Maizviziya Here?

Matijoro akaoneka pa mathuku e Bhabhironi anopindirana kudini no zvinobhuya Bhaibheri?

ACERI e mapuwe akafukura matijoro akawanda ainga akapsva ku Bhabhironi akasenzeswa pakuwaka thaundi. Maererano no muzii Robert Koldewey, matijoro akadai aigadzirhwa ku forno inooneka “kunza ke thaundi, kune mataka akanaka uye huni . . . dzakawanda.”

Zvitarhwa zve kare zvinopangidza kuti akuru akuru eku Bhabhironi aiseenzesawo maforno awo kuti aite zviro zvimweni zvakashata. Paul-Alain Beaulieu, mufundisi we Assiriologia we ku Univhersidhadhe ye Toronto, unoti: “Manyuku akawanda e Bhabhironi . . . anobhuya ngezve ngano ye ku piswa ke anhu nge ndaa ye ku panduka uye nge ndaa ye rusananguro ye magereja.” Tsamba imweni ye mazuwa a Mambo Nabhukodhonozori yaiti: “Atsakatisei, apisei, akocei, . . . pa muriro ye matijoro . . . itai kuti utsi wawo ukhwire, itai kuti atsakatiswe no murazvi we muriro.”

Izvi zvinoedzurira aerengi e Bhaibheri zviitiko zvakatarhwa pana Dhanyeri kapituro 3. Maererano no citarhwa icona, Mambo Nabhukodhonozori wakaimisa mufanikiso wakakura we ouro mu bani re Dhura kunza ke thaundi re Bhabhironi. Paya pokuti madjaha matatu aizwi Shadreki, Misheki na Abhedhinego akaramba kugodamira cidhori, Nabhukodhonozori wakanyangadzwa uye wakaita kuti muriro “upise zvakapethwa ka nomwe kupinda kubaka kawaiita kare,” uye wakaita kuti anarume atatu aya “akhandirhwe mu muriro waibaka maningi.” Ngirozi ino simba yakaaponesa pa rufu.—Dha. 3:1-6, 19-28.

© The Trustees of the British Museum. Licensed under CC BY-NC-SA 4.0. Source

Matijoro aya e Bhabhironi anorekethwawo mu matarhwa e Bhaibheri. Matijoro amweni akadhindwa mifanikiso yakawanda ye anhu ainamata mambo. Citarhwa cimweni cakhona cinoti: “Nabhukodhonozori, Mambo we Bhabhironi . . . Nyumba yangu, Utongi wangu wakakura wandakawaka . . . Ana angu ngaatonge mauri nokusikaperi.” Citarhwa ici cakaezana nocinorekethwa pana Dhanyeri 4:30, umo Nabhukodhonozori akadzikudza eciti: “Iri andiropi Bhabhironi Guru randakawaka ne simba rangu neukuru wangu kuti iwe nyumba ye umambo uye kuti ndipangidze ukuru wangu ne simba rangu here?”