Masoko anopfadza aya anobudadi kuna Mwari kamare?

1. Muridzi we Bhaibheri ndiyani?

Masoko akanaka okuti anhu acararama nokusikaperi pa Nyika ari mu Bhaibheri. (Pisarema 37:29) Bhaibheri rakaumbwa nge mabhuku madoko anokwana kuita 66. Mwari wakaseenzesa anarume akagondeka anokwana 40 kuti atare Bhaibheri. Mabhuku mashanu okutanga akatarwa na Mozesi mu makore akadarika anokwana kuita 3500. Bhuku rokupedzesera rakatarwa no muaphositori Juau mu makore akadarika 1900. Inzero dzani dzakatarwa mu Bhaibheri? Mwari wakareketa ne atari e Bhaibheri eciseenzesa mweya mutsvene wake. (2 Samweri 23:2) Awona akatara pfungwa dza Mwari haiwa nzero dzawo. Zve zvirokwazvo Djehovha ndiye muridzi we Bhaibheri.—Erengai 2 Timoti 3:16; 2 Pedru 1:20, 21.

2. Ngei tecigonda kuti Bhaibheri rinobuda kuna Mwari?

Tinoziya kuti Bhaibheri nge ra Mwari ngokuti rinotsanangudza zvakadjeka kamare nge zve ramangwana. Apana munhu unokwanisa kuita izvi. (Djoshuwa 23:14) Mwari we Masimba Ese ndiye ega basi anokwanisa kubhuya zvirokwazvo nge zve ramangwana re anhu.—Erengai Isaya 42:9; 46:10.

Taitoimira kuti bhuku rinobuda kuna Mwari rigare rakasiyana ne mabhuku amweni, uye ndizvodi kamare zvakaita Bhaibheri. Irona rakatokowaniswa mabhirionji aro mu mazana akawanda e mareketero akasiyana-siyana. Kunyazi Bhaibheri riri ro kare-kare irona rinopindirana no zvinobhuiwa mu siensia. Kupinda izvi, atari aro anokwana kuita 40 aazi kupesana-pesana pa zvaakatara.a Kupinda izvi, Bhaibheri rino cipangidziro co rudo ra Mwari uye rino simba rokucinja upenyu we anhu kuti ugare uri nani. Izvi zvese zvinoita kuti zviuru zve zviuru zve anhu atende kuti Bhaibheri isoko ra Mwari.—Erengai 1 WaTesaronika 2:13.

3. Kodi Bhaibheri rinoreketa nge zvei?

Bhaibheri rinoreketa maka-maka nge zve masoko anopfadza akaringana no cinangwa ce rudo ca Mwari ku anhu. Zvitarwa izvi zvinotsanangudza zvakaitika pakutanga pe ngano ye anhu kuti aruze mukana wokurarama mu Paradhiso pa Nyika uye zvinoreketazve kuti paradhiso icagadziriswa kudini.—Erengai Zvakapangidzwa 21:4, 5.

Soko ra Mwari rinewo mitemo, mazano ne mipango. Kupinda izvi, Bhaibheri rino ngano dze mabatire aaita Mwari kune anhu—ngano idzi dzinopangidza uunhu wake. Zvakadaro, Bhaibheri rinokwanisa kukubetsera kuti uziye Mwari. Irona rinotibvunza zvatinodikana kuita kuti tigare shamwari ya Mwari.—Erengai Pisarema 19:7, 11; Tiyago 2:23; 4:8.

4. Tingazwisisa kudini Bhaibheri?

Bhurushura iri ricakubetsera kuti uzwisise Bhaibheri, irona rinoseenzesa mushobo waiseenzeswa na Djesu. Iyena waidudza zviri mu Bhaibheri uye waitsanangura “zvaidudzwa no zvitarwa.”—Erengai Ruka 24:27, 45

Kuno zviro padoko basi zvinodakadza zvakaita hingana masoko akanaka anobuda kuna Mwari. Kunyadaro anhu amweni aapfari nawo uye amweni aareremedzi. Asi usaore mwoyo ngo ndaa yazvo. Kariro yako yo kuona upenyu usikaperi inotsamira pakuziya kako Mwari.—Erengai Juau 17:3.