“A maiti no outou . . . o vai ta outou e haamori”

1. Eaha te titauhia ia rave tatou no te fanaˈo i te oaoa, e no te aha? (Isaia 48:17, 18)

MEA here na to tatou Metua i te raˈi ia tatou e te hinaaro ra o ˈna ia oaoa tatou i teie nei â e a muri aˈe. (Koh. 3:12, 13) I to ˈna poieteraa ia tatou, ua horoa mai o ˈna i te aravihi ia rave i te tahi mau ohipa faahiahia. Aita râ o ˈna i poiete ia tatou e na tatou e faatere ia tatou iho aore ra e faaoti eaha te mea maitai e te mea ino. (Koh. 8:9; Ier. 10:23) Ua ite hoi o ˈna e oaoa noa tatou ia tavini tatou ia ˈna e ia pee tatou i ta ˈna mau ture aveia.—A taio i te Isaia 48:17, 18.

2. Eaha ta Satani e hinaaro ra ia manaˈo tatou, eaha râ ta Iehova i rave?

² Te hinaaro ra Satani ia manaˈo tatou e oaoa tatou aita anaˈe Iehova i roto i to tatou oraraa. Oia atoa, e nehenehe te taata e faatere ia ratou iho. (Gen. 3:4, 5) No te faaite e mea haavare Satani, ua vaiiho Iehova i te taime ia faatere te taata ia ratou iho. Tera râ, na te taata anaˈe e faatere, aita e haapaoraa. E faahopearaa ino ta tatou e ite ra i teie mahana. Area i roto i te Bibilia, te faahitihia ra te tahi mau tane e vahine tei oaoa, no te mea ua maiti ratou i te tavini ia Iehova. I roto i teie tumu parau, e ite mai ïa tatou i te hiˈoraa o Iesu Mesia, e no te aha o ˈna i maiti ai i te haamori ia Iehova. I muri mai, e hiˈopoa tatou no te aha mea tano iho â ia tavini tatou ia Iehova. I muri iho, e ite tatou i te tahi mau tumu i maiti ai tatou i te tavini ia Iehova.

NO TE AHA IESU I MAITI AI I TE TAVINI IA IEHOVA?

3. Eaha ta Satani i parau ia Iesu, eaha râ ta Iesu i faaoti?

³ A ora ˈi i te fenua, ua titauhia ia maiti Iesu o vai ta ˈna e haamori. I muri noa ˈˈe i to ˈna bapetizoraahia, ua faahema Satani ia ˈna e ua parau atu e horoa o ˈna i te mau faatereraa arii atoa o te ao nei ia tipapa Iesu no te haamori ia ˈna. Pahono atura Iesu: “A haere ê atu e Satani. Ua papaihia hoi: ‘O Iehova to oe Atua ta oe e haamori, e ia ˈna anaˈe e pûpû ai oe i te hoê taviniraa moˈa.’ ” (Mat. 4:8-10) No te aha Iesu i rave ai i tera faaotiraa? E hiˈopoa anaˈe i te tahi mau tumu.

4-5. Eaha te tahi mau tumu i maiti ai Iesu i te tavini ia Iehova?

⁴ Te tumu matamua i maiti ai Iesu i te tavini ia Iehova, no te mea ïa mea here roa na ˈna i to ˈna Metua. (Ioa. 14:31) Hau atu, ua ite Iesu e mea tano iho â ia na reira. (Ioa. 8:28, 29; Apo. 4:11) Ua ite hoi o ˈna o Iehova te Atua poiete, e nehenehe o ˈna e tiaturihia, e ua horoa mai o ˈna e rave rahi mau mea maitatai. (Sal. 33:4; 36:9; Iak. 1:17) Oia mau, e parau mau anaˈe ta Iehova i faaite ia Iesu, e ua horoa hoi oia na ˈna i te mau mea atoa. (Ioa. 1:14) Area o Satani, mea taa ê roa ïa. O te pohe ta ˈna e faatupu. E haavare hoi o ˈna o te haapao noa ia ˈna iho. (Ioa. 8:44) No reira Iesu i ore ai i pee i te huru o Satani ma te orure hau ia Iehova.—Phil. 2:5-8.

⁵ Te tahi atu tumu i maiti ai Iesu i te tavini ia Iehova, no te mea ïa ua ite o ˈna eaha te mau haamaitairaa no a muri aˈe e hopoi mai ta ˈna taviniraa. (Heb. 12:2) Ua ite o ˈna e ia vai taiva ore o ˈna, e haamoˈa oia i te iˈoa o to ˈna Metua, e e faaore-roa-hia te hara e te pohe ta te Diabolo i faatupu.

NO TE AHA MEA TANO IHO Â IA HAAMORI IA IEHOVA?

6-7. No te aha e rave rahi taata o te ore e tavini ra ia Iehova, no te aha râ mea tano iho â ia haamori tatou ia ˈna?

⁶ E rave rahi i teie mahana o te ore e tavini ra ia Iehova, no te mea aita ratou i matau ia ˈna. Aita atoa ratou i ite i to ˈna mau huru maitatai nehenehe mau. Aore atoa ratou i ite eaha ta ˈna i rave no ratou. E au ratou i te feia ta Paulo i poro i Ateno. Aita atoa ratou i ite o vai te Atua.—Ohi. 17:19, 20, 30, 34.

⁷ Ua faaite Paulo i te feia no Ateno e ua “horoa” mai te Atua mau “na te taata atoa i te ora e te aho e te mau mea atoa.” Hau atu, ua faataa Paulo: “Maoti o ˈna e ora ˈi, e hahaere ai e e vai mai ai tatou.” Inaha, na te Atua i poiete i te mau mea atoa, e “i te hoê noa taata, ua hamani oia i te mau nunaa atoa.” No reira, mea tano iho â ia haamori tatou ia ˈna.—Ohi. 17:25, 26, 28.

8. Eaha ta Iehova e ore roa e rave? A faataa na.

⁸ Ei Atua poiete e Arii hau ê o te ao taatoa, e tiaraa to Iehova no te faahepo i te taata ia tavini ia ˈna. Eita râ o ˈna e na reira. E horoa o ˈna i te mau haapapuraa e te vai mau ra o ˈna, e mea here na ˈna i te taata tataitahi. Te hinaaro nei Iehova ia riro e rave rahi taata ei hoa no ˈna e a muri noa ˈtu. (Tim. 1, 2:3, 4) No reira Iehova e faaineine ai ia tatou ia faaite ia vetahi ê eaha ta ˈna opuaraa e te mau mea faahiahia ta ˈna e rave no te huitaata. (Mat. 10:11-13; 28:19, 20) Tera atoa te tumu i haamau ai o ˈna i te mau amuiraa ia nehenehe tatou e haamori ia ˈna, a fanaˈo atu ai i te tauturu a te mau matahiapo î i te here.—Ohi. 20:28.

9. Mea nafea Iehova i te faaiteraa i to ˈna here i te mau taata atoa?

⁹ Te ite-maitai-hia ra to Iehova here no te feia aita e tiaturi ra ia ˈna. A feruri na: I te roaraa o te tau e miria taata tei faaoti eaha te mea maitai e te mea ino no ratou. Aita ratou i auraro ia Iehova. Noa ˈtu râ, ua horoa Iehova na ratou i te mau mea atoa ia ora e ia oaoa ratou. (Mat. 5:44, 45; Ohi. 14:16, 17) Maoti hoi o ˈna i fanaˈo ai ratou i te hoa, te utuafare, te tamarii e te mau maitai o ta ratou mau ohipa. (Sal. 127:3; Koh. 2:24) E haapapuraa teie e mea here roa na to tatou Metua i te raˈi i te mau taata atoa. (Exo. 34:6) E hiˈopoa mai tatou i teie nei i te tahi mau tumu i maiti ai tatou i te tavini ia Iehova, e e nafea o ˈna e haamaitai ai ia tatou.

NO TE AHA TATOU I MAITI AI I TE TAVINI IA IEHOVA?

10. (1) Eaha te tumu i maiti ai tatou i te tavini ia Iehova? (Mataio 22:37) (2) Eaha te maitai ta oe i fanaˈo inaha ua faaore Iehova i ta oe mau hara? (Salamo 103:13, 14)

¹⁰ Ua maiti tatou i te tavini ia Iehova no te mea e mea here roa na tatou ia ˈna mai ia Iesu. (A taio i te Mataio 22:37.) E hinaaro tatou e faafatata ˈtu ia Iehova, no te mea ua haapii tatou no nia i to ˈna mau huru maitatai, mai to ˈna faaoreraa i ta tatou mau hara. I to te ati Iseraela faaroo-ore-raa ia ˈna, ua taparu Iehova ia ratou: “A fariu ê mai na i ta outou mau ohipa ino.” (Ier. 18:11) Te haamanaˈo ra Iehova e taata hara tatou. (A taio i te Salamo 103:​13, 14.) Ia feruriruri oe i te mau huru maitatai o Iehova, oia hoi to ˈna faaoreraa i ta oe mau hara, eita anei te reira e turai ia oe ia tavini ia ˈna?

11. Eaha te tahi atu mau tumu i maiti ai tatou i te tavini ia Iehova?

¹¹ E hinaaro atoa tatou e tavini ia Iehova, no te mea e mea tano ia na reira. (Mat. 4:10) Hau atu, mea rahi te haamaitairaa ia vai taiva ore tatou ia ˈna. Ei hiˈoraa, e haamoˈa tatou i te iˈoa o Iehova. E haapapu tatou e haavare Satani. E faaoaoa tatou i te aau o to tatou Metua i te raˈi. Hau atu, ia maiti tatou i te tavini ia Iehova i teie mahana, e nehenehe tatou e na reira e a muri noa ˈtu!—Ioa. 17:3.

12-13. Eaha ta tatou e haapii mai i te hiˈoraa o Jane raua Pam?

¹² Ei taurearea, e nehenehe tatou e faatupu i te here ia Iehova. E puai atu â tera here ia paari mai tatou. Teie te hiˈoraa o na tuahine e piti, o Jane raua Pam.a Ahuru ma hoê e ahuru matahiti to raua a haamata ˈi raua i te haapii i te Bibilia. Ua faatia to raua na metua ia haapii raua i te Bibilia e te mau Ite no Iehova mai te peu e haere atoa raua i ta ratou pureraa i te hopea hebedoma. Te na ô ra Jane: “Maoti ta ˈu i haapii i roto i te Bibilia na muri i te mau Ite no Iehova, ua nehenehe au e mau papu i mua i te mau faahemaraa a to ˈu mau hoa haapiiraa. I faahepo na ratou ia rave au i te mau raau taero e te mau peu taotoraa tia ore.”

¹³ Tau matahiti i muri aˈe, ua riro mai Jane raua Pam ei taata poro. I muri iho, ua rave raua i te taviniraa pionie, a aupuru noa ˈi i to raua na metua tei paari roa. A feruri ai i ta Iehova i rave no raua, te haamanaˈo ra Jane: “Ua haapii au e mea aupuru roa na Iehova i to ˈna mau hoa. Ua papu atoa ia ˈu ta te Timoteo 2, 2:19 e parau ra, oia hoi ‘ua ite Iehova i to ˈna mau taata.’ ” Oia mau, mea aupuru roa na Iehova i te feia e maiti i te here e i te tavini ia ˈna.

14. E nafea tatou e paturu ai i te iˈoa o Iehova na roto i ta tatou mau parau e ohipa? (A hiˈo atoa i te hohoˈa.)

¹⁴ E hinaaro tatou ia ite te taata i te parau mau no nia ia Iehova. A feruri na: E hoa piri to oe, e taata hamani maitai e te aau horoa noa, o te faaore i ta vetahi ê hapa. I te hoê râ mahana, e pari te hoê taata e mea ino to oe hoa e mea haavare o ˈna. Eaha to oe huru? Papu e hinaaro roa oe e faaite i te parau mau. Hoê â huru raveraa ta Satani e ta te feia i raro aˈe i ta ˈna aratairaa. Ua tamata ratou i te tuino i te roo o Iehova ma te haaparare i te mau haavare no nia ia ˈna. Eaha ïa to tatou huru? E hinaaro tatou e faaite i te parau mau no nia ia Iehova, ma te paturu i to ˈna iˈoa. (Sal. 34:1; Isa. 43:10) Oia nei, e faaite papu tatou e te hinaaro ra tatou e tavini ia Iehova ma to tatou aau atoa, na roto i ta tatou mau parau e ta tatou mau ohipa.

15. Eaha te mau haamaitairaa ta te aposetolo Paulo i fanaˈo a rave ai i te mau tauiraa i roto i to ˈna oraraa? (Philipi 3:7, 8)

¹⁵ Ua ineine tatou i te rave i te mau tauiraa i roto i to tatou oraraa no te faaoaoa ia Iehova e no te tavini atu â ia ˈna. Ei hiˈoraa, e tiaraa faahiahia to te aposetolo Paulo i roto i te haapaoraa ati Iuda. Tera râ, ua maiti o ˈna i te vaiiho i te reira no te riro mai ei pǐpǐ na te Mesia e no te tavini ia Iehova. (Gal. 1:14) Ei faahopearaa, ua fanaˈo o ˈna e rave rahi haamaitairaa i roto i ta ˈna taviniraa ia Iehova. Ua fanaˈo atoa o ˈna i te haamaitairaa e faatere e o Iesu i te raˈi. Aita roa ˈtu Paulo i tatarahapa i te raveraa i teie faaotiraa. Eita atoa tatou e tatarahapa noa ˈˈe i te maiti e tavini ia Iehova.—A taio i te Philipi 3:7, 8.

16. Eaha te haapii mai i te hiˈoraa o Julia? (A hiˈo atoa i te hohoˈa.)

¹⁶ Ia tuu tatou i ta tatou taviniraa ia Iehova i te parahiraa matamua o to tatou oraraa, e fanaˈo tatou i te haamaitairaa i teie nei â e a muri aˈe. Teie te hiˈoraa o tuahine Julia. Hou o ˈna a ite ai i te parau mau, i to ˈna nainairaa, i himene na Julia i roto i te fare pure. Inaha mea ite roa o ˈna i te himene, ua fanaˈo ïa o ˈna i te hoê faaineineraa no te riro mai ei taata himene opera. Aita i maoro, ua tuˈi to ˈna roo, e ua himene o ˈna i roto i te mau vahi matau-roa-hia. A haere ai o ˈna i te fare haapiiraa upaupa tuiroo, ua paraparau te hoê hoa haapiiraa ia ˈna no nia i te Atua, e ua faaite atu o Iehova te iˈoa o te Atua. Haapii ihora Julia i te Bibilia e piti taime i te hebedoma. E ua faaoti o ˈna i te tavini ia Iehova, eiaha râ e riro mai ei taata himene tuiroo. E ere râ i te mea ohie no ˈna ia rave i teie faaotiraa. Te na ô ra o ˈna: “E rave rahi taata tei parau mai ia ˈu, ‘Mâuˈa noa tera reo to oe.’ Tera râ, ua hinaaro iho â vau e tavini ia Iehova ma te taime taatoa.” Eaha to Julia manaˈo i teie nei, a feruri ai i te faaotiraa ta ˈna i rave a 30 matahiti aˈenei? Te na ô ra Julia: “Oaoa iti rahi to ˈu i te maitiraa i te tavini ia Iehova, e ua ite au e faatupu Iehova a muri aˈe i ta to ˈu aau e hinaaro mau.”—Sal. 145:16.

A TAMAU I TE TAVINI IA IEHOVA

17. Inaha te ora nei tatou i te taime hopea o teie nei ao, eaha ïa to tatou huru mai te peu ua maiti aˈena tatou i te tavini i te Atua, e eaha te tupu no te feia aita â i tavini atura ia Iehova?

¹⁷ Te ora nei tatou i te taime hopea o teie nei ao. Ua papai te aposetolo Paulo: “Noa ˈtu e ‘taime poto roa’ te toe ra, e ‘e tae mai o tei haere mai nei e e ore oia e maoro.’ ” (Heb. 10:37) Eaha to tatou huru a ite ai i te reira? Te auraa, mea iti roa te taime e toe ra no te taata ia maiti i te tavini ia Iehova. (Kor. 1, 7:29) Mai te peu râ ua maiti aˈena tatou i te tavini i te Atua, ua ite tatou e noa ˈtu e faaruru tatou i te mau fifi, e faaruru tatou i te reira no te hoê taime poto roa.

18. Eaha ta Iesu raua Iehova e faaitoito ra ia tatou ia rave?

¹⁸ Ua faaitoito Iesu i ta ˈna mau pǐpǐ ia pee ia ˈna e ia tamau noa i te na reira. (Mat. 16:24) No reira, mai te peu mea maoro tatou i te taviniraa ia Iehova, e tamau anaˈe ïa i te na reira. E titauhia ia tutava tatou i te ora ia au i ta tatou faaotiraa e tavini ia Iehova. Papu, e ere roa ˈtu i te mea ohie. Tera râ, e fanaˈo tatou i te oaoa e e rave rahi haamaitairaa i teie nei â.—Sal. 35:27.

19. Eaha ta tatou e haapii mai i te hiˈoraa o Eugène?

¹⁹ Te manaˈo ra vetahi ia tavini ratou ia Iehova, eita ratou e oaoa i roto i to ratou oraraa. E te feia apî, tera atoa anei to outou manaˈo? Te na ô ra Eugène te hoê taeae apî: “I manaˈo na vau e mea rahi te mau faatureraa ei Ite no Iehova. Ia hiˈo vau i te mau taurearea hoê â matahiti e to ˈu, te oaoa ra ratou. E nehenehe ta ratou e arearea, haamatau i te hoê apiti, hauti i te mau hauti video e haavîraa uˈana to roto. Area râ vau, haere ïa vau i te mau putuputuraa e i roto i te taviniraa.” Eaha tei tupu no Eugène i muri mai? Te faatia ra o ˈna: “Ua pee au i te mau raveraa a te mau taurearea. I te haamataraa, ua au roa vau. Tera râ, aita te reira i hopoi mai i te oaoa mau. Feruri ihora vau i ta ˈu i haapii i roto i te Bibilia, e faaoti atura vau e tavini ia Iehova ma to ˈu aau atoa. Mai reira mai, e au ra e ua pahono Iehova i ta ˈu mau pure atoa.”

20. Ia faaoti papu tatou i te aha?

²⁰ Ua himene te papai Salamo ia Iehova: “E oaoa te taata ta oe e maiti e ta oe e haafatata no te parahi i roto i to mau aua.” (Sal. 65:4) No reira, e faaoti papu anaˈe i te tavini noa ia Iehova. Mai ia Iosua, e parau tatou: “Area vau e to ˈu utuafare, e tavini matou ia Iehova.”—Ios. 24:15.