NGANO 61
Awona Aazi Kunamata Mufanikiso
Mumasure me nguwa yakati rebei, Mambo Nabhukodhonozori wakaita mufanikiso we oro wakakura maningi. Pedzepo, iyena wakadainza anhu ese anokosha e ku Bhabhironi kuti aone mufanikiso uwona. Pakati pe anhu awona, painga pana Shadreki, Misheki uye Abhidhinego. Mambo wakabhuya kuti: ‘Imwimwi pamunozwa ngoma yecirira, godamai uye namatai mufanikiso.’ Hino parizvino, awona aizonamata mufanikiso here kana kuti aizorumbwa akagondeka kuna Djehovha?
Ngoma payakatanga kurira, munhu wese wakatanga kugodama uye otanga kunamata mufanikiso, kusiya Shadreki, Misheki uye Abhidhinego. Anhu anganani paakaona izvona akaenda koopanganidzira Nabhukodhonozori. Hino, mambo wakatuma anhu kuti aende kootora anarume atatu aya uye wakabhuya kuti: ‘Ndicamupasai mukana umwe basi, kana mukasama kunamata mufanikiso, inini ndicamukhandirai mu rindi re muriro uye apana Mwari acakwanisa kumuponesai kandiri.’ Awona akadaira eciti: ‘Mambo, atidi mukana umweni. Mwari wedu anokwanisa kutiponesa. Asi kunyazi iyena akasama kutiponesa, isusu atinamati mufanikiso.’
Nabhukodhonozori wakashatirhwa maningi uye wakabhuya kuti: ‘Itai kuti muriro wakhona upise zvakapethwa ka 7 kupinda zvaunosogara weciita!’ Hino iyena wakabvunza masurudado ake kuti: ‘Sungai anarume aya atatu uye akhandirei mu rindi ro muriro. Masurudado akaita izvona. Asi rindi ro muriro rainga recipisa maningi zvekuti masurudado akatofa no kuguma padhuze naro basi!’ Mambo paakaringira mu rindi ro muriro, iyena wakaona anarume arongomuna ecihamba-hamba. Hino iyena wakapatika ndizvo uye wakabvunzisa kuti: ‘Isusu takhandira anarume atatu mu rindi ro muriro, andizvopi? Asi mune anarume arongomuna mukatimo uye umwe wawo wakaita hinga ngirozi!’
Nabhukodhonozori wakaguma padhuze no rindi ro muriro uye wakabvunza Shadreki, Misheki uye Abhidhinego kuti abude imona. Anhu ese akashamisika paakaona atatu aya ecibuda mu rindi ro muriro asikazi kupsva. Ganda rawo, tsitsi rawo uye macira awo ainga asikazi kupsva. Awona ainga asikatonuhwi cutsi.
Nabhukodhonozori wakabhuya kuti: ‘Mwari wa Shadreki, Misheki uye Abhidhinego ndiye ano simba kudarika ese. Iyena atuma ngirozi yake kuti iaponese. Apana mwari akaezana naye.’
Washinga kurumbwa wakagondeka kuna Djehovha hinga zvainga zvakaita Ahebheru aya atatu here?
“Djehovha Mwari wako ndiye waunodikana kunamata, uye ndiye ega waunodikana kuitira basa rakacena.” —Mateu 4:10