E faaiteraa aravihi, a faaohipa ïa!
1 Te horoa tamau mai nei Te taviniraa o te Basileia e rave rahi mau omuaraa parau no te pororaa, e haafanaˈo te reira ia tatou i te mau manaˈo apî o te nehenehe e faatupu i te anaanatae i te poroi o te Basileia. Peneiaˈe te tutava nei tatou, i te avaˈe tataitahi, i te tamau hoê aore ra e rave rahi o taua mau omuaraa parau ra. Teie râ, e nehenehe te feia poro e manaˈo e e no faaohipa noa aˈenei ratou hoê e rave rahi taime e te ite-faahou-hia nei vetahi i roto i te hoê tumu parau apî o Te taviniraa o te Basileia. Oia mau, e ere i te mea ohie no te taatoaraa i te tamau i te hoê omuaraa parau apî na mua ˈˈe te tahi e faaohipa-maitai-hia ˈi.
2 I te tahi aˈe pae, te horoa nei tau tausani pionie e vetahi atu feia poro e rave rahi taime no te pororaa. Hau atu, te ohipa nei e rave rahi mau amuiraa i roto i ta ratou tuhaa fenua tau hebedoma noa i te maoro. I roto i taua mau huru tupuraa ra, te oaoa nei te feia poro i te fanaˈoraa i te mau ravea apî no te haafatataraa ˈtu i te taata e te mau manaˈo apî no te faaite i te poroi. E tauturu te reira ia ratou ia aravihi mai. E mea anaanatae aˈe atoa, e mea manuïa aˈe ta ratou taviniraa, e e nehenehe ïa ratou e haamatara i te mau fifi farereihia.
3 Noa ˈtu râ, mai te peu e ua faaineine tatou i te hoê omuaraa parau o te faaaraara i te anaanatae ma te aravihi, e tamau anaˈe ïa i te faaohipa i te reira! Eita e titauhia ia faaea i te faaohipa i te hoê faaiteraa aravihi ia ite-anaˈe-hia te manuïaraa. E faaau noa anaˈe te reira i te pûpûraa o teie avaˈe. Ma te hiˈo faahou i te mau manaˈo o Te taviniraa o te Basileia, e tapaopao anaˈe i te mau vahi faufaa o ta tatou e hinaaro e tuu i roto i ta tatou omuaraa parau.
4 No reira, ia tae anaˈe mai ta tatou hoê neneiraa apî o Te taviniraa o te Basileia, e haamanaˈo anaˈe e e mau manaˈo tauturu noa te mau faaiteraa i neneihia i roto ra. Mea maitai mau mai te peu e e nehenehe tatou e faaohipa i te reira. Area râ, mai te peu e te vai ra ta tatou hoê omuaraa parau o te manuïa ra i roto i ta tatou tuhaa fenua, e faaohipa anaˈe ïa! Te mea faufaa, ia “rave faahope roa” ïa tatou ‘i to tatou toroa’ ma te huru maitai roa, i te imiraa i te feia e au ra e te tautururaa ia ratou ia riro mai ei pǐpǐ.—Tim. 2, 4:5.