Samuela 1

Te Buka hoê a Samuela ra

ELIKANA ATI LEVI, E NA VAHINE TOOPITI NA ˈNA, I TE HAAMORIRAA I TE ATUA I SILO.

1 Te parahi ra te hoê taata no Ramataima-zophima, no te mouˈa ra o Epheraima, o Elikana to ˈna iˈoa, e tamaiti na Ierohama a Elihu, a Tohu, a Zuphe no Epherata ra; 2 e toopiti a ˈna pue vahine; o Hana te iˈoa o te hoê, o Penina hoi te iˈoa o te tahi: e tamarii ta Penina, aita ra a Hana e tamarii. 3 E tia taua taata ra i te haerea i te mau matahiti atoa i Silo, mai roto atu i to ˈna iho oire, e hopoi i te tusia e e haamori i te Atua sabaota ra ia Iehova. E to Eli pue tamarii toopiti ra, o Hophini raua o Phinehasa, o na tahuˈa ïa na Iehova i reira.

4 E ua hopoi anaˈe Elikana i te tusia ra, ua horoa oia i te tufaa na ta ˈna vahine ra na Penina, e ta te mau tamarii tamaroa e te mau tamahine na ˈna ra; 5 area ta Hana ra, e tufaa maitai ïa ta ˈna i hopoi na ˈna; no te mea, e vahine hinaaro Hana na ˈna, aita râ a ˈna e tamarii i horoahia mai e Iehova. 6 E ua haamaaroaro roa mai to ˈna enemi ia ˈna ia mihi, i te mea aita a ˈna e tamarii i horoahia mai. 7 I na reira oia i te mau matahiti atoa, ia haere oia i nia i te fare o Iehova ra; maaroaro aˈera oia ia ˈna; oto ihora Hana, e aore aˈera i amu i te maa. 8 E i reira hoi te tane ra o Elikana i na ô aˈe ai ia ˈna ra, E Hana, eaha oe i oto ai? e aha oe i ore i amu ai i te maa? eaha i inoino ai to aau? e ere anei i te maitai rahi to ˈu, i to te tamarii e ia tino ahuru noa ˈtu, ia oe ra?

9 I amu na Hana i te maa e inu na i Silo, e oti aˈera; (te parahi ra te tahuˈa ra o Eli i nia i te pǎpǎ, i te hiti o te hoê pou no te nao o Iehova ra;) 10 ua inoino roa to ˈna aau, e ua pure atura ia Iehova, oto roa ˈtura: 11 e ua euhe ihora oia i te euhe ra, na ô atura, E te Atua sabaota, e Iehova e, ia tia ia oe i te hiˈo mai i te ati o to tavini vahine nei, e ia manaˈo mai oe ia ˈu, ia ore oe ia haamoina i to tavini vahine nei, ia horoa maira oe i te tahi tamaiti na to tavini vahine nei; ei reira vau e horoa ˈi ia ˈna no Iehova, e hope roa ˈˈe o ˈna pue mahana i te ao nei; e aita e reta e tae i nia i tana upoo. 12 Te pure noa ra oia i mua i te aro o Iehova, te hiˈo noa ra Eli i tana vaha. 13 Tei te aau ra ta Hana parauraa, i mutamuta noa tana vaha, aita râ i itea tana reo: manaˈo aˈera Eli e ua taero. 14 Ua parau atura Eli ia ˈna, A fea râ una e pee ai to taero? e haapae ê atu i ta oe uaina. 15 Ua parau maira Hana, na ô maira, E ere tena, e tau fatu; e vahine aau mihi noa ra vau: aita vau i inu i te uaina e te mea taero, ua faaite hua râ vau i tau hinaaro i mua i te aro o Iehova. 16 Eiaha oe e parau i to tavini vahine nei, e e vahine haapao ore; no roto hoi i te rahi o to ˈu nei ati, e to ˈu nei oto, ta ˈu i parau iho nei. 17 Ua parau atura Eli, na ô atura, Ia ora na oe i te haerea; e ia faatia mai hoi te Atua no Iseraela i ta oe i ani atu ia ˈna ra. 18 Ua parau maira oia, Ia ite mai oe i to tavini vahine nei. Ua haere ihora taua vahine ra, e ua amu ihora i te maa, e aita ˈtura to ˈna mata i hana.

19 Ua tia aˈera ratou i te poipoi roa, e ua haamori atura ia Iehova, hoˈi maira, e tae maira i to ratou iho utuafare i Rama; e ua ite Elikana i ta ˈna vahine ia Hana; e ua manaˈo mai hoi Iehova ia ˈna ra. 20 E tô ihora Hana, e tae aˈera i te tau mau ra, ua fanau ihora oia e tamaroa, mairi ihora i to ˈna iˈoa, o Samuela, ua na ô aˈera hoi oia, e mea anihia oia e au ia Iehova ra. 21 Haere atura taua taata ra o Elikana e tana fetii atoa i nia e hopoi i te tusia matahiti, e ta ˈna hoi i euhe ra. 22 Aita aˈera râ Hana i tae; ua na ô aˈera hoi oia i tana tane, Ia mairi aˈe na te û i te tamaiti nei, e hopoi ai au ia ˈna i nia i mua i te aro o Iehova, a parahi mau atu ai oia i reira. 23 Ua parau maira tana tane ra o Elikana ia ˈna, Tei ia oe tei to oe hinaaro; a parahi e ia haamairihia e oe te û ia ˈna; ia faatupu râ Iehova i ta ˈna parau. Parahi ihora taua vahine ra, faaote ihora i ta ˈna tamaiti e mairi noa ˈtura te û. 24 E ia haamairihia e ana te û ra, ua hopoi atura oia ia ˈna i nia i Silo, e na puaatoro oni hoi e toru, e te faraoa hoê epha, e te hoê farii uaina, e ua hopoi atura ia ˈna i te fare o Iehova i Silo: e tamaiti apî roa taua tamaiti ra. 25 Ua taparahi ihora ratou i te hoê puaatoro oni, e ua hopoi aˈera ratou i taua tamaiti ra ia Eli; 26 e ua na ô atura oia, E tau fatu, te ora ra oe, e tau fatu, o vau te vahine i tia noa i pihaiiho ia oe ra, a pure ai au ia Iehova ra. 27 i pure hoi au no teie nei tamaiti; e ua horoa mai Iehova i ta ˈu i ani atu ia ˈna ra; 28 no reira vau i horoa ˈtu ai ia ˈna ia Iehova; no Iehova ïa oia e ia hope roa o ˈna pue mahana i te oraraa nei. Ua haamori ihora oia ia Iehova i reira ra.