Djehovha Akatibetsera Kukura ‘Paya Patainga Takasimwa’

Mats uye Ann-Catrin akakursari Cikora ce Giriyadhi muna 1979. Ndikona kaakapaswa mazano aya no mufundisi we Cikora Jack Redford. Nokuhamba ke makore Mats uye Ann-Catrin “akasimwa,” kana kuti akagadzwa kuti aseenze ku Iran, Zaire, Tanzânia, Uganda, Maurício uye Mianmar. Mazano awona aya, akaabetsera maningi paainga “ecisimwa,” “paakaduswa” uye “paakasimwazve” ku mbuto dzimweni. Ngatisiye kuti aona anyase kutipanganidzira zvakaitika.

Mats, ungatipanganidzira kuti wakaziya kudini cokwadi?

Mats unodaira eciti: Baba angu aigara ku Polônia mu nguwa ye Hondo ye Cipiri yakaitika mu nyika yese uye aiona zviro zvakashata maningi mu Gereja Katorika. Kunyazi zvakadaro, nguwa dzese awona aibhuya kuti: “Cokwadi ciriyo uye tingakwanisa kucigumira!” No kuhamba ke nguwa, ndakaona kuti zvaaibhuya zvainga zviri zvezvirokwazvo. Inini ndaitenga maningi mabhuku akaseenzeswa uye rimwe re bhuku randakatenga rainga riri re azuri rinodainzwa kuti: A Verdade Que Conduz à Vida Eterna. Musoro we bhuku iri, wakaita kuti inini ndide kuziya zviri imona uye pa usiku uwona kamare, ndakaerenga bhuku rese. Pazuwa rakazoteera inini ndaizviziya kuti ndainga ndagumira cokwadi!

Kubvira muna Abriri ya 1972, ndakatanga kuerenga mabhuku akawanda e Apupuri a Djehovha uye ndakagumira mhiduro dzemibvunzo dzangu dzese ngezve Bhaibheri. Inini ndakazwa hingana mutengesi unobhuiwa pa muezaniso wa Djesu wekuti mumasure mekugumira buwe rinokosha, wakatengesa zvese zvainga anazvo kuti aritenge. Nge mushobo umwewo inini “ndakatengesa” urongwa wangu, cekukurusari cikora ciripamusoro-soro kuti ndigare medhiko kuitira kuti nditenge buwe—“rinokosha” cokwadi candainga ndagumira. (Mat. 13:45, 46) Inini ndakabhabhatidzwa muzuwa 10 ya Dezembro ya 1972.

Mukati me gore rimwe, abereki angu uye hama dzangu dzakatenda cokwadi uye dzakabhabhatidzwa. Mu Julho ya 1973, inini ndakatanga kuseenza hinga mupiyonero we nguwa dzese. Pamapiyonero aishingaira ainga ari mu ungano medu, mainga muno hanzvadzi yakarungama maningi uye yaida maningi Djehovha yaizwi Ann-Catrin. Isusu takadanana uye takacata muna 1975. Makore marongomuna akazoteera isusu takararama muthaundi yaizwi Strömsund, mu mbuto yakarungama ye ku Suécia yekuti anhu akawanda aida kufunda Bhaibheri.

Ann-Catrin unoti: Baba angu akafunda cokwadi paaipedzesa cikora ce pamusoro-soro ku Estocolmo. Mu nguwa iyona, inini ndainga ndino mwedzi mitatu dzekubarhwa, asi awona ainditora kwenda ku musangano uye mu basa re kuparidzira. Mai angu ainga asikatozvipfariri uye aiedza kupangidza kuti Apupuri a Djehovha ainga asina cokwadi, asi awona aazi kuzvikwanisa. No kuhamba ke nguwa awona akazobhabhatidzwa. Pandainga ndaano makore 13, inini ndakazobhabhatidzwawo uye pandainga ndaano makore 16, inini ndakagara mupiyonera we nguwa dzese. Mumasure mekuseenza ku Umeå, kuthaundi raidiwa aparidzi akawanda inini ndakagara mupiyonera espesiyari.

Mumasure mekuti inini na Mats tacata, takagara no mupfaro wekubetsera anhu akawanda kufunda cokwadi. Umwe wakhona ndi musikana unodainzwa kuti Maivor, iyena wakasiya kuita mutambo waaida maningi uye wakatanga kuseenza hingana mupiyonera pamwepo no munukuna wake. Awona akakurusari Cikora ce Giriyadhi muna 1984 uye arikuseenza hingana mamisiyonario ku Equador.

Pa mabasa enyu hingana mamisionariyo, makaterera kudini “zano re kukura pamakasimwa”?

Mats unoti: Isusu “takasimwa” mu mabasa mapsva akawanda. Asi takaedza “kudzikamidzi” uye kugara takabatikana hingana Djesu teciita zvatinokwanisa, kuti titeedzere mawara ake maka-maka kudzidodosa. (Ako. 2:6, 7) Ngo muezaniso, panekuetsera kuti hama dze mu nharaunda yataiseenzera, dziite maererano netsika yedu, takaedza kuzwisisa mushobo wawo wekuita zviro, kaanogara uye mushobo wawo wekurangarira. Nge kuteedzera Djesu, isusu taizwa hingana “takasimwa padhuze no panoerera mvura” kuti tikure pa basa ripi haro ratinopaswa.—Pis. 1:2, 3.

Ann-Catrin unoti: Kuti ukure pa mbuto yaucasimwazve muti unoda zuwa. Djehovha ainga ari “zuwa” nguwa dzese katiri. (Pis. 84:11) Iyena akatipasa mhuri ye zvirokwazvo ye kumwiya, hama no hanzvadzi dzinobambisa uye dzino pangidza rudo. Nge muezaniso, isusu takaseenza mu ungano doko ku Teerã no ku Irã. Hama dze ikona, dzaitambira zvakanaka arendo izvona zvaitiedzurira kutambira arendo kunobhuyiwa mu nguwa dze Bhaibheri. Isusu taida maningi basa redu ku Irã, asi muna Julho ya 1980, anyautongi akarambidza basa redu uye takabvunzwa kuti taidikana kubuda imuna mumazuwa mairi. Isusu takagadzwa ku Zaire (kekuti zvino kunodainzwa kuti República Democrática do Congo) inogara ku Africa.

Pandakaziya kuti isusu tainga takagadzwa kuti tiende Africa, ndakacema. Ngano dzandakazwa dze ikona, dzinocokuita no nyoka uye nhenda dzakandipatisa maningi. Asi kazado imweni yekuti i shamwari yedu yakamboseenza ku Africa, ke makore akawanda yakatibvunza kuti: “Imwimwi amusati maziya Africa! Kana mukaiziya—Africa munoona kuti Africa inodakadza maningi.” Uye ndizvona kamare zvakaitika! Hama no hanzvadzi dze ikona dzino rudo uye dzinobambisa. Zvekuti paapadarika makore 6, pataidikana kubuda ku Zaire nge ndaa ye kuphikiswa, inini ndakashamisika uye ndakatoseka ndega ngekuti parizvino inini ndainamata kuna Djehovha ndeciti: “Ndapota Siyai kuti tigare kuno.”

Mupfaro upi wamakagara nawo ngekuseenzera Djehovha?

Mats unobhuya kuti: Umwe we mupfaro watakagara nawo, ngewe kuwaka ushamwari wakanaka no mamisionariyo e nyika dzakawanda uye tsika. Kusiya izvona, mu mabasa manganani isusu takagara no mupfaro mukuru we kuiitisa fundo dzakawanda dze Bhaibheri—pamweni paya, umwe na umwe wedu waiitisa fundo dzinokwana 20! Uye inini andizokanganwi rudo uye kutambira arendo zvakanaka kunoita hama no hanzvadzi dzedu ku Africa. Pa nguwa yataivhakacira ungano dze ku Tanzânia, hama dzakawanda dzaititambira zvakanaka uye dzaitiitira zviro zvaidarika zviya “zvaainga anazvo.” (2 Ako. 8:3) Ngo muezaniso pataiimisa kwartu yedu, zvezvirokwazvo yainga iri karu yaizwi kombi ngekuti taikwanisa kuwatira imona. Pataiimisa nge pa dii pe nyumba pawo, nguwa dzese awona aigadzirira kuti tigare no zvese zvataida. Nguwa yaikosha maningi katiri inini na Ann ndipaya pataigara kumapeto ke zuwa kuti ticedze ngezve zviya zvaitika uye kuti titende Djehovha no rubetso rake.

Ann-Catrin unoti: Kandiri umwe we mupfaro nge we kuziya hama dze mu nyika yese. Isusu takafundira mireketero mipsva—dzinobatanidza Farsi, Francês, Luganda uye Suaíli—uye takaziyawo tsika dzipsva. Isusu takabetserawo afundi apsva kuti akure uye kuti abudirire pakunamata uyewo takagara no shamwari dzakanaka uye “takaseenza pamwepo nadzo” pakuseenzera Djehovha.—Zef. 3:9.

Mupfaro umweni ngewe kuona zviro zvakawanda zvakasiyana-siyana uye kurungama ke zvisikwa zva Djehovha. Pa basa ripsva rimwe nga rimwe kainga kutanga ke mupfaro, Djehovha ecititungamirira. Isusu takararama zviro mu basa ra Djehovha zvekuti tainga tisikazozvirarami kudai tainga tiri tega.

Zvinetso zvipi zvamakasongana nazvo uye makabatana kudini nazvo?

Mats unobhuya kuti: Pamakore ese adarika, isusu takabatana no matenda akasiyana-siyana e mu nharaunda iyona akaita hingana mararia. Uye Ann-Catrin waitodikanawo kuizwa maoperasau nokukasika. Isusuwo tainetsekawo ngezve abereki edu paainga ecicembera. Ndiyo ndaa, isusu tinotenda maningi hama dzedu dze kunyama dzaitibetsera pa kuacengeta. Awona akaita izvona no mwoyo unononoka kutsamwa, rudo uye no mupfaro. (1 Ti. 5:4) Taiita zviri zvese kuti tibetsere abereki edu kunyazi tainga tiri kure. Kunyazi zvakadaro, nguwa dzimweni taibatana no marangariro akashata hingana kutsukwara uye kudzipasa ndaa ngekuti taida kuaitira zvakawanda.

Ann-Catrin unoti: Muna 1983, ku Zaire inini ndakabathwa no khorera uye ndakarhwara maningi. Medhiko wakabvunza Mats kuti: “Imwimwi munodikana kubuda mu nyika ino nokukasika!” Pazuwa rakazoteera takaenda ku Suécia ngo ndeka yainga ino zviro—ndiyona yoga yaizokwanisa kutibetsera—kuti tibude mu nyikeyo.

Mats unobhuya kuti: Isusu tairangarira kuti wainga uri mugumo we basa redu hinga mamisionariyo ndiyo ndaa, takacema maningi. Asi kusiyana no zviya zvairangarirhwa na medhiko, Ann-Catrin wakagara arinani. Mumasure me gore rimwe, isusu takakwanisa kuhwirira ku Zaire, parizvino takaenda kooseenza ku ungano imweni doko ye mu reketero we Suaíli ku thaundi ro Lubumbashi.

Ann-Catrin unoti: Patainga tiri ku Lubumbashi inini ndakagara no pa mwiri, asi ndakazomuruza mwanewo. Kunyazi kugara no mwana cainga cisiripi cinangwa cedo, inini ndakatsukwara maningi nge kumuruza. Pamugariro iwona unoshupha Djehovha akatipasa cipo cataiga tisikakariri. Isusu takagara no afundi akawanda ekuti tainga tisati takambogara nawo. Mukati me gore rimwe, numero ye aparidzi yakatunhudzirika kubva pa 35 dakara pa 70 uye anhu aipinda musangano akatunhudzirikawo kubva pa 40 kuenda pa 220. Isusu taigara takabatikana maningi mu basa re kuparidzira uye makomborero awona a Djehovha akandinyaradza maningi. Asi dakara zvino isusu tiri kurangarira ka mwana kedu uye ticiri kucedza ngezvake. Tirikuetsera kuona mushobo ucarapa Djehovha cironda cedo mu mwoyo medu.

Mats unoti: Paapadarika nguwa, Ann-Catrin wakazwa asina simba uye wakaremba. Pa nguwa imwe-imweyo, inini ndakaziya kuti ndainga ndino kanseri uye ndaidikana kuizwa operasau. Asi nyamasi inini ndiri kuzwa zvakanaka uye Ann-Catrin uri kupeta masimba kuti aite zvaanokwanisa mu basa ra Djehovha.

Isusu takazwisisa kuti atisupi tega tiri kubatana no zvinetso. Mumasure me kuuraiwa ke anhu ku Ruanda muna 1994 isusu takavhakacira hama dzakawanda ku nharaunda ye atizi e hondo. Takaona no padhuze kutenda uye kushingirira kawo. Uyewo kutambira zvakanaka kaanoita arendo kunyazi mu nguwa dzinoshupha. Izvona zvakatipangidza kuti Djehovha ano simba kuti akhumbatire anhu ake kunyazi no cinetso cipi haco.—Pis. 55:22.

Ann-Catrin unoti: Cinetso cimweni cakaitika petakaenda koona kudimurhwa ke firiari ku Uganda muna 2007. Mumasure me urongwa uwona takaita rhwendo hinga cikwata uye tainga tiri mamisionarioyo anoda kukwana 25 uye Mabheterita teienda ku Nairóbi, ku Quênia. Tisati taguma pa fronteira ye ku Quênia, karu imweni yakaponda karu yedu. Motorista uye hama dzedu dzinokwana kuita 5 dzakatofa pa nguwa iyona uye hanzvadzi imweni yakazofa ku cipitari. Tiri kukarira maningi nguwa yaticazoona shamwari dzedu idzi.—Djobo 14:13-15.

No kuhamba ke nguwa, inini ndakazotamba. Asi inini na Mats uye anganani ainga ari mu karu iyona takazogara no zvinetso. Kandiri, izvona zvaindipatisa maningi co usiku uye zvaaita kuti ndimuke ndecizwa kuti mwoyo wangu urikurhwadza maningi. Zvaindipatisa maningi, asi kuita minamato unobva pasi pe mwoyo kuna Djehovha, kuerenga uye kurangarira matsamba andinonyasa kuda, zvaindibetsera maningi. Isusu takatambirawo rubetso re mamedhiko uye izvona zvakabetsera maningi. Nyamasi uno kunetseka kedu kaanani uye nguwa dzese tinokumbira kuna Djehovha kuti anyaradze aya ari kubatana no mugariro wakaezana.

Pamakapanganidza kuti imwimwi muri kubatana kudini no zvinetso izvona, imwimwi makabhuya kuti Djehovha akamuthwarai “hingana kuthwara mazanda.” Izvona zvinoda kureyei?

Mats unoti: Isusu tabhuya izvona nge ndaa ye cireu cimweni ku Suaíli cinoti: “Tumebebwa kama mayai mabichi.” Masoko aya anoturikirhwa kuti: “Isusu takathwarhwa hingana mazanda mambishi.” Kuita hingana munhu unothwara mazanda ecinyasa kuabatisisa kuti asaphwanyike, nge mushobo umwewo no unaki Djehovha ari kutitsigira pa basa rimwe na rimwe ratinopaswa. Nguwa dzese isusu tainga tino zvese zvataida. Kubhuya zvazviri kutodarika zviya zvataida. Umwe we mushobo wekuti isusu takazwa rudo uye kutsigirhwa na Djehovha ndi mushobo wainetseka uye cido cainga cino Dare Rinotungamirira katiri.

Ann-Catrin unoti: Inini ndaida kupanganidza nguwa imweni yekuti takazwa kucengethwa no rudo ra Djehovha. Zuwa rimweni ndakatambira shamadha yaibhuya kuti baba angu ainga ari ku Suécia ainga ari ku cipitari. Mats waibatanawo no mararia uye isusu tainga tisina mare yekuti tikhwire ndeka kuti tiende ikona. Hino takasanangura kutengesa karu yedu. Asi ipona takatambira shamadha mbiri. Imwe yakhona yainga iri ye kazado yainga yaziya zvataibatana nazvo uye yakasanangura kupagari pasaji yo munhu umwe kuti akhwire ndeka. Shamadha inweni yainga iri ye hanzvadzi imweni yacembera yaicengeta mare mu kabhokisi yekuti yakatarhwa kuti: “Ku munhu waizoda.” Pa nguwa doko basi Djehovha akagadzirisa zvese!—Aheb. 13:6.

Pamunonangira sure pa makore 50 ese aya muri mu nguwa yakadzara, zvinyi zvamakafundira?

Ann-Catrin unoti: Inini ndakafundira kuti “simba redu riri pa kugara takaterama uye kugonda Djehovha.” Patinogonda Djehovha iyena anoita kuti zvinetso zvedu zvigare zvake. (Isa. 30:15; 2 Mak. 20:15, 17) Ngekuti takapasa Djehovha zvakanakisisa zvedu pa base rese tataipaswa, isusu takatambira makomborero akawanda ekuti tainga sikikazogari nawo kudai takasanangura gwanza rimweni.

Mats unoti: Fundo rinokosha randakafunda ngere kugonda Djehovha pa mugariro upi hawo uye kuona kuti iyena unozviita kudini katiri. (Pis. 37:5) Djehovha nguwa dzese akandibetsera hingana zvaakapikira kamare. Uye tiri kuona dakara nyamasi mushobo uri kutitsigira Djehovha pa basa redu ro zvino ku Bheteri ro Mianmar.

Isusu tinoda kuti madjaha akawanda anoda kuitira Djehovha zvakawanda azwe rudo rimwero rakagonde ratakapangidzirhwa na Djehovha. Uye tino rugondo rokuti madjaha awona acazwa izvona kana akatendera kuti Djehovha aabetsere kuti akure paya paanonga asimwa.