Isaia
25 E Iehova, o oe to ˈu Atua.
E faateitei au ia oe, e arue au i to iˈoa,
E ohipa faahiahia hoi ta oe i rave,+
Tei opuahia* mai mutaa iho mai.+
Ua faatupu oe i ta oe i parau,+ e ua faaite oe e nehenehe oe e tiaturihia.
2 Ua riro hoi te hoê oire ia oe ei pueraa ofai,
Te hoê oire auahia i te patu ei pueraa huˈahuˈa.
E ere te pare o te taata ê i te oire faahou.
E ore roa ˈtu te reira e patu-faahou-hia.
3 No reira oe e faahanahanahia ˈi e te tahi nunaa puai.
E mǎtaˈuhia oe e te oire o te mau nunaa haavî.+
4 Ua riro hoi oe ei pare no te feia riirii,
Ei pare no te taata veve e ahoaho ra,+
Ei haapuraa ia tupu te vero ûa,
E ei marumaru ia âhu roa.+
Ia farara te feia haavî mai te vero ûa i nia i te pǎpai,
5 Mai te âhu i te fenua mǎrô,
E faaiti mai oe i te maniania a te feia ěê.
Mai te âhu e iti mai i te marumaru o te ata,
E na reira atoa te himene a te feia haavî ia haamamûhia.
6 I nia i teie mouˈa,+ e faaineine Iehova o te mau nuu* no te mau nunaa atoa
I te tahi tamaaraa ma te maa maitatai,+
Te tahi tamaaraa ma te uaina maitai roa,*
Ma te maa maitatai mea ravai te puo ivi,
Ma te uaina maitai roa e te titiahia.
7 I nia i teie mouˈa, e faaore* oia i te ahu e puohu ra i te mau nunaa atoa
E te tapoˈi* tei raraahia i nia i te mau nunaa atoa.
8 E horomii* oia i te pohe e a muri noa ˈtu,+
E e tamǎrô te Arii hau ê e Fatu ra o Iehova i te roimata o to ratou mau mata atoa.+
E faaore oia i te hapa a to ˈna nunaa mai nia mai i te fenua taatoa,
Na Iehova hoi i parau.
9 I tera mahana, e parauhia:
“Inaha, o to tatou Atua teie!+
O Iehova teie!
Ua tiaturi tatou ia ˈna.
E oaoa e e popou anaˈe i te mea na ˈna e faaora ia tatou.”+
10 E vai noa hoi te rima o Iehova i nia i teie mouˈa,+
E e taataahihia Moabi i to ˈna vahi+
Mai te amaa huero maa e taataahihia i nia i te tahi pueraa para.