Te mau tiaau o te aratai nei ia tatou: te papai parau
1 E tuhaa faufaa roa ta te papai parau a te amuiraa no te vai-ara-raa e “ia ravehia te mau mea atoa ma te tia e ma te nahonaho.” (Kor. 1, 14:40, MN) E haapao teie melo o te tomite no te taviniraa i te mau rata e te mau papai faufaa a te amuiraa. Eita e itehia te mau hopoia o ta ˈna e rave ra mai ta te tahi atu mau matahiapo; teie râ, mea faufaa roa e mea farii-popou-hia ta ˈna ohipa.
2 Ia faatae anaˈe mai te Taiete aore ra te tahi atu mau taata papai i te hoê rata i te amuiraa, e hiˈopoa te papai parau e e vai ara oia e ia faataehia ˈtu te hoê pahonoraa i te taime au ra. E horoa ˈtu oia i te mau rata i tae mai i te tahi atu mau matahiapo e e faanaho atu oia i roto i te hoê vairaa ia nehenehe oia e hiˈo faahou i te tahi atu taime. E hiˈopoa oia i te mau parau aniraa no te mau buka e no te mau vea e e faatae atu oia i te Taiete ra. Na ˈna e tiaau i te mau taeae e haapao ra i te faufaa moni e te tamatahitiraa, e te mau mea atoa i taaihia i te mau tairururaa.
3 E tia i te papai parau ia faatae atu i te tabula no te taviniraa no te ono o te avaˈe i te Taiete ra; no reira ˈtura ïa mea faufaa no tatou taitahi ia faahoˈi oioi ta tatou tabula taviniraa i te mau hopea avaˈe atoa. I muri iho, e faaî oia i te tabula taviniraa a te mau melo o te amuiraa. E nehenehe te feia poro e ani atu ia ˈna e hiˈo i ta ratou iho tabula taviniraa.
4 Ia tae anaˈe mai te hoê taata poro i roto i te amuiraa aore ra ia haere anaˈe oia, e papai atu te papai parau i te mau matahiapo o te tahi atu amuiraa no te ani atu aore ra e faatae atu oia te hoê rata faaiteraa apitihia mai e te tabula taviniraa a te taata poro.—Notre ministère, api 105.
5 E tuatapapa te papai parau i te taviniraa a te mau pionie e e faaara oia i te mau matahiapo, te tiaau no te taviniraa iho â ra, no te mau fifi atoa e farereihia ra e te mau pionie. E faaite atu oia i te mau taeae faatere ra i te mau haapiiraa buka o vai ma te feia poro o ta ratou pǔpǔ o te ore e poro tamau nei. E faanaho te papai parau e te tiaau no te taviniraa i te mau tutavaraa papu no te tauturu atu i te feia tei toaruaru.—Te taviniraa o te Basileia, Novema 1987, api 1.
6 Ma te ite papu i te mau hopoia a te papai parau, e tutava anaˈe i te rave i te maraa ia tatou no te faaohie i to ˈna tiaraa tiaau!—Kor. 1, 4:2.