariro dzenyu pa zviro zvakanaka zvinoizwa no hama uye hanzvadzi dzenyu

Kana tikakhwedera dhuze no hama uye hanzvadzi dzedu, tinoguma pakuziya zviro zvakanaka zvainoita uye zvaanoshaishawo. Tingaita kudini kuti tigare tecirangarira zviro zvakanaka zvaanoita? Ridzai VHIDHIYO, pedzepo cedzai nge zve mubvunzo unoteera.

VHIDHIYO: Tutsirai Kugara Munhu Wakanaka! (5:10)

• Cinyi cingamubetsera kuti mukande ndangariro dzenyu pa zviro zvakanaka zvinoizwa no hama uye hanzvadzi dzenyu?

Djehovha anokanda ndangariro dzake pa zviro zvakanaka zvatinoita. Erengai 2 Makoronika 16:9a, pedzepo cedzai nge zve mubvunzo unoteera:

• Kuziya kuti Djehovha anokanda ndangariro dzake pa zviro zvakanaka zvamunoita kunoita kuti muzwe kudini?

MUCIGWAGWA

Mungakwanisa kubetsera kuti ungano igare yakabatana kana mukarekerera uye mukapangidza kuti munoda hama no hanzvadzi dzenyu dzese.

Mibvunzo yekuhwirinzira

• Mungakunda kudini dambudziko rekusanangura anhu akasiyana na imwimwi?

• Mucaita kudini kana mukashaishirana no hama imweni?

• Ngei tecidikana kuteedzera Djehovha pa nyaya yekurekerera amweni?

ZIYAI ZVAKAWANDA

Onai kuti miezaniso miiri yakarekethwa na Djesu inotibetsera kudini kuti tisatonge amweni.

Bvisai Danda (6:56)

Tingakumbira kurekererhwa pasina catashaisha here?

“Kukumbira Rurekerero—Kunokosha Maningi Ngekuti Zvinoita Kuti Paoneke Runyararo” (Murindiri wa 1 ya Novembro wa 2002)

Onai kuti anarume airi akakurira munyika ino rusananguro akaona kudini cinozwi kubatana ke cokwadi.

Musatonge Amweni ngo Ciimo Cawo (5:06)

Onai mishobo yamungagadzirisa nayo dambudziko rekutama kuzwirana no hama zvisati zvapingaidza runyararo mu ungano.

“Pangidzai Rudo Pamunonga Mecigadzirisa Kusama Kupindirana” (Murindiri wa Mayo 2016)