Na te here e tauturu ia oe ia tamau i te poro

1. Eaha ta tatou i fanaˈo i te rururaa matahiti 2023?

I TE rururaa matahiti 2023,a ua fanaˈo tatou i te faatanoraa no nia i te tahi o ta tatou mau tiaturiraa e ta tatou taviniraa. Ua faaarahia tatou e nehenehe vetahi e tia i te pae o te nunaa o Iehova i muri aˈe i te haamouraa o Babulonia rahi. Ua parau-atoa-hia e mai te avaˈe no Novema 2023 eita e titau-faahou-hia i te taata poro ia tapao pauroa i ta ˈna e rave i roto i te pororaa. Te auraa anei ïa e ere faahou te pororaa i te mea faufaa aore ra i te mea ru? E ere roa ˈtu!

2. No te aha e mea ru mau te ohipa pororaa? (Mareko 13:10)

² E ohipa ru mau te pororaa no te mea te iti mai ra te taime e toe ra hou a tae mai ai te hopea. E hiˈo anaˈe i ta Iesu i tohu no nia i te ohipa pororaa i te roaraa o te mau mahana hopea. (A taio i te Mareko 13:10.) Ia au i te evanelia a Mataio, ua parau Iesu e porohia te parau apî oaoa ati aˈe te fenua hou a tae mai ai “te hopea.” (Mat. 24:14) O te hopea o te ao ino a Satani ta Iesu e faahiti ra. Ua faataa Iehova i “te mahana e te hora” e tupu ai te reira. (Mat. 24:36; 25:​13; Ohi. 1:7) Te fatata mai ra taua taime ra. (Roma 13:11) A tiai noa ˈi, mea faufaa ia tamau tatou i te poro e tae noa ˈtu i te hopea.

3. No te aha tatou e poro ai?

³ A feruriruri ai i ta tatou taviniraa, e ui anaˈe ia tatou iho: No te aha tatou e poro ai i te parau apî oaoa? No to tatou here. Ia poro tatou, e tapao teie e mea au roa na tatou te parau apî oaoa, mea here na tatou i te taata e hau roa ˈtu â ia Iehova e mea faufaa no tatou to ˈna iˈoa. E hiˈopoa anaˈe i na tuhaa tataitahi.

MEA AU ROA NA TATOU TE PARAU APÎ OAOA

4. Eaha to tatou huru a faaroo ai i te hoê parau apî oaoa?

⁴ A feruri na i to oe huru a faaroo ai i te hoê parau apî oaoa. Ua fanau paha hoê o to oe fetii aore ra ua noaa mai ta oe ohipa. Ua oaoa roa oe i te faaite i teie parau apî i to oe utuafare e i to oe mau hoa. Eita e ore tera atoa to oe huru i to oe faarooraa i te mau parau apî oaoa roa ˈˈe, te parau apî oaoa o te Faatereraa arii a te Atua.

5. Eaha to oe huru i to oe iteraa i te parau mau? (A hiˈo atoa i te hohoˈa.)

⁵ A feruri na i to oe huru i to oe iteraa i te parau mau. Ua haapii oe e mea here na to oe Metua i te raˈi ia oe, e hinaaro o ˈna ia haamori oe ia ˈna, ua fafau oia i te faaore i te mauiui, i te faahoˈi mai i te feia herehia e oe i te ora i roto i te ao apî e te vai ra ˈtu â. (Mar. 10:29, 30; Ioa. 5:​28, 29; Roma 8:38, 39; Apo. 21:3, 4) Ua putapû roa oe i taua pue parau mau ra. (Luka 24:32) Ua au roa oe i ta oe i haapii mai, aita ˈtura oe i nehenehe e tapea noa na oe!—A hiˈo atoa i te Ieremia 20:9.

6. Eaha te haapii mai i te hiˈoraa o Ernest raua Rose?

⁶ Teie te hiˈoraa o taeae Ernest.b Ahuru noa matahiti to ˈna i te poheraa to ˈna papa. Te haamanaˈo ra Ernest: “Ua ui au: ‘Tei te raˈi anei o ˈna? E farerei faahou anei au ia ˈna?’ Ua pohehae vau i te mau tamarii te ora noa ra to ratou papa.” Pinepine Ernest i te haere i nia i te menema o to ˈna papa a pure atu ai: “Te Atua e, hinaaro vau e ite teihea roa to ˈu papa.” Ua farii oia i te hoê haapiiraa Bibilia 17 matahiti i muri aˈe i te poheraa to ˈna papa. Oaoa roa o ˈna i te haapii e aita te feia pohe i ite i te tahi mea, inaha te taoto ra ratou. Ua fafau atoa te Bibilia te vai ra te tia-faahou-raa. (Koh. 9:5, 10; Ohi. 24:15) Ua noaa mai ia ˈna te mau pahonoraa ta ˈna i hinaaro ahia matahiti teie nei. Oaoa roa Ernest i te iteraa i te pue parau mau Bibilia. Ua apiti atoa ta ˈna vahine o Rose ia ˈna e ua au roa o ˈna i ta ˈna i haapii mai. Ua bapetizohia raua i 1978. Ua poro raua ma te itoito i te fetii, hoa e te taata atoa e farii. Ei faahopearaa, ua tauturu raua hau atu 70 taata e tae roa ˈtu i te bapetizoraa.

7. Ia aˈa te parau mau Bibilia i roto i to tatou aau, eaha ta tatou e rave? (Luka 6:45)

⁷ Papu, ia aˈa te parau mau Bibilia i roto i to tatou aau, eita tatou e mamû noa. (A taio i te Luka 6:45.) E tu to tatou manaˈo i to te mau pǐpǐ o te senekele matamua tei parau: “Eita ïa e tia ia ore e parau i te mau mea ta mâua i ite e i faaroo.” (Ohi. 4:20) Mea au roa na tatou i te parau mau. No reira tatou e poro ai i te taata e rave rahi.

MEA HERE NA TATOU I TE TAATA

8. No te aha tatou e faaite ai i te parau apî oaoa i te taata? (A hiˈo i te tumu parau tarenihia “A here i te taata: A faariro ei pǐpǐ.”) (A hiˈo atoa i te hohoˈa.)

⁸ Mea here na tatou i te taata mai ia Iehova raua ta ˈna Tamaiti. (Mas. 8:31; Ioa. 3:16) E aroha tatou i te feia aita e Atua e aita e tiaturiraa to ratou. (Eph. 2:12) Mea rahi to ratou mau fifi, ua ite râ tatou eaha te ravea: te parau apî oaoa o te Faatereraa arii a te Atua. No to tatou here e aroha ia ratou e tutava ˈi tatou i te faaite i teie parau apî oaoa. Maoti teie poroi e fanaˈo ai ratou i te hoê tiaturiraa, te oaoa i teie nei â, e “te ora mau” oia hoi te ora mure ore i roto i te ao apî a te Atua.—Tim. 1, 6:19.

9. Eaha te faaaraara ta tatou e faaite no nia i te tupu a muri aˈe, e no te aha? (Ezekiela 33:7, 8)

⁹ No to tatou here i te taata e faaara atoa ˈi tatou ia ratou te fatata mai ra te hopea o teie ao ino. (A taio i te Ezekiela 33:7, 8.) E aroha tatou i te taata atoa, oia atoa to tatou fetii e ere to roto i te parau mau. E rave rahi te ore i ite te fatata mai ra “te hoê ati rahi aita i tupu aˈenei mai te omuaraa mai o teie nei ao e tae roa mai i teie mahana, e o te ore atoa e tupu faahou.” (Mat. 24:21) Te hinaaro ra tatou ia ite ratou eaha te tupu i tera taime haavaraa, e faaorehia te mau haapaoraa hape e e haamouhia teie ao ino i Aramagedo. (Apo. 16:14, 16; 17:​16, 17; 19:11, 19, 20) Te pure nei tatou ia faaroo te taata e rave rahi i teie faaaraara e ia apiti mai ratou i te haamoriraa viivii ore. Eaha râ te tupu no tei ore e farii mai i teie nei â, mai te mau mero paha o to tatou utuafare?

10. No te aha e mea ru ia faaara tatou i te taata?

¹⁰ Mai tei faataahia i to na mua ˈtu tumu parau, e hinaaro Iehova ia ora mai te feia o te taui i to ratou haerea a ite ai i te haamouraa o Babulonia rahi. Mea faufaa roa ïa ia tamau tatou i te faaara i te taata. A feruri na i teie manaˈo: Ta tatou e faaite atu i teie nei â, e haamanaˈo paha ratou i taua taime ra. (A hiˈo atoa i te Ezekiela 33:33.) Peneiaˈe e haamanaˈo ratou i ta ratou i faaroo na a hinaaro atu ai e tavini ia Iehova hou a tae mai ai te hopea. Mai te tiai i Philipi tei taui roa i muri aˈe i te hoê aueueraa fenua, peneiaˈe e taui vetahi i muri aˈe i te haamouraa o Babulonia rahi.—Ohi. 16:25-34.

MEA HERE NA TATOU IA IEHOVA E MEA FAUFAA ROA TO ˈNA IˈOA

11. E nafea tatou e horoa ˈi i te hanahana, te teitei e te puai ia Iehova ra? (Apokalupo 4:11) (A hiˈo atoa i te hohoˈa.)

¹¹ Te poro nei tatou no te mea mea here na tatou ia Iehova e mea faufaa roa to ˈna iˈoa moˈa no tatou. E ravea teie no te arue i te Atua ta tatou e here ra. (A taio i te Apokalupo 4:11.) Mea tano roa iho â ia fanaˈo te Atua ra o Iehova i te hanahana, te teitei e te puai. E faahanahana e e faateitei tatou ia ˈna ia faaite tatou i te taata i te mau haapapuraa e na ˈna “i poiete i te mau mea atoa,” e maoti o ˈna e ora ˈi tatou. E horoa tatou i te puai, oia hoi to tatou puai, ia ˈna ra ma te faaohipa i to tatou taime e itoito e ta tatou faufaa i roto i te taviniraa. (Mat. 6:33; Luka 13:24; Kol. 3:23) Mea au roa na tatou e paraparau no nia i te Atua ta tatou e here ra. E turai atoa te here ia tatou ia faaite i to ˈna iˈoa e to ˈna huru. No te aha?

12. E nafea tatou e haamoˈa ˈi i te iˈoa o Iehova i roto i te pororaa?

¹² E haamoˈa tatou i te iˈoa o Iehova no to tatou here ia ˈna. (Mat. 6:9) Te auraa, e hinaaro tatou e faaite i te taata e haavare anaˈe ta Satani i faahiti no nia ia Iehova. (Gen. 3:1-5; Ioba 2:4; Ioa. 8:44) Ia poro tatou, e hinaaro tatou ia ite te taata atoa o vai o Iehova, e here o ˈna, mea tia ta ˈna huru faatereraa, e maoti teie ravea e ore ai te mauiui e e tupu ai te hau e te oaoa i te fenua nei. (Sal. 37:10, 11, 29; Ioa. 1, 4:8) Ia paturu tatou i to ˈna roo i roto i te pororaa, te haamoˈa ra ïa tatou i to ˈna iˈoa. E oaoa atoa tatou no te mea tera tei titauhia ia rave ei Ite no Iehova. No te aha?

13. No te aha mea faahiahia ia piihia tatou ei Ite no Iehova? (Isaia 43:10-12)

¹³ Ua pii Iehova ia tatou ei “ite” no ˈna. (A taio i te Isaia 43:10-12.) Tau matahiti teie nei, te na ô ra te hoê rata a te Tino aratai: “Te haamaitairaa rahi roa ˈˈe ta tatou e nehenehe e fanaˈo o te parauraahia ïa tatou e e Ite no Iehova.”c No te aha? A feruri na ua pari-haavare-hia oe. Hinaaro oe ia parauhia e taata maitai oe e e haavare tera pariraa. O vai ta oe e maiti? Te taata iho â ïa ta oe i matau e ta oe e tiaturi. Hoê taata roo maitai e tiaturihia ˈi ta ˈna parau. Ma te maiti ia tatou, te faaite ra Iehova e ua matau maitai oia ia tatou e te tiaturi mai ra o ˈna no te faaite papu o ˈna anaˈe te Atua mau. Faahiahia roa tatou i te riroraa ei Ite no ˈna. No reira tatou e faaite ai o Iehova to ˈna iˈoa e te parau mau no nia ia ˈna. A na reira ˈi, e oaoa tatou no te mea tera tei titauhia ia rave ei Ite no Iehova.—Sal. 83:18; Roma 10:13-15.

E TAMAU TATOU I TE PORO TAE ROA ˈTU TE HOPEA

14. Eaha te tupuraa e oaoa tatou i te ite?

¹⁴ Te oaoa ra tatou i te ite eaha te tupu a muri aˈe. Maoti ta Iehova haamaitairaa, e hinaaro tatou ia farii e rave rahi taata i te parau mau hou a haamata ˈi te ati rahi. E oaoa ˈtu â tatou a ite ai e i te roaraa o taua taime fifi roa ra, e rave rahi atu â taata te faarue i teie ao ino a Satani e te apiti mai no te arue ia Iehova.—Ohi. 13:48.

15-16. E tamau tatou i te aha, e tae roa ˈtu i te aha?

¹⁵ A tiai noa ˈi i tera taime, e ohipa faufaa ta tatou o te ore faahou e ravehia oia hoi te pororaa o te parau apî oaoa o te Faatereraa arii a te Atua ati aˈe te fenua. I te hoê â taime, e tamau tatou i te faaara i te taata e fatata roa teie ao i te haamouhia. Ia tae mai te taime haavaraa, e taa ia ratou e no ǒ mai ia Iehova ra teie poroi ta tatou i faaite atu.—Ezk. 38:23.

¹⁶ Ia faaoti papu tatou i te aha? E tamau ïa tatou i te poro ma te ru e te itoito no te mea mea au na tatou te parau apî oaoa, mea here na tatou i te taata e ia Iehova e mea faufaa no tatou to ˈna iˈoa. E na reira tatou tae roa ˈtu i te taime e parau mai ai Iehova: “Ua oti!”