FUNDO 07

Djehovha Munhu Akaita Kudini?

Rakaizwa Zvekudindhwa

Kana mukarangarira nge zva Djehovha Mwari, ngazvipi zvinouya mu ndangariro menyu? Munomuona hingana munhu anotyisa, uye arikure na imwimwi kuita hingana nyeredzi dziri kure here? Kana kuti munorangarira kuti ano simba, asi asina unhu, kuita hingana mhepo here? Djehovha munhu akamboita kudini kamare? Djehovha arikuseenzesa Soko rake kuti amubvunze zvaari uye kuti anomuda maningi.

1. Ngei tisikakwanisi kuona Mwari?

“Mwari Mwiya.” (Juau 4:24) Djehovha aana muiri we nyama. Iyena anogara kudenga katisikakwanisi kuona.

2. Ngaupi unhu unganani wa Djehovha?

Kunyazi Djehovha asikaoneki, iyena munhu kamare ano unhu unoita kuti adiwe no anhu aya anomuziya. Bhaibheri rinoti: “Djehovha anoda unatsi, uye aazosii aya akagondeka kaari.” (Pisarema 37:28) Iyena ano “usisi uye anorekerera,” maka-maka kune anhu aya ari kushuphika. (Tiyago 5:11) “Djehovha ari dhuze no aya akaora mwoyo; Anoponesa aya akatsukwara.” (Pisarema 34:18) Maizviziya kuti zviya zvatinoita zvingakwanisa kupfadza kana kutsukwarisa Djehovha here? Munhu unoita zvisananguro zvakashata anomurhwadzisa uye anomutsukwarisa. (Pisarema 78:40, 41) Asi munhu unoita zvakanaka anomusiya akapfara.—Erengai Zvierengo 27:11.

3. Djehovha anopangidza kudini kuti anotida?

Wara guru ra Djehovha rudo. Zvezvirokwazvo, “Mwari rudo.” (1 Juau 4:8) Djehovha anopangidza rudo rake haiwa basi eciseenzesa Bhaibheri, asi eciseenzesawo zviro zvaakasika. (Erengai Zviito 14:17.) Nge muezaniso, onai masikire aakatiita. Iyena akatipa simba rokukwanisa kuona makori akarungama, nzee dze kuzwa zviridzwa zvinopfadza, uye kuraira zvokurhya zvinonaka. Iyena anoda kuti tipfadzwe ne upenyu.

FUNDAI ZVAKAWANDA

Fundai kuti Djehovha anoseenzesa cinyi kuti aite zviro zvinoshamisa. Pedzepo onai kuti anopangidza kudini kuti ndi Mwari anoshamisa.

4. Mwiya mucena—simba ra Mwari

Collage: 1. Praneta uye denga no nyika. 2. Mutari we Bhaibheri ecitara marangariro aafemerhwa na Mwari mu roro.

Hingana maseenzesere atinoita nyara dzedu kuti tiite mabasa, Djehovha anoseenzesawo mwiya mucena. Bhaibheri rinobhuya kuti mwiya mucena amunhupi, asi i simba rinoseenzeswa na Mwari kuti aite zviro zvaanoda. Erengai Ruka 11:13 uye Zviito 2:17, pedzepo cedzai nge zve mibvunzo dzinoteera:

Kana tikakumbira mwiya mucena, Djehovha acatipasa. Hino, munorangarira kuti mwiya mucena munhu here, kana kuti i simba ra Mwari? Ngei mecibhuya kudaro?

Djehovha anoseenzesa mwiya mucena wake kuti aite zviro zvinoshamisa. Erengai Pisarema 33:6 uye 2 Pedru 1:20, 21, uye cedzai nge zve mubvunzo unoteera:

Djehovha akaseenzesa mwiya mucena wake kuti aite zviro zvipi?

5. Djehovha anobata anhu zvakanaka

Mozesi wainga ari munamati wakagondeka wa Mwari, asi iyena waida kunyasa kuziya Musiki wake. Hino Mozesi wakati kaari: “Ndiziisei makwanza enyu kuti ndimuziyei.” (Ekisodho 33:13) Djehovha akapangidza Mozesi unhu wake unganani. Erengai Ekisodho 34:4-6, pedzepo cedzai nge zve mibvunzo dzinoteera:

Djehovha akapangidza kudini unhu wake kuna Mozesi?
Ngazvipi zvamunonyanya kupfarira pana Djehovha?

6. Djehovha anoda anhu ese

Ahebheru ainamata Mwari asi ainga ari aranda ku Edjipitu. Djehovha aizwa kudini ngekushuphika kawo? Ridzai AUDHIYO uye hambiranai no kuerenga ikona, kana kuti erengai Ekisodho 3:1-10. Pedzepo cedzai nge zve mibvunzo dzinoteera.

AUDHIYO: Djehovha Airhwadziwa Ngekushuphika Kaaita (2:45)

Hingana zvemazwa mu nyaya ii, Mwari anozwa kudini anhu paanoshuphika?—Onai mavhersikuro 7 uye 8.
Munorangarira kuti Djehovha anodadi kamare kubetsera anhu, uye iyena anokwanisa kuzviitadi here? Ngei mecidaro?

7. Tingafunda ngezva Djehovha kubva pa zviro zvaakasika

Djehovha anopangidza unhu wake eciseenzesa zviro zvaakasika. Ridzai VHIDHIYO. Pedzepo erengai Aroma 1:20, uye cedzai nge zve mubvunzo unoteera.