Psvakai Thaundi Ricagara Nokusikaperi

1. Djesu akabhuyei ngezve zviya zvaizoitika no Djerusarema?

MAZUWA manganani asati afa, Djesu akaita uphorofita waizodzadzika pekutanga mu mazuwa ekupedzesera ekuti Djerusarema raida kuparadzwa. Iyena akabhuya kuti Djerusarema ‘raizotenderedzwa no masurudado.’ (Ruka 21:20) Djesu akabhuyawo kuti kana afundi ake akaona izvona zveciitika awona aidikana kutiza nokukasika. Masoko awona akadzadzika anyahondo Eciroma paakatenderedza Djerusarema.—Ruka 21:21, 22.

2. Muphostori Pauro wakaedzurirei Akristu aigara ku Djerusarema uye Djudhiya?

² Makore manganani anyahondo Eciroma asati atenderedza Djerusarema, muphostori Pauro wakatara ciro cinokosha maningi cekuti nyamasi tinodainza kuti bhuku rokuti Ahebheru. Mu bhuku irona iyena wakapasa mazano Akrisru eku Djerusarema no eku Djudha aizoabetsera kugara akagadzirira kuitira zviya zvaizoitika nokukasika. Cinyi caizoitika? Pauro wakabhuya ngezve thaundi ro Djerusarema kuti: “Atina pano thaundi rinorumbwa riripo, asi tiri kupsvaka no mwoyo wese riya ricauya.” Djerusarema raizoparadzwa, kudai Akristu aida kupona awona aidikana kugara akagadzirira kusiya nyumba dzawo uye bizi rawo.—Aheb. 13:14.

3. Cinyi cinozwi “thaundi rino fundasau ye zvirokwazvo” uye ngei teciripsvaka?

³ Zvingaita kuti Akristu akasanangura kusiya Djerusarema uye Djudhiya akatukwa uye akashorhwa. Asi cisananguro icona cakaponesa upenyu wawo. Nyamai uno, isusu tinoshorhwawo ngekuti atigondi anhu uye atirangariri kuti kugara no mare uye upenyu wakanakisisa kunoticengeta. Isusu tinopsvaka “thaundi rino fundasau ye zvirokwazvo,” kana kuti Umambo wa Mwari.a (Aheb. 11:10; Mat. 6:33) Ngei tinoita kudaro? Ngekuti tinoziya kuti nyika ino icatsakatiswa. Mufundo ino, ticaona kuti mawara api ekuti Pauro wakakohomedzesa Akristu kuti agare nawo kuitira kuti arumbwe ecipsvaka Umambo wa Mwari uye kugara akagadzirira kuitira mune ramangwana. Uyewo ticafundira kuti mawara awona angatibetsera kunidi nyamasi uno.

GONDAI DJEHOVHA IYENA AAZOMBOMUSII

4. Ngei Djerusarema raikosha ku Akristu?

⁴ Djerusarema raikosha ku Akristu. Ungano yekutanga ye Cikristu yakaumbwa mu thaundi irona mu gore ra 33 K.A., uye hama dze dare rinotungamirira dzaigara ikona. Akristu akawanda ainga ano nyumba uye zviro zvakawanda mu Djerusarema. Kunyazi zvakadaro, Djesu akabvunza ateeri ake kuti aidikana kubuda mu Djerusarema uye mu Djudhiya.—Mat. 24:16.

5. Pauro wakagadzirira kudini Akristu kuitira zviya zvaizoitika ku Djerusarema?

⁵ Pauro waida kuti Akristu e ku Djerusarema agare akagadzirira pa zviya zvaizoitika. Ndiyo ndaa, iyena akaabetsera kuti agare no maonero a Djehovha ngezve thaundi irona. Pauro wakaedzurira Akristu kuti kuna Djehovha, tempro no zviro zvaipisirhwa no apristi zvainga zvisiripizve cena. (Aheb. 8:13) Anhu akawanda e ku Djerusarema ainga aramba Mesiya uye tempro yainga isiripizve mbuto yekunamatira kakacena. Ndiyo ndaa, tempro uye thaundi zvaizotsakatiswa.—Ruka 13:34, 35.

6. Ngei Akristu aida mazano a Pauro ari pana Ahebheru 13:5, 6?

⁶ Pauro paakatarira tsamba ku Ahebheru, Djerusarema rainga riri thaundi raibhudirira maningi. Muzii umweni we Ciroma we pa nguwa iyona wakabhuya kuti “Djerusarema rainga riri thaundi rino mbiri re Kumabvazuwa.” Adjudha e mu mbuto dzakawanda aiita rhwendo ecienda ikona mu makore ese kuti awoneke pa mabiko, uye izvona zvaiita kuti thaundi ribambirire kubudirira. Zvezvirokwazvo Akristu anganani aibetserekawo no mugariro uwona wakanaka. Pamweni izvona ndizvo zvakaita kuti Pauro abhuye kuti: “Mararamiro enyu ngaagare e kutama kuda maningi mare, uye gutsikanai no zviro zvamunazvo.” Iyena wakaedzurirawo Akristu ngezve kukosha ke cipikirhwa cainga caizwa ndi Djehovha cekuti: “Inini andizomusii, uye andizomutizii.” (Erengai Ahebheru 13:5, 6; Dhe. 31:6; Pis. 118:6) Akristu aigara ku Djerusarema uye ku Djudhiya aitoda rugondo irona. Ngei? Ngekuti mumasure me kutambira tsamba iyona, awona aidikana kusiya nyumba dzawo, bizi rawo uye zviro zvese zvawo. Awona aidikanawo kutangisa upenyu upsva mu mbuto imweni yaasikazii uye izvona zvainga dzvisiripi nyore kaari.

7. Ngei tinodikana kufundira zvino kunyasa kugonda Djehovha?

⁷ Zvatingafunda: Nokukasika isusu ticaona kupera ke nyika ino ya Sathani mu “dambudziko guru.” (Mat. 24:21) Kuita hingana Akristu eku Djerusarema, isusu tinodikana kugara takangwarira uye takagadzirira. (Ruka 21:34-36) Pa nguwa ye dambudziko guru pamweni isusu tinozodikana kusiya zviro zvedu zvinganani kana kuti zviro zvese kamare tecinyasa kugonda kuti Djehovha aazombotisii. Uye kubvira zvino dambudziko guru risati ratanga, tino mukana wekupangidza kuti tiri kugonda ani. Dzibvunzisei kuti: ‘Kodi zvisananguro zvangu uye zviro zvandiri kugadzirira mune ramangwana zviri kunyasa kupangidza kuti inini andigondi mare, asi ndinogonda Mwari uya wakapika kuti acandicengeta here?’ (1 Ti. 6:17) Muezaniso we Akristu ekare ungatibetsera kurumbwa takagondeka. Asi apana zviro zvaakabatana nazvo zvicaezaniswa no zviro zvicaitika mu “dambudziko guru.” Hino tingaziya kudini kuti zvinyi zvatingaita kana dambudziko guru raakutanga?

ZWIRAI NHUNGAMIRIRO DZO AYA ARI KUTUNGAMIRIRA

8. Djesu akabhuya kuti afundi aidikana kuitei?

⁸ Panguwa doko mumasure mekuti Ahebheru atambira tsamba, Akristu akaona anyahondo Eciroma ecitenderedza Djerusarema. Icona cainga ciri cipangidzo cokuti aidikana kutiza ngekuti Djerusarema raida kutsakatiswa. (Mat. 24:3; Ruka 21:20, 24) Asi awona aizotiza ecienda kupi? Djesu akabhuya basi kuti: “Aya anonga ari mu Djudhiya ngaatizire ku matunhu.” (Ruka 21:21) Ikona kaiga kuno matunhu akawanda. Hino awona aizotiza ecienda kupi kamare?

9. Ngei zvainga zvisiripi nyore ku Akristu kusanangura kaaizotizira? (Onaiwo mapa.)

⁹ Onai mbuto dzinganani dzaizotidzirhwa nge Akristu: Matunhu e Samariya, Garireya, Hermoni, Rebhanoni uye amweni aigara nge dii rimweni we Murambo we Djorodhani. (Onai mapa) Mathaundi manganani ainga ano matunhu ikona aiita hinga kuti akacengeteka. Ngo muezaniso, thaundi re Gamra raigara pandenga pe dunhu rakareba maningi zvekuti zvaishupha kuguma ikona. Adjudha anganani aiona thaundi irona hingana mbhuto yakanaka maningi ye kutizira. Asi mu thaundi imona mainga muno mbuto yaiizirhwa zvecisimba nge Adjudha no Aroma uye anhu akawanda aigara ikona akafa.b

10-11. (a) Djehovha aitungamirira kudini Akristu? (Ahebheru 13:7, 17) (b) Ngei zvainga zvakanaka kuti Akristu azwire aya aitungamirira? (Onaiwo mufanikiso.)

¹⁰ Zvinoita hingana kuti Djehovha akatungamirira Akristu eciseenzesa aya aitungamirira mu ungano. Mutari we ngano unozwi Euzebio wakazotara kuti: “Peciseenzeswa mwiya mucena, anhu e mu ungano ku Djerusarema akatambira cipangidzo cakapaswa anarume aitenderhwa. Awona akapaswa nhungamiriro kuti abude mu thaundi hondo isati yatanga uye kuti aende koogara ku Pereiya thaundi raidainzwa kuti Pera.” Mbuto iyona yainga yakanaka maningi ku Akristu. Pera rainga risikagari kure maningi no Djerusarema hino zvaizoita nyore kuti Akristu agume ikona. Kusiya izvona, anhu akawanda e ikona ainga asiripi Akristu ndiyo ndaa, thaundi irona rainga risikazi kupfuridzirhwa maningi no Adjudha airhwisana no Aroma.—Onai mapa.

¹¹ Akristu akatizira ku matunhu akateerera zano ra Pauro re kuzwira aya “anotungamirira mu ungano.” (Erengai Ahebheru 13:7, 17.) Kuzwira kakaponesa upenyu wawo. Ngano iyona inopangidza kuti Mwari aazi kusiya aya ‘aietsera thaundi rino fundasau ye zvirokwazvo’ —Umambo wa Mwari.—Aheb. 11:10.

12-13. Djehovha anotungamirira kudini anhu ake mu nguwa dzinoshupha?

¹² Zvatingafunda: Djehovha anoseenzesa aya anotungamirira kuti apase nhungamiriro dzakananga ku anhu ake. Mu Bhaibheri makadzara no miezaniso inopangidza kuti Djehovha akaseezesa kudini anarume akagondeka kuti atungamirire anhu ake mu nguwa dzaishupha. (Dhe. 31:23; Ps. 77:20) Nyamasi uno, pano zvipangidzo zvakawanda zvinopangidza kuti Djehovha ari kurumbwa ecitungamirira anhu ake eciseenzesa hama dzinotungamirira.

¹³ Ngo muezaniso, pandemiya ye COVID-19 payakatanga, “hama . . . dzaitungamirira” dzakatipasa nhungamiriro dzaidikakwa. Akuru akatambira nhungamiriro kuti abetsere hama dze mu ungano panecokuita no zvekunamata. Padarika nguwa doko pandemiya yatanga, takagara no gungano raikwanisa kuoniya no anhu akawanda, rataionera mu Internet, mu Terevhizau, uye mu radhiyo mu mireketero inodarika 500. Hama adzizi kuima kupaswa zviro zvinocokuita no kunamata. Mugumisiro wakhona ngewe kuti takanyasa kurumbwa takabatana. Tinorugondo rokuti azvinei no zvinetso zvaticabatana nazvo mune ramangwana, Djehovha acarumbwa ecibetsera hama dzinotungamirira kuti dzisanangure gwanza rakasisira kuti tiriteerere. Asi pane basi kugonda uye kuzwira Djehovha, mawara api amweni acatibetsera kugara takagadzirira kubatana no dambudziko guro uye kuita zviro no ungwaru mu nguwa iyona inoshupha?

PANGIDZAI RUDO KU HAMA DZEDU UYE TAMBIRAI ARENDO ZVAKANAKA

14. Maererano na Ahebheru 13:1-3, Akristu aidikana kupangidza mawara api pa nguwa yokuti Djerusarema raida kuparadzwa?

¹⁴ Nokukasika, ticadikana kupangidzirana rudo ku umwe na umwe wedu hingana zvatisati takamboita kare. Cinyi cicatibetsera kuteedzera muezaniso we Akristu akararama ku Djerusarema uye ku Djudhiya? Awona ainga aakupangidzirana rudo ku umwe na umwe wawo. (Aheb. 10:32-34) Asi painga paakuda kuparadzwa Djerusarema awona aidikana kunyasa kupangidzira “rudo ku hama.”c (Erengai Ahebheru 13:1-3.) Pa dambudziko guru, isusu ticadikanawo kuita izvona.

15. Ngei Akristu akadikana kupangidza rudo uye kutambira arendo zvakanaka mumasure me kutiza?

¹⁵ Anyahondo e Roma paakatenderedza Djerusarema uye ciripo ripoco akaenda, Akristu akatiza asi aazi kutora zviro zvakawanda. (Mat. 24:17, 18) Mugwanza ecienda ku matunhu uye mumasure mazvo kutanga upenyu upsva, iwona aitodikana kubetserana umwe na umwe wawo. Zvezvirokwazvo hama dzakawanda dzaida zvokurhya, zvokupfeka uye mbuto dzekugara. Izvona zvakaita kuti Akristu agare no mukana we kupangidza rudo re zvirokwazvo ku hama uye kutambira arendo zvakanaka ecinyasa kutsigirana uye ecipasana zviro zvaainga anazvo.—Tito 3:14.

16. Tingapangidza kudini rudo ku hama dzedu dzinoda rubetso? (Onaiwo mufanikiso.)

¹⁶ Zvatingafunda: Rudo rinotiitisa kuti titsigire aseenzi a Djehovha paanonga ecida rubetso. Ngo muezaniso, hama no hanzvadzi dzinganani dzakatiza mu nyika yawo nge daa ye hondo kana kuti tsawana dzinoitika dzega. Asi mhuri yedu ye mu nyika yese dzakadzipira kuti dziabetsere panecokuita no zvekunamata uye kunyama. Hanzvadzi imweni ye ku Ucrânia yakabuda mu nyika yawo nge daa ye hondo yakati: “Isusu takaona nyara ya Djehovha yecititungamirira uye yecitibetsera nge kuseenzesa hama. Awona akatitambira zvakanaka, akatibetsera maningi ku Ucrânia, Hungria uye pari zvino ku Alemanha.” Aya anotambira arendo zvakanaka uye anoabetsera, anonga eciseenzeswa na Djehovha.—Zvie. 19:17; 2 Ako. 1:3, 4.

17. Ngei zvinokosha kufundira zvino kupangidza rudo ku hama uye kutambira arendo zvakanaka?

¹⁷ Zvezvirokwazvo rubetso ratinopasa hama dzedu ricanyanya kudikanwa mune ramangwana. (Abha. 3:16-18) Djehovha ari kutifundisa zvino kuti tipangidze rudo ku hama uye kuatambira zvakanaka. Mawara awona acanyanya kukosha dambudziko guru parinoga reciitika.

RAMANGWANA RIRI KUTIGADZIRIREI

18. Tingateedzera kudini muezaniso we Akristu akatiza ku Djerusarema?

¹⁸ Ngano inobhuya kuti Akristu akatizira ku matunhu akakwanisa kurarama Djerusarema parakatsakatiswa. Awona akadikana kusiya thaundi asi Djehovha ainga ari nawo nguwa dzese. Isusu tingateedzera kudini muezaniso wawo? Isusu atinyasi kuziya kuti ramangwana riri kutigadzirirei. Asi Djesu akaziisa kuti tinodika kugara takagadzirira kuzwira. (Ruka 12:40) Tinodikanawo kunyasa kurangarira zvakatarhwa na Pauro ku Ahebheru. Kusiya izvona, tinodikanawo kugonda no cipikirhwa ca Djehovha cokuti iyena aazombotisii. (Aheb. 13:5, 6) Tecirangarira izvona, tinodikana kurumbwa tecipsvaka thaundi ricagara nokusikaperi—Umambo wa Mwari—uye izvona zvicaita kuti titambire makomborero akawanda.—Mat. 25:34.