Deuteronomi

24 “Ia faaipoipo te tahi tane i te hoê vahine, aita râ oia i mauruuru ia ˈna no te mea ua itea mai ia ˈna te tahi mea au ore no nia ia ˈna, e papai ïa oia i te tahi parau faataaraa no taua vahine ra,+ e horoa ˈtu oia i te reira ia ˈna a tuu atu ai ia ˈna i rapae i to ˈna fare.+ 2 Ua faarue anaˈe te vahine i to ˈna fare, e nehenehe oia e haere e e riro ei vahine faaipoipo na te tahi atu tane.+ 3 Ia hae* te piti o te tane ia ˈna e ia papai oia i te tahi parau faataaraa no ˈna, ia horoa ˈtu oia i te reira ia ˈna a tuu atu ai ia ˈna i rapae i to ˈna fare, aore ra ia pohe te piti o te tane tei faaipoipo ia ˈna, 4 eita ta ˈna tane matamua tei tuu ia ˈna e faatiahia ia rave faahou ia ˈna ei vahine faaipoipo na ˈna i muri iho i to ˈna haaviiviiraahia, mea faufau hoi na Iehova te reira. Eiaha oe e hopoi mai i te hara i te fenua ta Iehova to Atua e horoa nei ei tuhaa na oe.

5 “Mai te peu no faaipoipo noa ˈtura hoê tane, eiaha oia ia tavini i roto i te nuu aore ra ia horoahia te tahi atu mau hopoia. Eiaha ei hopoia ta ˈna hoê matahiti, e faaea oia i te fare e e faaoaoa oia i ta ˈna vahine faaipoipo.+

6 “Eiaha hoê taata e haru i te taviri huero maa aore ra to nia iho ofai oro ei piri taoˈa no te hoê tarahu,+ hoê â huru te reira i te raveraa i te imiraa a* te tahi ei piri.

7 “Ia itehia e ua haru hoê taata i te tahi o to ˈna taeae ati Iseraela e ua rave ino ia ˈna a hoo atu ai ia ˈna,+ e pohe ïa te taata haru.+ E iriti ê oe i te mea ino mai rotopu ia outou.+

8 “Ia parare te maˈi lepera,* a haapao maitai ia rave i te mau mea atoa ta te mau tahuˈa ati Levi e faaue ia oe.+ A haapao maitai ia rave maite i ta ˈu i faaue ia ratou. 9 A haamanaˈo i ta Iehova to Atua i rave ia Miriama a haere ai outou i to outou tere i rapae i Aiphiti.+

10 “Ia tarahu mai to taata tupu ia oe i te tahi mea,+ eiaha oe e tomo i roto i to ˈna fare no te haru ia ˈna ra i ta ˈna i pûpû ei piri taoˈa. 11 E tia oe i rapae, e na te taata tarahu e hopoi mai i rapae i ta ˈna e horoa ei piri taoˈa. 12 E mai te peu e taata veve oia, eiaha oe e haere e taoto e tei ia oe noa ra ta ˈna i horoa mai ei piri taoˈa.+ 13 Ia imi oe i te mau ravea atoa no te faahoˈi ia ˈna i ta ˈna i horoa mai ei piri taoˈa i te toparaa iho â te mahana, e e haere oia e taoto ma to ˈna ahu,+ e e haamaitai oia ia oe. E riro te reira ei parau-tia na oe i mua ia Iehova to Atua.

14 “Eiaha oe e taviri i te taata veve o te ere ra, ta oe i tarahu ei rave ohipa, e taeae anei no oe aore ra e taata ê e noho ra i to fenua, i roto i to mau oire.*+ 15 E horoa oe i ta ˈna moni ohipa i tera iho â mahana,+ hou te toparaa mahana, no te mea mea veve oia e tei ta ˈna moni ohipa ra to ˈna ora. Ia ore anaˈe, e tiaoro oia ia Iehova ma te faahapa ia oe, a hara ˈtu ai oe.+

16 “Eiaha te mau metua tane e haapohehia no tei ravehia e ta ratou mau tamarii, e eiaha te mau tamarii e haapohehia no tei ravehia e to ratou mau metua tane.+ E haapohehia te taata no ta ˈna iho hara.+

17 “Eiaha e faahuru ê i te haavaraa a te taata ê e noho ra i ǒ oe aore ra te tamarii aita e metua tane,*+ e eiaha e rave i te ahu o te tahi vahine ivi ei piri taoˈa no te tahi tarahu.+ 18 A haamanaˈo e i riro na oe ei tîtî i Aiphiti, e ua hoo mai Iehova to Atua ia oe mai reira mai.+ No reira vau e faaue ai ia oe ia na reira.

19 “Ia ooti oe i te maa auhune o ta oe faaapu, e ua moˈe ia oe te tahi ruru huero maa i roto i te faaapu, eiaha e hoˈi a tii. E vaiihohia te reira no te taata ěê e noho ra i ǒ oe, te tamarii aita e metua tane, e te vahine ivi,+ ia haamaitai Iehova to Atua ia oe i roto i te mau ohipa atoa ta oe e rave.+

20 “Ia ueue oe i ta oe tumu olive, eiaha oe e na reira i to ˈna mau amaa. E vaiihohia te toe ra na te taata ê e noho ra i ǒ oe, te tamarii aita e metua tane e te vahine ivi.+

21 “Ia haaputu oe i te vine o ta oe faaapu vine, eiaha e hoˈi e haaputu i te toe ra. E vaiihohia te reira na te taata ê e noho ra i ǒ oe, te tamarii aita e metua tane e te vahine ivi. 22 A haamanaˈo e i riro na oe ei tîtî i te fenua o Aiphiti. No reira vau e faaue ai ia oe ia na reira.