TUMU PARAU HAAPIIRAA 15
HIMENE 30 E Atua, Hoa, Metua oia no ˈu
Mea maitai no tatou “ia faafatata ˈtu i te Atua”
“Mea maitai . . . no ˈu ia faafatata ˈtu i te Atua.”—SAL. 73:28.
MANAˈO FAUFAA
E ite mai tatou e nafea ia faafatata ia Iehova e eaha te mau haamaitairaa ia na reira tatou.
1-2. (1) Eaha te titauhia no te faahoa ˈtu i te hoê taata? (2) Eaha ta teie tumu parau e faataa mai?
E HOA anei to oe mea piri roa orua? Mea nafea to orua riroraa mai ei hoa? Papu roa ua aparau orua, a ite atu ai oe i ta ˈna i faaruru, i ta ˈna e au e ta ˈna e au ore. Ua itea atoa mai ia oe i to ˈna mau huru maitatai ta oe atoa e hinaaro e faatupu. E ua here roa ˈtura oe i to oe hoa.
2 E titauhia ïa te taime e te tutavaraa no te faahoa ˈtu i te hoê taata. Hoê â huru no te riro ei hoa no te Atua ra o Iehova. E faataa mai teie tumu parau e nafea ia riro ei hoa piri roa no ˈna e eaha te mau haamaitairaa e fanaˈo tatou. Na mua, e hiˈo mai tatou no te aha mea maitai no tatou ia faafatata i to tatou Hoa rahi roa ˈˈe o Iehova.
3. No te aha mea faufaa ia feruriruri i te mau haamaitairaa ia faafatata ˈtu ia Iehova? A horoa i te hoê hiˈoraa.
3 Mea papu e farii iho â oe e mea maitai ia faafatata ˈtu ia Iehova. Eita râ e navai. Mea tano atoa ia feruriruri eaha te mau haamaitairaa ia na reira tatou. E hinaaro atu â ïa tatou e tamau i te faafatata ˈtu ia ˈna. (Sal. 63:6-8) Ei hiˈoraa, ua ite tatou pauroa e mea maitai ia haapao i ta tatou maa, ia faaetaeta i te tino, ia taoto maitai e ia inu i te pape. Aita râ e rave rahi e haapao nei i teie mau mea. Aita iho â ïa ratou e tâuˈa nei i to ratou ea. O tatou râ, ia feruri tatou eaha te mau maitai e noaa mai, e haapao maitai noa ïa tatou i to tatou ea. Hoê â huru ia faafatata tatou ia Iehova, mea maitai iho â no tatou. Ia feruriruri râ tatou i te mau haamaitairaa e noaa mai, e hinaaro ïa tatou e tamau i te tapiri atu i to tatou Hoa o Iehova.—Sal. 119:27-30.
4. Eaha ta te papai Salamo i parau i roto i te Salamo 73:28?
4 A taio i te Salamo 73:28. E ati Levi tei papai i te Salamo 73 tei tavini na i roto i te hiero o Iehova ei hauti upaupa. Papu mea maoro to ˈna haamoriraa ia Iehova. Teie râ, ua taa ia ˈna te faufaaraa ia haamanaˈo o ˈna e vetahi ê e mea maitai no ˈna e no ratou “ia faafatata ˈtu i te Atua.” Eaha ïa te tahi mau haamaitairaa ia faariro ia Iehova ei hoa no tatou?
E OAOA TATOU “IA FAAFATATA ˈTU I TE ATUA”
5. (1) No te aha tatou e oaoa ˈi ia piri atu â tatou ia Iehova? (2) E nafea te paari ta Iehova e horoa mai ra e paruru ai ia oe? (Maseli 2:6-16)
5 Ia piri atu â tatou ia Iehova, e oaoa ˈtu â ïa tatou. (Sal. 65:4) E parau mau iho â teie. No te aha? No te mea e maitaihia tatou ia faaohipa tatou i te paari e vai ra i roto i ta ˈna Parau, te Bibilia. E paruru hoi taua paari ra ia tatou i te mau taata haerea ino e ia ore tatou e rave i te hara rahi. (A taio i te Maseli 2:6-16.) No reira te Bibilia e parau ai: “E oaoa te taata o te ite mai i te paari e te taata e noaa mai ia ˈna te haroˈaroˈa.”—Mas. 3:13.
6. No te aha te papai Salamo i ere ai i to ˈna oaoa?
6 Parau mau, e oto atoa te mau hoa o Iehova i te tahi mau taime. Ua oto atoa hoi tei papai i te Salamo 73. Aita o ˈna i oaoa faahou no to ˈna mau manaˈo tano ore. A ite ai oia te maitai noa ra te feia ino e te feia teoteo, aita hoi ratou e tâuˈa ra ia Iehova e ta ˈna mau ture aveia, ua riri roa o ˈna e ua pohehae. Ua manaˈo o ˈna e rahi noa ˈtu â ta ratou mau taoˈa, e maitai noa ˈtu â to ratou tino, eita atoa ratou e roohia i te mauiui. (Sal. 73:3-7, 12) No to ˈna horuhoru, ua manaˈo roa o ˈna aita e faufaa ia tavini ia Iehova. Ua parau hoi o ˈna: “Mea faufaa ore to ˈu tapearaa i te hoê aau viivii ore e to ˈu horoiraa i to ˈu rima i te hara ore.”—Sal. 73:13.
7. Eaha te rave ia oto tatou? (A hiˈo atoa i te hohoˈa.)
7 Noa ˈtu to ˈna oto rahi, ua taui te papai Salamo i to ˈna huru feruriraa. Eaha ta ˈna i rave? Ua ‘tomo o ˈna i roto i te nao rahi a te Atua,’ i reira to Iehova faaafaroraa i to ˈna huru feruriraa. (Sal. 73:17-19) E ite mai Iehova to tatou Hoa rahi roa ˈˈe ia oto tatou. Ia pure tatou ia ˈna no te ani i ta ˈna aratairaa e ia farii tatou i ta ˈna tauturu na roto i ta ˈna Parau e te amuiraa, e noaa ia tatou te puai no te tavini noa ia ˈna noa ˈtu to tatou oto. Ia rahi atoa to tatou ahoaho, na Iehova e tamahanahana e e tamǎrû ia tatou.—Sal. 94:19.a
Te tia ra te ati Levi tei papai i te Salamo 73 i roto i “te nao rahi a te Atua” (A hiˈo i te paratarafa 7)
HAAMAITAIRAA I TEIE NEI E A MURI AˈE “IA FAAFATATA ˈTU I TE ATUA”
8. Eaha ˈtu â na haamaitairaa ia faafatata ˈtu tatou ia Iehova?
8 E piti atu â haamaitairaa e fanaˈo tatou ia faafatata ˈtu ia Iehova. A tahi, e maitaihia to tatou oraraa i teie nei â. A piti, e tiaturiraa papu to tatou no a muri aˈe. (Ier. 29:11) E hiˈopoa ïa tatou i teie na haamaitairaa.
9. No te aha tatou e oaoa ˈi ia riro Iehova ei hoa rahi no tatou?
9 E maitaihia to tatou oraraa ia riro Iehova ei hoa rahi no tatou. I teie mahana, te parau ra e rave rahi aita e Atua. Aita ïa ratou i ite eaha ta te taata ohipa i te fenua nei. Te tiaturi nei ratou e ia tae i te hoê mahana aita e taata faahou. Auaˈe râ tatou i haapii i te Bibilia i papu ai ia tatou e “te ora ra” Iehova e na ˈna e “haamaitai i te feia e imi maite nei ia ˈna.” (Heb. 11:6) I teie nei â, te oaoa nei tatou, no te mea te tavini nei tatou ia Iehova to tatou Metua i te raˈi, tera hoi te tumu i hamani ai o ˈna ia tatou.—Deut. 10:12, 13.
10. Eaha ta Iehova i fafau i te feia e tiaturi ra ia ˈna? (Salamo 37:29)
10 Te oraraa o te taata e rave rahi i teie mahana, te rave-noa-raa ïa i te ohipa, te fanauraa i te tamarii, e te haaputuraa i te moni ia faatuhaahia ratou. Aita Iehova i roto i to ratou oraraa. O tatou râ, ua ite ïa e aupuru Iehova i ta ˈna mau tavini. (Sal. 25:3-5; Tim. 1, 6:17) Te tiaturi nei tatou i to tatou Atua e Hoa. Ua papu ia tatou e rave iho â o ˈna mai ta ˈna i fafau. Mea rahi roa te haamaitairaa ta tatou e tiai ru nei, oia atoa te haamoriraa ia Iehova e a muri noa ˈtu i roto i te paradaiso.—A taio i te Salamo 37:29.
11. Eaha atoa te haamaitairaa ia faafatata ia Iehova, e eaha to ˈna huru ia na reira tatou?
11 Mea rahi â te haamaitairaa ia faafatata tatou ia Iehova. Ei hiˈoraa, ua fafau o ˈna i te faaore i ta tatou mau hara ia tatarahapa tatou. (Isa. 1:18) Eita ïa tatou e faahapa noa ia tatou no te mau hara ta tatou i rave na. (Sal. 32:1-5) E oaoa atoa o ˈna ia faafatata tatou ia ˈna. (Mas. 23:15) Mea rahi â te haamaitairaa e fanaˈo tatou no te mea e hoa tatou no Iehova. Mea faufaa roa râ ia tamau tatou i te faafatata ia ˈna. Eaha ïa te rave?
E NAFEA IA TAMAU I TE “FAAFATATA ˈTU I TE ATUA”?
12. Eaha ta oe i rave no te faafatata ia Iehova?
12 Hou oe a bapetizohia ˈi ei Ite no Iehova, mea rahi te tutavaraa ta oe i rave no te riro ei hoa no Iehova. Ua haapii oe i te parau mau no nia ia ˈna, ia Iesu, ua tatarahapa oe i ta oe mau hara, ua faatupu i te faaroo puai ia Iehova e ua faaitoito oe i te haapao i to ˈna hinaaro. Teie râ, e titauhia ia tamau oe i te na reira no te piri roa ˈtu â ia Iehova.—Kol. 2:6.
13. Eaha te tauturu mai ia piri noa tatou ia Iehova?
13 Eaha te tauturu mai ia piri noa tatou ia Iehova? (1) Te tamauraa ïa tatou i te taio e te haapii i te Bibilia, eiaha noa no te apo mai i te haapiiraa no nia ia Iehova. Oia atoa râ, no te taa eaha ta ˈna e hinaaro ra ia rave tatou, e no te haapao i ta ˈna mau aratairaa i roto i te Bibilia. (Eph. 5:15-17) (2) Te haapuairaa i to tatou faaroo ma te feruriruri i te mau haapapuraa e mea here iho â na Iehova ia tatou. (3) Te tamauraa tatou i te au ore i te mau mea e haamauiui ia Iehova, eiaha atoa e faahoa i te feia e rave ra i taua mau mea ra.—Sal. 1:1; 101:3.
14. Eaha ta tatou e rave no te faaoaoa ia Iehova? (Korinetia 1, 10:31) (A hiˈo atoa i te hohoˈa.)
14 A taio i te Korinetia 1, 10:31. Mea faufaa roa ia rave tatou i te mau mea o te faaoaoa ia Iehova, mai te haereraa i roto i te taviniraa e i te mau putuputuraa. Eita râ e navai. I roto i to tatou oraraa i te mau mahana atoa e faaoaoa ˈi tatou ia ˈna. Ma te faaite anei i te hoê haerea afaro e ma te tufa i ta tatou mau mea na vetahi ê. (Kor. 2, 8:21; 9:7) Te hinaaro atoa ra o ˈna ia haafaufaa tatou i te ô o te ora. E haapao maitai tatou ia tamaa e ia inu tatou, ma te tanotano noa ïa. E rave atoa tatou i te tahi mau mea no te maitai o to tatou ea. E here roa ˈtu â Iehova ia tatou no ta tatou mau tutavaraa i te faaoaoa ia ˈna, tae noa ˈtu i roto i te mau mea haihai.—Luka 16:10.
E faaoaoa tatou ia Iehova ma te haapao maitai ia faahoro tatou i te pereoo, i to tatou ea ma te amu i te maa maitai e te faaetaeta i te tino, e ma te tufa i ta tatou mau mea na vetahi ê (A hiˈo i te paratarafa 14)
15. Eaha ta Iehova e hinaaro ra ia rave tatou?
15 Mea hamani maitai Iehova i te feia parau-tia e te feia parau-tia ore atoa. (Mat. 5:45) Te hinaaro ra o ˈna ia na reira atoa tatou. Ei hiˈoraa, “eiaha ia faaino i te taata e eiaha ia tatamaˈi,” ia faaite râ tatou i “te mǎrû i nia i te taata atoa.” (Tito 3:2) Eita ïa tatou e manaˈo e mea faahiahia aˈe tatou i te feia aita e tiaturi ra ia Iehova. (Tim. 2, 2:23-25) Ia hamani maitai noa tatou i te taata atoa, e piri roa ˈtu â tatou ia Iehova.
A “FAAFATATA ˈTU I TE ATUA” IA HAPA ATOA TATOU
16. Eaha te manaˈo o tei papai i te Salamo 73 i muri aˈe i to ˈna taviniraa ia Iehova e rave rahi matahiti?
16 I te tahi taime, e manaˈo paha tatou aita Iehova e here faahou ra ia tatou no te mau hapa ta tatou i rave na. A haamanaˈo ïa i tei papai i te Salamo 73. Ua na ô o ˈna: “Ua fatata roa . . . to ˈu avae i te hahi ê. Ua fatata roa to ˈu avae i te hee.” (Sal. 73:2) Ua parau roa o ˈna e ua “toaruaru” o ˈna, e “maamaa” to ˈna e ua riro o ˈna “mai te hoê animara aita e feruriraa” i mua ia Iehova. (Sal. 73:21, 22) Teie râ, ua manaˈo anei o ˈna aita Iehova e here faahou ra ia ˈna no to ˈna hahi-ê-raa?
17. (1) Eaha ta te papai Salamo i rave i to ˈna toaruaru-roa-raa? (2) Eaha te haapiiraa e huti mai i to ˈna hiˈoraa? (A hiˈo atoa i te hohoˈa.)
17 Eita e ore no te hoê taime poto noa to te papai Salamo manaˈoraa aita Iehova e here faahou ra ia ˈna. E au ra e i taua taime atoa ra, ua taa ia ˈna e mea faufaa roa ia faafatata o ˈna ia Iehova. Ua parau hoi o ˈna: “I teie nei râ, tei pihai iho noa vau ia oe [e Iehova]. Ua tapea oe i to ˈu rima atau. Te aratai ra oe ia ˈu i ta oe aˈoraa, e e aratai oe ia ˈu i te hanahana.” (Sal. 73:23, 24) Mea faufaa atoa ia ani tatou i ta Iehova tauturu ia paruparu to tatou faaroo aore ra ia toaruaru tatou no ta tatou mau hapa. (Sal. 73:26; 94:18) E noa ˈtu e hara rahi ta tatou i rave, e nehenehe tatou e fariu ia Iehova ra, “ua ineine [hoi o ˈna] i te faaore i te hara.” (Sal. 86:5) Mea faufaa iho â râ ia faafatata ia Iehova ua toaruaru roa anaˈe tatou.—Sal. 103:13, 14.
Ua paruparu anaˈe tatou i te pae varua, mea faufaa roa ia faafatata ˈtu â ia Iehova ma te faarahi i te pure e ma te haere i te mau putuputuraa atoa (A hiˈo i te paratarafa 17)
A “FAAFATATA ˈTU I TE ATUA” E A MURI NOA ˈTU
18. No te aha tatou e faafatata noa ˈi ia Iehova e a muri noa ˈtu?
18 E nehenehe tatou e faafatata noa ia Iehova e a muri noa ˈtu. Inaha e tamau noa tatou i te haapii mai no nia ia ˈna. Te parau ra hoi te Bibilia “eita e noaa ia tatou ia taa” i to Iehova mau haerea, to ˈna paari e to ˈna ite.—Roma 11:33.
19. Eaha ta te Salamo e haapapu mai ra?
19 Te na ô ra te Salamo 79:13: “I reira matou, to nunaa e te nǎnǎ mamoe o ta oe vahi aihere, e haamauruuru ai ia oe e a muri noa ˈtu. E arue matou ia oe mai tera e tera uˈi.” A tamau noa ˈi oe i te faafatata ia Iehova, e haamaitai o ˈna ia oe e a muri noa ˈtu. E parau ïa oe: “O te Atua . . . te mato o to ˈu aau e ta ˈu tuhaa e a muri noa ˈtu.”—Sal. 73:26.
HIMENE 32 A tia no Iehova!
a Mea maoro paha vetahi i te faarururaa i te ahoaho, te toaruaru aore ra te oto. Mea tano paha ïa ia farerei ratou i te hoê taote. No te ite atu â, a hiˈo i Te Pare Tiairaa No 1 2023.