Eita Iehova e vahavaha i te hoê mafatu e oto ra
“O ta te Atua tusia hinaaro ra, o te aau paruparu ra ïa; o te aau paruparu ra e te oto ra, e ore roa te Atua e vahavaha i te reira.”—SALAMO 51:17.
1. Eaha te manaˈo o Iehova i ta ˈna mau tavini o te rave i te hara ino mau, tera râ o te tatarahapa?
E NEHENEHE Iehova e ‘tapoˈi ia ˈna iho i te ata, ia ore te pure ia pǔpû atu i roto ra.’ (Oto a Ieremia 3:44) Teie râ, te hinaaro nei oia e ia haafatata ˈtu to ˈna nunaa ia ˈna. Noa ˈtu e e rave te hoê o ta ˈna feia haamori i te hoê hara ino tera râ e tatarahapa oia, e haamanaˈo to tatou Metua i te raˈi ra i te maitai i ravehia e taua taata ra. No reira te aposetolo Paulo i nehenehe ai e parau i to ˈna mau hoa kerisetiano e: “E ere te Atua i te Atua parau-tia ore, a haamoe ai oia i ta outou ohipa i rave, e to outou hinaaro i to ˈna ra iˈoa.”—Hebera 6:10.
2, 3. Eaha te tia i te mau matahiapo kerisetiano ia haapao ia farerei ratou i te feia o tei hara?
2 E tia atoa i te mau matahiapo kerisetiano ia haamanaˈo i te mau matahiti taviniraa haapao maitai i pûpûhia i te Atua e te feia tiaturi. Te vai ra i roto te taviniraa moˈa a te feia tatarahapa o tei hape to ratou taahiraa avae aore ra o tei rave i te hoê hara ino mau. Te imi nei te mau tiai mamoe kerisetiano i te maitairaa i te pae varua o te feia atoa no roto i te nǎnǎ a te Atua.—Galatia 6:1, 2.
3 Te titau nei te hoê taata hara tatarahapa i te aroha o Iehova. Teie râ, e hau atu â te titauhia. Te haapapuhia ra te reira i roto i te mau parau a Davida i roto i te Salamo 51:10-19.
E titauhia te hoê mafatu viivii ore
4. No te aha o Davida i pure ai no te hoê mafatu viivii ore e te hoê aau apî?
4 Mai te peu e tei roto te hoê kerisetiano pûpûhia i te hoê huru tupuraa ino i te pae varua no te mea e ua hara oia, eaha ta ˈna e titau ra taa ê atu i te aroha o Iehova e to ˈna faaoreraa mai i ta ˈna hara? Teie ta Davida i taparu: “E hamani mai oe i roto ia ˈu i te hoê mafatu viivii ore, e te Atua e, e a tuu mai i roto ia ˈu nei i te hoê aau apî, e te turori ore.” (Salamo 51:10, T.a.a.) E au ra e ua faatae o Davida i teie aniraa no te mea e ua taa ia ˈna e te vai noa râ te hinaaroraa e rave i te hara i roto i to ˈna mafatu. Peneiaˈe aita tatou i rave i te tahi hara mai tei faahema ia Davida i roto i te ohipa e o Bate-seba raua o Uria, teie râ, te titau nei tatou i te tauturu a Iehova no te ape i te topa i roto i te faahemaraa e pee i te hoê haerea hara ino mau. Hau atu, te titau nei tatou tataitahi i te tauturu a te Atua no te iriti mai roto mai i to tatou mafatu i te mau huru iino mai te nounou e te ririraa i te taata—e mau peu iino hoê â e te eiâ e te taparahi taata.—Kolosa 3:5, 6; Ioane 1, 3:15.
5. (a) Eaha te auraa ia noaa i te hoê mafatu viivii ore? (b) Eaha ta Davida i hinaaro ia ˈna i ani i te hoê aau apî?
5 Te titau nei Iehova e ia noaa i ta ˈna mau tavini te hoê ‘mafatu viivii ore,’ oia hoi te viivii ore o te hinaaro aore ra te manaˈo e turai ia tatou. I te taaraa ia ˈna e aita o ˈna i faaite i teie huru viivii ore, ua pure Davida e ia tamâ te Atua i to ˈna mafatu e ia tuea maite i te mau ture a te Atua. Ua hinaaro atoa te papai salamo i te hoê aau apî e te tia, oia hoi te aveia o to ˈna manaˈo. Ua titau oia i te hoê aau o te tauturu ia ˈna ia patoi i te faahemaraa e ia ati maite atu i te mau ture e te mau faaueraa tumu a Iehova.
Mea faufaa te varua moˈa
6. No te aha o Davida i ani ai e ia ore Iehova ia iriti i to ˈna varua moˈa mai nia mai ia ˈna ra?
6 Ia oto anaˈe tatou no ta tatou mau hape aore ra ta tatou hara, e riro tatou i te manaˈo e e tuu te Atua ia tatou i te hiti e e iriti mai oia i to ˈna varua moˈa, oia hoi to ˈna puai ohipa, mai nia mai ia tatou. Mai te reira hoi te huru o Davida, no reira oia i ani atu ai ia Iehova e: “Eiaha e faarue ia ˈu i mua i to aro nei, eiaha hoi e rave ê atu i to [varua moˈa] ia ˈu nei.” (Salamo 51:11) Ua manaˈo hoi te taata aau tatarahapa e te haehaa ra o Davida e no ta ˈna mau hara, eita e tia faahou ia ˈna ia tavini ia Iehova. Ia faaruehia oia i mua i te aro o te Atua oia ïa te auraa e erehia o ˈna i to ˈna farii maitai, to ˈna tamahanahanaraa, e ta ˈna haamaitairaa. Ia ora faahou mai o Davida i te pae varua, te titau ra o Davida i te varua moˈa o Iehova. Ia vai teie varua i nia ia ˈna, e nehenehe te arii e imi i te aratairaa a te Atua ma te pure ia mauruuru o Iehova, e ape i te hara, e e faatere ma te paari. Ma te ite i ta ˈna mau hara i Tei horoa i te varua moˈa, ua tano roa o Davida i te aniraa ia ore Iehova ia rave ê atu i to ˈna varua moˈa ia ˈna ra.
7. No te aha tatou e pure ai no te varua moˈa e ia ara ia ore tatou ia faahapa i teie varua?
7 E o tatou nei? E tia ia tatou ia pure no te varua moˈa e ia ara ia ore tatou ia faaino ia ˈna na roto i te oreraa e pee i ta ˈna aratairaa. (Luka 11:13; Ephesia 4:30) Ahiri aita, e nehenehe tatou e erehia i te varua e eita tatou e nehenehe e faaite i to ˈna mau hotu no ǒ mai i te Atua ra oia hoi te here, te oaoa, te hau, te faaoromai, te hamani maitai, te maitai, te faaroo, te mǎrû, e te hitahita ore. E rave ê atu te Atua ra o Iehova i to ˈna varua moˈa ia tatou nei mai te peu e e tamau noa tatou i te hara ia ˈna ma te ore e tatarahapa.
Te oaoaraa i te faaoraraa
8. Mai te peu e e hara tatou teie râ te hinaaro nei tatou e fanaˈo i te oaoa o te faaoraraa, eaha te tia ia tatou ia rave?
8 E nehenehe te hoê taata rave hara tei tatarahapa o te fanaˈo i te faahoˈiraahia mai oia i te pae varua, e oaoa faahou i te ravea faaoraraa a Iehova. I to ˈna titauraa i te reira, ua ani atura Davida i te Atua e: “E faahoˈi mai oe i te oaoa i te [faaoraraa] na oe ra; e ia tauturuhia mai au e te aau [tae] ra.” (Salamo 51:12) Auê te faahiahia e ia oaoa i te tiaturiraa papu o te faaoraraa no ǒ mai i te Atua ra o Iehova! (Salamo 3:8) I muri aˈe i to ˈna hararaa i te Atua, ua imi Davida e ia faahoˈihia mai te oaoa o te faaoraraa na roto Ia ˈna. I muri iho, ua horoa mai Iehova i te faaoraraa na roto i te tusia o te hoo a ta ˈna Tamaiti, o Iesu Mesia. Mai te peu e e rave tatou, tatou te mau tavini pûpûhia a te Atua, i te hara ino mau teie râ e hinaaro tatou e ia faahoˈihia mai te oaoa o te faaoraraa, e tia ia tatou ia faaite i te hoê haerea tatarahapa e ia ore e tamau noa i te rave i teie hara e tae roa ˈtu i te faito e hara ˈi i te varua moˈa.—Mataio 12:31, 32; Hebera 6:4-6.
9. Eaha ta Davida e titau ra ia ˈna i ani atu i te Atua ia turu ia ˈna “ma te aau [tae] ra”?
9 Ua ani o Davida e ia turu o Iehova ia ˈna “ma te aau [tae] ra.” E au ra e e tano te reira, eiaha i te ineineraa o Iehova ia tauturu mai, eiaha atoa i to ˈna varua moˈa, teie râ i te manaˈo e turai ia Davida. Ua hinaaro o Davida e ia turu mai te Atua ia ˈna na roto i te horoaraa mai i te hoê aau tae no te rave i te mea tia e ia ore e topa faahou i roto i te hara. Te turu maite nei te Atua ra o Iehova i ta ˈna mau tavini e te faaitoito nei oia i te feia i faateimahahia e te mau tamataraa e rave rahi. (Salamo 145:14) Mea tamahanahana mau â ia ite i te reira, mai te peu iho â râ e ua hara tatou teie râ te tatarahapa nei tatou e te hinaaro nei tatou e tavini â ia Iehova ma te haapao maitai!
E haapii i te feia rave hara i te aha?
10, 11. (a) Eaha ta Davida e nehenehe e haapii i te feia rave hara Iseraela? (b) E nehenehe o Davida e haapii atu i te feia rave hara mai te peu noa e ua rave oia iho i te aha?
10 Mai te peu e e farii te Atua, ua hinaaro o Davida ma te aau haavare ore e rave i te hoê mea o te faaite i to ˈna mauruuru no te aroha o Iehova e o te tauturu atu ia vetahi ê. Ma te aau rotahi i te pure tei faataehia ia Iehova, te faaite ra te arii tatarahapa i muri iho e: “E i reira vau e haapii ai i te feia rave hara i ta oe parau, e e faafariuhia mai te rave parau ino ra ia oe.” (Salamo 51:13) Nafea te taata rave hara ra o Davida e nehenehe ai e haapii atu i te feia tei ofati i te Ture a te Atua? Eaha ta ˈna e parau atu ia ratou? E eaha te maitai e noaa mai?
11 Ia faaite atu o Davida i te feia rave hara ati Iseraela i te mau haerea o Iehova ia faarue ratou i te eˈa ino, e nehenehe o Davida e haapapu i te ino o te hara, eaha te auraa o te tatarahaparaa, e mea nafea ia fanaˈo i te aroha o te Atua. I te mea e ua ite oia i te mauiui o te ereraa i te farii maitai o Iehova e o te hoê haava manaˈo faahapa, e riro mau â o Davida ei taata haapii aroha i te feia hara tatarahapa o te oto ra to ratou mafatu. Parau mau, e nehenehe oia e faaohipa i to ˈna iho hiˈoraa no te haapii ia vetahi ê, i muri aˈe i to ˈna iho fariiraa i te mau faaueraa a Iehova e i To ˈna faaoreraa mai i ta ˈna hara, inaha, aita e tiaraa to te feia patoi i te auraro i te mau titauraa a Iehova ia ‘faahiti i ta te Atua ra parau faaau.’—Salamo 50:16, 17.
12. Mea nafea to Davida faufaaraahia i te iteraa e ua faatiamâ te Atua ia ˈna i te hara toto?
12 Ma te faaite â i to ˈna mau hinaaro na roto i te tahi atu mau parau, te na ô ra o Davida e: “Ia ora vau ia oe i te hara toto ra, e te Atua e, te Atua e ora ˈi au nei; e na tau vaha e himene pii hua i to oe ra [parau-tia].” (Salamo 51:14) E hopoi mai te hara toto i te utua pohe. (Genese 9:5, 6) No reira, ia ite oia e ua faatiamâ te Atua o to ˈna faaoraraa ia ˈna i ta ˈna hara toto i nia ia Uria, e noaa mai ïa ia Davida te hau o te mafatu e o te feruriraa. E nehenehe to ˈna arero e himene ma te oaoa no nia i te parau-tia o te Atua, eiaha râ to ˈna iho. (Koheleta 7:20; Roma 3:10) Eita o Davida e nehenehe e tumâ i to ˈna haerea faaturi aore ra e faatia faahou mai ia Uria mai te pohe mai, e eita atoa ta te hoê taata i teie mahana e nehenehe e faahoˈi mai i te tura i te pae taatiraa o te hoê vahine o ta ˈna i rave aore ra e faatia faahou mai i te hoê taata o ta ˈna i taparahi. Eita anei e tia ia tatou ia feruri i te reira ia faahema-anaˈe-hia tatou? E e tia mau â ia tatou ia mauruuru no te aroha ta Iehova i faaite mai ma te parau-tia! Inaha, e tia i te mauruuru ia turai ia tatou ia aratai ia vetahi ê i teie Pu o te parau-tia e o te faaoreraa hapa.
13. I roto anaˈe i teihea mau tupuraa e nehenehe ai te hoê taata rave hara e hamama i to ˈna vaha no te arue ia Iehova?
13 Aita e taata rave hara o te nehenehe e hamama i to ˈna vaha ma te au no te arue ia Iehova mai te peu e e ere na te Atua e iriti i to ˈna vaha ma te aroha no te faaite i Ta ˈna mau parau mau. No reira ïa o Davida i himene ai e: “E vevete na oe, e Iehova, i tau vaha, e na tau vaha e arue ia oe.” (Salamo 51:15) Maoti te tamǎrûraahia to ˈna haava manaˈo i to te Atua faaoreraa i ta ˈna hara, e turaihia o Davida ia haapii atu i te feia rave hara i te mau haerea o Iehova, e e nehenehe oia e faahanahana Ia ˈna ma te tapeapea ore. Te feia atoa o tei faaorehia ta ratou hara mai ia Davida ra, e tia ia ratou ia mauruuru no te hamani maitai faito ore ta Iehova i faaite ia ratou, e e tia ia ratou ia faaohipa i te mau ravea atoa no te faaite i te parau mau a te Atua e ia ‘faaite hua i to ˈna hanahana.’—Salamo 43:3.
Te mau tusia fariihia e te Atua
14. (a) Eaha te mau tusia o tei titauhia ia au i te faufaa o te Ture? (b) No te aha e mea hape roa ia manaˈo e e nehenehe tatou e rave noa i te hara e e tiamâ mai na roto i te raveraa i te tahi mau ohipa maitatai?
14 Ua noaa mai ia Davida te maramarama hohonu o tei turai ia ˈna ia parau e: “E ere hoi i te tusia ta oe i hinaaro [e Iehova], ahiri o te reira, ua horoahia ïa e au, aore hoi oe e au i te tusia taauahi.” (Salamo 51:16) E titau na te faufaa a te Ture e ia pûpûhia te mau tusia animala i te Atua. Teie râ, eita te mau hara faaturi e te taparahi taata a Davida, e faautuahia hoi e te pohe, e nehenehe e faaorehia na roto i teie mau tusia. Ahiri oia, eita ïa o ˈna e tarani i te horoa i ta ˈna mau faufaa no te pûpû i te tusia animala na Iehova. Mai te peu e aita e tatarahapa haavare ore, aita ïa e faufaa to te mau tusia. Mea hape roa ïa ia manaˈo e e nehenehe tatou e tamau noa i te rave i te hara e e paruru ia tatou na roto i te raveraa i te tahi mau ohipa maitatai.
15. Eaha te haerea o te hoê taata pûpûhia te oto ra to ˈna mafatu?
15 Te na ô râ o Davida e: “O ta te Atua tusia hinaaro ra, o te aau paruparu ra ïa; o te aau paruparu ra e te oto ra, e ore roa te Atua e vahavaha i te reira.” (Salamo 51:17) I roto i te hiˈoraa o te hoê taata rave hara o te tatarahapa, “o ta te Atua tusia hinaaro ra, o te aau paruparu ra ïa.” Eita teie huru taata e faaite i te hoê haerea patoitoi. E hepohepo te mafatu o te hoê taata pûpûhia e aau oto to ˈna, i ta ˈna hara, e faahaehaa oia ia ˈna iho no te mea e te taa ra ia ˈna te mauruuru ore o te Atua, e te hinaaro nei oia e rave i te mau mea atoa ia noaa faahou mai te farii maitai o te Atua. Aita e faufaa te mea o ta tatou e pûpû atu i te Atua mai te peu e eita tatou e tatarahapa i ta tatou mau hara e e horoa ˈtu i to tatou mafatu no ˈna ma te haamori ia ˈna anaˈe.—Nahuma 1:2.
16. Nafea te Atua ia hiˈo i te hoê taata o tei paruparu te mafatu no te hara o ta ˈna i rave?
16 Eita te Atua e patoi i te hoê tusia mai te hoê mafatu paruparu e oto ra. Noa ˈtu te fifi ta tatou e farerei ei nunaa no ˈna, eiaha tatou ia topa i roto i te hepohepo. Ahiri e ua turori tatou i nia i te eˈa o te ora e tiaoro ai to tatou mafatu i te aroha o te Atua, eiaha e manaˈo e aita e ravea faahou. Mai te peu e ua hara ino mau tatou tera râ e tatarahapa tatou, eita te Atua e haavahavaha i to tatou mafatu e oto ra. E faaore mai oia i ta tatou hara na roto i te tusia o te hoo a te Mesia e e farii faahou mai Oia ia tatou. (Isaia 57:15; Hebera 4:16; Ioane 1, 2:1) Teie râ, mai ia Davida, e tia ia tatou ia ani i roto i ta tatou mau pure e ia fanaˈo faahou tatou i te farii maitai o te Atua e ia ore tatou e ape i te aˈo aore ra te utua e titauhia ra. Ua faaore te Atua i te hara a Davida, ua faautua atoa râ oia ia ˈna.—Samuela 2, 12:11-14.
Te tapitapiraa no te haamoriraa viivii ore
17. Taa ê atu i te aniraa e ia faaore mai te Atua i ta ratou hara, eaha te tia i te feia rave hara ia rave?
17 Mea papu maitai e mai te peu e ua rave tatou i te hoê hara ino mau, e riro te reira i te faateimaha rahi i to tatou feruriraa, e e turai to tatou mafatu tatarahapa ia taparu i te Atua ia faaore mai i ta tatou hara. Hau atu râ, e tia atoa ia tatou ia pure no vetahi ê. Noa ˈtu e ua titau â o Davida e pûpû i te haamoriraa fariihia i te Atua ra, aita ta ˈna salamo i tuu ia vetahi ê i te hiti ma te manaˈo miimii. Teie hoi ta ˈna i ani atu ia Iehova: “Ei hamani maitai to oe ia Ziona; e patu hoi oe i te aua i Ierusalema nei.”—Salamo 51:18.
18. No te aha te taata tatarahapa ra o Davida i pure ai no Ziona?
18 Oia mau, ua titau o Davida e ia farii-faahou-hia mai oia e te Atua. Teie râ, ua titau atoa te papai salamo i roto i ta ˈna pure e ‘ia hamani maitai te Atua ia Ziona,’ te oire pu o Iseraela, oia hoi o Ierusalema, i reira to Davida hinaaroraa e faatia i te hiero o te Atua. Ua haamǎtaˈu te mau hara iino mau a Davida i te nunaa taatoa, no te mea e nehenehe te nunaa taatoa e roohia i te ati na roto i te haerea ino o te arii. (A faaau e te Samuela 2, pene 24.) Inaha, ua haaparuparu ta ˈna mau hara i “te aua i Ierusalema nei,” e no reira e tia ˈtura i teie nei ia patu-faahou-hia.
19. Mai te peu e ua hara tatou teie râ ua faaorehia ta tatou hara, e tano e ia pure tatou no te aha?
19 Mai te peu e ua hara ino mau tatou teie râ ua faaorehia mai ta tatou hara e te Atua, e tano roa ia pure e ia tataˈi mai oia i te ino ta to tatou haerea i faatupu. Peneiaˈe ua tuu tatou i te faainoraa i nia i to ˈna iˈoa moˈa, ua haaparuparu tatou i te amuiraa, e ua riro paha tatou i te haamauiui i to tatou utuafare. E nehenehe to tatou Metua here i te raˈi e faaore i te faainoraa i roohia i nia i to ˈna iˈoa, e nehenehe oia e faatia faahou i te amuiraa na roto i te arai o to ˈna varua moˈa, e e nehenehe oia e tamǎrû i te mafatu o te feia herehia e tatou o te here nei e o te tavini nei ia ˈna. Mea papu e noa ˈtu e ua hara tatou aore ra aita, e tia i te faaraaraa i te iˈoa o Iehova e te maitairaa o to ˈna nunaa ia riro ei tapitapiraa tamau no tatou.—Mataio 6:9.
20. I roto i teihea mau huru tupuraa e mauruuru ai Iehova i te mau tusia e te mau pûpûraa a Iseraela?
20 Ia patu faahou Iehova i te aua o Ziona, eaha ïa te ohipa e tupu? Ua himene o Davida e: “Ei reira oe e mauruuru ai i te tusia parau-tia e te tusia taauahi taatoa mau ra: ei reira te puaatoro e hopoihia ˈi i nia i ta oe ra fata.” (Salamo 51:19) Ua hinaaro mau â Davida e ia fanaˈo oia e te nunaa atoa i te farii maitai o Iehova ia nehenehe ratou e haamori Ia ˈna ma te tia. E mauruuru ïa te Atua i ta ratou mau tusia taauahi e ta ratou mau pûpûraa taatoa. E te reira no te mea e tusia parau-tia teie e hopoihia e te feia pûpûhia, te aau mehara, e te tatarahapa o te fanaˈo ra i te farii maitai o te Atua. No to ratou mauruuru no te aroha o Iehova, e hopoi atu ratou i nia i ta ˈna ra fata i te mau puaatoro—te mau tusia maitatai aˈe e te moni roa ˈˈe. I teie mahana, te faahanahana nei tatou ia Iehova na roto i te afairaa ˈtu na ˈna te tuhaa maitai aˈe o te mau mea e vai ra ia tatou nei. E i roto i ta tatou mau pûpûraa te vai ra ‘te mau puaatoro apî o to tatou nei vaha,’ te mau tusia haamaitairaa i to tatou Atua aroha ra o Iehova.—Hosea 14:2; Hebera 13:15.
Te faaroo maira Iehova i ta tatou mau auê
21, 22. Eaha te mau haapiiraa maitatai roa no tatou i roto i te Salamo 51?
21 Te faaite maira te pure mehara a Davida i roto i te Salamo 51 e e tia ia tatou ia ohipa ma te aau tatarahapa mau i mua i ta tatou hara. Te vai atoa ra i roto i teie salamo te mau haapiiraa faufaa roa no tatou nei. Ei hiˈoraa, ia hara tatou tera râ ia tatarahapa tatou, e nehenehe tatou e tiaturi i te aroha o te Atua. Teie râ, e tia ia tatou ia tapitapi na mua no te faainoraa o ta tatou i tuu i nia i te iˈoa o Iehova. (Irava 1-4) Mai ia Davida, e nehenehe tatou e tiaoro i to tatou Metua i te raˈi ia aroha mai oia ia tatou no to tatou tiaraa taata hara. (Irava 5) E tia ia tatou ia faaite i te aau haavare ore, e e tia ia tatou ia imi i te paari no ǒ mai i te Atua ra. (Irava 6) Mai te peu e ua hara tatou, e tia ia tatou ia taparu ia Iehova ia horoa mai oia i te hoê mafatu mâ, te viivii ore, e te hoê aau turori ore.—Irava 7-10.
22 Ia au i teie Salamo 51, te taa atoa ra ia tatou e eiaha roa e haapaari ia tatou i roto i te hara. Ia na reira anaˈe tatou, e iriti mai Iehova i to ˈna varua moˈa, oia hoi to ˈna puai ohipa, mai nia mai ia tatou. Ia vai râ te varua o te Atua i nia ia tatou, e nehenehe tatou e manuïa i te haapii atu i ta ˈna ra mau eˈa ia vetahi ê. (Irava 11-13) Mai te peu e e hara tatou tera râ e tatarahapa tatou, e farii Iehova e ia tamau noa tatou i te arue ia ˈna no te mea e ore roa oia e haavahavaha i te mafatu paruparu e oto ra. (Irava 14-17) Te faaite atoa ra teie salamo e eiaha tatou ia haapao noa ia tatou i roto i ta tatou mau pure. Maoti râ, e tia ia tatou ia pure no te haamaitairaa e te parururaa i te pae varua o te feia atoa e rave ra i te haamoriraa viivii ore a Iehova.—Irava 18, 19.
23. No te aha te Salamo 51 e turai ai ia tatou ia faaitoito e ia faatupu i te manaˈo tae?
23 E tia i teie salamo putapû mau a Davida ia turai ia tatou ia faaitoito e ia faatupu i te manaˈo tae. Te tauturu maira oia ia tatou ia ite e eiaha tatou e manaˈo e aita e ravea faahou mai te peu e e topa tatou i roto i te hara. No te aha? No te mea e ia tatarahapa tatou, e nehenehe te aroha o Iehova e faaora ia tatou i te oto. Mai te peu e e tatarahapa tatou e e pûpû tatou ia tatou taatoa no to tatou Metua here ra i te raˈi, e faaroo mai oia i ta tatou pii i to ˈna aroha. E auê ïa tamahanahanaraa e ia ite e eita Iehova e vahavaha i te mafatu e oto ra!
Nafea outou ia pahono mai?
◻ No te aha te mau kerisetiano e titau ai i te hoê mafatu viivii ore e te varua moˈa o te Atua?
◻ Eaha ta te hoê taata tatarahapa e nehenehe e haapii atu i te feia tei ofati i te ture a Iehova?
◻ Nafea Iehova ia faariro i te hoê mafatu tatarahapa e oto ra?
◻ Eaha te mau haapiiraa e vai ra i roto i te Salamo 51?
[Hohoˈa i te api 15]
Te pure ra anei outou no te ani i te varua moˈa e te ara ra anei outou ia ore e faahapa i teie varua?
[Hohoˈa i te api 17]
A faaite i te mauruuru no te hamani maitai faito ore o Iehova na roto i te faaiteraa i ta ˈna parau mau