TUMU PARAU HAAPIIRAA 26
HIMENE 123 Auraro anaˈe i ta Iehova aratairaa ma te taiva ore
E farii anaˈe aita tatou i ite i te mau mea atoa
“Eita e roaa ia tatou ia taa i te Manahope.”—IOBA 37:23.
MANAˈO FAUFAA
Noa ˈtu aita tatou i ite i te mau mea atoa aore ra eaha te tupu a muri aˈe, e noaa ia tatou ia faaruru i te mau fifi ma te tiatonu i te mau mea ta tatou i ite e ma te tiaturi ia Iehova.
1. Mea nafea Iehova i te poieteraa ia tatou, e no te aha?
UA POIETE Iehova ia tatou e te aravihi ia feruri, ia noaa mai te ite, ia taa i ta tatou i haapii mai e ia faaite i te paari. No te aha o ˈna i poiete ai ia tatou mai tera? No te mea te hinaaro ra Iehova ia haapii tatou o vai o ˈna e ia tavini tatou ia ˈna ma to tatou feruriraa.—Mas. 2:1-5; Roma 12:1.
2. (1) Ia farii tatou i te aha? (Ioba 37:23, 24) (A hiˈo atoa i te hohoˈa.) (2) Eaha te mau maitai ia farii e aita tatou i ite i te mau mea atoa?
2 Noa ˈtu ua poiete Iehova ia tatou e te aravihi ia haapii, mea rahi te ohipa ta tatou i ore e ite. (A taio i te Ioba 37:23, 24.) A feruri na ia Ioba. Ua tuu Iehova e rave rahi mau uiraa ia ˈna, aita râ i noaa ia ˈna ia pahono. Maoti te reira, ua taa ia Ioba te faufaaraa ia faaite i te haehaa e ia taui i to ˈna feruriraa. (Ioba 42:3-6) Mai ia Ioba, e farii anaˈe e aita tatou i ite i te mau mea atoa. E turai te reira ia tatou ia tiaturi ia Iehova. Inaha, e faaite noa mai o ˈna i te mau mea faufaa, ia nehenehe tatou e rave i te faaotiraa paari.—Mas. 2:6.
E fanaˈo tatou i te mau maitai ia farii tatou e aita tatou i ite i te mau mea atoa mai ia Ioba (A hiˈo i te paratarafa 2)
3. Eaha ta tatou e hiˈopoa i roto i teie tumu parau?
3 I roto i teie tumu parau, e ite mai tatou i te mau mea ta tatou i ore i ite e te mau fifi ta tatou e faaruru. E hiˈopoa atoa tatou no te aha mea maitai ia ore tatou ia ite i teie mau ohipa. E tauturu mai teie tumu parau ia tiaturi atu â ia Iehova, “te Itehope,” o te faaite noa mai i te mau mea faufaa ia ite tatou.—Ioba 37:16.
AITA TATOU I ITE AFEA TE HOPEA E TAE MAI AI
4. Ia au i te Mataio 24:36, eaha ta tatou i ore i ite?
4 A taio i te Mataio 24:36. Aita tatou i ite afea te hopea o teie nei ao e tae mai ai. A ora ˈi Iesu i te fenua, aita atoa o ˈna i ite i “te reira mahana e te reira hora.”a I muri aˈe, ua faataa o ˈna i ta ˈna mau aposetolo, o Iehova te Fatu o te taime, na ˈna ïa e faaoti eaha te taime tano e tupu ai te tahi mau ohipa. (Ohi. 1:6, 7) Ua faaoti aˈena Iehova te mahana o te hopea o teie nei ao, aita râ e haere ia tatou ia ite ma te papu roa afea tera mahana e tae mai ai.
5. Eaha to tatou huru inaha aita tatou i ite afea te hopea o teie nei ao e tae mai ai?
5 Ia au i ta Iesu i parau, aita ïa tatou i ite ehia maororaa tatou e tiai faahou ai. E nehenehe tatou e fiu i te tiai aore ra e toaruaru, mai te peu iho â râ mea maoro tatou i te tiai-noa-raa te mahana o Iehova. E mai te peu e faaooo te fetii aore ra vetahi ê ia tatou, mea fifi atu â ïa. (Pet. 2, 3:3, 4) E puta mai ïa te manaˈo e, ahani tatou i ite i te taime e tae mai ai te hopea o teie nei ao, mea ohie aˈe ïa ia tiai e ia faaoromai tatou i te faaoooraa a vetahi ê.
6. No te aha mea maitai ia ore tatou ia ite afea te hopea e tae mai ai?
6 No te mea aita Iehova i faaite ia tatou afea te hopea e tae mai ai, e ravea ïa teie no te faaite e te tavini ra tatou ia ˈna no to tatou here e tiaturi ia ˈna. Aita tatou e tavini ra ia Iehova no te hoê taio mahana. Mai te huru ra e ua niuhia to tatou faaroo i nia i te reira. Mea maitai aˈe ia tiatonu tatou i ta te “mahana o Iehova” e faatupu, eiaha râ i te taime e tae mai ai te reira. E piri atu â ïa tatou ia Iehova e e tamau tatou i te faaoaoa i to ˈna aau.—Pet. 2, 3:11, 12.
7. Eaha ta tatou i ite?
7 E tiatonu anaˈe i te mea ta tatou i ite. Ei hiˈoraa, ua ite tatou e ua haamata te mahana hopea i 1914. Ua horoa mai Iehova i te mau parau tohu Bibilia o te haapapu ra i te reira, e o te faaite mai eaha tei tupu i nia i te fenua mai reira mai. No reira, ua papu ia tatou e ua piri “te mahana rahi o Iehova.” (Zeph. 1:14) Ua ite atoa tatou eaha to Iehova hinaaro oia hoi, ia porohia te “parau apî oaoa o te Faatereraa arii.” (Mat. 24:14) E te porohia ra teie poroi na roto hau atu 1 000 reo e 240 fenua. Aita e faufaa ia ite tatou i te ‘mahana e te hora’ o te hopea o teie nei ao no te faaite i te itoito rahi i roto i te pororaa.
AITA TATOU I ITE EAHA TA IEHOVA E RAVE NO TATOU
8. Eaha te auraa o te parau “te ohipa a te Atua mau”? (Koheleta 11:5)
8 Aita tatou i ite i “te ohipa a te Atua mau.” (A taio i te Koheleta 11:5.) Ia parauhia te ohipa a te Atua mau, o te mau mea atoa ïa ta Iehova e rave nei aore ra e vaiiho o ˈna ia tupu ia au i to ˈna hinaaro. Aita tatou i ite eaha te tumu Iehova i vaiiho ai ia tupu te tahi ohipa aore ra e nafea o ˈna e tauturu ai ia tatou. (Sal. 37:5) Ei hiˈoraa, aita tatou i ite e nafea te hoê pêpe e rahi mai ai i roto i te opu o to ˈna mama. Aita atoa i taa maitai i te mau aivanaa i tera tupuraa. Hoê â huru no tatou, aita atoa tatou i ite eaha ta Iehova e rave.
9. Inaha aita tatou i ite eaha ta Iehova e rave no tatou, eaha te manaˈo e puta mai?
9 Inaha aita tatou i ite eaha ta Iehova e rave no tatou, e puta mai paha te manaˈo feaa. Ei hiˈoraa, eita paha tatou e hinaaro faahou e rave i te mau haapaeraa no te rave hau atu â i roto i te taviniraa aore ra no te haere i te vahi e hinaaro-rahi-hia te feia poro. E manaˈo atoa paha tatou e aita Iehova e mauruuru ra ia tatou no te mea aita i naea ia tatou i te hoê fa pae varua. Aore ra ua rohi tatou i roto i te pororaa, aita râ ta tatou e haapiiraa Bibilia. E ua rohi tatou i roto i te hoê taviniraa taa ê no te faanahonahoraa, ua faaruru râ tatou i te fifi. No teie mau tumu, e puta mai paha te manaˈo e aita Iehova e tauturu mai ra ia tatou.
10. Inaha aita tatou i ite eaha ta Iehova e rave no tatou, eaha ïa te mau huru maitatai ta tatou e faatupu?
10 No te mea aita tatou i ite eaha ta Iehova e rave no te tauturu ia tatou, e ravea ïa teie no te faatupu i te mau huru maitatai mai te haehaa e te aau faahaihai. Te taa ra ia tatou e mea teitei aˈe to Iehova mau manaˈo i to tatou. E mea teitei aˈe ta ˈna mau raveraa i ta tatou. (Isa. 55:8, 9) Hau atu, ua taa ia tatou i te faufaaraa ia tiaturi atu â ia ˈna. Ia fanaˈo tatou i te tahi haamaitairaa i roto i te taviniraa, o Iehova anaˈe ta tatou e faahanahana. (Sal. 127:1; Kor. 1, 3:7) Mai te peu aita tatou i fanaˈo i te tahi mea mai ta tatou i manaˈo na, e haamanaˈo anaˈe e ua ite Iehova te mau mea atoa. (Isa. 26:12) E tamau anaˈe i te rave i ta tatou tuhaa, a tiaturi atu ai e haapao Iehova i ta ˈna tuhaa. Ia papu ia tatou e aratai Iehova ia tatou, noa ˈtu eita o ˈna e faatupu i te hoê semeio mai ta ˈna i rave i tahito ra.—Ohi. 16:6-10.
11. Eaha te mau mea faufaa ta tatou i ite?
11 E feruri anaˈe i ta tatou i ite. Ei hiˈoraa, ua ite tatou e ohipa noa Iehova ma te here, te parau tia e te paari. E te haafaufaa nei o ˈna i ta tatou e rave ra no ˈna e no te mau taeae e tuahine. Ua ite atoa tatou e haamaitai Iehova i te feia o te vai taiva ore ia ˈna.—Heb. 11:6.
AITA TATOU I ITE EAHA TE TUPU ANANAHI
12. Eaha te haapii mai i te Iakobo 4:13, 14?
12 A taio i te Iakobo 4:13, 14. Aita tatou i ite eaha te tupu ananahi. I roto i teie nei ao, e faaruru tatou i te “taime e te tupuraa manaˈo-ore-hia.” (Koh. 9:11) No reira, aita tatou i ite e manuïa anei ta tatou mau opuaraa aore ra e haere anei ia tatou ia rave faahope i te reira.
13. Mai te aha to tatou huru inaha aita tatou i ite eaha te tupu a muri aˈe?
13 E ere paha i te mea ohie no tatou ia faaoromai tamau no te mea aita tatou i ite eaha te tupu a muri aˈe. No te aha? No te mea e haapeapea paha no tei nehenehe e tupu, a ere atu ai i to tatou oaoa. E nehenehe atoa to tatou oraraa e taui taue noa a haamauiui atu ai ia tatou. E mai te peu aita tatou e fanaˈo i te mau mea ta tatou i hinaaro noa na, e hepohepo aore ra e toaruaru roa ïa tatou.—Mas. 13:12.
14. No te fanaˈo i te oaoa, eaha te titauhia ia rave tatou? (A hiˈo atoa i te hohoˈa.)
14 Ia faaoromai tatou noa ˈtu eaha te fifi, e haapapuraa teie e te tavini ra tatou ia Iehova no to tatou here ia ˈna, eiaha râ no te imi i to tatou iho maitai. E rave rahi mau aamu Bibilia o te faaite ra eiaha tatou e manaˈo e faaore Iehova i te mau tamataraa atoa aore ra ua faaoti aˈena o ˈna eaha te tupu i roto i to tatou oraraa. Ua ite o ˈna e nafea tatou e oaoa ˈi. E ere no te mea ua ite tatou eaha te tupu a muri aˈe, no te mea râ ua fanaˈo tatou i ta ˈna mau aˈoraa e ua faaohipa tatou i te reira. (Ier. 10:23) Ia imi tatou i to ˈna mau manaˈo hou a rave ai i te hoê faaotiraa, mai te huru ra e te parau ra tatou: “Ia tia ia Iehova, e ora ïa tatou e e rave tatou i teie aore ra i tera.”—Iak. 4:15.
E paruru mai Iehova ia tatou, ia imi e ia pee tatou i ta ˈna aratairaa (A hiˈo i te paratarafa 14-15)b
15. Eaha ta tatou i ite no a muri aˈe?
15 Aita tatou i ite eaha te tupu i tera e tera mahana, ta tatou râ i ite ua fafau mai Iehova e fanaˈo tatou i te ora mure ore, i te raˈi anei aore i te fenua. Ua ite tatou eita o ˈna e nehenehe e haavare e aita hoê aˈe mea e nehenehe e tapea ia ˈna ia faatupu i ta ˈna i fafau. (Tito 1:2) O ˈna anaˈe te nehenehe “e tohu i te hopearaa, e mai mutaa iho ra, te mau mea aita â i ravehia ˈtura.” E parau mau iho â te reira. Ua tupu ta Iehova i tohu i mutaa iho ra, e tupu atoa ïa ta ˈna i tohu no a muri aˈe. (Isa. 46:10) Ua papu maitai ia tatou aita hoê aˈe mea e nehenehe e tapea ia Iehova ia here ia tatou. (Roma 8:35-39) E horoa mai iho â o ˈna te paari, te tamahanahanaraa e te puai ia faaoromai tamau tatou i te mau huru tupuraa atoa. Te mea papu, e haamaitai e e tauturu Iehova ia tatou.—Ier. 17:7, 8.
EITA E TAA IA TATOU TA IEHOVA I ITE NO NIA IA TATOU
16. Eaha ta Iehova i ite no nia ia tatou, e eaha to tatou manaˈo? (Salamo 139:1-6)
16 A taio i te Salamo 139:1-6. Ua ite to tatou Atua poiete i te mau mea atoa no nia ia tatou. Ua ite o ˈna no te aha tatou i manaˈo ai mai tera e eaha to tatou mau huru aau. Ua ite o ˈna i te mau mea atoa ta tatou i parau e eaha to roto i to tatou aau. Ua ite atoa o ˈna te mau mea atoa ta tatou e rave nei e no te aha tatou i na reira ˈi. Ua parau hoi te arii Davida, ua ineine noa Iehova i te tauturu ia tatou. Mea putapû ia ite e te tâuˈa mai ra te Atua Manahope, tei poiete i te mau mea atoa ia tatou! Ua parau Davida: “E ite rahi to oe, eita e haere ia ˈu ia taa i te reira.”—Sal. 139:6.
17. No te aha mea fifi paha no tatou, i te tahi taime, ia tiaturi e ua ite Iehova i te mau mea atoa no nia ia tatou?
17 Mea fifi paha no tatou ia tiaturi e Metua î i te here o Iehova e te tâuˈa ra ia tatou. No ta tatou paha i faaruru i roto i to tatou oraraa, to tatou taˈere aore ra no ta tatou i tiaturi na mua ˈˈe hou a ite ai i te parau mau. E manaˈo atoa paha tatou e hara rahi roa ta tatou i rave na mua ˈˈe, eita roa ˈtu Iehova e tâuˈa mai ia tatou. E mea atea ê roa o ˈna ia tatou. Tera hoi te manaˈo o te arii Davida. (Sal. 38:18, 21) Te tutava atoa ra paha te hoê taata i te taui i to ˈna huru oraraa no te pee i te mau ture aveia a te Atua. E manaˈo paha o ˈna i te tahi taime: ‘Mai te peu ua ite te Atua i te mau mea atoa no nia ia ˈu, no te aha ïa mea fifi no ˈu ia rave i tera mau tauiraa?’
18. No te aha mea maitai ia farii e mea ite aˈe Iehova no nia ia tatou ia tatou iho? (A hiˈo atoa i te hohoˈa.)
18 E farii anaˈe e mea ite aˈe Iehova no nia ia tatou ia tatou iho. O te maitai ta ˈna e hiˈo ra i roto ia tatou, te mea hoi ta tatou e ore e ite. Parau mau, te ite nei o ˈna i ta tatou mau hapa, teie râ ua ite o ˈna e nehenehe tatou e riro mai ei taata maitai aˈe. E mea here roa na ˈna ia tatou. (Roma 7:15) Ia taa ia tatou e ua papu ia Iehova e nehenehe tatou e taui, e horoa mai o ˈna i te puai no te tavini ia ˈna ma te taiva ore e ma te oaoa.
E tauturu Iehova ia tatou ia faaruru i te mau fifi o te oraraa ma te haapuai i to tatou tiaturi i te mau haamaitairaa ta tatou e fanaˈo i roto i te ao apî (A hiˈo i te paratarafa 18-19)c
19. Eaha ta tatou i ite maitai no nia ia Iehova?
19 Ua ite tatou e here Iehova. E parau mau roa ïa teie. (Ioa. 1, 4:8) Ua ite tatou e i roto i ta ˈna mau ture aveia e ite-maitai-hia to ˈna here no tatou e to ˈna hinaaro ia fanaˈo tatou i te hoê oraraa maitai aˈe. Ua ite tatou e te hinaaro ra Iehova ia ora tatou e a muri noa ˈtu. No reira o ˈna i horoa mai ai i te hoo. E te haapapu mai ra hoi teie ô ta Iehova i horoa mai e noa ˈtu ta tatou mau hape, e nehenehe tatou e tavini ia Iehova e e faaoaoa ia ˈna. (Roma 7:24, 25) Ua ite atoa tatou “e mea rahi aˈe te Atua i to tatou aau e ua ite o ˈna i te mau mea atoa.” (Ioa. 1, 3:19, 20) E tera iho â, ua ite Iehova i te mau mea atoa no nia ia tatou e ua papu ia ˈna e nehenehe iho â tatou e rave i to ˈna hinaaro.
20. Eaha te tauturu mai ia tatou ia ore e haapeapea rahi roa?
20 E faaite mai iho â Iehova i te mau ohipa mea faufaa ia ite tatou. Ia farii tatou i teie parau mau ma te aau faahaihai, eita ïa tatou e haapeapea rahi roa no te mau mea e aita e mana to tatou i nia iho. Teie râ, e tiatonu tatou i te mau mea faufaa roa. Ia na reira tatou, e faaite tatou ia Iehova i to tatou tiaturi ia ˈna “te Itehope.” (Ioba 36:4) Noa ˈtu aita tatou e taa ra i te tahi mau mea i teie nei, ua ite râ tatou e tamau noa Iehova i te haapii ia tatou e a muri noa ˈtu. Te tiai ru nei tatou i taua taime ra no te mea eita roa ˈtu tatou e faaea i te apo mai i te mau haapiiraa apî no nia i to tatou Atua faahiahia mau.—Koh. 3:11.
HIMENE 104 E horoa te Atua i to ˈna varua moˈa
b FAATAARAA O TE HOHOˈA: Te faaineine ra te papa e ta ˈna tamaiti i te hoê pute no te mau tupuraa ru. Ua ineine ïa ratou ia tupu noa mai te tahi ati.
c FAATAARAA O TE HOHOˈA: Te faaruru nei teie taeae i te fifi. Noa ˈtu râ, te feruri ra o ˈna i te oaoa ta ˈna e fanaˈo i roto i te ao apî.