Ngei Mwari uno sangano?

1. Ngei Mwari wakaronga walsraeri wo kare?

Mwari wakaronga ana a Abrahamu kuti agare dzinza uye wakaapasa mindandanda ye mitemo. Iyena wakadainza dzinza iri kuti “Israeri” uye wakaapasa mutoro wo kucengetedza manamatire e cokwadi uye soko rake. (Pisarema 147:19, 20) Nokudaro anhu e nyika dzese aizotambira makomborero ecibuda ku Israeri.—Erengai Genesi 22:18.

Mwari wakasanagura waIsraeri kuti aite apupuri ake. Ngano yawo inotibetsera kuona kuti anhu anobetserwa kudini paya paano teerera mitemo dza Mwari. (Dheuteronomiyo 4:6) Zvadaro, ngo kuona muezaniso wakanaka we waIsraeri uye kufunda nge zvawo, anhu amweni aizokwanisa kuziya Mwari we zvirokwazvo.—Erengai Isaya 43:10, 12.

2. Ngei maKristu e cokwadi akarongwa?

No kuhamba ke nguwa dzinza ra Israeri rakaruza kutenderwa na Mwari uye Djehovha wakaacinja nge ungano yeciKristu. (Mateu 21:43; 23:37, 38) Nyamasi uno maKristu e cokwadi ndiwo ari kuseenza se wapupuri wa Djehovha haiwa waIsraeri.—Erengai Zviito 15:14, 17.

Djesu wakaronga ateereri ake kuti aparidze uye kuita afundi mu nyika yese. (Mateu 10:7, 11; 24:14; 28:19, 20) Uye zvino, mu magumo e mazuwa ano basa iri raakuizwa mu nyika yese. Pa kutanga ke ngano ye anhu, Djehovha waunganidza zviuru zve zviuru zve anhu e madzinza ese mu manamatire e cokwadi. (Zvakapangidzwa 7:9, 10) MaKristu e cokwadi akarongwa no cinangwa ce kubambisa uye kubatsira umwe na umwe. Mu Nyika yese, awona ane urongwa umwewo we kufundisa mu misangano mawo.—Erengai WaHebheru 10:24, 25.

3. Sangano re Wapupuri wa Djehovha rakatanga kudini mu mazuwa a nyamasi uno?

Mu gore ra muna 1870 cikwata cimwe ce afundi e Bhaibheri cakatanga kupfumura zvokwadi zvo Bhaibheri zvainga zvakakanganika kwe nguwa yakareba. Afundi aya aizviziya kuti Djesu wainga wakaronga sangano kuti riparidze. Nokudaro, awona akatanga kuita gwitikwiti ro kuparidza masoko e Umambo mu nyika dzakawanda. Hino mu gore ra 1931 afundi aya akatanga kuseenzesa zina rokuti Wapupuri wa Djehovha.—Erengai Zviito 1:8; 2:1, 4, 11; 5:42.

4. Wapupuri wa Djehovha akarongwa kudini?

Mu zana rekutanga re makore, ungano dze nyika dzakawanda dzaibatsirwa ngo Mutumbi Unotungamirira waiziya kuti Djesu ndiye Musoro we ungano. (Zviito 16:4, 5) Mu mushobo umwewo, nyamasi uno Wapupuri wa Djehovha mu nyika yese anobatsirwa no Mutumbi Unotungamirira unoumbwa nge akuru ane ruziyo. Awona anoonerera mashikiritorio e Wapupuri wa Djehovha, anoturikira, anoonerera mucini dzo kudhindha uye anokowanisa mabhuku okufundisa Bhaibheri mu mareketero anodarika 700. Zvaa zvadaro Mutumbi Unotungamirira unokwanisa kubambisa anhu ngo Bhaibheri uye kupasa nhungamiriro ku ungano dzinodarika 115 000 mu nyika yese. Mu ungano imwe na imwe, muno anarume akakwaniriswa kuti aseenze se akuru kana kuti aonereri. Anarume aya anocengeta mabira a Mwari no rudo.—Erengai 1 Pedru 5:2, 3.

Wapupuri wa Djehovha akarongwa kuti aparidze masoko akanaka kana kuti masoko anopfadza uye kuita afundi. Zvadaro kuita hingana maphositori awona anoparidzira nyumba no nyumba. (Zviito 20:20) Uyezve awona anozvipira pakuseenzesa nguwa yawo kuti afundise Bhaibheri anhu akanaka anoda cokwadi. Asi Wapupuri wa Djehovha aasi sangano basi. Imhuri ina Baba ane rudo. Awona ihama no handzadzi anorangarirana. (2 WaTesaronika 1:3) Sezvo abatiri a Djehovha akarongwa kuti apfadze Mwari uye kuti abatsire anhu, awona anoumba mhuri yakanyanya kupfara pa Nyika pano.—Erengai Pisarema 33:12; Zviito 20:35.