Hulda Wakaona Zvaaida
MAKORE manganani adarika namakavhakacira citsuwa cidoko ce Sangir Besar ku Indonésia, imwimwi maida kuona hanzvadzi dzedu nhatu dze Cikristu ku bahari. Ikona, awona anonyasa kuziikanwa ngokubetsera anhu kuziya Bhaibheri. Asi rhwendo rino, awona aiita zviro zvakasiyana no zvaaiita kare.
Citsuwa ce Sangir Besar ka kutsi ke Indonésia
Awona anosopinda mu mvura kuti aone mapuwe anorema maningi kuti ande nawo ku bahari. Mapuwe amweni ainga akatokura maningi hingana bhora rokucaya kamare, mumasure mazvo awona aigara pacibhanku co muti uye aiseenzesa maritero kuti aphwanye mapuwe kuti agare zvidoko-zvidoko kudarika zanda ro huku. Pedzepo, awona aikanda zvimapuwe zvidoko izvi mu zvibhardhi zvidoko zvondande uye awona aidikana kukhwira masikada no mabhardhi aya dakara ku mbuto yaaigara. Pakupedzesera, awona aikanda zvimapuwe zvidoko izvi mumasaku kuti azothwarhwe no karu uye azoseenzeswa pakugadzira makwanza.
Hulda, eciunganidza mapuwe mu bahari
Umwe we hanzvadzi idzi ndi Hulda. Iyena waikwanisa kugara no nguwa yakawanda kuti aite basa iri. Kakawanda kakhona iyena waiseenzesa mare yaaikwanisa kuti ariritire mhuri yake. Asi rhwendo rino iyena wainga ano cinangwa cimweni, iyena waida kutenga tablet kuti akwanise kuseenzesa JW Library® Hulda waizviziya kuti ma vhidhiyo uye no zvinooneka mu aprikativho zvaizokwanisa kumubetsera mu basa rekuparidzira, uye pa fundo yake ye mumhu ega.
Mukati me mwedzi no meya, Hulda macibesi ari ese waiseenza nguwa dzinokwana kuita mbiri dze macibesi kuti akwanise kuphwanya mapuwe akawanda aizodzadza kamiyao doko. Pakupedzesera iyena wakawona mare inokwana kuti akwanise kutenga thabreti.
Hulda no thabreti yake
Hulda unopanganidza kuti: “Izvirokwazvo kuti ndaigara ndakaremba uye ndecirhwadziwa ngokuphwanya mapuwe aya, asi inini ndakakangnwa marhwadzo aya ese, pandakatanga kuseenzesa thabreti. Uye iyona yakandibetsera kuti ndione mugumisiro wakanaka mu basa rekuparidzira uye ndinyase kugadzirira zvakanaka musangano.” Iyena unotiwo, thabreti iyi yakandibetsera pa nguwa yakatanga pandemiya. Pa nguwa yekuti zvese zvino cekuita no misangano zvakatanga kuizwa peciseenzeswa interneti. Isusu takapfarawo maningi ngokuti Hulda wakakwanisa kudzadzisa cinangwa cake.