Levitiko

14 Paraparau noa maira Iehova ia Mose, a na ô ai: 2 “Teie te ture no te taata lepera i te mahana tamâraa ia ˈna, te mahana e arataihia ˈi oia i te tahuˈa ra.+ 3 E haere te tahuˈa i rapaeau i te puhapa e e hiˈopoa oia ia ˈna. Mai te peu e ua ora te lepera o taua taata ra, 4 e faaue te tahuˈa ia ˈna ia hopoi mai e piti manu ora viivii ore, te raau arezi, te ahu uteute, e te hisopa no te tamâraa ia ˈna.+ 5 E faaue te tahuˈa ia haapohehia hoê manu i roto i te hoê farii araea e pape maaro to roto. 6 Tera râ, e rave oia i te manu ora e te raau arezi, te ahu uteute e te hisopa, a tutau pauroa ˈtu ai i roto i te toto o te manu tei haapohehia i nia ˈˈe i te pape maaro. 7 I muri iho, e pîpî oia i te reira e hitu taime i nia i te taata e tamâ ra ia ˈna i te lepera, a faaite atu ai mea viivii ore oia, e e tuu oia i te manu ora ia maurere.+

8 “E horoi te taata e tamâ ra ia ˈna i to ˈna mau ahu, e hahu pauroa to ˈna tino e e hopu oia i te pape, a vai viivii ore atu ai. I muri iho oia e nehenehe ai e haere mai i roto i te puhapa. Tera râ e faaea oia i rapae i to ˈna fare ie e hitu mahana. 9 I te hitu o te mahana, e hahu oia pauroa to ˈna upoo, i to ˈna taa e to ˈna na tue mata. I muri iho oia i te hahuraa pauroa to ˈna tino, e horoi oia i to ˈna mau ahu e e hopu oia i te pape, a vai viivii ore atu ai.

10 “I te vaˈu o te mahana, e rave oia e piti mamoe oni apî oraora maitai, hoê fanauˈa mamoe ufa oraora maitai+ aita â i hoê matahiti, e toru tuhaa i nia ahuru o te hoê epha* faraoa ota oro-maitai-hia anoihia e te hinu ei tusia huero maa,+ e hoê loga* hinu.+ 11 Na te tahuˈa, o te faaite mea viivii ore te taata e tamâ ra ia ˈna, e hopoi ia ˈna e ta ˈna mau tusia i mua ia Iehova i te tomoraa o te tiahapa o te amuiraa. 12 E rave te tahuˈa i te hoê mamoe oni apî, a pûpû atu ai ei tusia no te hapa,+ oia atoa te loga hinu, e e taueue oia i te reira ei tusia taueuehia i mua ia Iehova.+ 13 I muri iho, e tupai oia i te mamoe oni apî i te vahi e tupaihia ˈi te tusia no te hara e te tusia taauahi,+ i roto i te hoê vahi moˈa, no te mea, mai te tusia no te hara, na te tahuˈa te tusia no te hapa.+ Mea moˈa roa te reira.+

14 “I muri iho, e rave te tahuˈa maa toto o te tusia no te hapa, e e parai te tahuˈa i te reira i nia iho i te hiti o te tariˈa atau o te taata e tamâ ra ia ˈna, e i nia iho i to ˈna manimani rima rahi atau e i nia i to ˈna manimani avae rahi atau. 15 E rave te tahuˈa maa vahi o te loga hinu,+ a ninii atu ai i roto i to ˈna apu rima aui. 16 E tutau te tahuˈa i muri iho i to ˈna manimani rima atau i roto i te hinu e vai ra i roto i to ˈna apu rima aui, a pîpî atu ai maa hinu i to ˈna manimani rima e hitu taime i mua ia Iehova. 17 I muri iho, e parai te tahuˈa maa vahi o te hinu e toe ra i roto i to ˈna apu rima i nia iho i te hiti o te tariˈa atau o te taata e tamâ ra ia ˈna, e i nia iho i to ˈna manimani rima rahi atau e i nia i to ˈna manimani avae rahi atau na nia iho i te toto o te tusia no te hapa. 18 E tuu te tahuˈa i te hinu e toe ra i roto i to ˈna apu rima i nia iho i te upoo o te taata e tamâ ra ia ˈna, e e pûpû te tahuˈa i te faahauraa no ˈna i mua ia Iehova.+

19 “E pûpû te tahuˈa i te tusia no te hara+ e e pûpû oia i te faahauraa no te taata e tamâ ra ia ˈna i to ˈna viivii, e i muri iho oia e tupai ai i te tusia taauahi. 20 E pûpû te tahuˈa i te tusia taauahi e te tusia huero maa+ i nia i te fata, e e pûpû te tahuˈa i te faahauraa no ˈna,+ a vai viivii ore atu ai oia.+

21 “Tera râ, mai te peu e mea veve o ˈna, e ere i te mea navai, e rave ïa oia i te hoê mamoe oni apî ei tusia no te hapa no te hoê tusia taueuehia, no te pûpû i te faahauraa no ˈna, e hoê tuhaa i nia ahuru o te hoê epha* faraoa ota oro-maitai-hia anoihia e te hinu ei tusia huero maa, hoê loga hinu 22 e e piti uupa aore ra e piti uuairao apî, ia au i te pee ia ˈna. No te tusia no te hara te tahi, e no te tusia taauahi te tahi atu.+ 23 I te vaˈu o te mahana,+ e hopoi mai oia i te reira no te tamâraa ia ˈna i te tahuˈa ra i te tomoraa o te tiahapa o te amuiraa i mua ia Iehova.+

24 “E rave te tahuˈa i te mamoe oni apî o te tusia no te hapa+ e te loga hinu, e e taueue te tahuˈa i te reira ei tusia taueuehia i mua ia Iehova.+ 25 E tupai oia i muri iho i te mamoe oni apî o te tusia no te hapa, e e rave te tahuˈa maa toto o te tusia no te hapa, a parai atu ai i nia iho i te hiti o te tariˈa atau o te taata e tamâ ra ia ˈna, e i nia iho i to ˈna manimani rima rahi atau e i nia i to ˈna manimani avae rahi atau.+ 26 E ninii te tahuˈa maa hinu i roto i to ˈna apu rima aui,+ 27 e e pîpî oia maa vahi o te hinu e vai ra i roto i to ˈna apu rima aui i to ˈna manimani rima atau e hitu taime i mua ia Iehova. 28 E e parai te tahuˈa maa vahi o te hinu e vai ra i roto i to ˈna apu rima i nia iho i te hiti o te tariˈa atau o te taata e tamâ ra ia ˈna, e i nia iho i to ˈna manimani rima rahi atau e i nia i to ˈna manimani avae rahi atau i reira atoa to ˈna parairaa i te toto o te tusia no te hapa. 29 E tuu te tahuˈa i te hinu e toe ra i roto i to ˈna apu rima i nia iho i te upoo o te taata e tamâ ra ia ˈna, no te pûpû i te faahauraa no ˈna i mua ia Iehova.

30 “E pûpû oia hoê o na uupa aore ra hoê o na uuairao apî, ia au i te pee ia ˈna,+ 31 ta ˈna e nehenehe e hoo mai, hoê ei tusia no te hara e te tahi atu ei tusia taauahi,+ e te tusia huero maa, e e pûpû te tahuˈa i mua ia Iehova i te faahauraa no te taata e tamâ ra ia ˈna.+

32 “Tera te ture no te taata i leperahia na, e ere râ i te mea navai i te mahana tamâraa ia ˈna.”

33 Na ô maira Iehova ia Mose e ia Aarona: 34 “Ia tomo outou i te fenua o Kanaana,+ ta ˈu e horoa ˈtu ei fenua no outou,+ e ia haaviivii au i te hoê fare i to outou fenua i te maˈi lepera,+ 35 e haere mai te taata no ˈna tera fare e parau i te tahuˈa: ‘Ua faura mai te tahi viivii i roto i to ˈu fare.’ 36 E horoa te tahuˈa i te tahi mau faaueraa ia tatarahia te mau taihaa i roto i te fare hou oia a haere mai ai e hiˈopoa i te viivii, ia ore hoi oia e faaite e mea viivii pauroa te taihaa i roto i te fare, e i muri iho i te reira e tomo ai te tahuˈa i roto no te hiˈopoa i te fare. 37 E hiˈopoa oia i te vahi tei viivii, e mai te peu e apoopoo matie marearea aore ra mauteute to nia iho i te mau pǎpai o te fare, 38 e haere ïa te tahuˈa i rapaeau i te fare i te uputa o te fare, a opani atu ai i te fare e hitu mahana.+

39 “E hoˈi mai te tahuˈa i te hitu o te mahana e e hiˈopoa oia i te fare. Mai te peu e ua parare te viivii na nia i te mau pǎpai o te fare, 40 e horoa ïa te tahuˈa i te tahi mau faaueraa, e tatarahia te mau ofai viivii e e faaruehia i rapaeau i te oire i te hoê vahi viivii. 41 I muri iho, e faaue oia ia paraˈu-maitai-hia te tapiri araea i nia i te mau pǎpai i roto i te fare e e faaruehia te reira i rapaeau i te oire i te hoê vahi viivii. 42 E tuuhia te tahi atu mau ofai i te mau vahi ua tatarahia te ofai, e faaohipa oia i te tahi atu tapiri araea e e faaue oia ia pǎtehia te fare.

43 “Mai te peu râ e hoˈi faahou mai te viivii, a faura mai ai i roto i te fare i muri iho i te tatararaahia te mau ofai e te paraˈuraahia e te pǎteraahia te fare, 44 e tomo ïa te tahuˈa i roto e e hiˈopoa oia i te reira. Mai te peu e ua parare te viivii na roto i te fare, e lepera ino mau ïa+ i roto i te fare. Mea viivii te fare. 45 E faaue oia ia vavahihia te fare, to ˈna mau ofai, to ˈna mau raau, e pauroa te tapiri araea o te fare, e ia hopoihia te reira i rapaeau i te oire i te hoê vahi viivii.+ 46 Te taata râ e tomo i roto i te fare i te mau mahana ua opanihia te reira,+ e viivii oia e ahiahi noa ˈtu.+ 47 Te taata o te taoto i roto i te fare, e horoi oia i to ˈna mau ahu, e te taata o te tamaa i roto i te fare, e horoi oia i to ˈna mau ahu.

48 “Ia haere mai râ te tahuˈa, a ite atu ai e aita te viivii i parare na roto i te fare i muri iho i te pǎte-faahou-raahia te fare, e faaite ïa te tahuˈa mea viivii ore te fare, no te mea ua ore te viivii. 49 No te tamâ i te fare i te viivii,* e rave oia e piti manu, te raau arezi, te ahu uteute, e te hisopa.+ 50 E haapohe oia hoê manu i roto i te hoê farii araea e pape maaro to roto. 51 I muri iho, e rave oia i te raau arezi, te hisopa, te ahu uteute, e te manu ora, a tutau atu ai i roto i te toto o te manu tei haapohehia, e i roto i te pape maaro e e pîpî oia i te reira i te fare e hitu taime.+ 52 E e tamâ oia i te fare i te viivii* i te toto o te manu, te pape maaro, te manu ora, te raau arezi, te hisopa, e te ahu uteute. 53 E tuu oia i muri iho i te manu ora ia maurere i rapae i te oire, e e pûpû oia i te faahauraa no te fare, a vai viivii ore atu ai te reira.

54 “Tera te ture no te mau maˈi lepera atoa, te maˈi o te iri o te upoo aore ra te huruhuru taa,+ 55 te lepera o te ahu+ aore ra o te fare,+ 56 e no te mau puu, una e pata,+ 57 no te faaoti eaha te tupuraa mea viivii ai te tahi mea e eaha te tupuraa mea viivii ore ai te reira.+ Tera te ture no te lepera.”+