Pangidzai Rureremedzo ku Amweni

1. Ngei tinopfarira kureremedzwa? (Zvierengo 22:1)

IMWIMWI munopfarira kureremedzwa here? Zviri pamhene kuti honde. Rureremedzo iciro cekuti munhu wese unoda kupangidzirhwa. Munhu paanotireremedza tinozwa mupfaro uye kukosheswa. Ndiyo ndaa Bhaibheri rinobhuya kuti: “Kureremedzwa kakanaka kudarika prata uye oro”!—Erengai Zvierengo 22:1.

2-3. Ngei anguwapi yese yekuti zviri nyore kupangidza rureremedzo uye tinodikana kureremedza ani?

² Ainguwapi yese yekuti zvinobvira kupangidza rureremedzo ku amweni. Cimwe cecikonzero ngecekuti azvibviri kutama kuona zvishaishi zvinoizwa nge amweni. Kusiya izvona, tinorarama mu nyika mekuti kutama kureremedzana iciro cinonyanya kuitika. Asi isusu tinoda kugara anhu akasiyana. Ngei? Ngekuti Djehovha anoda kuti isusu tikudze kana kuti tireremedze amweni.—1 Ped. 2:17.

³ Mu fundo ino, ticafundira kuti cinyi cinoda kureya kupangidza rureremedzo uye kuti tingapangidza kudini rureremedzo (1) mu mhuri, (2) mu ungano, uye (3) ku anhu asikaseenzeri Djehovha. Ticaonawo kuti tingaita kudini izvona kunyazi paya pazvinoshupha.

CINYI CINODA KUREYA KUREREMEDZA AMWENI?

4. Kureremedza zvinoda kureyei?

⁴ Soko rokuti kureremedza rinoda kureyei? Kureremedza kunoreya maka-maka mushobo watinoona munhu. Patinoreremedza munhu, tinoita izvona ngokuti mu maonero edu, iyena unosisira kuti tinyase kumuteya nzee pamweni nge ndaa ye mawara ake, zviro zvaanazvo kana kuti ubaba waanawo. Mu mireketero minganani, soko rokuti “kureremedza” rinobatanidzwawo pa “kukudza.” “kukudza” zvinoreya mushobo watinobata amweni. Patinokudza munhu, isusu tinomubata no rureremedzo, nge mushobo unoita kuti iyena azwe ecikosheswa uye ecidiwa. Zviri pamhene kuti rukudzo re zvirokwazvo rinodikana kubva mu mwoyo.—Mat. 15:8.

5. Cinyi cinotiitisa kuti tireremedze amweni?

⁵ Djehovha anoda kuti isusu tibate amweni no rureremedzo ngo muezaniso, iyena anobhuya kuti tinodikana kureremedza “atongi.” (Aro. 13:1, 7) Asi pamweni anganani angarangarira kuti: “Azvizi kushata kupangidza rureremedzo ku anhu, asi awona anodikana kuita zviro zvinosisira kuti areremedzwe.” Kodi mushobo uwona wekurangarira wakanaka here? Hingana aseenzi a Djehovha, isusu tinozwisisa kuti rureremedzo redu ku anhu aridikani kutsamira basi pazviya zvaanoita. Cikonzero cinoita kuti tireremedze amweni iciro cinokosha maningi—rudo redu kuna Djehovha uye cido cedu cekuda kumupfadza.—Djs. 4:14; 1 Ped. 3:15.

6. Miezaniso ipi inopangidza kuti zvinobvira kureremedza munhu asikatireremedzi? (Onaiwo pakapa.)

⁶ Anganani pamweni angadzibvunzisa kuti: ‘Kodi zvinobvira here kureremedza munhu asikandireremedzi?’ Honde. Onai miezaniso minganani. Mambo Sauri akapsverusa Djonatani mwana wake pamberi pe amweni. (1 Sam. 20:30-34) Kunyazi zvakadaro, Djonatani wakarumbwa ecimureremedza uye wakarumbwa ecienda ku hondo naye. (Eki. 20:12; 2 Sam. 1:23) Mupristi Mukuru Eri, wakapumha Ana kuti iyena wainga wakararadza. (1 Sam. 1:12-14) Asi Ana wakabhuya nge mushobo unopangidza rureremedzo na Eri, kunyazi anhu ese e mu Israeri eciziya ngezve zvishaishi zvake hingana baba uye hingana Mupristi Mukuru. (1 Sam. 1:15-18; 2:22-24) Uye anarume e ku Atena akabvunza Pauro, kuti iyena wainga uno “nhango.” (Zvii. 17:18) Kunyazi zvakadaro, Pauro wakapangidza rureremedzo paakareketa nawo. (Zvii. 17:22) Miezaniso ii inosiya pamhene kuti rudo rakakura ratinaro kuna Djehovha uye kuda kedu kumupfadza, kungatiitisa kuti isusu tireremedze amweni kunyazi paya pazvinoshupha. Hino ngatione kuti ndiyani anosisira kureremedzwa uye ngei.

PANGIDZAI RUREREMEDZO MU MHURI

7. Ngei zvingashupha kupangidza rureremedzo ku nhengo dze mu mhuri medu?

⁷ Ngei zvinoshupha? Isusu tinotora nguwa yakareba no nhengo dze mhuri yedu. Ndiyo ndaa, tinonyasa kuziya zviya zvakanaka uye zvakashata zvaanoita. Anganani pamweni anonetseka maningi kana kuti ano nhenda inoshupha kuti tiacengete. Uye pamweni amweni angabhuya kana kuti kuita zviro nge mushobo ungatirhwadzisa. Pane kuita kuti mu mhuri mugare mbuto ye kuzorora uye ino runyararo, amweni anobata nhengo dze mhuri asikaareremedzi. Tingaezanisa mhuri, no mwiri wedu. Nhenda ingaitisa kuti mwiri wedu usagare zvakanaka. Nge mushobo umwewo, kana nhengo dze mu mhuri dzikasama kureremedzana izvona zvingaita kuti mhuri isagare yakabatana. Asi sezvo nhenda dzakawanda dzingakwanisa kuraphwa, zvinobvira kuti mhuri, ifundirewo kupangidza rureremedzo ku umwe na umwe wawo.

8. Ngei zvinokosha kupangidza rureremedzo ku nhengo dze mu mhuri medu? (1 Timoti 5:4, 8)

⁸ Ngei tinodikana kupangidza rureremedzo? (Eregai 1 Timoti 5:4, 8.) Mutsamba yake ye kutanga kuna Timotiyo, Pauro wakabhuya kuti tinodikana kukudza kudini nhengo dze mhuri yedu, teciriritira zvido zvawo zvekunyama. Asi isusu atiiti izvona tecibambidzirhwa. Pauro wakapanganidza kuti cikonzero cinonyanya kukosha cinotiita kuti tireremedze anhu e mu mhuri yedu, nge ce “kudzipira kuna Mwari.” Kana kuti kumunamata uye basa redu rakagondeka ratinomuiitira. Djehovha ndiye akasika mhuri. (Aef. 3:14, 15) Hino patinoreremedza nhengo dze mhuri yedu, zvezvirokwazvo isusu tinonga tecipasa rukudzo Kumusiki we mhuri Djehovha. (1 Ti. 5:4.) Ici icikonzero cinokosha maningi cinotiita kuti tibate nhengo dzedu dze mhuri no rureremedzo!

9. Mwamuna no mukadzi angapangidzirana kudini rureremedzo? (Onaiwo mufanikiso.)

⁹ Tingapangidza kudini rureremedzo. Mwamuna unokudza mukadzi wake, unopangidza kuti unomukoshesa paanonga ari airi uye panonga pano anhu akawanda. (Zvie 31:28; 1 Ped. 3:7) Iyena aazomupondi kana kumupsverusa kana kuti kuita zviro zvinoita kuti iyena azwe hinga asikabetseri. Mwamuna umweni unozwi Ariel,a unogara ku Argentina, unopanganidza eciti: “Nge ndaa ye cinetso ce uthongo cinomukadzi wangu, nguwa dzimweni iyena unobhuya zviro zvinondirhwadza. Paanoita izvona, ndinoedza kuedzurira kuti zvaanobhuya andizvopi kamare zvaaida kubhuya. Tsamba inondibetsera pa nguwa iyona inoshupha, ndi 1 Akorinti 13:5. Iyona inondikohomedzesa kuti ndirekete naye nge mushobo we rureremedzo pane kusiya shungu dziite kuti ndirekete no hasha.” (Zvie. 19:11) Mukadzi unokudza mwamuna wake, unoreketa zviro zvakanaka ngezvake ku amweni. (Aef. 5:33) Iyena aapsvinyiri mwamuna wake, aaiiti zviro zvinomunyangadza uye aamushori; iyena unoziya kuti muiitiro uwona unoita kuti mucata usahambe zvakanaka. (Zvie. 14:1) Hanzvadzi imweni inogara ku Itália inoti: “Mwamuna wangu urikurhwisana ne kudzirhya mwoyo uye nguwa dzimweni ndinoona kuti iyena unonetseka maningi no zviro pasina cikonzero. Pakutanga masoko angu uye mushobo wandaimuringira, wainga usikapangidzi rureremedzo kaari. Asi ndakazoona kuti pandinopedza nguwa ne anhu anopangidza rureremedzo, ndinogara no cido cekuda kureremedzawo mwamuna wangu.”

10. Ana angapangidza kudini rureremedzo ku abereki awo?

¹⁰ Madjaha teererai mitemo yamupaswa nge abereki enyu. (Aef. 6:1-3) Reketai nawo meciapangidzira rureremedzo. (Eki. 21:17) Uye abereki enyu paanonga ecikura, apangidzirei rureremedzo meciapasa rubetso raanoda. Itai zvirizvese kuti muacengete. Onai muezaniso wa María. Baba a Maria ekuti ainga asiripi Mupupuri wa Djehovha paakarhwara, zvakashuphira maningi María kuti aacengete ngekuti awona ainga asikamubati zvakanaka. Iyena unoedzurira eciti: “Inini ndainamata kuna Djehovha haiwa basi kuti ndikwanise kureremedza baba angu, asiwo kuti ndipangidze izvona pazviito. Inini ndaidzibvunza kuti sezvo Djehovha ecikumbira kuti ndikudze abereki angu, hino zvezvirokwazvo iyena acandipasa simba kuti ndiite izvona. No kuhamba ke nguwa ndakazwisisa kuti ndainga ndisikadikani kuetsera kuti baba angu acinje muitiro wawo, kuti ndikwanise kuareremedza.” Patinoreremedza nhengo dze mu mhuri yedu, kunyazi no zvishaishi zvawo tinopangidza rureremedzo kuna Djehovha uya Akasika mhuri.

PANGIDZAI RUREREMEDZO MU UNGANO

11. Ngei zvingashupha kubata hama no rureremedzo?

¹¹ Ngei izvona zvinoshupha. Hama dzinopeta masimba kuti dziseenzese zviya zvinobhuiwa no Bhaibheri; kunyazi zvakadaro, nguwa dzimweni anganani angakwanisa kutibata zvisikazi kunaka, kuita zviro zvinotinyangadza kana kuti kutonga nge mushobo usina unatsi. Hama paainoita ciro cinotipasa cikonzero cekuti tizwe “takashaishirhwa,” zvingatishuphira kurumbwa teciareremedza. (Ako. 3:13) Asi cinyi cingatibetsera kuti tirumbwe tecipangidza rureremedzo?

12. Ngei zvinokosha kupangidza rureremedzo ku hama dzedu? (2 Pedru 2:9-12)

¹² Ngei tecidikana kupangidza rureremedzo? (Erengai 2 Pedru 2:9-12.) Mutsamba yake yecipiri, Pedru wakabhuya kuti anganani mu ungano, ainga ecireketa nge mushobo usikareremedzi “aya anoreremedzwa na Mwari,” kana kuti akuru. Ngirozi dzakagondeka dzainga dzeciona zvese zviya zvaiitika. Asi idzona dzakaitei? “Dzecireremedza Djehovha,” idzona adzizi kureketa ciro cipi haco cisikapangidzi rureremedzo ku anhu aya. Ngirozi dzakakwana, dzakaramba kureketa nge mushobo we kushora ku anarume aya akashata. Pane kudaro, idzona dzakasiya kuti Djehovha atonge nyaya ii. (Aro. 14:10-12; ezanisai na Djud. 9.) Ngirozi idzi dzatisira fundo rinokosha. Kana tecireremedza kunyazi anhu aya anophikisa Djehovha, hino atidikaniwo kunyasa kureremedza hama dzedu here?. Isusu ‘tinodikana kuareremedza.’ (Aro. 12:10) Ngekuita izvona, tinopangidza kuti tinoreremedza Djehovha.

13-14. Pasai muezaniso wekuti tingapangidza kudini rureremedzo mu ungano? (Onaiwo mufanikiso.)

¹³ Tingapangidza kudini rureremedzo. Akuru petai masimba kuti mufundise no rudo. (Firi. 8, 9) Kana mecida kupasa zano munhu, itai izvona no unaki haiwa kana makanyangadzwa. Hanzvadzi, imwimwi munokwanisa kubetsera maningi kuti mu ungano muoneke uye mugare no rureremedzo, hino musabatanidzwe pa mapsveda kana kuti nhango. (Tito 2:3-5) Tese isusu tingapangidza kuti tinoreremedza akuru, nge kuzwira nhungamiriro dzaanopasa. Mushobo umweni ngewe kupangidza kutenda ngekupeta masimba kaanoita kuti aitise misangano, agadzirire basa re kuparidzira uye pakubetsera aya okuti “akatanga kuhamba mu gwanza rakashata.”—Aga. 6:1; 1 Ti. 5:17.

¹⁴ Hanzvadzi inodainzwa kuti Rocío yaizwa zvecishupha maningi kureremedza mukuru wekuti wainga aipasa zano. Iyena unopanganidza kuti: “Inini ndairangarira kuti mukuru iyena wainga andiomesera maningi.” “Pa nyumba inini ndaireketa zvakashata ngezvake. Inini ndainga ndisikabhuyi izvona pamhene, asi ndairangarira kuti iyena wainga asina basa na inini, hino andizi kupurutana zano rake.” Cinyi cakabetsera Rocío? Iyena unopanganidza eciti: “Pa kuerenga kangu ke Bhaibheri inini ndakaona tsamba ya 1 Atesaronika 5:12, 13. Pandakazwisisa kuti ndainga ndisikareremedzi hama iya ndakagara no hana yecirema. Inini ndakanamata kuna Djehovha uye ndakapsvakisisa mu mabhuku edu kuti ndigumire zviro zvaaizondibetsera kuti ndicinje muitiro. Nokuhamba ke nguwa ndakazwisisa kuti cinetso cainga cisiripi ce hama iya, asi cainga ciri cekudzikudza kandaiita. Parizvino ndaakuzwisisa, kuti ndikwanise kureremedza amweni inini ndinodikana kudzidodosa. Inini ndiciri kudikana kupeta masimba kuti ndikwanise izvona, asi ndiri kuita zviri zvese kuti ndipangidze rureremedzo uye izvona zvinondibetsera kuti ndigare no runyararo ra Djehovha.”

PANGIDZAI RUREREMEDZO KU AYA ASIKASEENZERI DJEHOVHA

15. Ngei zvingashupha kupangidza rureremedzo ku aya asikaseenzeri Djehovha?

¹⁵ Ngei zvecishupha. Mu basa rekuparidzira zvakadjairika kugumira anhu asikareremedzi zviya zvinofundiswa no Bhaibheri. (Aef. 4:18) Anganani, anosanangura kurumbwa eciramba masoko edu nge ndaa yo mushobo waakarerhwa. Kusiya izvona, pamweni tinobatana no mashefi kana maprofesori ekuti zvinoshupha kuapfadza. Adoni edu ekubasa, ekucikora pamweni ndi anhu asikareremedzi amweni. No kuhamba ke nguwa, tingakwanisa kusama kureremedza anhu aya uye tosiya kuabata zvakanaka hingana mushobo wataida kuabata.

16. Ngei zvinokosha kupangidza rureremedzo ku aya ekuti aasati aseenzera Djehovha? (1 Pedru 2:12; 3:15)

¹⁶ Ngei tinodikana kupangidza rureremedzo? Edzurirai kuti Djehovha anoona mushobo watinobata aya ekuti aasati atanga kumuseenzera. Muphostori Pedru wakabhuya ku Akristu kuti maitiro akanaka awo aizoita kuti anganani “akudze Mwari.” Ndiyo ndaa Pedru wakabhuya kuti aapanganidzire zvaanotenda no “upfawi uye no rureremedzo.” (Erengai 1 Pedru 2:12; 3:15.) Azvinei kuti tiri kudziirira kutenda kedu mutribhunari kana kucedza no anyacigarisano, cokwadi ngece kuti tinodikana kubata aya asiripi e ungano ya Djehovha hingana kuti Djehovha ari ku dii redu. Djehovha ari kuona uye kuzwa zvese zvatinobhuya uye mushobo watinozvibhuya. Icona icikonzero cakabamba cekuti tibate no rureremedzo aya asikaiti dii re ungano!

17. Tingapangidza kudini rureremedzo ku aya asikaseenzeri Djehovha?

¹⁷ Tingapangidza kudini rureremedzo. Mu basa rekuparidzira atidi kudzipangidzira hingana kuti, tinokosha kudarika aya asikazii zvakawanda kana asikatozi ciro ngezve Bhaibheri. Kusiya izvona, tinoda kuona anhu hingana anokosha kuna Mwari uye akuru katiri. (Ajeu. 2:7; Afi. 2:3) Kana munhu akamunyangadzisai, nge ndaa ye zviro zvamunotenda, dzibatei kuti musahwirinzire. Musarekete ciro kuti muonekwe hingana makangwara asi pamweni cinganyangadzisa anhu. (1 Ped. 2:23) Kana mukareketa ciro camainga musikadi kubhuya, kumbirai rurekerero ciriporipoco. Mungapangidza kudini rureremedzo kamunoseenzera? Garai museenzi wakanaka uye edzai kuona mawara akanaka e adoni enyu e kubasa uye e mashefi enyu. (Tito 2:9, 10) Kana mukagara munhu akatendeka uye unoseenza no simba, zvingaita kuti mungakwanisa kupfadza anhu akawanda kana kuti haiwa. Asi zvezvirokwazvo mucapfadza Mwari.—Ako. 3:22, 23.

18. Ngei zvinokosha kugara no rureremedzo uye kupangidza rureremedzo?

¹⁸ Mu fundo ino taona zvikonzero zvakanaka kuti tigare no rureremedzo uye kuti tipangidze ruremedzo ku amweni! Tafunda kuti kana tikagara no musambo uwona mu mhuri ticakudza Musiki we mhuri Djehovha. Ngo mushobo umwewo, patino reremedza hama dzedu uye hanzvadzi dze mu ungano tinokudza Baba edu e Kudenga. Uye patino pangidza rureremedzo ku aya asikaseenzeri Djehovha, tinosiya misuwo dzakafununguka kuti areremedze uye kuti akudze Mwari wedu Mukurusa. Kunyazi anhu anganani asikapangidzi rureremedzo ngo mushobo umwewo, zvinokosha maningi kupangidza wara irona. Ngei? Ngekuti Djehovha acatikumborera. Iyena anotigondesa kuti: “Ndicakudza aya anondikudza.”—1 Sam. 2:30.