Kolosa

TE AˈO NEI PAULO IA RATOU IA TAMAU MAITE Â I TE PARAU, E IA ARA I TE HAAVARE.

2 Te hinaaro nei hoi au ia ite outou e ati rahi to ˈu ia outou, e to Laodikea, e te feia atoa aore i ite ia ˈu i tau tino nei; 2 ia mahanahana to ratou aau, i te au-tahi-maite-raa i te aroha, e ia noaa te ite rahi papu roa ra, ia farii maite i te parau aro a te Atua Metua e ta te Mesia ra hoi; 3 o tei vaiiho-paatoa-hia te taoˈa ra o te paari e te ite i roto ia ˈna ra. 4 O te haavare mai te hoê taata ˈtu ia outou i te parau taparu, i na reira ˈtu ai au. 5 Taa ê noa mai â tau tino nei, tei o outou â tau varua, i te oaoaraa i te hiˈoraa ˈtu i ta outou haapao maitai, e te papu o to outou faaroo i te Mesia ra. 6 E tena na, ua farii outou i te Fatu i te Mesia ra ia Iesu, e haapao â outou i ta ˈna; 7 ia aahia i roto ia ˈna, e ia patuhia i nia iho ia ˈna, e ia papu outou i te parau faaroo, mai tei haapiihia ˈtu ia outou na, e ia rahi atu te reira ma te haamaitai. 8 E ara o te riro noa ˈtu outou i te parau paari e te haavare faufaa ore a te hoê taata ˈtu, i te parau tutuu a te taata nei, mai te â rii a teie nei ao ra, aore i au i ta te Mesia ra. 9 Tei roto hoi ia ˈna te î atoa a te Atua i te parahi-mau-raa; 10 e ua nehenehe roa outou i roto ia ˈna, o tei hau ïa i nia i te feia mana e te feia hau atoa ra: 11 oia hoi i peritomehia ˈi outou i te peritome rave-ore-hia e te rima ra, i te tino o te ino o te taata nei i haapaehia i te peritome a te Mesia ra: 12 i tanu-atoa-hia outou e oia atoa i te bapetizoraa ra, e i faatia-atoa-hia hoi i reira i te faaroo i te ravea puai rahi a te Atua, o tei faatia mai ia ˈna mai te pohe maira. 13 E o outou hoi, o tei pohe i ta outou hara, e te peritome ore o to outou tino, tei faaora-atoa-hia e ana e oia atoa, ua oti hoi i te faaorehia ta outou mau hara atoa; 14 ua paraihia hoi te ture i papaihia no tatou ra, e to ˈna atoa ra mau oroa au ore ia tatou, e ua hopoi-ê-hia ïa, oia i patiti i te reira i nia i tana satauro ra; 15 e pau aˈera ia ˈna te feia hau e te mana ra, faariro atura ia ratou ei hiˈoraa i te vahi atea, ma te umere i nia iho ia ratou i te satauro no ˈna ra.

16 E tena na, eiaha ei taata e faahapa noa ˈtu ia outou i te maa i amuhia ra, e tei inuhia ra, e te mahana oroa ra, e te avaˈe apî, e te sabati; 17 e ata anaˈe ïa no te tupu a muri aˈe; area te mea mau ra o te evanelia ïa o te Mesia ra. 18 Eiaha roa outou ia ere i ta outou utua i te hoê taata ˈtu, i te haapeu faahaehaa ra, e te haamori melahi ra, i te faaô-noa-raa i te mau mea aore roa i itea e ana, i te ahaaha faufaa ore o to ˈna iho aau i au i ta te tino ra; 19 e aore hoi i mau papu i te upoo, no ˈna te tino atoa e maitai ai e ati maitai ai, i te mau ponaraa e te tiaatiraa, i tupu ai i te tupu a te Atua ra. 20 E teie nei, ua pohe atoa outou e te Mesia i te peu o teie nei ao ra, eaha hoi outou i haapao ai i te mau peu ma te mea e, te ora noa nei â i teie nei ao, (mai te parau ra e, 21 Eiaha e amu, eiaha hoi e tamata, e eiaha hoi e rave noa ˈtu, 22 i tei pau noa hoi taua mau mea ra ia rave-anaˈe-hia ra;) i ta te taata tuuraa mai, e ta ˈna i haapii mai? 23 E mea huru au maitai â hoi taua mau peu ra i te haamori a te hinaaro o te taata nei, e te faahaehaa ra, e te faaherehere ore i te tino nei; eita râ e haamaitaihia ˈtu e mea faarearea taata nei ïa.