Tinganamata Kudini kuna Djehovha Zvecibva Pasi pe Mwoyo?

1-2. (a) Ngei zvingatishuphira kufunungura mwoyo wedu kuna Djehovha? (b) Tinoziya kudini kuti Djehovha anonyasa kupurutana minamato yedu?

IMWIMWI munorangarira kuti minamato yenyu ngeye kuphinda-phinda, kana kuti munozwa kuti zvinoshupha kufunungura mwoyo wenyu kuna Djehovha pa munamato here? Hino imwimwi andimwipi mwenga. Nge ndaa yekuwandirhwa no zviro zvekuita pa zuwa, pamweni tino musambo we kuita munamato nokukasika zvingaita kuti tingarangarira kuti atisisiri kuita munamato. Ndiyo ndaa, atikwanisi kubvunza Djehovha ngezve mazwiro edu ngece mukati-kati uye marangariro edu.

² Bhaibheri rinotigondesa kuti zvinokosha kuna Djehovha akuseenzesapi masoko akarungama pa minamato yedu asi kureketa zvecibva pasi pe mwoyo. Iyena anozwa “zvikumbiro zve anatsi.” (Pis. 10:17) Djehovha anonyasa kuzwa soko rimwe na rimwe ratinoreketa ngokuti tinokosha maningi kaari.—Pis. 139:1-3.

3. Zvinyi zvaticaona mu fundo ino?

³ Mu fundo ino, ticaona mhinduro dze mibvunzo dzinoteera: Ngei tinganamata kuna Djehovha tisikathyi? Tingaita kudini minamato yecibva pasi pe mwoyo? Minamato yakatarhwa mu Bhaibheri ingatibetsera kudini kuita izvona? Zvinyi zvatinodikana kuita kana takatsukwara maningi uye tisikakwanisi kubhuya zviri mu mwoyo medu kuna Djehovha?

NAMATAI KUNA DJEHOVHA MUSIKATHYI

4. Cinyi cingatibetsera kuita minamato kuna Djehovha tisikathyi? (Pisarema 119:145)

⁴ Djehovha ishamwari yakagondeka uye inoda zvakatinakira. Patinozwisisa izvona, tinozwa takasudzunuka kumubvunza zvese zvatinorangarira uye zvatinozwa. Mutari we Pisarema 119 waipsvaka kugara no maonero iwona ngezva Djehovha. Upenyu wake wainga usikazi kukwana. Anhu akashata aireketa manyepo nge zvake. (Pis. 119:23, 69, 78) Kusiya izvona, mutari we Pisarema nguwa dzimweni waizwawo wakaora mwoyo nge ndaa ye zvishaishi zvake. (Pis. 119:5) Kunyazi zvakadaro, iyena wainga asikathyi kudurura mwoyo wake kuna Djehovha.—Erengai Pisarema 119:145.

5. Ngei atidikani kusiya kuti maonero edu asikazi kunaka nge zvedu kamare atiitise kuti tisaite munamato? (b) Bhuyai ngezve muezaniso unopangidza kuti atidikani kupsveruka kuita munamato.

⁵ Ngatisasiye kuti maonero akashata nge zvedu atiitise kuti tisaite minamato. Djehovha anopika kunyazi aya akaita zvitema zvakakura kuti anamate kaari. (Isa. 55:6, 7) Rangarirai ngezve muezaniso unoteera: Mutekenyi we ndeka unoziya kuti ungakwanisa kureketa no aya ari kumuonerera pese paanoda rubetso. Ngatiti iyena uri kupsveruka kukumbira rubetso ku aya ari kumuonerera ngokuti wapsveteka kana kuti waita ciro caainga asikadikani kuita. Imwimwi munorangarira kuti iyena unodikana kusiya kukumbira rubetso ku aya ari kumuonerera here? Haiwa! Ngo mushobo umwewo, kana tikazwa takapsveteka kana kuita cishaishi atidikani kuthya kudurura mwoyo wedu kuna Djehovha.—Pis. 119:25, 176.

CINYI CINGATIBETSERA KUFUNUNGURA MWOYO WEDU KUNA DJEHOVHA?

6-7. Cinyi cingatibetsera kuita munamato no mwoyo wese? Pasai muezaniso. (Onai masoko e pasi.)

⁶ Patinofunungura mwoyo wedu kuna Djehovha nge kumubvunza marangariro edu uye mazwiro edu e mukati-kati tinozwa tiri dhuze naye. Cinyi cingatibetsera kuita izvona?

⁷ Nyasai kurangarira ngezve mawara a Djehovha.a Patinonyasa kurangarira ngezve mawara a Djehovha, zvicatiitira nyore kumubvunza zvese zvatinorangarira uye zvatinozwa. (Pis. 145:8, 9, 18) Onai muezaniso wa Kristine, hanzvadzi imweni yekuti yainga ina baba ainga ano bvinga. Iyona inoti: “Kandiri, zvainga zvisiripi nyore kuona Djehovha hingana Baba uye kufunungura mwoyo wangu kaari. Inini ndairangarira kuti nge ndaa ye kusama kukwana kangu, Djehovha aizopedzesera andisiya.” I wara ripi ra Djehovha rakabetsera Kristine? Iyena unoti: “Rudo rakagondeka ra Djehovha rinondipasa rugondo rekuti iyena anondida. Inini ndinoziya kuti Djehovha aazosii nyara yangu. Kunyazi ndikambwera, iyena acandibata no rudo uye iyena acandibetsera kumuka. Kuziya izvona, kunondibetsera kuti ndirekete naye ngezve zviro zvinondipfadza uye kureketa ngezve zviro zvinonditsukwarisa.”

8-9. Maererano no muezaniso wa Aliska, ngei zvakanaka kutanga tarangarira zvaticareketa tisati taita munamato?

⁸ Rangarirai zvamucabhuya. Musati maita munamato imwimwi mungadzibvunzisa kuti: ‘Matambudziko api andiri kubatana nawo zvino? Kodi pari zvino ndinodikana kurekerera munhu here? Ndiri kubatana no muedzo mupsva uye ndinoda rubetso ra Djehovha kuti ndikwanise kuukunda here?’ (2 Mad. 19:15-19) Uyewo tingakwanisa kuteerera muezaniso watakasiirhwa na Djesu unocokuita no munamato. Pamunamato yedu tingakwanisa kureketa ngezve zina ra Djehovha, Umambo wake uye ngezve kuda kake.—Mat. 6:9, 10.

⁹ Hanzvadzi imweni inodainzwa kuti Aliska yakaona kuti mwamuna wayo wainga uno kanseri mu musoro inouraya. Pakutanga, zvainga zvisiripi nyore kuti aite munamato kuna Djehovha. Iyona inoti: “Inini ndakanetseka maningi zvekuti ndainga ndisikakwanisi kurangarira zvakanaka zvekubhuya.” Cinyi cinosobetsera Aliska? Iyena unopanganidza kuti: “Ndisati ndaita munamato, inini ndinopsvaka cimukana kuti ndigadzirise marangariro angu, uye izvona zvinondibetsera kuti ndisagare ndecireketa nge zvangu basi uye ngezve nhenda ye mwamuna wangu. Izvi zvinondibetsera kuti ndigare ndakaterama uye ndigare ndisikanetseki mu ndangariro pandinoita munamato.”

10. Ngei zvakanaka kuita munamato tisikagogomeki? (Onaiwo mafoto.)

¹⁰ Musaite munamato mecigogomeka. Izvirokwazvo kuti munamato yakadodoka ingabva pasi pe mwoyo. Asi patinoita minamato tisikagogomeki, tingakwanisa kudurura zvese zvatinozwa uye zvatinorangarira.b Elijah, mwamuna wa Aliska, unopanganidza kuti: “Inini ndinoedza kuita minamato kakawanda pa zuwa, uye pandinodusa nguwa kuti ndiite minamato yakareba, ndinoona kuti ushamwari wangu na Djehovha unonyasa kubamba. Djehovha aaetseri kuti ndikasike kupedza munamato wangu. Hino, ndingakwanisa kureketa ke nguwa yakareba.” Edzai zvinoteera: Psvakai nguwa uye mbuto yamungaita munamato musikabviringidziki, pamweni mungatoita no izwi rinozika, uye garai no musambo we kuita munamato musikagogomeki.

NYASAI KURANGARIRA NGEZVE MINAMATO YAKADZIKA YAKATARHWA MU BHAIBHERI

11. Ngei zvakanaka kunyasa kurangarira ngezve minamato yakadzika yatinogumira mu Bhaibheri? (Onai bhokisi rakazwi “Mazwiro Enyu Akaezana no Mazwiro Awo Here?”)

¹¹ Ciro cinotibetsera i kunyasa kurangarira minamato yakadzika uye ngoma kana kuti mapisarema atinogumira mu Bhaibheri. Kuona kuti aseenzi a Mwari e kare akadurura kudini marangariro awo akadzika zvinotibetsera kuti tifunungure mwoyo yedu kuna Djehovha. Kuona masoko aakaseenzesa kuti akudze Djehovha zvingatibetsera kugumira masoko ekuti tingaaseenzesa pa minamato yedu. Uye pamweni mungagumira minamato ye aseenzi a Djehovha ekuti akabatana no migariro yakaezana no yenyu.

12. Mibvunzo dzipi dzatingarangarira patinonga tecinyasa kurangarira ngezve munamato uri mu Bhaibheri?

¹² Pamunoerenga munamato wakatarhwa mu Bhaibheri, rangarirai zvinoteera: ‘Ndiani wakaita munamato uu uye cinyi caiitika mu upenyu wake? Mazwiro ake akaezana no angu here? Zvinyi zvandingafunda no munamato uwona?’ Pamweni zvinoda kunyasa kupsvakisisa kuti mudaire mibvunzo idzi, asi kupeta masimba kucabetsera. Ngatione miezaniso minganani.

13. Tingafundei no munamato wakaizwa na Ana? (1 Samueri 1:10, 11) (Onaiwo pa kapa.)

¹³ Erengai 1 Samueri 1:10, 11. Ana paiita munamato, iyena waibatana no zvinetso zviiri zvakakura. Iyena wainga asikabari uye mukadzi umweni we mwamuna wake wainga asikamusii mu runyararo. (1 Sam. 1:4-7) Asi Ana wakanamata asikagogomeki uye wakafunungura mwoyo wake kuna Djehovha. Ngokudaro, iyena wakazwa wakarerukirhwa. (1 Sam. 1:12, 18) Kana mecibatana no cinetso cekuti ciri kurumbwa cecimudusirai runyararo, zvinyi zvamafunda no munamato wa Ana? “Patinokhandira mitoro yedu kuna Djehovha” tecimubvunza zvinetso zvedu zvese uye mazwiro edu tinozwawo takarerukirhwa.—Pis. 55:22.

14. (a) Zviro zvipi zvimweni zvatingafunda no muezaniso wa Ana? (b) Cinyi cinopangidza kuti kunyasa kurangarira ngezve ngano dze Bhaibheri zvingakwanisa kuita kuti minamato yedu igare yakanyasa kunaka? (Onai masoko e pasi.)

¹⁴ Ana wakazogara no mwana unozwi Samueri. Makore manganani mumasure mekuti mwanewo wakura, Ana wakamuendesa kuno Mupristi Mukuru Eri. (1 Sam. 1:24-28) Ecinamata no mwoyo wese iyena wakatenda Djehovha nge kudziirira aseenzi ake akagondeka uye kuacengeta.c (1 Sam. 2:1, 8, 9) Zvinetso zva Ana azvizi kupera asi iyena wakakanda ndangariro dzake pa makomborero aainga apaswa na Djehovha. Zvinyi zvatingafunda? Isusu ticakwanisa kushingirira patinonga tecibatana no zvinetso kana tikakanda ndangariro dzedu pa zviya zvakaizwa na Djehovha uye pa zviya zvaari kurumbwa eciita kuti atitsigire.

15. Cinyi catingafunda no munamato wakaizwa no muphorofita Djeremiya? (Djeremiya 12:1)

¹⁵ Erengai Djeremiya 12:1. Pamugariro umweni we upenyu wake, muphorofita Djeremiya wakaora mwoyo nge kuona kuti anhu akawanda ainga eciita zviro zvakashata, aiita hingana kuti ainga ano upenyu wakanaka uye unopfadza. Iyenawo wakatsukwara maningi nge kubathwa zvakashata no hama dzake Aisraeri. (Djer. 20:7, 8) Asikapumhi Mwari kuti ainga asina unatsi, Djeremiya wakabvunza Djehovha mazwiro ake ese. Paapadarika nguwa, Djeremiya wakaona kuti Djehovha akaphanica kudini Aisraeri aya ekuti ainga apanduka, izvona zvingaita kuti zvakatunhudzira rugondo rake pa unatsi wa Mwari. (Djer. 32:19) Isusuwo patinoona anhu asikazi kutendeka ecibudirira kana kuti paya patino psverudzwa, tingakwanisa kugara no mazwiro hinga ainga ana Djeremiya. Asi kuita hingana Djeremiya, tingareketa no mwoyo wakafununguka kuna Djehovha ngezve zviya zvatiri kuzwa tecigonda kuti pa nguwa yakasisira Djehovha acagadzirisa zvese zvisina unatsi zvinoitika mu upenyu medu.

16. Cinyi catingafunda no munamato wakaizwa no Murevhi wekuti wainga asikakwanisi kunamata mu tempro? (Pisarema 42:1-4) (Onaiwo mifanikiso.)

¹⁶ Erengai Pisarema 42:1-4. Pisarema ii yakatarhwa no Murevhi wekuti mugariro wake wainga usikabviri kuti iyena anamate mu tempro no Aisraeri amweni. Masoko ake, anopangidza mushobo waaizwa. Kana tikasungwa nge ndaa ye kutenda kedu kana kuti tino nhenda inotiitisa kuti tisabude pa nyumba pamweni tingazwa hinga Murevhi uya. Kunyazi mazwiro edu asiripi pa mbuto zvinokosha maningi kuti tibvunze Djehovha mushobo watiri kuzwa. Izvona zvingatibetsera kuti tizwisise zvakanaka mazwiro edu uye kuona zviro nge mushobo umweni. Ngo muezaniso, murevhi wakazwisisa kuti iyena wainga uno mikana imweni yekuti anamate Djehovha. (Pis. 42:5) Iyena wakadusawo nguwa kuti arangarire mushobo waainga ecibetserhwa na Djehovha. (Pis. 42:8) Kunamata no mwoyo wese kuna Djehovha kunotibetsera kunyasa kuzwisisa mazwiro edu, kugara no maonero ari pakati no pakati uye kugara no simba kuti tikwanise kubudirira.

17. (a) Tingafundei kubva pa munamato wakaizwa no muphorofita Djona? (Djona 2:1, 2) (b) Ngei zvakanaka kuiga matsamba manganani e Bhaibheri mu musoro hingana ari muma Pisarema? (Onai masoko e pasi.)

¹⁷ Erengai Djona 2:1, 2. Muphorofita Djona wakaita munamato uu paainga ari mundani me howe yakakura maningi. Iyena wainga asikazi kuzwira Djehovha. Kunyazi zvakadaro wainga ano rugondo rekuti Djehovha aizomupurutana. Pamunamato wake, Djona wakaseenzesa masoko akawanda atinogumira pana Pisarema.d Izvona zvinopangidza kuti iyena wainyasa kuziya masoko awona. Kunyasa kurangarira ngezve masoko awona kakamupasa rugondo rekuti Djehovha aizomubetsera. Ngo mushobo umwewo, zvakanaka maningi kuiga mu musoro matsamba manganani e Bhaibheri. Nge kudaro, patinoita minamato pamigariro inoshupha, tingakwanisa kuaedzurira uye kunyaradzwa nawo.

RUMBWAI MECIITA MINAMATO INOMUKHWEDEDZAI DHUZE NA DJEHOVHA

18-19. Aroma 8:26, 27 inotipasa gondeso rei? Pasai muezaniso.

¹⁸ Erengai Aroma 8:26, 27. Nguwa dzimweni, tinganetseka maningi zvekuti tingakonerhwa kupanganidzira Djehovha zviya zvatiri kuzwa. Asi tingagonda rubetso rakakura maningi. Pamugariro uwona mwiya mucena wa Mwari “unotikumbirira.” Izvona zvingaitika kudini? Djehovha akaseenzesa mwiya wake mucena kuti atari e Bhaibheri atare minamato yakawanda. Kana tikakonerhwa kureketa nge mushobo wakadjeka zviya zvatinonga tecirangarira pa minamato yedu, Djehovha anokwanisa kuona minamato minganani yakatarhwa mu Soko rake hingana zvikumbiro zvedu kaari. Uye iyena angakwanisa kudaira minamato iwona hingana yedu kamare.

¹⁹ Kuziya izvona kakabetsera hanzvadzi imweni yeku Rússia inodainzwa kuti Yelena. Iyona yakasungwa nge ndaa ye kuita munamato uye kuerenga Bhaibheri. Yelena wakatsukwara maningi zvekuti wakarangarira kuti zvaimushuphira maningi kuita munamato. Iyena unoti: “Inini pandinozwa kuremerhwa uye ndokonerhwa ce kukumbira pa munamato, Djehovha anokwanisa kutendera minamato ye aseenzi ake e kare hingana minamato yangu. Izvona zvakandinyaradza maningi pa mugariro uwona unoshupha.”

20. Paya patinonga tecinetseka, tingagadzirira kudini ndangariro dzedu kuti tiite munamato?

²⁰ Patinonga tecinetseka uye toita munamato, tingakonerhwa kunyasa kurangarira uye totama kuziya zvekureketa pa munamato. Kuti tinyase kugadzirira ndangariro dzedu tingapurutana maaudhiyo manganani e Mapisarema. Kuita hingana Dhavhidhi tingaedza kutara zviya zvatiri kuzwa. (Pis. 18, 34, 142; misoro.) Cokwadi ngece kuti akuna mishobo yakanyasa kunanga yekuti tingagadzirira kudini kuti tiite minamato. (Pis. 141:2) Hino, edzai kuona kuti zvinyi zvakanaka kamuri.

21. Ngei tingaita munamato kuna Djehovha no mwoyo wese?

²¹ Zvinonyaradza kuziya kuti Djehovha anozwisisa mazwiro edu kunyazi tisati tamupanganidzira mushobo watiri kuzwa. (Pis. 139:4) Kunyazi zvakadaro, iyena anopfara maningi nge kupurutana patinoita munamato tecipangidza rugondo kaari. Hino, musathye kuita munamato kuna Baba enyu e kudenga. Seenzesai minamato iri mu Bhaibheri hingana muezaniso. Itai munamato no mwoyo wese. Mupanganidzirei zviro zvese zvinomupfadzai uye zvinomutsukwarisai. Djehovha ishamwari yakanyasa kunaka kamuri; iyena nguwa dzese acagara ku dii renyu!