Ioba
TE OTO NEI IOBA I TO ˈNA MANA RAHI E TE TURA I MUTAAIHORA.
29 Ua tamau noa ˈtura Ioba i taua parabole na ˈna ra, na ô atura,
2 Ahiri vau i teie nei mai tei na marama i mairi aˈenei e! mai tei te mau mahana i tiai mai ai te Atua ia ˈu nei e; 3 a anaana mai ai tana lamepa i nia ˈˈe i tau upoo, e no te maramarama o te reira i tae ai au na roto i te pouri! 4 E mai tei te mau mahana o to ˈu apîraa a vai maite ai te aˈo a te Atua i roto i tau tiahapa ra; 5 a au mai ai te Puaihope ia ˈu nei, e ua haaati mai tau mau tamarii ra ia ˈu, 6 a horoi ai au i tau avae i te û, e ua manii hua mai te hinu no ˈu no roto i te mato ra. 7 Ia ˈu i haere i te uputa na roto i te oire ra, e ua faanahonaho i tau parahiraa i te aroâ ra; 8 ua hiˈo mai te mau taata apî ia ˈu, e ua tapuni; e te feia paari ra, ua tia noa maira ïa i nia; 9 ua mamu hoi te mau tavana aore i parau; e ua tapoˈi i to ratou vaha i te rima. 10 Ua tapea noa te feia rarahi i to ratou reo; e piri noa ˈtura to ratou arero i te vaha. 11 Tei te faarooraa mai te tariˈa ra, ua haamaitai maira; tei te hiˈoraa mai te mata ra, ua tamau maite maira i te hiˈo: 12 ua faaora hoi au i te taata rii ia tiaoro mai; te otare hoi, e te taata tauturu ore ra. 13 Te faaora a te taata i fatata i te pohe tei iri mai i nia ia ˈu; e ua pii noa te aau o te vahine ivi ra ia ˈu i te oaoa. 14 Ua ahu vau i te parau-tia, e ua ati aˈera vau; e ua riro ta ˈu parau mai te ahu pu ra e te korona. 15 Ua riro vau ei mata no te matapo, e ei avae au no te pirioi. 16 Ei metua vau no te taata i roohia e te ati; e te parau aore i itea e au ra, ua imihia ïa e au. 17 Ua ofati au i te niho rahi o te taata ino, e ua haruhia mai e au te taoˈa i riro i tana niho. 18 I parau ai au e, Ei roto i to ˈu nei ofaaraa e pohe ai au; e riro o ˈu pue mahana mai te one ia taio. 19 Ua toro roa to ˈu ra aa e ua tae i te pape, e ua iri mai te hau i nia i tau mau amaa e ao noa ˈˈe te po. 20 Ua faaapîhia mai tau hinuhinu ia ˈu nei, e te vai etaeta ra tau fana i tau rima.
21 Ua faaroo mai ratou ia ˈu, e ua haapao; e ua mamu ia aˈohia ˈtu e au ra. 22 Ia oti ta ˈu parau; aore ratou i parau mai; ua roohia hoi ratou e taua parau na ˈu ra. 23 Ua tiai mai ratou ia ˈu mai te tiai ûa ra; e ua hamǎmǎ i to ratou vaha mai tei tiai i te ûa auhune ra. 24 Ia atahia ˈtu ratou e au ra, aore ïa i onoono mai; aore i faarue i te maramarama o tau mata. 25 Ua faaite au i to ratou eˈa, e o vau tei rahi; ua parahi au mai te arii i roto i to ˈna taata; e mai te taata i haamahanahana i te feia i roohia e te ati ra.