Levitiko

15 Paraparau noa maira Iehova ia Mose e ia Aarona, a na ô ai: 2 “A paraparau i te ati Iseraela e a parau ia ratou: ‘Ua tahe anaˈe mai te tahi mea no te maˈi mai roto i te mero atiraa* o te hoê tane, e viivii oia i te reira.+ 3 Mea viivii oia no taua mea ra i tahe mai, noa ˈtu e e tahe noa mai taua mea ra mai roto mai i to ˈna mero atiraa aore ra ua mau i roto mai, mea viivii noa oia.

4 “‘E viivii te mau roˈi atoa e taotohia e taua taata maˈi ra, e e viivii te mau mea atoa e parahihia e ana. 5 Te taata o te tapea i to ˈna roˈi, e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu.+ 6 Te taata o te parahi i nia i te tahi mea tei parahihia e te taata maˈi, e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu. 7 Te taata o te tapea i te tino o te taata maˈi, e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu. 8 Ia tutuha te taata maˈi i nia i te tahi atu taata viivii ore, e horoi taua taata ra i to ˈna mau ahu, e hopu oia i te pape e e vai viivii oia e ahiahi noa ˈtu. 9 E viivii te mau parahiraa atoa i nia i te hoê animara tei parahihia e te taata maˈi. 10 Te taata o te tapea i te mau mea atoa i raro aˈe ia ˈna, e viivii oia e ahiahi noa ˈtu, e te taata o te rave i taua mau mea ra, e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu. 11 Mai te peu e aita te taata maˈi+ i horoi i to ˈna rima i te pape e tapea ˈtura oia i te tahi atu taata, e horoi taua taata ra i to ˈna mau ahu, e hopu oia i te pape, e e vai viivii oia e ahiahi noa ˈtu. 12 E tupararihia te farii araea ta te taata maˈi e tapea, e e horoihia te mau farii raau atoa i te pape.+

13 “‘Ia ore taua mea ra ia tahe faahou mai, e ere atu ai taua taata ra i te mea viivii faahou, e taio oia e hitu mahana no te tamâraa ia ˈna, e e horoi oia i to ˈna mau ahu, e hopu oia i te pape maaro, a mâ ˈtu ai.+ 14 I te vaˈu o te mahana, e rave oia e piti uupa aore ra e piti uuairao apî,+ e haere mai oia i mua ia Iehova i te tomoraa o te tiahapa o te amuiraa e e horoa oia i na manu i te tahuˈa. 15 E pûpû te tahuˈa i te reira, hoê ei tusia no te hara e hoê ei tusia taauahi, e e pûpû te tahuˈa i te faahauraa no taua taata ra i mua ia Iehova no te mea i tahe mai.

16 “‘Mai te peu e pape tane te tahe mai, e hopu taua tane ra i to ˈna tino taatoa i te pape e e vai viivii oia e ahiahi noa ˈtu.+ 17 E horoi oia i te pape i te mau ahu atoa e te mau iri animara atoa e pape tane to nia iho, e e vai viivii te reira e ahiahi noa ˈtu.

18 “‘Ia taoto te hoê tane i te hoê vahine e ua tahe mai te pape tane, e hopu ïa raua i te pape e e vai viivii raua e ahiahi noa ˈtu.+

19 “‘Ia tahe mai te toto no roto mai i to ˈna tino, e vai viivii noa ïa taua vahine ra no to ˈna maˈi avaˈe e hitu mahana.+ Te taata o te tapea ia ˈna, e viivii ïa e ahiahi noa ˈtu.+ 20 E viivii te mau mea atoa e taotohia i nia iho e taua vahine viivii ra no to ˈna maˈi avaˈe, e e viivii te mau mea atoa e parahihia e ana.+ 21 Te taata o te tapea i to ˈna roˈi, e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu. 22 Te taata o te tapea i te mau mea atoa tei parahihia e ana, e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu. 23 Mai te peu e roˈi aore ra te tahi atu mea ta ˈna i parahi, e viivii ïa te taata o te tapea i te reira e ahiahi noa ˈtu.+ 24 E ia taoto te hoê tane ia ˈna, a viivii atu ai oia i te toto o to ˈna maˈi avaˈe,+ mea viivii ïa oia e hitu mahana, e e viivii te mau roˈi atoa e taotohia e ana.

25 “‘Ia tahe mai te toto o te hoê vahine e rave rahi mahana+ e ere hoi i te taime matauhia o to ˈna maˈi avaˈe,+ aore ra ia tahe noa te toto i muri iho atoa i to ˈna maˈi avaˈe, e viivii ïa oia pauroa te mahana e tahe ai to ˈna toto, mai i te mau mahana i viivii ai oia no to ˈna maˈi avaˈe. 26 Te mau roˈi atoa e taotohia e ana i te mau mahana e tahe mai ai to ˈna toto, e riro ïa mai te roˈi tei viivii no to ˈna maˈi avaˈe.+ E te mau mea atoa e parahihia e ana, e viivii ïa mai te viivii o to ˈna maˈi avaˈe. 27 E viivii te taata e tapea i te reira, e e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu.+

28 “‘Teie râ, ia ore to ˈna toto e tahe faahou mai, e taio ïa oia e hitu mahana, e i muri iho mea mâ oia.+ 29 I te vaˈu o te mahana, e rave oia e piti uupa aore ra e piti uuairao apî,+ e e hopoi mai oia i te reira i te tahuˈa i te tomoraa o te tiahapa o te amuiraa.+ 30 E pûpû te tahuˈa hoê manu ei tusia no te hara e te tahi atu ei tusia taauahi, e e pûpû te tahuˈa i te faahauraa no taua vahine ra i mua ia Iehova no to ˈna toto viivii i tahe mai.+

31 “‘No reira, e faataa ê mai orua i te ati Iseraela i to ratou viivii, ia ore ratou ia pohe no to ratou viivii ma te haaviivii i ta ˈu sekene, tei rotopu ia ratou.+

32 “‘Tera te ture no te tane e tahe mai te tahi mea no roto mai ia ˈna, te tane tei viivii i te pape tane tei tahe mai,+ 33 te vahine e maˈi avaˈe to ˈna,+ te tane aore ra te vahine e tahe mai te tahi mea no roto mai i te tino,+ e te hoê tane o te taoto i te hoê vahine viivii.’”