Garai Munhu Unokasika “Kubetsera Aya Anopfarira Masoko Akanaka”

1. Anhu pamweni angatambira kudini masoko edu? (Zviito 13:47, 48; 16:14, 15)

MU NGUWA ye Akristu ekutanga, anhu akawanda akatenda cokwadi paya paakazwa masoko akanaka. (Erengai Zviito 13:47, 48; 16:14, 15.) Nge mushobo umwewo, anhu anganani nyamasi uno anopfarira masoko akanaka paya paanozwa pekutanga. Amweni pekutanga aapangidzi kupfarira asi paapadarika nguwa, anofunungura mwoyo yawo ku masoko e Umambo. Cinyi catinodikana kuita paya patinogumira anhu ano “cido cakanaka”?

2. Ngei tingaezanisa basa re kuita afundi no basa re murimi?

² Basa re kuita afundi rakaezana maningi no basa re murimi. Murimi paanoona kuti muti ino micero yaibva, iyena unobvisa nokukasika. Asiwo, iyena unorumbwa ecirima uye ecicengeta miti dzinonga dzisati dzaano micero yaibva. Nge mushobo umwewo, paya patinogumira munhu unopangidza cido ku masoko akanaka, tinodikana kumubetsera nokukasika kuti agare mufundi wa Djesu. Uye isusuwo tinorumbwa tecisakurira cido ce aya anoda nguwa yakareba kuti azwisise kukosha ke zviya zvaari kupurutana. (Juau 4:35, 36) Paya patinozwisisa kuti munhu uno cido pa masoko akanaka kana kuti haiwa, zvinoita nyore kuti tigumire mushobo wakanaka we kumubetsera. Mu fundo ino, ticaona kuti cinyi catinodika kuita pa kucedzesana kekutanga kuti tibetsere aya anoda kutipurutana uye ticaonawo kuti tingaabetsera kudini kuti arumbwe ecibudirira.

TINGABETSERA KUDINI MUNHU UNOPANGIDZA KUDA MASOKO AKANAKA

3. Mubasa re kuparidzira cinyi catinodikana kuita kana tikagumira anhu anopangidza kupfarira? (1 Akorinti 9:26)

³ Patinogumira munhu unopangidza kupfarira mu basa re kuparidzira, tinodikana kumubetsera nokukasika kuti afundire ngezva Djehovha uye kukhwedera dhuze naye. Ndiyo ndaa, patinocedza naye kekutanga, tinodikana kumupasa fundo ye Bhaibheri uye kumupika kuti auye ku musangano.—Erengai 1 Akorinti 9:26.

4. Bhuyai ngezve esperiensiya ye munhu waiga akagadzirira kufunda ciriporipoco.

⁴ Kupasa fundo ye Bhaibheri. Anganani atinocedza nowo akagadzirira kutangisa fundo ye Bhaibheri. Hinga muezaniso, ngo mu Cirongomuna, musikana umweni we ku Canada wakakhwedera dhuze no painga pano cingoro ce mabhuku uye wakabata bhurushura ra Pfadzwai ne Upenyu Nokusikaperi!. Hanzvadzi yainga iri pa cingoro yakamupanganidzira kuti eciseenzesa bhurushura iri, iyena waizokwanisa kugara no fundo ye Bhaibheri asikaripi. Musikanewo wakapfarira uye akapasana numero dze terefoni. Paapadarika nguwa mu zuwa irona kamare, musikanewo wakatumira hanzvadziyo mensaji ecibvunzisa ngezve kufunda. Hanzvadziyo payakabvunzisa kuti zvakadini kuti tionane mu mapeto e sumana, musikanewo wakabvunzisa kuti: “Zvakadini kuti tionane mangwana? Inini ndinonga ndino mukana.” Awona akatanga kufunda mu Cishanu, uye mu sumana iyona kamare musikanewo wakapinda musangano uye wakarumbwa ecibudirira.

5. Pamigariro minganani cinyi catinodikana tatanga taita tisati tapasa fundo ye Bhaibheri? (Onaiwo foto.)

⁵ Izvirokwazvo kuti aanhu esepi acaita hinga musikanewo kutenda kufunda Bhaibheri nokukasika. Pa migariro imweni, zvingada kuti isusu tisakurire cido ce munhu. Tingakwanisa kuita kudaro nge kureketa zviro zvaangapfarira. Tikagara no maitiro akanaka uye torumbwa tecipangidza kuti tinopfarira munhuwo, nokukasika tingakwanisa kutangisa fundo ye Bhaibheri. Zvinyi zvatingareketa patinotanga kupasa fundo ye Bhaibheri? Takaita mubvunzo uu ku hama no hanzvadzi dzisikashuphirhwi kutangisa fundo dze Bhaibheri. Ngatione maonero aakapasa.

6. Cinyi catinodikana kubhuya kuti munhu ade kurumbwa ecicedza?

⁶ Hama idzona dzakapanganidza kuti mu mbuto dzinganani pakubhuya ngezve fundo ye Bhaibheri zvakanaka maningi kutama kubhuya masoko akaita hingana “fundo” “kurso ye Bhaibheri” kana kuti “ndinoda kumufundisai.” Pane kudaro, awona akazwisisa kuti masoko anobudirira ndi aya akaita hingana “kucedzesana,” uye “kuzwisisa Bhaibheri.” Kuti munhu arumbwe ecida kucedza, imwimwi mungabhuya kuti: Zvinoshamisa maningi mushobo unodaira Bhaibheri mibvunzo dzinokosha dze upenyu. Bhaibheri aibhukupi basi rinobetsera aya anonamata, asi irona rinotipasawo mazano anotibetsera zuwa no zuwa. Mungabhuyawo kuti: “Imwimwi amutori nguwa yakareba, pa miseswa 10 kana kuti 15 basi imwimwi mungakwanisa kufunda zviro zvinomubetserai mu upenyu menyu.” Kuti musapatise munhuwo, zvakanaka maningi kutama kuseenzesa masoko akaita hingana, amudikani kuposha mazuwa atakapangana kana kuti munodikana kufunda masumana ese.

7. Anganani akazwisisa kuti aiga ecifunda cokwadi nguwa ipi? (1 Akorinti 14:23-25)

⁷ Mupikei kuti auye ku musangano. Mumazuwa e muphostori Pauro, zvinoita hingana kuti anganani akazwisisa kuti aifundira cokwadi paaienda ku musangano. (Erengai 1 Akorinti 14:23-25.) Kakawanda ndizvo zvinoitikawo mazuwa ano. Afundi akawanda anobudirira paya paanotanga kupinda musanango. I nguwa ipi yakanaka ye kupika munhu kuti auye ku musangano? Bhuku ra Pfadzwai ne Upenyu Nokusikaperi! rino mupiko pa fundo 10. Asi imwimwi amudikani kuetsera dakara pa fundo iyona kuti mumupike. Pakucedzesana kenyu ke kutanga imwimwi mungatomupika kuti auye ku musangano mu kupera ke sumana iyona. Pamweni imwimwi mungatomubvunza ngezve musoro ye mharidzo ku anhu ese kana kuti fundo inokosha ye Fundo ye Murindiri.

8. Cinyi catingabhuya paya patinopika munhu kuti auye ku musangano? (Isaya 54:13)

⁸ Pamunopika munhu wapfarira kuti auye ku musangano, mupanganidzirei kuti misangano yedu yakasiyana maningi no yaakambopinda ku magereja amweni. Mufundi umweni we Bhaibheri wakaona Fundo ye Murindiri kekutanga, wakabvunzisa mufundisi wake kuti: “Kodi muitisi we Murindiri unoziya mazina e anhu ese here?” Hanzvadziyo yakapanganidza kuti hingana mushobo watinoziya mazina e anyaukama edu, isusu tinopeta masimba kuti tiziye mazina e hama dzedu. Mufundiwo wakabhuya kuti zvainga zvakasiyana maningi no zvinoitika ku gereja kake. Musiyano umweni watingabhuya i kubhuya cinangwa ce misangano yedu. (Erengai Isaya 54:13.) Isusu tinoungana kuti tinamate Djehovha, tifundire ngezvake uye kubambisana umwe na umwe wedu. (Aheb. 2:12; 10:24, 25) Ndiyo ndaa, misangano yedu yakagadzirirhwa kuti tifundire, haiwa kuti tiende koophinda-phinda zviro. (1 Ako. 14:40) Nyumba ye Umambo i mbuto yekuti isusu tifundire ndiyo ndaa, iyona yakanyasa kudjeka kamare. Ngekuti tiri anhu akaperera, atitsigiri zve matongerhwe e nyika uyewo aticedzesani ngezvazvo kana kutopasa maonero. Ciro cingabetsera i kupangidza mufundiwo paciino nguwa vhidhiyo yakazwi Mu Nyumba yo Umambo Munoizwei? Ngekudaro, iyena ucaenda ku musangano eciziya kuti zvinyi zvicaitika ikona.

9-10. Tingabhuyei ku munhu wekuti pamweni unonga ecipsveruka kupinda musangano? (Onaiwo foto.)

⁹ Anganani anopsveruka kupinda musangano ngekuti anorangarira kuti acadikana kugara Mupupuri wa Djehovha. Hino, mupanganidzirei kuti tinopfarira maningi kutambira anotivhakacira uye kuti atibambidziri munhu kuti abhuye kana kuita ciro panonga peciizwa musangano kana kuti kutogara Mupupuri wa Djehovha. Ese e mu mhuri akasudzunukawo kuuya kutobatanidzawo ana. Pa misangano yedu, ana aagari akaparadzana no anhu akauru. Pane kudaro, abereki uye ana anogara pamwepo uye anofunda pamwepo. Izvona zvinobetsera abereki kuziya kuti ana awo akagara nani uye ari kufundei. (Dhe. 31:12) Atikumbiri mupiro kana kuhambisa paratu kuti munhu akandemo mare. Isusu tinoteera mutemo wa Djesu unoti: “Makapaswa nyore, ipaiwo nyore.” (Mat. 10:8) Imwimwi mungamubvunzazve kuti mungakwanisa kupfeka macira amunawo kuti muuye ku musangano. Mwari aaoni ciimo cedu asi anoona mwoyo wedu.—1 Sam. 16:7.

¹⁰ Kana munhuwo akaenda ku musanagano itai zviri zvese kuti iyena azwe akasudzunuka. Mupangidzei ku akuru uye ku hama dzimweni. Kana iyena akazwa ari pa nyumba zviri nyore kuti iyena ade kuhwirirazve. Kana asina Bhaibheri onai mwese mu Bhaibheri renyu. Kusiya izvona, mupangidzei kuti imwimwi munoenderana kudini no mharidzo kana kuti fundo.

TINGABETSERA KUDINI MUNHU URI KUTANGA KUFUNDA BHAIBHERI

11. Imwimwi mungapangidza kudini kuti munoreremedza nguwa uye urongwa we mufundi?

¹¹ Patinofundisa munhu Bhaibheri cinyi catinodika kurangarira? Reremedzai nguwa yake uye urongwa wake. Ngo muezaniso, pamunopangana imwe nguwa endai pa nguwa iyona kamare kunyazi amweni e mu nharauda yenyu ano musambo we kunonoka. Kusiya izvona, pamweni zvakanaka kuti fundo yenyu ye kutanga isatore nguwa yakareba. Aparidzi anganani ano maesperiensiya anobhuya kuti zvakanaka maningi kuti fundo iyona isatore nguwa yakareba kunyazi munhuwo ecida kufunda zvakawanda. Ngwarirai kuti musarekete zvakawanda, siyai mufundi wenyu akasudzunuka kuti arekete.—Zvie. 10:19.

12. Cinangwa cedu cinodikana kugara cipi paya patinotanga kuitisa fundo ye Bhaibheri?

¹² Kubvira pakutanga cinangwa cenyu cinodikana kugara ce kubetsera mufundi kuti aziye Djehovha na Djesu uye kusakurira rudo kaari. Mushobo umwe we kuita izvona, ndi kupanganidza kuti zvamuri kufundisa zviri kubva mu Bhaibheri Soko ra Mwari haiwa pa uzii wenyu. (Zvii. 10:25, 26) Muphostori Pauro wakapangidza muezaniso wakanaka pa nyaya iyona. Paaifundisa anhu, iyena wakakanda ndangariro dzake pa uzii wa Djesu Kristu akauya pa nyika kuti abetsere anhu kuziya uye kuda Djehovha. (1 Ako. 2:1, 2) Kusiya izvona, Pauro wakasiya pamhene kuti zvinokosha maningi kebetsera afundi apsva kusakurira mawara akanaka angakwanisa kuezaniswa no oro, prata uye mapuwe anokosha. (1 Ako. 3:11-15) Mawara awona anobatanidza kutenda, uzii, kunyasa kurangarira uye kuthya Djehovha. (Pis. 19:9, 10; Zvie. 3:13-15; 1 Ped. 1:7) Teedzerai mushobo wekufundisa wa Pauro uye betserai mufundi wenyu kusakurira kutenda kakabamba uye ushamwari we padhuze na Baba ano rudo e kudenga.—2 Ako. 1:24.

13. Tingagara kudini no mwoyo unononoka kutsamwa uye kuzwisisa paya patinonga tecibetsera mufundi? (2 Akorinti 10:4, 5) (Onaiwo mufanikiso.)

¹³ Pamunonga mecifundisa teedzerai muezaniso wa Djesu we kugara no mwoyo unononoka kutsamwa uye kuzwisisa. Ngwarirai kuita mubvunzo dzinoita kuti munhuwo asazwe zvakanaka. Kana mufundi akagara no cinetso ce kutenga imwe nyaya rumbwai mecifunda uye hwirirai kureketa ngezve nyaya iyona pa nguwa imweni. Pane kumubambidzira kuti atendere mafundisiro enyu, siyai nguwa yekuti cokwadi cidzike midzi mu mwoyo make. (Juau 16:12; Ako. 2:6, 7) Bhaibheri rinoezanisa mafundiso ekunyepa no zviro zvakanyasa kubamba zvatiri kuedza kuputsa. (Erengai 2 Akorinti 10:4, 5.) Hino, tisati taita kuti mufundi wedu asiye zve ku gereja kake, tinodikana kumubetsera kuti awake zviro zvipsa zvakanyasa kubamba kana kuti kugonda Djehovha hinga mbuto ye Kutizira.—Pis. 91:9.

TINGABETSERA KUDINI MUNHU URI KUTANGA KUPINDA MISANGANO

14. Tinodikana kubata kudini aya anotanga kupinda musangano?

¹⁴ Djehovha anoda kuti tigare anhu asikasananguri uye akanaka no munhu wese. Azvinei no tsika yake, mare yake kana kaakabva. (Tig. 2:1-4, 9) Hino tingapangidzira kudini rudo ku aya ari kutangisa kupinda musangano?

15-16. Tingabetsera kudini aya ari kutanga kupinda musangano kuti azwe akasudzunuka?

¹⁵ Anganani anoenda ku misangano yedu ngokuti anoda kuona kuti zvinoizva kudini kana kuti akapikwa no munhu we ungano imweni. Mukaona munhu wavhakacira ungano yenyu cedzai naye uye momuti mauya mauya. Asi ngwarirai kuti mupfaro wenyu usaite kuti iyena asazwe zvakanaka. Pikai munhu wavhakacira kuti agare ku dii renyu uye onai mwese Bhaibheri uye mabhuku enyu kana kuti mukumbirirei bhuku. Kusiya izvona, edzai kuzwisisa mazwiro ake. Mwanarume umweni wakavhakacira Nyumba ye Umambo wakabvunza hama yamutambira kuti wainga ecipsveruka ngekuti wainga asina macira akasisira. Hama iya yakamubetsera kuti azwe akasudzunuka uye yakamupanganidzira kuti isusu Apupuri a Djehovha tiri anhu akaita hingana anhu amweni. Paapadarika nguwa, mwanarume uya wakabhabhatidzwa asi iyena aazi kukanganwa mhinduro iya. Pamunonga mecireketa no munhu wavhakacira misangano yenyu musangano usati watanga kana kuti mumasure me kupera misangano nguwa dzese rangarirai kuti tinoda kumupangidzira kuti tinomuzwisisa asi atipindiri pa nyaya dzake.—1 Ped. 4:15.

¹⁶ Pano mushobo umweni we kubetsera avhakaciri kuti azwe zvakanaka pa musangano. Pakucedzesana kenyu, mhinduro dzenyu uye matii pamunonga mecireketa ngezve munhu usikaseenzeri Djehovha, reketai nguwa dzese no rureremedzo. Ngwarirai kureketa zviro zvinomunyangadza zvinoita kuti iyena asadezve kuzopinda musangano. (Tito 2:8; 3:2) Ngo muezaniso, atidikani kushora kana kureketa zviro zvakashata nge zviya zvinotendwa ngo amweni. (2 Ako. 6:3) Hama dzinoita mharidzo ku anhu ese dzinodikana kungwarira pa zviro izvi. Hama idzi dzinopangidzawo rureremedzo nge kupanganidza masoko kana kuti zviro kuti aya ari kuvhakacira azwisise.

17. Tinodikana kuitei patinogumira anhu “ano cido cakanaka ce kuona upenyu usikaperi”?

¹⁷ Zuwa no zuwa basa re kuita afundi rinodikana kuizwa nokukasika uye isusu ticarumbwa tecipsvaka anhu “ano cido cakanaka ce kuona upenyu usikaperi.” (Zvii. 13:48) Izvona zvikaitika atidikani kuthya kupasa fundo ye Bhaibheri kana kuti kuapika kuti auye ku musangano. Ngokudaro, tingakwanisa kuabetsera kuti akwanise kupasa matanhu ekutanga mu “gwanza rinoendesa ku upenyu.”—Mat. 7:14.