E pahono anei Iehova i ta ˈu mau pure?

1-2. No te aha tatou e manaˈo ai e aita paha Iehova e pahono ra i ta tatou mau pure?

“IA OAOA roa oe ia Iehova, e e horoa mai oia i ta to aau e hinaaro ra.” (Sal. 37:4) Auê ïa parau mahanahana! Te auraa anei râ e e horoa mai Iehova i ta tatou i ani atu i tera iho â taime? Teie te tahi mau hiˈoraa. Na roto i te pure, ua faaite te hoê tuahine i to ˈna hinaaro e apiti i te Haapiiraa no te feia poro i te parau apî oaoa o te Basileia. Tau matahiti râ tei mairi e aita â o ˈna i titauhia ˈtura. I to ˈna pae, ua ani hoê taeae ia Iehova ia faaora i to ˈna maˈi haaparuparu no te tavini hau atu â i roto i te amuiraa. Aita râ to ˈna ea i maitai mai. Ua pure atoa te tahi mau metua Kerisetiano ia mau papu ta ratou mau tamarii i roto i te parau mau, ua atea ê râ ratou ia Iehova.

² Peneiaˈe ua pure outou ia Iehova e aita outou i ite i te pahonoraa. E na ô paha ïa outou: ‘E pahono noa Iehova i te pure a vetahi ê, eiaha râ ta ˈu. Aore ra ua rave paha ïa vau i te hoê hape.’ Tera atoa ta Janiceb i manaˈo na. Na roto i te pure, ua faaite raua ta ˈna tane i to raua hinaaro e tavini i te Betela. Te parau ra o ˈna: “Ua manaˈo roa vau e eita mâua e tiai maoro ia titauhia mâua i te Betela.” Tiairaa ïa raua tau avaˈe, tau matahiti e aita â raua i titauhia ˈtura. Te na ô ra Janice: “Ua oto e ua haapeapea roa vau. Ua feruri au eaha râ ta ˈu i rave i inoino ai Iehova. Mea papu maitai hoi ta ˈu pure, ua hinaaro vau i ta ˈna aratairaa. No te aha hoi o ˈna i ore ai i pahono i ta ˈu pure?”

3. Eaha te mau uiraa ta tatou e pahono i roto i teie tumu parau haapiiraa?

³ I te tahi taime, e ui paha tatou e e faaroo anei Iehova i ta tatou mau pure. Tera atoa ta te tahi mau tavini haapao maitai i tahito ra i ui na. (Ioba 30:20; Sal. 22:2; Hab. 1:2) E hiˈo mai tatou i te haapapuraa e e pahono iho â Iehova i ta tatou mau pure. (Sal. 65:2) E pahono ïa tatou i to muri nei mau uiraa: (1) E nafea Iehova e pahono ai i ta tatou mau pure? (2) Eaha ta Iehova e titau ra ia tatou? (3) No te aha e tia ˈi ia faatanotano i ta tatou mau pure i te tahi taime?

EAHA TA TATOU E PAPU A PURE AI IA IEHOVA?

4. Ia au i te Ieremia 29:12, eaha ta Iehova i fafau mai?

⁴ Ua fafau Iehova e e faaroo o ˈna i ta tatou mau pure. (A taio i te Ieremia 29:​12.) Mea here na to tatou Atua i ta ˈna mau tavini taiva ore, eita ïa o ˈna e fariu ê i ta ratou mau pure. (Sal. 10:17; 37:28) E ere râ i te auraa e e farii noa o ˈna i ta tatou mau aniraa. No te tahi mau aniraa, e titauhia paha ia tiai roa i roto i te ao apî ia tupu te reira.

5. Eaha ta Iehova e hiˈo a faaroo ai i ta tatou mau pure? A faataa.

⁵ E hiˈo Iehova e te tuati ra anei ta tatou aniraa i ta ˈna opuaraa no te huitaata. (Isa. 55:8, 9) I roto i te opuaraa a Iehova, e ora te taata i nia i te fenua ma te oaoa e te tahoê e e auraro ratou paatoa i ta ˈna faatereraa. No Satani râ, mea au aˈe e na te taata e faatere ia ratou iho. (Gen. 3:1-5) No te haapapu e e haavare te Diabolo, ua vaiiho ïa Iehova i te taata ia faatere ia ratou iho. Ei faahopearaa, ua ati roa te huitaata i teie mahana. (Koh. 8:9) Eita Iehova e faatitiaifaro i te reira i teie nei â, aˈunei vetahi e manaˈo ai e na te taata iho i faatitiaifaro i to ratou mau fifi.

6. No te aha mea faufaa ia papu ia tatou e e haa noa Iehova ma te here e te parau-tia?

⁶ Hoê â aniraa, e ere râ hoê â pahonoraa. Ei hiˈoraa, ua maˈi-roa-hia te arii Hezekia e ua taparu oia ia Iehova ia faaora ia ˈna e faaora ihora Iehova ia ˈna. (Arii 2, 20:1-6) I te aniraa râ te aposetolo Paulo ia Iehova ia tatara i te ‘tara i roto i to ˈna tino,’ aita Iehova i na reira. (Kor. 2, 12:​7-⁠9) A hiˈo atoa na i te tupuraa o te aposetolo Iakobo e Petero. Mai pohe raua toopiti i te rima o te arii Heroda. Ua pure te amuiraa no Petero e eita e ore no Iakobo atoa. Ua faaora-semeio-hia Petero, area Iakobo, ua haapohehia ïa. (Ohi. 12:1-11) E ui paha tatou: ‘No te aha Iehova i faaora ˈi ia Petero eiaha râ ia Iakobo?’ Aita te Bibilia e faaite ra.c Te mea papu râ no Iehova, “aita roa to ˈna e parau-tia ore.” (Deut. 32:4) Ua ite tatou e ua fanaˈo Petero e o Iakobo atoa i te farii maitai a Iehova. (Apo. 21:14) I te tahi taime, e faaû tatou i te fifi manaˈo-ore-hia. No te mea râ ua papu ia tatou e e pahono Iehova i ta tatou mau pure ma te tano e te here, eita tatou e ui maere i ta ˈna pahonoraa.—Ioba 33:13.

7. No te aha e ore ai tatou e faaau i to tatou tupuraa i to vetahi ê?

⁷ Ua ite tatou e eiaha e faaau i to tatou tupuraa i to vetahi ê. Ei hiˈoraa, e nehenehe tatou e ani ia Iehova ia tauturu ia tatou i roto i te hoê tupuraa taa maitai, aita râ e pahonoraa. I muri iho, e faaroo tatou e tera atoa ta te hoê hoa Kerisetiano i ani ia Iehova e e au ra e ua pahono Iehova i ta ˈna pure. Ta te tuahine Anna ïa i ora mai. Ua pure o ˈna ia ora mai ta ˈna tane, o Matthew, i te maˈi mariri ai taata. I tera mau mahana, ua roo-atoa-hia e piti tuahine paari i te hoê â maˈi. Pure ihora Anna no Matthew e no tera na tuahine. Ora mai nei na tuahine, ua faarue mai râ Matthew. I te haamataraa, ua manaˈo Anna e na Iehova i faaora i tera na tuahine ei pahonoraa i ta ˈna pure. Ahani te reira iho â, no te aha ïa aita o ˈna i faaora atoa i ta ˈna tane mai ta ˈna i ani? Papu, aita tatou i ite i te tumu i ora mai ai na tuahine e piti. Ua ite râ tatou e e ravea ta Iehova no te faaore i te mau mauiui atoa e a muri noa ˈtu e te ru nei oia i te faaora mai i to ˈna mau hoa tei pohe.—Ioba 14:15.

8. (1) Ia au i te Isaia 43:2, e nafea Iehova e tauturu ai ia tatou? (2) E nafea te pure e tauturu mai ai ia faaruru tatou i te fifi? (A hiˈo i te video E tauturu mai te pure i mua i te fifi.)

⁸ Eita Iehova e faaea i te tauturu ia tatou. No te mea e Metua here Iehova, eita o ˈna e au ia mauiui tatou. (Isa. 63:9) Eita râ o ˈna e arai i te mau tamataraa atoa tei au i te anavai e te auahi. (A taio i te Isaia 43:2.) Tera râ, ua haapapu oia e e tauturu mai o ˈna “ia na roto” atu tatou i te reira. Eita oia e vaiiho i tera mau ati ia haafifi ia tatou e a muri noa ˈtu. E horoa mai oia i to ˈna varua moˈa no te faaoromai i te fifi. (Luka 11:13; Phil. 4:13) No reira, ia papu ia tatou e e horoa mai o ˈna i ta tatou e hinaaro mau ra no te faaoromai i te ati e no te vai taiva ore ia ˈna.d

EAHA TA IEHOVA E TITAU RA IA TATOU?

9. Ia au i te Iakobo 1:6, 7, no te aha mea faufaa ia tiaturi tatou e e tauturu mai Iehova?

⁹ E titau Iehova ia tatou ia tiaturi ia ˈna. (Heb. 11:6) I te tahi taime, mea teimaha roa te hoê ati, e au ra e eita e noaa ia tatou ia faaruru. E feaa roa paha tatou e e tauturu anei iho â Iehova ia tatou. Te haapapu mai ra râ te Bibilia e maoti te puai o te Atua “e nehenehe ai [tatou] e pauma i nia i te hoê patu.” (Sal. 18:29) Eita ïa tatou e feaa, e pure râ tatou ma te tiaturi papu e e pahono mai Iehova.—A taio i te Iakobo 1:6, 7.

10. A horoa i te tahi hiˈoraa e nafea ia haa ia au i ta tatou mau pure.

¹⁰ E titau Iehova ia tatou ia haa ia au i ta tatou mau pure. Ei hiˈoraa, e ani te hoê taeae ia Iehova ia horoahia mai ta ˈna mahana faafaaearaa no te apiti i te tairururaa. E nafea Iehova ia pahono i tera pure? E nehenehe o ˈna e horoa i te taeae i te itoito no te ani i to ˈna paoti, e tia râ i te taeae ia haere roa ˈtu e farerei ia ˈna. Peneiaˈe e titauhia ia ˈna ia onoono i te ani i to ˈna paoti aore ra ia taui i te mahana ohiparaa e te tahi hoa rave ohipa. Aore ra, e rave o ˈna i te mahana faafaaearaa noa ˈtu eita o ˈna e aufauhia.

11. No te aha e tia ˈi ia tamau i te pure ia haapeapea tatou?

¹¹ E titau Iehova ia tatou ia tamau i te pure ia haapeapea tatou. (Tes. 1, 5:17) Ua haapii mai iho â Iesu e eita ta tatou mau aniraa atoa e faatupuhia i reira iho. (Luka 11:9) Eiaha râ e tuu! A tamau i te pure ma te aau atoa. (Luka 18:1-7) Ia tamau tatou i te ani i te tahi ohipa, e faaite tatou ia Iehova e mea faufaa roa te reira no tatou. E ite atoa mai o ˈna e ua papu ia tatou e nehenehe ta ˈna e tauturu mai.

E TITAUHIA PAHA IA FAATANOTANO I TA TATOU MAU ANIRAA

12. (1) Hou a faatae ai i te tahi aniraa ia Iehova, eaha ta tatou e feruri e no te aha? (2) E nafea tatou e ite ai e te faatura ra tatou ia Iehova i roto i ta tatou mau pure? (A hiˈo i te tumu parau tarenihia “Te faaite ra anei ta tatou mau aniraa mea faatura na tatou ia Iehova?”)

¹² Ia ore tatou ia fanaˈo i ta tatou i ani i roto i te pure, e toru uiraa ta tatou e ui ia tatou iho. A tahi, ‘Mea tano anei ta ˈu aniraa?’ Pinepine, e manaˈo tatou e ua ite tatou eaha te mea maitai no tatou. Te parau mau râ, aita tatou i ite eaha te mea maitai roa ˈ ˈe no tatou. Ia pure tatou no te tahi fifi, eita e ore e te vai ra te hoê ravea maitai aˈe i te mea ta tatou e ani ra. E i te tahi taime, eita ta tatou aniraa e tuati ra i te hinaaro o Iehova. (Ioa. 1, 5:14) Te haamanaˈo ra anei outou i te mau metua ta tatou i faahiti i te omuaraa? Ua ani raua ia mau papu ta raua tamarii i roto i te parau mau. E au ra e mea tano ta raua aniraa. Tera râ, eita Iehova e faahepo i te taata ia tavini ia ˈna. E hinaaro o ˈna e na tatou iho, oia atoa ta tatou mau tamarii, e faaoti i te tavini ia ˈna. (Deut. 10:12, 13; 30:19, 20) No reira, mea tano aˈe ia ani teie na metua ia tauturu Iehova ia raua ia haaputapû i te aau o ta raua tamarii a riro atu ai ratou ei hoa no ˈna.—Mas. 22:6; Eph. 6:4.

13. Ia au i te Hebera 4:16, i teihea taime Iehova e tauturu ai ia tatou? A faataa.

¹³ Te piti o te uiraa te tia ia uihia, ‘Teie anei iho â te taime e horoa mai ai Iehova i ta ˈu i ani atu?’ E hinaaro tatou ia pahono mai Iehova i tatou mau aniraa, i te taime iho â e pure ai tatou ia ˈna. Ia ite mai râ tatou, o Iehova tei ite eaha te taime tano. (A taio i te Hebera 4:16.) Aita anaˈe Iehova i horoa mai i ta tatou i ani, i tera iho â taime, aita ïa Iehova i farii i te reira. Peneiaˈe râ aita â te taime i tae mai atura. A haamanaˈo na te taeae apî tei ani ia Iehova ia faaora i to ˈna maˈi. Ahani Iehova i faaora semeio ia ˈna, e mârô Satani ia Iehova e e tavini noa te taeae ia ˈna no te mea ua faaora o ˈna i to ˈna maˈi. (Iob 1:9-11; 2:4) Hau atu, ua faataa ê na Iehova i te hoê mahana e faaore ai oia i te mau maˈi atoa. (Isa. 33:24; Apo. 21:3, 4) A tiai noa ˈtu ai i tera mahana, eiaha tatou e tiaturi e e ora semeio to tatou mau maˈi. E nehenehe ïa te taeae e ani ia Iehova i te puai e te hau o roto no te faaoromai i to ˈna maˈi e no te tamau i te tavini i te Atua.—Sal. 29:11.

14. Eaha ta outou e haapii mai i te hiˈoraa o Janice?

¹⁴ Te haamanaˈo ra anei outou ia Janice tei pure no te tavini i te Betela? E pae matahiti i muri iho, ua taa ia ˈna mea nafea Iehova i te pahonoraa i ta ˈna pure. Te parau ra oia: “Ua faaohipa Iehova i tera roaraa matahiti no te haapii e no te faaineine ia ˈu. Mea titauhia ia haapuai au i to ˈu tiaturi ia ˈna e ia haapao maitai i ta ˈu mau ohipa pae varua. Ua taa atoa ia ˈu e mea faufaa ia oaoa noa vau noa ˈtu eaha to ˈu tupuraa.” I muri aˈe, ua titauhia Janice raua ta ˈna tane i roto i te tuhaa haaati. A feruri ai o ˈna i tera mau matahiti, te na ô ra Janice: “Ua pahono Iehova i ta ˈu mau pure, noa ˈtu e ere mai ta ˈu i manaˈo na. I muri aˈe tau matahiti, ua faahiahia roa vau mea nafea Iehova i te pahonoraa i ta ˈu pure, te mauruuru nei au i teie nei e ua ite au i to ˈna here e to ˈna hamani maitai.”

15. No te aha e mea faufaa ia faatano i ta tatou aniraa i te tahi taime? (A hiˈo atoa i te hohoˈa.)

¹⁵ Te toru o te uiraa te tia ia uihia, ‘E tia anei ia ˈu ia faatano i ta ˈu aniraa?’ Noa ˈtu mea au roa ia ani ia Iehova i te hoê ohipa taa maitai, i te tahi taime, mea au aˈe ia hiˈo eaha ta Iehova e hinaaro mau ra no tatou. A rave na i te hiˈoraa o te tuahine faaea taa noa tei pure ia Iehova no te apiti i te Haapiiraa no te feia poro i te parau apî oaoa o te Basileia. Ua hinaaro o ˈna e tavini i te vahi e hinaaro-rahi-hia te feia poro. A pure noa ˈi o ˈna no tera haapiiraa, mea faufaa atoa ia ani o ˈna ia Iehova ia tauturu ia ˈna ia ite mai i te tahi atu ravea no te tavini atu â ia ˈna. (Ohi. 16:9, 10) Ei hiˈoraa, e nehenehe o ˈna e ani i te tiaau haaati ihea e hinaarohia ˈi te pionie, aore ra e papai i te amaa no te ani ihea e hinaaro-rahi-hia ˈi te feia poro.e

16. Eaha tei papu maitai ia tatou?

¹⁶ Mai ta tatou i haapii mai, ia papu ia tatou e e pahono Iehova i ta tatou pure ma te tano e te here. (Sal. 4:3; Isa. 30:​18) I te tahi taime, eita paha o ˈna e pahono ia tatou mai ta tatou i manaˈo na. Eita râ o ˈna e fariu ê i ta tatou mau pure. Mea here roa na ˈna ia tatou e eita roa oia e faarue ia tatou. (Sal. 9:10) E tamau anaˈe ïa i te “tiaturi ia ˈna i te mau taime atoa” ma te haamahora ˈtu i to tatou aau na roto i te pure.—Sal. 62:8.