FUNDO 19
Rumbwai Muri Dhuze na Djehovha
1, 2. Ndikupi katingatizira kuti tidziirirhwe nyamasi uno?
RANGARIRAI kuti muri kuhamba, kunza kotanga kucinja. Kotanga kuita makuta no dutu, uku mheni dzecitinhira. Ciripori-poco kototanga kunaya. Munotanga kupsvaka mbuto yakaoma yokudzamira. Pamunogumira mbuto yakadaro zve zvirokwazvo munozwa kucengeteka!
2 Zvakaezanawo na isusu nyamasi uno. Nyika iri kubambirira kushata. Pamweni mungadzibvunzisa kuti, ‘Ndingatizira kupi kuti ndidziirirhwe?’ Umwe mutari we Bhaibheri akati: “Ndicati kuna Djehovha: ‘Ndimwi citiziro cangu no mbuto yangu yakacengeteka, Mwari wangu wandinogonda.’” (Pisarema 91:2) Zvirokwazvo, Djehovha anokwanisa kutibetsera pa matambudziko edu zvino uno, uye anotipasa kariro yakanakisisa ye nguwa ye mberi.
3. Tingaita kudini Djehovha citiziro cedu?
3 Djehovha angatidziirira kudini? Anokwanisa kutibetsera kushingirira matambudziko atinawo, uye ane simba kupinda munhu upi hake anoda kutiitira zvakashata. Kunyazi kana tikabatana ne matambudziko zvino uno, tinogonda kuti Djehohva acaagadzirisa mune ramangwana. Bhaibheri rinotibambisa kuti ‘tirumbwe tiri mu rudo ra Mwari.’ (Djudha 21) Tinodikana kurumbwa tiri dhuze na Djehovha kuti atibetsere mu nguwa dzakashata. Asi Tingazviita maitirei?
PANGIDZAI KUTI MUNODA MWARI
4, 5. Djehovha akapangidza kudini kuti anotida?
4 Kuti tirumbwe tiri dhuze na Djehovha, tinodikana kuziya kuti anotida zvakadini. Rangarirai zvese zvatakaizirhwa na Djehovha. Akatipasa nyika ino yakarungama kuti tiraramemo uye akaidzadza ne maruwa ne zvinyama zvinosiridza kuona. Uyewo akatipasa zvekurhya zvinonaka ne mvura yekumwa yakacena. Eciseenzesa Bhaibheri, Djehovha akatifundisa zina rake ne unhu wake unoshamisa. Asi pa zvese izvi, akapangidza kuti anotida maningi ngo kutuma pa nyika Mwana wake waanoda, Djesu, kuti azotifire. (Juau 3:16) Nge ndaa ye rufu ra Djesu, tino kariro yakanakisisa ye nguwa ye mberi.
5 Djehovha akaita kuti pamuke Umambo wa Mesiya, utongi wo kudenga ucapedza kushuphika kwese mbai-mbai pano. Umambo ucaita kuti nyika igare paradhizo, uye anhu ese acararama murunyararo ecipfara nokusikaperi. (Pisarema 37:29) Djehovha akapangidzawo kuti anotida ngo kutifundisa mararamiro akanaka zvino uno. Anotibvunza kuti tinamate kaari, uye akagara akagadzirira kutipurutana. Djehovha akapangidza pamhene kuti anotida.
6. Tinopangidza kudini kuti tinoreremedza rudo ratakapangidzirhwa na Djehovha?
6 Mungapangidzawo kudini kuti munoreremedza rudo ramakapangidzirhwa na Djehovha? Pangidzai kuti munotenda ngo zvese zvamakaizirhwa naye. Zvinotsukwarisa kuti anhu akawanda nyamasi uno aatendi zvaanoizirhwa. Izvi zvaiitikawo mu mazuwa a Djesu. Zuwa rimweni, Djesu akarapa anhu gumi ainga ane maperembudzi, asi umwe basi ndiye akauya komutenda. (Ruka 17:12-17) Tinoda kuita hingana mwanarume uya akatenda Djesu. Nguwa dzese tinoda kutenda zvatakaizirhwa na Djehovha.
7. Tinodikana kuda Djehovha zvakadini?
7 Tinodikanawo kupangidza kuti tinoda Djehovha. Djesu akabvunza afundi ake kuti anodikana kuda Djehovha ne mwoyo wawo wese, ne mwiya wawo wese, uye ne nzero dzawo dzese. (Erengai Mateu 22:37.) Izvi zvinoda kureyei?
8, 9. Tingapangidzira kudini Djehovha kuti tinomuda?
8 Zvinokwana here kureketa basi kuti tinoda Djehovha? Haiwa. Kana tecida Djehovha ne mwoyo wedu wese, ne mwiya wedu wese, uye ne nzeru dzedu dzese, ticazvipangidza ngo zvatinoita. (Mateu 7:16-20) Bhaibheri rinopangidza pamhene kuti kana tecida Djehovha, ticatondoedza mitemo yake. Zvinoshupha here kuita izvona? Haiwa, ngokuti “mitemo yake airemi.”—Erengai 1 Juau 5:3.
9 Kana tikazwira Djehovha, tinopfara mu upenyu. (Isaya 48:17, 18) Asi zvinyi zvicatibetsera kurumbwa tiri dhuze na Djehovha? Ngationei.
RUMBWAI MECIKHWEDERA DHUZE NA DJEHOVHA
10. Ngei munodikana kurumbwa mecifunda nge zva Djehovha?
10 Makaguma kudini pakugara shamwari ya Djehovha? Kufunda kamaiita Bhaibheri, kakaita kuti muziye zvakawanda nge zva Djehovha mogara ne ushamwari naye. Ushamwari uwona wakaita hingana muriro wamunoda kuti ugare wecibaka. Kuita hingana muriro unoda kukhwinidzirhwa kuti ugare wecibaka, munodikanawo kurumbwa mecifunda nge zva Djehovha kuti ushamwari wenyu ugare wakabamba.—Zvierengo 2:1-5.
Kuita hingana muriro, rudo renyu kuna Djehovha rinodikana kukhwinidzirhwa kuti rigare recibaka
11. Mucazwa kudini kana mukarumbwa mecifunda Bhaibheri?
11 Pamunorumbwa mecifunda Bhaibheri, mucafunda zviro zvokuti zvicamubayai mwoyo. Izvi zvakaitikawo no afundi airi a Djesu. Paakazwisisa uphorofiti we Bhaibheri waipanganidzwa na Djesu, awona akati: “Taizwapi here kupisa mu mwoyo paaibhuya na isusu mu gwanza ecitidjekesera zvakanaka Matarhwa!”—Ruka 24:32.
12, 13. (a) Cinyi cinokwanisa kuitika no rudo redu kuna Mwari? (b) Tingaitei kuti kuda katinoita Djehovha kurumbwe kakabamba?
12 Kuita hingana afundi a Djesu akabaiwa mwoyo paakazwisisa Matarhwa, zvingadaro kuti makazwawo zvimwezvo pamakatanga kuzwisisa Bhaibheri. Izvi zvakamubetserai kuti muziye Djehovha motanga kumuda. Zvirokwazvo kuti amudi kuti rudo irona ridzime.—Mateu 24:12.
13 Kana maashamwari ya Mwari, munodikana kuseenza ne simba kuti mubambise ushamwari uwona. Munodikana kurumbwa mecifunda nge zvake ne zva Djesu. Nyasai kurangarira zvamuri kufunda moona kuti mungazviseenzesa kudini mu upenyu wenyu. (Juau 17:3) Pamunoerenga kana kufunda ciro mu Bhaibheri, dzibvunzisei kuti: ‘Izvi zvinondifundisei nge zva Djehovha Mwari? Ngei ndecidikana kumuda ne mwoyo wangu wese uye ne mwiya wangu wese?’—1 Timoti 4:15.
14. Munamato unotibetsera kudini kuti kuda katinoita Djehovha kurumbwe kakabamba?
14 Kana mune shamwari yamunoda, munocedza nayo kajinji, uye izvi zvinoita kuti ushamwari wenyu urumbwe wakabamba. Ngo mushobo umwewo, patinogara tecireketa na Djehovha mu munamato, kuda katinomuita kunorumbwa kakabamba. (Erengai 1 Atesaronika 5:17.) Munamato cipo cakanakisisa catakapaswa na Baba edu e kudenga. Tinodikana kugara tecireketa nawo ne mwoyo wese. (Pisarema 62:8) Atidikani kuphinda minamato yatakabata no musoro, asi tinodikana kureketa zvatiri kuzwa mu mwoyo. Zvirokwazvo, kana tikarumbwa tecifunda Bhaibheri ne kunamata ne mwoyo wese, kuda katinoita Djehovha kucarumbwa kakabamba.
REKETAI NO AMWENI NGE ZVA DJEHOVHA
15, 16. Munoona kudini basa re kuparidza?
15 Kana tecida kurumbwa tiri dhuze na Djehovha, tinodikanawo kureketa ne amweni nge zvatinotenda. Kureketa ne amweni nge zva Djehovha cikomborero cikuro. (Ruka 1:74) Uye maKristu e zvirokwazvo akapaswa basa irona kamare na Djesu. Umwe ne umwe wedu anodikana kuparidza masoko akanaka e Umambo wa Mwari. Makatanga kuzviita here?—Mateu 24:14; 28:19, 20.
16 Muphostori Pauro aireremedza maningi basa re kuparidza zvokuti akaridaidza “upfumi.” (2 Akorinti 4:7) Kureketa ne amweni nge zva Djehovha ne zvaacaita ndiro basa rinodikana kugara pakutanga mu upenyu wenyu. Munodikana kuita kudaro kana mecida kunamata Djehovha, uye iyena anoreremedza zvamunomuitira. (Ahebheru 6:10) Kuparidza kunobetsera imwimwi pamwepo ne aya anomupurutanai kugara dhuze na Djehovha uye kuona upenyu usikaperi. (Erengai 1 Akorinti 15:58.) Pane basa rimweni ringaita kuti mupfare kupinda irona here?
17. Ngei basa re kuparidza rinodikana kuizwa nokukasika?
17 Basa re kuparidza rinodikana kuizwa nokukasika. Tinodikana ‘kuparidza soko,’ uye tinodikana kuzviita “nokukasika.” (2 Timothy 4:2) Anhu anodikana kuzwa nge zve Umambo wa Mwari. Bhaibheri rinoti: “Zuwa guru ra Djehovha raapadhuze! Raapadhuze, uye riri kuguma nokukasika!” Mugumo ‘auzononoki.’ (Zefaniya 1:14; Abhakuki 2:3) Mbai-mbai pano, Djehovha acaparadza nyika yakashata ya Sathani. Anhu anodikana kuziya izvona kuitira kuti asanangure kuseenzera Djehovha.
18. Ngei tinodikana kunamata Djehovha tiri pamwepo ne maKristu amweni e zvirokwazvo?
18 Djehovha anoda kuti timunamate tiri pamwepo ne maKristu amweni e zvirokwazvo. Bhaibheri rinoti: “Ngatirangariranei umwe ne umwe, kuitira kuti tibambisane pakupangidza rudo ne kuita mabasa akanaka, tisikarekeri kuungana kedu, hingana musambo une amweni, asi tibambisane, maka-maka meciona zuwa ra Mwari reciguma.” (Ahebheru 10:24, 25) Tinodikana kuita zvese zvatinokwanisa kuti tipinde misangano yese. Misangano inotipasa mikana kuti tishingisane ne kubambisana.
19. Cinyi cicamubetserai kuti mude hama ne hanzvadzi dzenyu dzeciKristu?
19 Pamunopinda misangano, mucagara ne shamwari dzakanaka dzicamubetserai kunamata Djehovha. Mucaziya hama ne hanzvadzi dzakasiyana-siyana dzinoita zvadzinokwanisa kuti dzinamate Djehovha hingana zvamuri kuitawo. Kuita hingana imwimwi, idzona dzinoshaishawo. Padzinodaro, garai makagadziriri kudzirekerera. (Erengai Akorosi 3:13.) Nguwa dzese kandai nzero dzenyu pa zviro zvakanaka zvinoizwa ne hama ne hanzvadzi dzenyu dzeciKristu. Izvi zvicamubetserai kuti mudzide uye mubambire kugara shamwari ya Djehovha.
UPENYU WE ZVIROKWAZVO
20, 21. Cinyi cinozwi “upenyu we zvirokwazvo”?
20 Djehovha anoda kuti shamwari dzake dzese dzigare ne upenyu wakanakisisa. Bhaibheri rinotifundisa kuti mberiyo upenyu wedu ucagara wakasiyana maningi no watinawo nyamasi uno.
Djehovha anoda kuti mugare ne “upenyu we zvirokwazvo.” Imwimwi munouda here?
21 Mberiyo, ticararama nokusikaperi, haiwa basi ke makore 70 kana 80. Ticagara ne “upenyu usikaperi” tine uthongo wakakwana, murunyararo tecipfara mu nyika yakarungama. Upenyu uwona ndiwo unozwi ne Bhaibheri “upenyu we zvirokwazvo.” Djehovha anotigondesa kutipasa upenyu we zvirokwazvo, asi tinodikana kuita zvese zvatinokwanisa kuti ‘tiubatisise.’—1 Timoti 6:12, 19.
22. (a) Tingaitei kuti tibatisise “upenyu we zvirokwazvo”? (b) Ngei teciti upenyu usikaperi cipo ca Mwari?
22 Tingaitei kuti tibatisise “upenyu we zvirokwazvo”? Tinodikana ‘kuita zvakanaka’ ne ‘kugara takapfuma pa mabasa akanaka.’ (1 Timoti 6:18) Izvi zvinoda kubhuya kuti tinodikana kuita zvatinofunda mu Bhaibheri. Asi upenyu we zvirokwazvo auuyi nge ndaa ye masimba edu. Zvatinoita azvikwanisi kutenga kuna Mwari upenyu usikaperi. Djehovha acapasa cipo ce upenyu usikaperi ku anhu ake nge ndaa ye “nyasha” dzake. (Aroma 5:15) Baba edu e kudenga anoda maningi kupasa anhu awo akagondeka cipo icona.
23. Ngei munodikana kuziya kusanangura zvino uno?
23 Dzibvunzisei kuti, ‘Ndiri kunamata Mwari ngo mushobo waanoda here?’ Kana meciona kuti pane pamunodikana kugadzirisa, musanonoke kuzviita. Kana tikagonda Djehovha, toita zvese zvatinokwanisa kuti timuzwire, Djehovha acagara citiziro cedu. Acarumbwa ecidziirira anhu ake akagondeka mu mazuwa okupedzesera o nyika ya Sathani. Pedzepo, Djehovha acaita kuti tirarame nokusikaperi mu Paradhizo hingana zvaakagondesa. Honde, munokwanisa kugara ne upenyu we zvirokwazvo kana mukaziya kusanangura zvino uno!