“A ueue te huero o te Basileia” i roto i ta tatou eˈa opereraa vea
1 Teie te upoo parau o te himene 133 o te buka ra E haamaitai ia Iehova na roto i te himene “A ueue te huero o te Basileia.” Ua niuhia te reira i nia i te hiˈoraa ta Iesu i faaohipa no te faaau i te ohipa faariroraa i te mau taata atoa ei pǐpǐ i te ueueraa i te huero. (Mat. 13:4-8, 19-23) Te faahiti nei te mau parau o teie nei himene e: “Ia hotu mai te mau maa maitatai, ia rohi â tatou e tia ˈi.” Nafea tatou ia aravihi atu â i roto i te taviniraa? Mea na roto ïa i te haamauraa i te hoê eˈa opereraa vea e ma te tapea-maite-raa i te reira.
2 E naeahia ia tatou e rave rahi mau tapao maoti i te hoê eˈa opereraa vea. 1) E tauturu te mau hoˈi-faahou-raa e farerei tamau, i te mau piti hebedoma atoa, ia tatou ia haamau i te hoê auhoaraa e te feia e faaite ra i te anaanatae. 2) Auaa tatou, te fanaˈo tamau nei taua feia ra i te hoê haapiiraa ora i roto i Te Pare Tiairaa e te A ara mai na! 3) Na roto i ta tatou mau tauaparauraa, e nehenehe tatou e aratai ia ratou ia “hiaai maite” i te parau mau Bibilia, e e nehenehe te reira e faatupu mai i te hoê haapiiraa Bibilia.—Petero 1, 2:2.
3 Nafea ia haamau i te hoê eˈa opereraa vea: I te faaiteraa iho â te hoê taata i te anaanatae no te mau vea, e faataa atu tatou ia ˈna e te vai ra te mau tumu parau faahiahia i roto i te mau vea atoa e e parau atu tatou ia ˈna e oaoa roa tatou i te afai mai te reira na ˈna i te mau piti hebedoma atoa. I muri iho, ia vaiiho anaˈe tatou ia ˈna, e tapao anaˈe to ˈna iˈoa, to ˈna vahi faaearaa, te taio mahana o to tatou hoˈi-faahou-raa e farerei, te taio mahana o te mau vea ta tatou i vaiiho atu, te tumu parau i haafaufaahia e te mau tumu parau iho â ra o tei huti i te ara-maite-raa o taua taata ra.
4 E nehenehe tatou e haamau i te hoê eˈa opereraa vea e te tahi noa mau taata. I muri iho, e tutava anaˈe i te faarahi i te reira ma te faaô mai i te tahi atu mau taata i vaiihohia ˈtu te mau vea e tatou. A rahi noa ˈi te eˈa opereraa, e faanaho anaˈe e ia ati ohie noa te eˈa opereraa. E tapao maitai anaˈe i te mau vea ta tatou e vaiiho ra i te mau taata atoa, e te taio mahana atoa o te hoˈi-faahou-raa e farerei. E tapao atoa anaˈe i te mau tauaparauraa e ia nehenehe tatou e faatupu i te anaanatae i muri iho.
5 E manaˈonaˈo anaˈe i te feia tapihoo e te feia na ratou iho ta ratou ohipa: Te faaite ra te tupuraa mau e te farii ohie nei te feia tapihoo e te feia na ratou iho ta ratou ohipa i te rave tamau i te mau vea. Inaha, ua faaô atoa mai te hoê matahiapo i te tavana o to ˈna oire i roto i ta ˈna eˈa opereraa. Ua haamata te hoê taata poro i te hoê haapiiraa Bibilia e te hoê taata e vau ahuru matahiti e tiahapa, e fatu oia no te hoê fare tauihaa hamani fare, i muri aˈe i to ˈna vaiiho-noa-raa i te mau vea i te roaraa 10 matahiti!
6 Ua tomo atu te hoê pionie i roto i te hoê fare toa. Aita râ hoi nau hoa faaipoipo o ta ˈna i farerei i farii maitai atu ia ˈna. No to raua râ fariiraa i te mau vea, ua tapao atura ïa oia ia raua i roto i ta ˈna eˈa opereraa. I muri iho, ua opua aˈera taua tuahine ra e faaea i te haere e farerei ia raua no to raua huru au ore e no te mea eita raua e paraparau, ia uiui atoa anaˈe oia i to raua manaˈo. Ua pure râ oia no nia i taua tuhaa ra. I te pae hopea, ua vaiiho atura oia na raua i te buka ra Ora e a muri noa ˈtu. I te otiraa ia ˈna i te taio, ua na ô maira taua vahine ra e: “Ua iteahia mai ia ˈu te parau mau!” Ua haamatahia ˈtura te hoê haapiiraa Bibilia e, i muri iho, ua bapetizohia ˈtura nau hoa faaipoipo. Ua faatupu mau te tuutuu ore o taua pionie ra i te faahopearaa maitatai.
7 Te mau hoˈi-faahou-raa e farerei: Ia tae anaˈe mai ta tatou vea apî, e taio anaˈe i te mau tumu parau atoa. E maimi anaˈe i te mau manaˈo e auhia mai e te mau taata atoa o ta tatou eˈa opereraa. I muri iho, ia haere anaˈe tatou e farerei ia ratou, e nehenehe tatou e na ô atu e: “A taio noa ˈi au i teie tumu parau, ua manaˈo atura vau ia oe e ua maimi au i te hoê tumu parau e nehenehe ai oe e anaanataehia.” E nehenehe te feia poro atoa, noa ˈtu eaha to ratou faito matahiti, e fanaˈo i te hoê eˈa opereraa vea, e tae noa ˈtu te hoê tamarii atoa. E nehenehe oia e parau e: “Ua oaoa roa vau i te farerei-faahou-raa ia oe. Ua tae mai ta oe mau vea apî Te Pare Tiairaa e te A ara mai na! Manaˈo anaˈe au e au oe i teie tumu parau teie hoi te upoo parau . . .”
8 E faahiaamu anaˈe i te mau taata i te mau vea apî ma te huti i to ratou ara-maite-raa i nia i te tabula tarenihia “I roto i ta matou numera i mua nei.” E faataa anaˈe ia ratou i te mau tumu parau i tatuhaahia e e faaitoito anaˈe ia ratou ia ore ratou ia vaiiho i te hoê tuhaa i te hiti. Eiaha ia moehia ia tatou e, i te taime atoa e afai ai tatou i te mau vea i te hoê taata o ta tatou eˈa opereraa, e nehenehe tatou e taio hoê hoˈi-faahou-raa e farerei. E hau atu, e haamanaˈo tatou e ta tatou fa oia hoi te haamataraa ïa i te mau haapiiraa Bibilia e taua mau taata ra.
9 E rave tamau anaˈe i ta tatou eˈa opereraa vea: E nehenehe e ravehia ta tatou eˈa opereraa vea i te mau taime au atoa: i te hoê poipoi i roto i te hebedoma, i te avatea, i te ahiahi, aore ra i te hopea hebedoma i muri aˈe i te pororaa i tera fare e tera fare. Mai te peu e eita ta tatou e nehenehe e rave no te mea ua maˈihia tatou aore ra ua reva tatou no te faafaaearaa, e ani anaˈe i te hoê taata poro o to tatou utuafare aore ra o te amuiraa e mono ia tatou. E fanaˈo ïa te te mau taata i ta ratou mau vea i te tau au ra.
10 Hoê o te mau ravea no te ueue i te huero o te Basileia, oia hoi te afai tamauraa ïa i Te Pare Tiairaa e te A ara mai na! i te feia tei roto i ta tatou eˈa opereraa vea. Mai te peu e e haapii atu tatou ia ratou i te mau parau mau Bibilia, peneiaˈe e apo mai ratou i te auraa mau o te parau o te Basileia e e hotuhia ratou i i pihai iho ia tatou.—Mat. 13:8, 23.