Makagadzirira kuti “Mugare Nhaka ye Nyika Here”?
TINO cido cekuona kudzadzika ke masoko ari pana Mateu 5:5 anoti: “Anopfara aya ano mwoyo wakapfawa, ngokuti acagara nhaka ye nyika.” Akadzodzwa acagara nhaka ye nyika paacagara madzimambo na Djesu kudenga. (Zvak. 5:10; 20:6) Asi Akristu akawanda anyamasi uno, acagara nhaka ye nyika ngekuti acagaremo nokusikaperi akakwana, ane runyararo no mupfaro. Kuti izvona zvinyase kuitika, awona acange ano mabasa akawanda. Ngatione zviro zvitatu zvaacaita: kuti nyika igare paraizo, kubetsera anhu acamutswa no kuafundisa. Onaiwo zvamungaita zvino kuti mupangidze kuti imwimwi munoda kuita mabasa awona aya mu Paraizo.
MAKAGADZIRIRA HERE KUTI MUITE KUTI NYIKA IGARE PARAIZO?
Djehovha paakapasa mutemo wekuti anhu “adzadze uye acengete nyika,” ayena akapangidza pamhene kuti padoko no padoko nyika yese yaizogara paraizo. (Gen. 1:28) Aya acagara nhaka ye nyika acadikanawo kutondowedza mutemo uu, sezvo munda we Edheni wakaruzika. Hino kuti nyika igare paraizo ticadikana kutanga papsva, mumasure me Amagedoni, ticagara no basa rakakura rekucenesa matii amweni e nyika akakuwadzwa no anhu!
Apana mubvunzo kuti iri rinonga riri basa rakakura, izvi zvinotiedzuririsa ngezve basa rakaizwa nge Aisraeri paakahwirira kubva ku Bhabhironi kuenda ku Djerusarema, nyika iyona yakapedza makore 70 isikagarhwi. Muphorofita Isaya wakafemerhwa kutara kuti no rubetso ra Djehovha Aisraeri aizokwanisa kuita kuti nyika iya igarezve yakarungama. Uphorofiti uu waiti: “Acaita kuti renje raro rigare hinga Edheni uye mapani aro asina mvura hinga munda we maruwa wa Djehovha.” (Isa. 51:3) Uye izvi zvakaitikadi kamare. Nge mushobo umwewo, no rubetso ra Djehovha aya acagara nhaka ye nyika acakwanisa kuiita kuti nyika igare Paraizo. Uye pano zvamungaitawo zvino zvinopangidza kuti munodawo kubatanidzwa pa kuita basa iri.
Cimweni camungaita ngecekupeta masimba kuitira kuti pa nyumba penyu pagare pakacena uye pakarongeka. Uye imwimwi mungaita izvona kunyazi anyacigarisano enyu asikazvioni hinga zvinokosha. Imwimwi mugabetserawo pakucenesa nokugadzirisa Nyumba dze Umambo uye Nyumba dze magungano. Uye kana mugariro wenyu wecitendera imwimwi mungadzipira kuti mubetsere hama no hanzvadzi dzauirhwa no tsawana dzinoitika dzoga. Ngokudaro, imwimwi mucapangidza kuti munonga makagadzirira kubetsera hama no hanzvadzi dzenyu. Mungadzibvunzisa kuti: ‘Ndakagadzirira here kuti ndibetsere aya acamutswa?’
GADZIRIRAI KUTI MUBETSERE ACAMUTSWA
Mumasure mekumutsa mwana wekadzi wa Djairosi, Djesu akabvunza anhu kuti apase mwanewo zvokurhya. (Mark. 5:42, 43) Azvizi kushupha kubetsera musikana uya we makore 12. Asi cimborangarirai basa raticagara naro kana Djesu akadzadzisa cipikirhwa cekuti “ese anonga ari mumakuwa acazwa izwi rake obuda.” (Juau 5:28, 29) Kunyazi hazvo Bhaibheri risikanyasi kupanganidza ngezve rumuko, zviripamhene kuti aya acamutswa acada zvekurhya, zvekupfeka uye pekugara. Mungapangidza kubvira zvino kuti munoda kubetsera here? Ngatione mibvunzo dzinganani.
Zvinyi zvamungaita zvino kuti mupangidze kuti makagadzirira kuti muzogare nhaka ye nyika?
Pamunoziiswa kuti ungano yenyu icavhakacirhwa no muonereri we nharaunda, imwimwi munomupika kuti auye koosvusvura nemwi here? Kana hama yaiseenza mu Bheteri kana kuti yainga iri muoneri we nharaunha yosiya basa rayo youya koosenza mu ungamo menyu, imwimwi mungadzipira kuti muibetsera kuti iwone mbuto yokugara here? Kana pakaitika gungano re mutanha kana gungano re nyika dzakawanda ku dhuze no kamunogara, imwimwi mungadzipira kuti mubetsere gungano risati ratanga uye gungano rikapera here? Uyewo mungabetserawo pakutambira hama dzinogara kure here?
MAKAGADZIRIRA HERE KUFUNDISA AYA ACAMUTSWA?
Maererano na Zviito 24:15 pamweni mabhiriyonji e anhu acamutswa, akawanda awo aazi kuona mukana wekufundira ngezva Djehovha asati afa. Awona acawona mukana uu mumasure mekumutswa.a Mwari acaseenzesa aseenzi ake akagondeka uye agara no basa kuti afundise aya acamutswa. (Isa. 11:9) Hanzvadzi imweni inozwi Charloti yakamboparidzira ku Europa, América do Sul uye África, inoda maningi kuita basa iri. Iyona inoti: “Ndino cido cikuru cekufundisa aya acamutswa. Pandinoerenga ngezve munhu wakararama kare-kare, inini ndinorangarira kuti: ‘Munhu iyena waizogara kudini kudai akaziya Djehovha.’ Ndino cido cakakura cekuzobhuya no aya acamutswa nge zve zviro zvaakaruza.”
Kunyazi aseenzi a Djehovha akagondeka akararama kare Djesu asati auya panyika acadikana kufundira zvakawanda. Cimborangarirai basi makomborero uye kupfara katicaita ngo kupanganidzira Dhanyeri ngezve kudzadzika ke uphorofiti waakatara asi waainga asikazwisisi. (Dha. 12:8) Rangariraiwo kupfadza kazvicaita kufundisa Ruti na Noemi kuti Mesiya akabva ku dzinza rawo. Zvezvirokwazvo zvicapfadza maningi kuseenza mu basa iri rekuparidzira mu nyika yese tisikapingaidzwi no mugariro we nyika ino yakashata.
Zvinyi zvamungaita zvino kuti mupangidze kuti munonga makagadzirira kufundisa aya acamutswa? Umwe we mushobo wakanaka wekuita izvi ngewe kupeta masimba kuti tigare aparidzi anonyasa kufundisa uye kuparidzira nguwa dzese. (Mat. 24:14) Kunyazi imwimwi musikacakwanisi kuparidzira nge mushobo wamaida nge ndaa ye tunga kana kuti zviro zvimweni, imwimwi mungapangidza kuti munoda maningi kufundisa aya acamutswa, nge kupeta masimba mu basa rekuparidzira zvino.
Mibvunzo uno muka ngewe kuti munodadi here kugara nhaka ye nyika? Imwimwiwo munocidaka-daka cekuita kuti nyika igare Paraizo? Uye mobetsera no kufundisa aya acamutswa? Imwimwi mungaapangidza kuti imwimwi makagadzirira nge kukhorovhera mikana yamunayo zvino yekuita mabasa akaezana no aya amucaita kana mukagara nhaka ye nyika!
a Onai musoro unoti: “Akawanda Arikubetserhwa Pakugara Anatsi” uri mu Murindiri wa Setembro wa 2022.